༄༅།། དུས་རབས་གསར་བར་བསྐྱོད་པ། མགོན་པོ་རྡོ་རྗེ། 

དུས་རབས་གསར་བའི་ཅོང་སྒྲ་གྲགས་པ་དང་བསྟུན་ནས་ལོ་བརྒྱ་བསྐྱར་དུ་འཁོར་བ་དེ་འདས་ནས་དུས་རབས་ཉེར་གཅིག་པ་སྟེ་གསར་དར་ཀྱི་དུས་རབས་གསར་བ་ཞིག་ལ་སླེབས་འདུག དུས་རབས་དེ་ནི་གསེར་མདོག་གི་ཉི་གཞོན་དང་འདྲ་བར་ཡངས་པའི་ས་གཞི་ལ་དྲོད་ཁོལ་འཇམ་པོ་ཞིག་ཁྱེར་ནས་ཡོང་ལ་འཇིག་རྟེན་ཁམས་ཀྱི་སྐྱེ་འགྲོ་ཡོངས་ལ་ཡང་རེ་བ་གསར་བ་ཞིག་ཀྱང་ཁྱེར་ནས་ཡོང་། 
དུས་རབས་ཉེར་གཅིག་པ་ནི་གནམ་ས་འགུལ་བའི་དུས་རབས་ཤིག་ཡིན། དེའི་རྒྱུ་མཚན་ནི་ཚན་རིག་གི་ལག་རྩལ་དར་རྒྱས་ཆེ་བའི་དུས་རབས་ཤིག་ཡིན་ལ། བྱ་བ་གང་ཞིག་སྒྲུབ་ཀྱང་ཀླད་ཤུགས་ལ་བརྟེན་ནས་སྒྲུབ་དགོས་པའི་དུས་རབས་ཤིག་ཡིན། ད་དུང་དུས་རབས་དེ་ནི་བརྡ་འཕྲིན་གྱི་དུས་རབས་ཤིག་ཀྱང་ཡིན། བརྡ་འཕྲིན་དར་བ་དང་བསྟུན་ནས་མིའི་རིགས་ཀྱི་འབྲེལ་འདྲིས་བྱེད་སྟངས་ལ་ཡང་སྟབས་བདེ་གང་ལེགས་བསྐྲུན་ཡོད། དུས་རབས་གསར་བ་དེ་ནི་མི་དམངས་ལས་ལ་བརྩོན་པར་བརྟེན་ནས་བྱུང་བའི་རེ་བ་ཞིག་ཡིན་ལ། རི་འགོག་དམག་འཁྲུག་ལ་རྒྱལ་ཁ་ཐོབ་པ་ནས་ད་ལྟའི་བར་ཞི་བདེའི་སྐལ་བ་ལྡན་པར་གྱུར་བ་ནི་འབད་བརྩོན་དང་ཁ་བྲལ་ཐབས་མེད་པ་ཡིན་པས། མི་རེ་རེའི་འབད་བརྩོན་ལ་བརྟེན་ནས་དུས་རབས་འདི་སྐས་རིམ་གསར་བ་ཞིག་དུ་སླེབས་པ་དང་། ཕུགས་འདུན་ཡོད་ཚད་མངོན་འགྱུར་བྱུང་ནས་དུས་རབས་གསར་བ་ཞིག་ཤར་བ་ཡིན། ང་ཚོ་ཡང་ཉིན་རེ་བཞིན་འཚར་ལོངས་བྱུང་བཞིན་ཡོད་ལ། དུས་རབས་གསར་བ་དེ་ནི་ང་ཚོའི་ཆེས་ལེགས་པའི་འཚར་ལོངས་ཀྱི་སྐྱེད་ཚལ་ཡིན། དུས་རབས་གསར་བ་འདིའི་ནང་དུ། ན་གཞོན་ཞིག་ཡིན་པས་ང་ཚོས་རང་གི་མེས་རྒྱལ་ལ་དགའ་ཞེན་དང་སྤྱི་ཚོགས་རིང་ལུགས་ཀྱི་རིན་ཐང་ལྟ་བ་སྐྱེད་སྲིང་དང་ཧུར་ཐག་གིས་ལག་ལེན་བྱེད་དགོས་ལ། ཚུལ་ལྡན་གྱི་ཀུན་སྤྱོད་བཟང་བོ་ཆགས་པར་བྱས་ཏེ་ཀུན་སྤྱོད་བཟང་བ་དང་། ཤེས་ཡོན་ལྡན་པ། འགན་འཁྲི་ཡོད་པ་བཅས་ཀྱི་ན་གཞོན་བཟང་བོ་ཞིག་བྱེད་དགོས། ད་ལྟ་ང་ཚོ་ནི་སྡོང་རྐང་གཅིག་གི་སྡོང་ཕྲུག་ཡིན་པས། ངེས་པར་དུ་གོམས་གཤིས་བཟང་བོ་ཞིག་ཆགས་རྒྱུར་དམ་འཛིན་བཟང་བོ་བྱས་ནས་འཚོ་བཅུད་ཕུན་སུམ་ཚོགས་པོ་བསྡུ་ལེན་བྱས་ཚེ་ད་གཟོད་གཞི་ནས་གཏན་འཇགས་ཡིན་པའི་ཤིང་སྡོང་ཆེན་པོ་ཞིག་ཏུ་འགྱུར་ཐུབ། ང་ཚོ་ནི་མེས་རྒྱལ་གྱི་རེ་བ་གསར་བ་ཡིན་པ་དང་། ང་ཚོས་འགན་འཁྲི་ཆེན་པོ་ཕྲག་ཏུ་ཁུར་ནས་ཞུམ་པ་མེད་པར་མདུན་དུ་བསྐྱོད་ན། ད་གཟོད་ང་ཚོའི་མེས་རྒྱལ་ནི་སྔར་ལས་ཕུན་སུམ་ཚོགས་ཤིང་སྟོབས་འབྱོར་མངའ་ཐང་ལྡན་པས་རྒྱལ་ཁབ་ཆེན་པོ་ཞིག་ཏུ་འགྱུར་ངེས། ང་ཚོ་སློབ་འབྲིང་སློབ་མ་ཞིག་ལ་མཚོན་ན། དུས་རབས་གསར་བའི་ནང་རྣམ་པ་གསར་བ་ཞིག་ལྡན་དགོས། ང་ཚོས་གསར་གཏོད་བྱེད་ཕོད་པ། ལག་ལེན་འགོད་པར་དགའ་བ། མི་དམངས་ལ་ཞབས་འདེགས་ཞུ་བར་དགའ་བ་སོགས་བྱེད་པའི་སྙིང་སྟོབས་ལྡན་དགོས།  
བྱམས་བརྩེ་ལྡན་པའི་དུས་རབས་གསར་བ་འདིའི་ནང་དུ་ང་ཚོ་ནི་རེ་བ་དང་སྤྲོ་སེམས་ཀྱིས་ཁེངས་པ་ཞིག་བྱེད་དགོས་ལ། དུས་རབས་གསར་བ་འདི་དང་བསྟུན་ནས་རང་ཉིད་ལ་དགའ་བ་དང་རང་ཉིད་ལ་ཡིད་ཆེས་ཡོད་པ་བྱེད་དགོས་པར་མ་ཟད། རང་རེའི་རླབས་ཆེ་བའི་མེས་རྒྱལ་ལ་དགའ་བ་དང་དད་གུས་བྱེད་པའི་ན་གཞོན་ཕུལ་དུ་བྱུང་བ་ཞིག་བྱེད་དགོས།