༄༅།།དུས་རབས་གསར་བར་བསྐྱོད་པ། པདྨ་དབང་རྒྱལ།

དུས་རབས་གསར་བའི་ཅོང་སྒྲ་གྲགས་པ་དང་བསྟུན་ནས་ང་ཚོས་དུས་རབས་ཉེར་གཅིག་སྟེ་དར་རྒྱས་ཕུན་སུམ་ཚོགས་པའི་དུས་རབས་གསར་བ་ཞིག་ངང་གིས་བསུ་དགོས་པ་རེད།དུས་རབས་ཉེར་གཅིག་པ་ནི་ས་གཞི་ཆེན་པོར་ཐེངས་དང་པོར་གནམ་ས་བླ་འོག་བརྗེ་པའི་ཉི་མ་ཤར་བ་དང་འདྲ་བར།ང་ཚོས་ཀྱང་རང་ཉིད་ཀྱིས་ནུས་པར་བརྟེན་ནས་འབད་པ་ཆེན་པོས་རྒྱང་བསྐྱོད་བྱས་ཏེ་གསར་གཏོད་ཀྱི་བཞུད་ལམ་གསར་བ་ཞིག་ཆགས་པར་བྱེད་དགོས་ལ་མིའི་རིགས་ཀྱི་འདས་མ་ད་གསུམ་ལ་སྔ་ན་མེད་པའི་ཤེས་རིག་གིས་བཅོས་བསྒྱུར་ཆེན་པོ་བྱེད་པའི་སྟ་གོན་གང་ལེགས་བྱེད་དགོས་པའི་དུས་རབས་ཤིག་ཡིན་སྲིད་པ་རེད།
ལོ་ཆིག་སྟོང་ལྷག་ཙམ་གྱི་རིང་ལ་མིའི་རིགས་ཀྱི་ལོ་རྒྱུས་ལ་འགྱུར་ལྡོག་ཆེན་པོ་བྱུང་བ་དང་མིའི་རིགས་ཀྱི་སྤྱི་ཚོགས་དེ་བཀས་བཀོད་རྒྱུད་འཛིན་གྱི་སྤྱི་ཚོགས་ནས་མ་རྩ་རིང་ལུགས་ཀྱི་སྤྱི་ཚོགས་སུ་སླེབས་པ་མ་ཟད།རྒྱལ་ཁབ་ཁ་ཤས་སུ་སྤྱི་ཚོགས་རིང་ལུགས་ཀྱི་ལམ་ལུགས་གསར་བ་བཙུགས་པ་རེད།ད་ལྟ་ང་ཚོའི་མེས་རྒྱལ་སྔར་བས་སྟོབས་ཇེ་ཆེར་འགྲོ་བཞིན་ཡོད་པ་དང་།མི་རྣམས་ཀྱི་འཚོ་བའི་ཆུ་ཚད་ཀྱང་སྔར་བས་མཐོ་རུ་འགྲོ་བཞིན་ཡོད།རྒྱལ་ཁབ་ཀྱི་སྟོབས་ཤུགས་དངོས་སུ་ཇེ་ཆེར་སོང་བ་དང་བསྟུན་ནས་རང་རྒྱལ་གྱི་རྒྱལ་སྤྱིའི་ཐོག་གི་གོ་གནས་ཀྱང་ཇེ་མཐོར་འགྲོ་བཞིན་ཡོད།ལོ་བཅུ་ཕྲག་གི་རིང་ལ་ཀྲུང་གོ་གནམ་ས་བླ་འོག་བསྒྱུར་བ་ལྟ་བུའི་འགྱུར་ལྡོག་ཆེན་པོ་བྱུང་བས།ཕྱི་རྒྱལ་བ་ཚོས་ང་ཚོ་ཀྲུང་གོར་མཐེ་བོང་བསྒྲེངས་ནས་ལྟ་སྟངས་གསར་བ་མི་འཛིན་ཐབས་ཀ་མེད་རེད།དེ་ནི་ང་ཚོའི་ཡུན་རིང་ལ་འབད་པ་ཆེན་པོ་བྱས་པའི་འབྲས་བུ་ཞིག་ཀྱང་ཡིན་སྲིད་པ་རེད།
རྒྱལ་ཁབ་ཉེན་ཁར་ཐུག་པའི་སྐབས་སུ་བཙུགས་པའི་ཀྲུང་གོ་གུང་ཁྲན་ཏང་གིས་རྒྱལ་ཡོངས་མི་དམངས་ལ་མཐུན་སྒྲིལ་བྱས་ཏེ་མཐར་བཀས་བཀོད་རྒྱུད་འཛིན་ལམ་ལུགས་དང་བཙན་རྒྱལ་རིང་ལུགས་རི་བོ་ཆེན་པོ་གཉིས་ཀྱི་མགོ་རྟིང་སློག་ནས་ཀྲུང་གོ་གསར་བ་བཙུགས།གུང་ཁྲན་ཏང་གིས་མགོ་ཁྲིད་འོག་མི་དམངས་ཀྱིས་སྤྲོ་སེམས་རབ་ཏུ་འཁོལ་བའི་ངང་ནས་ཀྲུང་གོ་གསར་བའི་འཛུགས་སྐྲུན་ཁྲོད་དུ་ཞུགས་པ་དང་།རིག་གནས་པ་དང་བཟོ་སྐྲུན་པ་སོགས་མི་སྣ་དཔེ་བཟང་ཅན་མང་དུ་བྱུང་བ་དང་། འཁོར་སྐར་དང་མེ་ཤུགས་འཕུར་མདའ། གློག་རྡུལ་ཕྲ་རབ། སྐྱེ་དངོས་སོགས་ཚན་རིག་ཀྱི་ཁྱབ་ཁོངས་མང་པོའི་ཁྲོད་འཛམ་གླིང་གི་སྔོན་ཐོན་ཆུ་ཚད་དུ་སླེབས་ཡོད།
ང་ཚོའི་མི་རབས་འདིའི་བྱིས་པ་དག་དབུལ་ཕོངས་ཀྱི་སོམ་ཉིའི་དྲ་བར་ཚུད་པ་མེད་པར་འདི་འདྲའི་མཚར་སྡུག་ལྡན་པའི་འཚོ་བ་ཞིག་རོལ་བཞིན་ཡོད་ལ།ཕ་མའི་གཅེས་སྐྱོང་དང་། དགེ་རྒན་དང་སློབ་གྲོགས་ཀྱི་རོགས་རམ་དང་སེམས་ཁུར་བཅས་ཐོབ་བཞིན་ཡོད་ལ།འདི་དག་ཚང་མ་ཀྲུང་གོ་གུང་ཁྲན་ཏང་གི་བཀའ་དྲིན་ལས་བྱུང་བ་ཡིན་པས་ང་ཚོས་དུས་ནམ་ཡང་ཀྲུང་གོ་གུང་ཁྲན་ཏང་གི་བཀའ་དྲིན་རྗེས་སུ་དྲན་དགོས་ལ་ཁྱད་པར་རང་གི་མི་རིགས་དང་མེས་རྒྱལ་ལ་སྔ་ན་མེད་པའི་བདེ་སྐྱིད་ཆེན་པོ་ཞིག་སྐྲུན་པར་བྱེད་དགོས་པ་རེད།སྤྱི་ཚོགས་མདུན་དུ་སྐྱོད་བཞིན་ཡོད་པ་དང་། དུས་རབས་ཀྱང་རྒྱུན་ཆད་མེད་པར་ཡར་ཐོན་དུ་འགྲོ་བཞིན་ཡོད། སློབ་འབྲིང་སློབ་མའི་ངོས་ནས་བཤད་ན་ང་ཚོ་ཡང་དུས་རབས་དང་བསྟུན་ནས་མདུན་དུ་བསྐྱོད་དགོས་པ་དང་། གསར་གཏོད་བྱེད་ཕོད་པ་དང་ལག་ལེན་བྱེད་ཕོད་པ་ཞིག་བྱེད་དགོས་པ་དང་། སྤྱི་ཚོགས་ལ་ཞབས་འདེགས་ཞུ་ནུས་པ་ཞིག་ནི་དེ་བས་ཀྱང་བྱེད་དགོས་པ་རེད།