༄༅། །མཚོ་ལྷོ་ཁུལ་མི་རིགས་མཐོ་འབྲིང་གཉིས་པས་མཐར་ཕྱིན་མཛད་སྒོ་འཚོགས་པ།

       སྤྱི་ལོ༢༠༢༤ལོའི་ཟླ༦པའི་ཚེས༡ཉིན་གྱི་ཞོགས་པར། མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་གཉིས་པས་སློབ་གྲྭའི་ལུས་རྩལ་ར་བར་མཐོ་གསུམ་སློབ་མའི་མཐར་ཕྱིན་མཛད་སྒོ་སྐབས༢༩པ་གཟབ་རྒྱས་ངང་འཚོགས། ཏང་ཨུའི་ཧྲུའུ་ཅི་བསོད་ནམས་རྡོ་རྗེ་དང་སློབ་གཙོ་ཕྱུག་ལོ་གཙོ་བྱས་སློབ་གྲྭའི་དབུ་ཁྲིད་རྣམ་པ་དང་། དགེ་སློབ་ལྷན་རྒྱས། ཕྱོགས་ཡོངས་ནས་ཕེབས་པའི་ཁྱིམ་བདག་རྣམ་པ་བཅས་མཐར་ཕྱིན་མཛད་སྒོར་ཞུགས།

       བཀྲ་ཤིས་ཆུ་འཛིན་དཀར་པོའི་གདུགས་དཀར་གྱི་འོག་ཏུ། དོན་འགྲུབ་ལྗོན་ཤིང་འདབ་མའི་རེ་སྨོན་གྱི་ཀློང་དུ། ཁ་དྲོ་གཞས་དབྱངས་སྙན་མོའི་འགྱུར་ཁུགས་ཀྱི་དབྱིངས་སུ། ཡིད་ཆེས་དང་སྤོབས་པའི་གཟི་མདངས་འཚེར་ཞིང་། ཡིད་འོང་རྒྱན་གོས་ཀྱིས་མངོན་པར་སྤུད་པའི་མཐོ་གསུམ་མཐར་ཕྱིན་སློབ་མའི་ཚོགས་དང་བཀའ་དྲིན་མཚུངས་པ་མེད་པའི་དགེ་རྒན་རྣམ་པ་ཀུན་ལས་རྣམ་རྒྱལ་གྱི་སྒོ་མོ་ཆེ་ནས་ཚོགས་རར་དགའ་བསུ་ཞུས་པ་དང་ཆབས་ཅིག ལྷན་རྒྱས་ཡར་ལངས་ནས་གཟབ་ནན་གྱིས་རྒྱལ་གླུ་བླངས་ཤིང་རྒྱལ་དར་བསྒྲེངས་རྗེས། མཐར་ཕྱིན་མཛད་སྒོ་ཡི་མཛད་རིམ་རྣམས་རིམ་པ་བཞིན་སྤེལ།

       ཐོག་མར་ཧྲུའུ་ཅི་བསོད་ནམས་རྡོ་རྗེས་མཐར་ཕྱིན་མཛད་སྒོ་དངོས་སུ་མགོ་བརྩམས་པ་ཁྱབ་བསྒྲགས་བྱས་པ་དང་ལྷན་དུ། རྟེན་འབྲེལ་ཤོག་སྦག་གི་སྒྲ་བརྒྱས་ཕྱོགས་ཀུན་ཁྱབ་ཅིང་བཀྲ་ཤིས་དགེ་མཚན་གྱི་དུད་སྤྲིན་འཇའ་ཚོན་མཁའ་རུ་བཀྲ། དེ་རྗེས་ཁ་བཏགས་ཆུང་རུང་ལྷ་རྫས་ཞེས་པའི་དཔེ་ལྟར་ཕན་ཚུན་བར་བཀྲ་ཤིས་རྟེན་འབྲེལ་གྱི་ཁ་བཏགས་གཏོང་བའི་ཡོ་ལང་རླབས་ཕྲེང་བཞིན་རྩེན་ཅིང་། སློབ་གཙོ་ཕྱུག་ལོས་སློབ་གྲྭའི་ཚབ་བྱས་ཏེ་མཐར་ཕྱིན་སློབ་མ་རྣམས་ལ་ཤིས་ཚིག་གིས་མདུན་བསུས་ཏེ་མི་ཚེའི་ལམ་སྟོན་དུ་གྱུར་པའི་གསུང་བཤད་གལ་ཆེན་གནང་ཞིང་། མཐར་ཕྱིན་སློབ་མ་དང་ཤུལ་སྡོད་སློབ་མ། མཐར་ཕྱིན་དགེ་རྒན་གྱི་ཚབ་བྱེད་པ་རྟ་མགྲིན་མགོན་པོ་ཐར་བཅས་ཀྱིས་རིམ་པ་བཞིན་དྲིན་བཟོ་དང་དྲིན་དྲན། རྟེན་འབྲེལ་དང་རེ་སྨོན་ཞུ་བ། ཐོས་བརྩོན་དང་ཡ་རབས་བཟང་སྤྱོད། སྐུལ་ལྕག་དང་བསླབ་བྱ་གནང་བ་སོགས་ཀྱིས་མཚོན་པའི་སེམས་འགུལ་ཐེབས་ཤིང་མཆི་མ་གཡོ་བ། སྤོབས་པ་རྒྱས་ཤིང་ངར་ཤུགས་སྩོལ་བ། བློ་སྒོ་འབྱེད་ཅིང་མདུན་ལམ་མཐོང་བའི་གཏམ་བཤད་རིམ་པ་བཞིན་སྤེལ། མཐར་སློབ་གཙོ་གཞོན་པ་པདྨ་ནོར་བུས་ཕུལ་བྱུང་གི་མཐར་ཕྱིན་སློབ་མ་དང་འཛིན་གྲྭའི་ལས་བྱེད་མི་སྣར་གཟེངས་རྟགས་སྤྲོད་པའི་ཐག་གཅོད་སྒྲོག་སྦྱང་བྱས་ནས་གཟེངས་རྟགས་སྤྲད་པ་དང་། སློབ་གཙོ་གཞོན་པ་ཡན་ཡུག་ཧྲོན་གྱིས་མཐར་ཕྱིན་ཆོག་མཆན་གྱི་ཐག་གཅོད་སྒྲོག་སྦྱང་བྱས་ནས་མཐར་ཕྱིན་སློབ་མར་མཐར་ཕྱིན་འཛིན་ཡིག་དང་ལག་སྐྱེས་བསྩལ་ཅིང་། རྣ་བའི་བདུད་རྩི་དང་མིག་གི་དགའ་སྟོན་དུ་གྱུར་པའི་རིག་རྩལ་འཁྲབ་སྟོན་གྱི་གསོལ་སྟོན་ལ་ཉམས་སུ་མྱངས་རྗེས་མཐར་ཕྱིན་མཛད་སྒོ་ཡོངས་སུ་མཇུག་རྫོགས་ཏེ་མཐར་ཕྱིན་སློབ་མ་རྣམས་ལ་སྐྱེལ་མ་བྱས་སོ། །

       ད་ནི་མཐོ་རྒྱུགས་ལེན་པར་ཉིན་འགའ་ལས་མེད་ནའང་། རྟ་ལྕག་གིས་བསྐུལ་ན་བྱང་ལམ་ཆོད། བུ་སྙིང་རུས་ཆེ་ན་དོན་ཆེན་འགྲུབ་ཅེས་པའི་དཔེ་ལྟར། མུ་མཐུད་དུ་སློབ་སྦྱོང་ལ་བཏང་ལྷོད་མེད་པར་བརྩོན་པ་ཆུ་བོའི་རྒྱུན་བཞིན་བསྟེན་རྒྱུ་ཤིན་ཏུ་གལ་ཆེ་ལ། ཡང་བུ་རེ་བ་ཅན་ལ་རེ་བཞག་ཅིག གོས་རི་མོ་ཅན་ལ་རྒྱང་ལྟ་ཞིག་ཅེས་པའི་དཔེ་ལྟར། རང་ཉིད་ཀྱིས་མི་ལོ་གསུམ་ལ་སློབ་གཉེར་བྱས་པའི་འབྲས་རྟགས་སུ། མཐོ་རྒྱུགས་ཀྱི་མགོ་སྔ་བར་གསུམ་དུ་རྒྱུད་ལ་འབྱོར་བའི་ཡོན་ཏན་གྱི་རྩལ་དགུ་རྣམ་པར་སྤྲུགས་ནས། གཡུར་དུ་ཟ་བའི་རྒྱུགས་བླངས་ཏེ་འདོད་དོན་གྱི་རི་མོ་ལྷུན་གྱིས་འགྲུབ་པའི་བཀྲ་ཤིས་སྨོན་འདུན་རྒྱུགས་ཞུགས་སློབ་མ་ཡོངས་ལ་ཞུའོ། །