༄༅། །རྒན་ཀུན་བཟང་དོན་གྲུབ་ཀྱི་མི་སྒེར་ཡིག་གཟུགས་བརྩམས་ཆོས་འགྲེམ་སྟོན་མཚོ་ལྷོ་ཆབ་ཆ་རུ་བསྡུས།

      བཀྲ་ཤིས་གཡང་གིས་གཏམས་པའི་གནམ་ལོ་གསར་ཚེས་ལ་བསུ་བ་དང་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་འཁོར་བརྒྱ་ལོན་པར་རྗེས་དྲན། མི་རིགས་རིག་གནས་སྒྱུ་རྩལ་དར་སྤེལ།  བོད་ཀྱི་ཡིག་གཟུགས་སྒྱུ་རྩལ་འཕེལ་རྒྱས་ལ་སྐུལ་འདེད་གཏོང་ཆེད། མཚོ་ལྷོ་ཁུལ་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ་ཡིས་གཙོ་སྒྲུབ་དང་། ཁུལ་དཔེ་མཛོད་ཁང་གིས་རོགས་སྒྲུབ་གནང་སྟེ་མདོ་སྨད་ཀྱི་ཡིག་གཟུགས་མཁན་པོ་རྒན་ཀུན་བཟང་དོན་གྲུབ་ལགས་ཀྱི་མི་སྒེར་གྱི་ཡིག་གཟུགས་བརྩམས་ཆོས་འགྲེམ་སྟོན༢༠༢༠ལོའི་ཟླ༡༢ཚེས༣༡ཉིན་གྱི་སྔ་དྲོར་མཚོ་ལྷོ་ཁུལ་དཔེ་མཛོད་ཁང་དུ་གཟབ་རྒྱས་ངང་བསྡུས་ཤིང་།  ཁུལ་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའི་ཅུའུ་ཀྲང་རིན་བྷེ་དང་ཅུའུ་ཀྲང་གཞོན་པ་ཚེ་གཟུང་ཐར་སོགས་འབྲེལ་ཡོད་འགོ་ཁྲིད་དག་དང་། ད་དུང་སྤྱི་ཚོགས་ལས་རིགས་སོ་སོའི་བོད་ཀྱི་ཡིག་གཟུགས་སྒྱུ་རྩལ་ལ་དུང་བ་ཟབ་པའི་ཡིག་མཁན་དག དེ་མིན་ཁུལ་མི་རིགས་མཐོ་འབྲིང་དང་པོ་དང་གསེར་ཆེན་རྫོང་མི་རིགས་སློབ་འབྲིང་གི་དགེ་སློབ་ཆིག་སྟོང་ལྷག་འགྲེམ་སྟོན་གྱི་བྱ་འགུལ་དུ་ཞུགས།        ཐེངས་འདིའི་ཡིག་གཟུགས་འགྲེམ་སྟོན་དུ་ཡིག་མཁན་ཁོང་གི་སོར་རྩེ་ནས་ཐོན་པའི་ཡིག་གཟུགས་བརྩམས་ཆོས་བརྒྱ་ཕྲག་ལྷག་གཟིགས་མོ་བ་ཀུན་གྱི་སྤྱན་སྔར་བཤམས་ཡོད་ལ།  ཁོང་གི་བརྩམས་ཆོས་ཁག་ལ་དབུ་ཅན་དང་ཚུགས་ཆུང་། འབྲུ་ཚ་སོགས་ཀྱིས་མཚོན་པས་བྲིས་རྒྱུན་གཙང་ལ་ཁུངས་བཙུན་ཞིང་། སྒྱུ་རྩལ་མཚོན་ཐབས་དང་ཁྱད་ཆོས་མངོན་པར་གསལ་ལ།  འབྲི་རྩལ་ཚད་གཞིའི་རྒྱ་ལས་གྲོལ་ཅིང་། སྨྱུག་རྩེར་ཉམས་འགྱུར་སྟོང་གིས་ཕྱུག་པས་དུས་རབས་ཀྱི་འགྲོས་དང་མཐུན་ལ་ས་གནས་ཀྱི་ཁྱད་ཆོས་འབུར་དུ་ཐོན་པས། བོད་ཀྱི་ཡིག་གཟུགས་སྒྱུ་རྩལ་ལ་དུང་བ་ཟབ་པའི་གཞོན་རབས་པ་དག་གི་ཡིད་ཀྱི་དང་བ་འདྲེན་ཞིང་མིག་དབང་ཅིག་ཅར་ཏུ་འཕྲོག་པ་མ་ཟད། རང་ཁུལ་གྱི་བོད་ཡིག་ཡིག་གཟུགས་སྒྱུ་རྩལ་ཁྱབ་གདལ་དང་འཕེལ་རྒྱས་ལ་ནུས་པ་གལ་ཆེན་ཐོན་ཡོད།        ཡིག་གཟུགས་ནི་བྲིས་བཤུས་རྐྱང་རྐྱང་ངམ་འབྲི་རྩལ་ཁོ་ནའི་ལས་ཙམ་མིན་པར་བསམ་པའི་རོལ་མྱོང་ཞིག་ཡིན་ཞིང་།  སྐྱེས་བུ་སྒེར་བའི་ཡིག་གཟུགས་ནི་དུས་རབས་ཤིག་གི་ལོ་རྒྱུས་ཀྱི་དན་རྟགས་ཡིན་ལ། སྐྱེས་བུ་ཞིག་གི་གྲུབ་འབྲས་མཐའ་དག་ཀྱང་ཁོང་རང་ཉིད་ཀྱི་བསླབ་པ་དོན་གཉེར་དང་དམ་པོར་འབྲེལ་ཡོད་དེ། བོད་ཀྱི་ཡིག་མཁན་རྒན་ཀུན་བཟང་དོན་གྲུབ་བམ་བསེ་རུ་ནག་པོ་ལགས་ཀྱིས་མི་ཚེའི་ཐོག་མཐའ་བར་གསུམ་དུ་མི་ལྡོག་བརྩོན་པའི་གོ་ཆ་ལུས་ལ་བགོས་ཏེ་དབྱར་དགུན་གནང་ངལ་གསོའི་དུས་ཚོད་བེད་སྤྱད་ནས་དབུས་གཙང་དུ་ཐེངས་དུ་མར་ཕེབས་ཏེ་གཙང་གི་ཡིག་མཁན་ལྷ་ཁང་བློ་བཟང་རྡོ་རྗེ་དང་དབུས་ཀྱི་ཡིག་མཁན་སྙེ་འཕྲིན་ལས་རྒྱལ་མཚན་སོགས་ཀྱི་ཞབས་ལ་གཏུགས་ཏེ་བོད་ཀྱི་བྲིས་རྒྱུན་སྣ་ཚོགས་ལ་འབད་པས་སྦྱངས་མཐར༢༠༡༥ལོའི་ཟླ༩བར“གཟི་ཚ་སྡེ་དགུའི་བུམ་པ་རྟགས་ཅན”གྱི་ཀྲུང་གོའི་ནུབ་རྒྱུད་ཀྱི་བོད་རྒྱ་ཡིག་གཟུགས་འགྲན་སྡུར་ཆེན་མོའི་སྟེང་དངུལ་གྱི་རྟགས་མའི་བྱ་དགའ་དང་།   ༢༠༡༧ལོའི་ཟླ༥བར་བོད་ལྗོངས“ཚངས་དབྱངས་རྒྱ་མཚོའི་རིག་གནས་དུས་ཆེན་གྱི་བོད་ཡིག་ཡིག་གཟུགས་འགྲན་སྡུར་ཆེན་མོའི”སྟེང་ཨང་དང་པོའི་བྱ་དགའ་སོགས་སྔ་ཕྱིར་རྒྱལ་ནང་གི་རིམ་པ་དུ་མའི་ཡིག་གཟུགས་འགྲན་སྡུར་ནང་གྲུབ་འབྲས་མི་དམན་པ་བླངས་ཡོད་ལ། ད་ལྟ་མཚོ་ལྷོ་ཁུལ་ཡིག་རིས་མཐུན་ཚོགས་ཀྱི་ཀྲུའུ་ཞི་གཞོན་པ། མཚོ་སྔོན་ཞིང་ཆེན་ཡིག་གཟུགས་མཐུན་ཚོགས་ཀྱི་ཚོགས་མི། མཚོ་སྔོན་ཞིང་ཆེན་བོད་ཡིག་ཡིག་གཟུགས་རྒྱུན་འཛིན་དང་དར་སྤེལ་ཞིབ་འཇུག་ཚོགས་པའི་ལས་འཛིན། བོད་ལྗོངས་ཚངས་དབྱངས་རྒྱ་མཚོའི་རིག་གནས་ཞིབ་འཇུག་མཐུན་ཚོགས་ཀྱི་ཚོགས་མི། ལྷ་ས་གྲོང་ཁྱེར་ཡིག་གཟུགས་མཐུན་ཚོགས་ཀྱི་ཚོགས་མི། མཚོ་ལྷོ་ཁུལ་རིག་གནས་ཁང་གི་ལས་འཛིན་ཚོགས་པའི་ལས་འཛིན། མཚོ་ལྷོ་ཁུལ་ཞབས་བྲོ་དང་རོལ་མོ་བའི་མཐུན་ཚོགས་ཀྱི་ཚོགས་མི། མདོ་སྨད་ཡུལ་གྱི་སྤྱི་ཚོགས་སློབ་གྲྭའི་ནང་སྦྱངས་ཤིང་ཁྱབ་བརྡལ་དང་ལག་ལེན་གནང་མཁན་ཐོག་མ། མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་དང་པོའི་བོད་སྐད་ཡིག་དང་ཡིག་གཟུགས་སློབ་ཁྲིད་ཀྱི་འགན་གཅིག་ལྕོགས་སུ་ཕྲག་ཏུ་བཞེས་ཏེ་བོད་ཀྱི་ཡིག་གཟུགས་རྒྱུན་འཛིན་པ་འབོར་ཆེན་སྐྱེད་བསྲིང་བྱས་ཏེ་ཀྲུང་དབྱང་མི་རིགས་སློབ་ཆེན་སོགས་ཞིང་ཆེན་ཕྱི་ནང་གི་སློབ་ཆེན་ཁག་ཏུ་སློབ་གཉེར་བྱས་དང་བྱེད་མུས་ཡོད་ལ། དེ་དག་གིས་ཀྱང་བོད་ཀྱི་ཡིག་གཟུགས་སྒྱུ་རྩལ་རྒྱུན་འཛིན་དང་དར་སྤེལ་གྱི་ལས་རླབས་པོ་ཆེ་ཕྲག་ཏུ་བླངས་ཏེ་བོད་ཀྱི་རིག་གནས་ཁྱོན་ཡོངས་ནས་འཕེལ་རྒྱས་སུ་གཏོང་བར་སྔ་ན་མེད་པའི་མཛེས་སྡུག་གསར་བ་ཞིག་བསྣན་ཡོད།