༄༅།། དུས་རབས་གསར་བར་བསྐྱོད་པ། ཀུན་བཟང་སྐྱིད།

དགུང་སྔོན་དབྱིངས་སུ་འཕུར་བཞིན་པའི་ལྕགས་བྱ་དང་དོག་མོ་ས་ནས་བསྐྱོད་ཀྱིན་པའི་འགྲིམ་འགྲུལ་ཡོ་ཆས་སྣ་ཚོགས། ཐ་ན་ང་ཚོའི་འཚོ་བའི་ནང་དུ་སྤྱོད་པའི་རྒྱུན་མཁོའི་དངོས་ཆས་སོགས་ཚང་མས་ཚན་རིག་ལག་རྩལ་འཕེལ་རྒྱས་སུ་སོང་ནས་ང་ཚོ་མི་འགྱངས་པར་དུས་རབས་གསར་བ་ཞིག་ཏུ་སླེབས་པར་ར་སྤྲོད་བྱེད་བཞིན་ཡོད་པ་རེད། 
མིའི་རིགས་བྱུང་བ་ནས་བཟུང་། ཚན་རིག་ལག་རྩལ་ཉིན་རེ་བཞིན་ཇེ་རྒྱས་ཇེ་ལེགས་སུ་འགྲོ་བཞིན་མཆིས། དེས་ད་ལྟའི་སྤྱི་ཚོགས་ལ་དགེ་མཚན་མང་པོ་ཞིག་བསྐྲུན་བཞིན་ཡོད་པ་རེད། བདག་ལོ་བཅུ་གཅིག་ཡིན་པའི་དུས་སུ་ངེད་ཁྱིམ་ཚང་བོ་ལྷ་སར་མཇལ་སྐོར་དུ་ཕྱིན་པ་ཡིན། ང་ཚོ་མེ་འཁོར་དུ་བསྡད་དེ་སོང་བས་དུས་ཚོད་ཉེར་བཞིའི་འགོར་རྗེས་གཞི་ནས་ང་ཚོ་འགྲོ་དགོས་པའི་དམིགས་ཡུལ་དེར་སླེབས་པ་རེད། སྐབས་དུས་དེར་བདག་གི་རྨོ་མོས་ང་ལ་དེང་རབས་ཚན་རིག་འཕེལ་རྒྱས་སུ་སོང་ནས་འགྲོ་འདུག་སྤྱོད་གསུམ་གང་གི་ཆར་དགེ་མཚན་མི་དམན་པ་ཞིག་སྐྲུན་བཞིན་ཡོད་པ་རེད། སྔོན་ཆད་ང་ཚོའི་དུས་སྐབས་སུ་ལྷ་ས་ལྟ་བུའི་ཡུལ་ཐག་རིང་བོར་འགྲོ་དགོས་ན་ངེས་པར་དུ་ཞོན་པ་དང་ཡང་ན་རང་གི་རྐང་བར་བརྟེན་ནས་འགྲོ་དགོས་པ་ཡིན་པས་དཀའ་ཚེགས་ཤིན་ཏུ་ཆེ་བ་མ་ཟད། ལམ་བར་དུ་གཅན་གཟན་སོགས་ཀྱི་འཇིགས་པ་ཡང་ཤིན་ཏུ་ཆེ། ལྷ་ས་ལྟ་བུར་མཚོན་ན་མ་མཐའ་ཡང་ཟླ་གཅིག་གི་དུས་ཚོད་བེད་སྤྱད་དེ་འགྲོ་དགོས་པ་རེད། ད་ལྟའི་སྤྱི་ཚོགས་ལ་མཚོན་ན། རྒྱ་ཆེ་སའི་ཕྱོགས་ནས་བཤད་ན་ཟླ་བའི་གོ་ལ་སོགས་ལ་བརྟག་དཔྱད་བྱས་ཏེ་མིའི་རིགས་ཀྱི་མ་འོངས་པའི་གནས་གཞི་འཚོལ་བ་དང་། འཇིག་རྟེན་འཕུར་གྲུ་གསར་གཏོད། མཉམ་འབྲལ་དྲ་རྒྱ་འཛམ་གླིང་ལ་ཁྱབ་ཡོད་པས་གླིང་མི་གཅིག་པའི་མི་དང་འབྲེལ་འདྲིས་བྱེད་ཐུབ་པ་རེད། གནམ་གཤིས་བརྟག་དཔྱད་བྱས་ཏེ་མིའི་རིགས་ཀྱི་འཚོ་བའི་དགོས་མཁོ་སྐོང་བར་སྔ་ན་མེད་པའི་མཐུན་རྐྱེན་གང་ལེགས་སྦྱར་བ་རེད། གཞན་གློག་གི་མི་སོགས་གསར་གཏོད་བྱས་ཏེ་མིའི་འཚོ་བའི་ཆ་ལ་སྟབས་བདེ་བཟང་བོ་སྐྲུན་བཞིན་ཡོད་པ་རེད། རྒྱ་ཆུང་བའི་ཕྱོགས་ནས་བཤད་ན་གཞི་རྒྱ་ཆེ་བའི་སྒོ་ནས་འཛུགས་སྐྲུན་སྣ་ཚོགས་བྱས་པ་མ་ཟད་འགྲིམ་འགྲུལ་སྟབས་བདེ་བཟོས། འཚོ་བར་འོད་སྣང་བསྣན། སྣ་འཛོམས་རང་བཞིན་གྱི་ཤེས་བྱ་སྦྱངས་སའི་སློབ་གྲྭ་ཆེ་ཆུང་གང་མང་བཙུགས་པ་སོགས་ནི་ཚན་རིག་གིས་ང་ཚོ་དུས་རབས་གསར་བར་བསྐྱོད་པའི་འདུ་ཤེས་ལ་རམ་འདེགས་མི་དམན་པ་ཞིག་སྐྲུན་པར་བྱས་པ་རེད། དེ་བས་ང་ཚོས་ཀྱང་མདུན་བསྐྱོད་ཀྱི་གོམ་ཁ་ནམ་ཡང་ལྷོད་པ་མེད་པར་ཚན་རིག་འཕེལ་རྒྱས་ཀྱི་ཆ་ལ་སྔ་ན་མེད་པའི་མཐུན་རྐྱེན་གང་ལེགས་སྦྱོར་བར་ནུས་པ་ཆེན་པོ་འདོན་དགོས་པ་རེད། དེ་ལས་ཀྱང་ང་ཚོ་ཡང་དུས་རབས་གསར་བར་བསྐྱོད་དེ་ཆབ་དཔལ་རིག་གསུམ་འཕེལ་རྒྱས་སུ་འགྲོ་བཞིན་པའི་སྔོན་ཐོན་མི་རིགས་ཀྱི་གྲལ་དུ་ཚུད་པར་བྱེད་དགོས་སོ། ། 
རྒྱུ་མཚན་དེ་དག་གི་དབང་གིས་ང་ཚོས་དུས་ནམ་ཡང་དུས་ཚོད་ཆུད་ཟོས་སུ་མི་གཏོང་བར་རིག་པའི་གནས་ལ་འབད་པ་ཆེན་པོ་བྱས་ཏེ་མ་འོངས་པ་ན་དུས་རབས་གསར་བར་བསྐྱོད་པའི་མི་རིགས་ཀྱི་སྣེ་ཁྲིད་པ་བཟང་བོ་ཞིག་ཏུ་འགྱུར་བར་འབད་པ་ཆེན་པོ་བྱེད་དགོས་པ་རེད།