༄༅། །རེབ་གོང་སྐལ་བཟང་མེ་ཏོག་བྱིས་སྐྱོང་གླིང་གི་རི་ལམ་བྱ་འགུལ།

        དགེ་སློབ་དག་དུས་ཚོད་དགུ་ལྷག་གི་རིང་རི་ལམ་དུ་བསྐྱོད་པའི་ལམ་བར་དུ་རྩི་ཤིང་དང་མེ་ཏོག་ས་དེར་ཡོད་པའི་རི་སྐྱེས་སྲོག་ཆགས་དང་སྒོ་ཟོག་སོགས་ངོ་སྤྲོད་ཞིབ་རྒྱས་སུ་གནང་ཡོད་པ་མ་ཟད། «སྨན་གྱི་འཁྲུངས་དཔེ་ཤེལ་དཀར་མེ་ལོང»དུ་གསལ་བའི་གཅིག་གྱུར་གྱི་མིང་བརྡ་ཐ་སྙད་ལྟར་ངོ་སྤྲོད་དང་ངོས་འཛིན་གང་ལེགས་གནང་ཡོད་པས་བྱ་འགུལ་ལ་ཞུགས་པའི་སློབ་མ་རྣམས་ལ་མཚོན་ན་ཆེས་སྤྲོ་སྣང་ལྡན་པའི་བྱ་འགུལ་དམིགས་བསལ་བ་ཞིག་ཏུ་གྱུར་ཡོད་པ་ལྟར་ཁྱིམ་བདག་དག་གིས་ཀྱང་དགའ་བསུ་ཆེས་ཆེར་བྱས་ཡོད་འདུག “ཁྱིམ་བདག་དག་ལ་མཚོན་ན་ཡང་རང་རང་གི་བྱིས་པར་གདེང་འཇོག་ཇི་ལྟར་བྱེད་ཐུབ་ན་དེ་ལྟར་ལས་གང་ལའང་འཇུག་ནུས་པར་སྙམ་པའི་འདུ་ཤེས་སྐྱེ་རུ་བཅུག་པ་དང་། བྱིས་པ་དག་ལ་མཚོན་ན་ཡང་རི་ལུང་ཐང་གསུམ་ནས་བྱ་དངོས་མང་པོ་ཞིག་མྱོང་རྟོག་བྱེད་པའི་གོ་སྐབས་བྱུང་བ་ནི་ལོ་ངོ་གསུམ་གྱི་རིང་གི་སློབ་གྲྭའི་འཚོ་བའི་ཁྲོད་ཆེས་བརྗེད་མི་སྲིད་ཅིང་། སློབ་གསོ་བཅོས་བསྒྱུར་གྱི་ཁ་ཕྱོགས་དང་མཐུན་པ། ང་ཚོས་གླེང་རིན་ཡོད་པའི་བྱ་བ་ཞིག་བཅས་ཡིན”ཞེས་སློབ་གཙོ་རླངས་ཚང་བསོད་ནམས་རྡོ་རྗེ་ལགས་ཀྱིས་གསུངས་སོང་། ད་རེབ་ཀྱི་བྱ་འགུལ་འདི་ནི་བྱིས་སྐྱོང་གླིང་གསུམ་པོས་མཉམ་དུ་སྤེལ་བའི་མཐར་ཕྱིན་སློབ་མའི་རི་ལམ་བྱ་འགུལ་ཐེངས་གཉིས་པ་ཡིན་པ་དང་། བྱ་འགུལ་འདིའི་སྐོར་དང་བརྙན་དང་འདྲ་པར་སོགས་རྒྱལ་ཁབ་སློབ་གསོ་པུའུ་ཡིས་གཉེར་བཞིན་པའི་ཀྲུང་གོའི་དགེ་རྒན་ཚགས་པར་དང་ཨ་མདོ་བརྙན་འཕྲིན་ཁང་བཅས་ཀྱིས་དྲ་ལམ་དུ་བཏང་བས་ལྟ་མཁན་མང་པོས་དགའ་མོས་ཆེས་ཆེར་གནང་འདུག