“ཛམ་དཀར”རྟགས་ཅན་གྱི“སྦྲང་ཆར་རྩོམ་རིག་བྱ་དགའ”སྐབས་བཅུ་གཅིག་པ།

       “ཛམ་དཀར”རྟགས་ཅན་གྱི“སྦྲང་ཆར་རྩོམ་རིག་བྱ་དགའ”སྐབས་བཅུ་གཅིག་པ་སྤེལ་པའི་མཛད་སྒོ་དང“བཅོལ་གདམས་ཡིད་ལ་དམ་བཅངས་ཏེ། །དྲིན་གཟོའི་སྒོ་ནས་མདུན་དུ་སྐྱོད”ཅེས་པའི་རྩོམ་རིག་གསར་རྩོམ་བགྲོ་གླེང་ཚོགས་འདུ་དེ། 2024ལོའི་ཟླ8པའི་ཚེས9ཉིན་གྱི་སྔ་དྲོར་རྨ་ལྷོ་རེབ་གོང་དུ་བདེ་བླག་ངང་འཚོགས།

       ཚོགས་འདུའི་སྟེང་དུ་མཚོ་སྔོན་མི་རིགས་དཔེ་སྐྲུན་ཁང་གི་ཏང་ཨུ་ཧྲུའུ་ཅིའམ་ཧྲེ་ཀྲང་། སྤྱི་ཁྱབ་རྩོམ་སྒྲིག་པ་བསམ་གྲུབ་དང་། མཚོ་སྔོན་ཞིང་ཆེན་དྲིལ་སྒྲོག་པུའུ་གསར་འགྱུར་དཔེ་སྐྲུན་ཁྲུའུ་ཡི་ཁྲུའུ་ཀྲང་ལིའང་ཁྲུན་ཅང་། མཚོ་སྔོན་ཞིང་ཆེན་དྲིལ་སྒྲོག་པུའུ་རིག་རྩལ་ཁྲུའུ་ཡི་ཁྲུའུ་ཀྲང་གཞོན་པ་ལུའོ་ཁྲིན་ཧྲིན། མཚོ་སྔོན་མི་རིགས་དཔེ་སྐྲུན་ཁང་གི་ཧྲེ་ཀྲང་གཞོན་པའམ་སྤྱི་ཁྱབ་རྩོམ་སྒྲིག་པ་གཞོན་པ་མགོན་པོ་ཚེ་རིང་། མཚོ་སྔོན་མི་རིགས་དཔེ་སྐྲུན་ཁང་གི་ཧྲེ་ཀྲང་གཞོན་པའམ་སྤྱི་ཁྱབ་རྩོམ་སྒྲིག་པ་གཞོན་པ་བཀྲ་ཤིས་དོན་གྲུབ། མཚོ་སྔོན་ཞིང་ཆེན་རྨ་ལྷོ་ཁུལ་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱི་ཀྲུའུ་རེན་ལི་ཞའོ་ཡན། ཀན་སུའུ་ཛམ་དཀར་ཨར་ལས་ཀུང་སིའི་འགན་འཛིན་པ་ནོར་བུ། རྩོམ་པ་པོ་དང་དཔྱད་བརྗོད་པ་སོགས་མི་སྣ་དྲུག་ཅུ་ལྷག་ཞུགས་པ་དང་། མཚོ་སྔོན་མི་རིགས་དཔེ་སྐྲུན་ཁང་གི་ཧྲེ་ཀྲང་གཞོན་པའམ་སྤྱི་ཁྱབ་རྩོམ་སྒྲིག་པ་གཞོན་པ་མགོན་པོ་ཚེ་རིང་གིས་ཚོགས་འདུ་ལ་མགོ་འཛིན་མཛད།

       ཐེངས་འདིའི་རྩོམ་རིག་བྱ་དགའ་ནི2021ལོ་ནས2023ལོའི་བར་གྱི«སྦྲང་ཆར»དུས་དེབ་བཅུ་གཉིས་སྟེང་སྤེལ་པའི་སྒྲུང་གཏམ་དང་སྙན་ངག ལྷུག་རྩོམ། རྩོམ་རིག་དཔྱད་བརྗོད་བཅས་ལས་བདམས་ཐོན་བྱུང་བ་ཡིན་ལ། དཔྱད་འདེམ་སྐབས་སུ་ཐོག་མར་ཀློག་པ་པོས་དྲ་ཐོག་བརྒྱུད་ནས་འདེམ་ཤོག་འཕངས་པ་དང་། རྩོམ་སྒྲིག་པས་འོས་སྦྱོར་བྱས་པ། རྩོམ་རིག་ལས་གནས་སུ་མིང་དུ་གྲགས་པའི་རྩོམ་པ་པོ་དང་དཔྱད་བརྗོད་པ། རྩོམ་སྒྲིག་པས་གྲུབ་པའི་དཔྱད་འདེམ་ཚན་ཆུང་གིས་དཔྱད་འདེམ་དང་བགྲོ་གླེང་། གྲོས་སྡུར་སོགས་བྱས་པ་བརྒྱུད་ནས། རྩོམ་པ་པོ་ལ་མི་རྟོན་བརྩམས་ཆོས་ལ་རྟོན་པའི་རྩ་དོན་གཞིར་བཟུང་ནས་འདྲ་མཉམ་དང་དྲང་བདེན། མངོན་གསལ་དང་ཡང་དག་གི་རྩ་དོན་རྒྱུན་འཁྱོངས་བྱས་ཏེ། བྱ་དགའ་ཐོབ་པའི་བརྩམས་ཆོས་དྲུག་བདམས་ཐོན་བྱུང་།

       སྐབས་བཅུ་གཅིག་པའི“ཛམ་དཀར”རྟགས་ཅན་གྱི“སྦྲང་ཆར་རྩོམ་རིག་བྱ་དགའ”ཐོབ་པའི་བརྩམས་ཆོས་ནི་ཚེ་ལོ་ཐར་གྱི་སྒྲུང་གཏམ«ཟླ་འོད་འོག་གི་ལོང་བ»དང་། མཚོ་སྐྱེས་ཀྱི་སྙན་ངག«གོ་ཁ» སོག་རུ་ཀརྨ་ཀུན་ཁྱབ་ཀྱི་ལྷུག་རྩོམ«ས་ཡི་རྟེན་ཕུར་ནམ་ར»གསུམ་ཡིན་ལ། སྐབས་བཅུ་གཅིག་པའི“ཛམ་དཀར”རྟགས་ཅན་གྱི“སྦྲང་ཆར་དཔྱད་བརྗོད་བྱ་དགའ”ཐོབ་པའི་བརྩམས་ཆོས་ནི་བདུད་ལྷ་རྒྱལ་གྱི་དཔྱད་བརྗོད«ལོ་རྒྱུས་ཀྱི་བསྡུས་གཟུགས»ཡིན་པ་དང་། སྐབས་བཅུ་གཅིག་པའི“ཛམ་དཀར”རྟགས་ཅན་གྱི“སྦྲང་ཆར་སྨྱུག་གསར་བྱ་དགའ”ཐོབ་པའི་བརྩམས་ཆོས་ནི་སྒར་བ་ཚེ་བཀྲའི་སྒྲུང་གཏམ«ལས་འཕྲོའི་མདུད་པ»དང་གཡུ་སྒྲོན་འཚོའི་སྒྲུང་གཏམ«གསེར་གྱི་རྣ་ལོང་ཡ་གཅིག»གཉིས་ཡིན།

       ཐེངས་འདིའི་ཚོགས་ཐོག་ཏུ་དཔྱད་འདེམ་ཚོགས་པའི་ཀྲུའུ་རེན་རིན་ཆེན་བཀྲ་ཤིས་ལགས་ཀྱིས་དཔྱད་འདེམ་གྱི་གོ་རིམ་ཡོད་ཚད་ཚོགས་ཞུགས་ལྷན་རྒྱས་ཀྱི་སྙན་ལམ་དུ་ཞུས། ཁོང་གིས་ཐེངས་འདིའི་སྦྲང་ཆར་རྩོམ་རིག་བྱ་དགའི་འོས་སྦྱོར་གྲས་སུ་ཚུད་པའི་བརྩམས་ཆོས་ཀྱི་བརྗོད་བྱ་ཡང་སྔོན་མ་དག་ལས་སྣ་མང་ཅན་དང་། ནང་དོན་ཕུན་སུམ་ཇེ་ཚོགས་སུ་ཕྱིན་ཡོད་ཅིང་། རྩོམ་པ་པོ་རྣམས་ཀྱི་མཐོང་རྒྱའང་སྔར་ལས་ཇེ་ཆེ་རུ་ཕྱིན་ལ། མཚོན་ཐབས་ཀྱང་སྔར་ལས་སྣ་ཚོགས་སུ་གྱུར་ཡོད་པ་མཐོང་བས། སྐབས་འདིའི་དཔྱད་འདེམ་ཚོགས་པར་ཡིད་སྨོན་དང་ང་རྒྱལ་ཡང་སྐྱེས་སུ་བཅུག་བྱུང་། དཔྱད་འདེམ་སྐབས་སུའང་སྦྲང་ཆར་རྩོམ་རིག་བྱ་དགའི་དཔྱད་འདེམ་རྩ་དོན་གཞིར་བཟུང་ནས་དྲང་བོ་དྲང་བཞག་གི་སྒོ་ནས་བདམས་ཏེ། 2021ལོ་ནས2023ལོའི་བར་གྱི«སྦྲང་ཆར»དུས་དེབ་བཅུ་གཉིས་སྟེང་སྤེལ་པའི་བརྩམས་ཆོས་ལས་ཆེས་ཕུལ་དུ་བྱུང་བ་དག་བདམས་ཡོད། དེ་དག་གི་བརྗོད་དོན་དང་བསམ་བློ། མཚོན་ཐབས་སོགས་གང་གི་ཐད་ནས་ཀྱང་ཆུ་ཚད་ཅུང་མཐོ་བས། བོད་ཀྱི་རྩོམ་རིག་གསར་རྩོམ་ཡང་མཐོ་ཚད་གསར་བ་ཞིག་ཏུ་སླེབས་ཡོད་པར་ངོས་འཛིན་བྱེད་ཆོག་ཅེས་བསྒྲགས།

       བདུད་ལྷ་རྒྱལ་གྱིས་བྱ་དགའ་ཐོབ་པའི་རྩོམ་པ་པོ་དག་གི་ཚབ་བྱས་ཏེ་བྱ་དགའ་གནང་མཁན་གྱི་འབྲེལ་ཡོད་ལས་ཁུངས་ལ་བཀའ་དྲིན་ཆེ་ཞུས་པ་དང་ཆབས་ཅིག རྗེས་མའི་ཆ་ལ་ཡང་མུ་མཐུད་དུ་གསར་རྩོམ་ཐད་འབད་པ་རྒྱུན་འཁྱོངས་བྱས་ནས། ཐེངས་འདིའི་བྱ་དགའ་གནང་མཁན་གྱི་ལས་ཁུངས་དང་སྦྱིན་བདག་ངོ་གནོང་མི་དགོས་པ་དང་། ཀློག་པ་པོ་རྣམས་ཀྱིས་ཡིད་ཚིམ་པའི་བརྩམས་ཆོས་མང་བོ་འབྲི་བར་འབད་པ་བྱས་ཏེ། བོད་ཀྱི་རྩོམ་རིག་གི་སྡེ་ལ་རང་གི་རིག་པའི་རྩལ་དང་བློ་གྲོས་ཀྱི་ནུས་པ་དབུལ་རྒྱུའི་ཆོད་སེམས་བསྟན། མཚོ་སྔོན་མི་རིགས་དཔེ་སྐྲུན་ཁང་དང་རྨ་ལྷོ་ཁུལ་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱི་འབྲེལ་ཡོད་མགོ་ཁྲིད་ཀྱང་ཚོགས་འདུར་ཞུགས་པར་མ་ཟད་གསུང་བཤད་གནང་།

       ཐེངས་འདིའི་བྱ་དགའི་འགྲོ་སོང་ཐད་མ་དངུལ་གྱི་མཐུན་རྐྱེན་སྦྱོར་མཁན་ནི་ཀན་སུའུ་ཛམ་དཀར་ཨར་ལས་འཛུགས་སྐྲུན་ཚད་ཡོད་ཀུང་སི་ཡིན་ལ། “སྦྲང་ཆར་རྩོམ་རིག་བྱ་དགའ”ཐོབ་མཁན་དང“སྦྲང་ཆར་རྩོམ་རིག་དཔྱད་བརྗོད་བྱ་དགའ”ཐོབ་མཁན་མི་རེར་དམངས་སྒོར8000རེ་དང་། “སྦྲང་ཆར་སྨྱུག་གསར་བྱ་དགའ”ཐོབ་མཁན་མི་རེར་དམངས་སྒོར4000རེའི་བྱ་དགའ་གནང་ལ། དུས་མཚུངས་སུ་བྱ་དགའ་ཐོབ་པའི་བརྩམས་ཆོས་ཀྱི་རྩོམ་སྒྲིག་འགན་འཁུར་པ་པད་མ་དབང་ཆེན་དང་། ཁོན་ཐར་རྒྱལ། སྙིང་རྒྱལ་འབུམ་བཅས་ལ་ཡང་བྱ་དགའི་དངུལ་དང་གཟིགས་བཟོས་ཀྱི་དཔང་ཡིག་གནང་།

       རྩོམ་རིག་བྱ་དགའ་གནང་རྗེས་མཚོ་སྔོན་མི་རིགས་དཔེ་སྐྲུན་ཁང་གི་ཧྲེ་ཀྲང་ངམ་སྤྱི་ཁྱབ་རྩོམ་སྒྲིག་པ་བསམ་གྲུབ་ལགས་ཀྱིས་སྤྱི་བསྡོམས་གསུང་བཤད་གནང་བ་དང་། ཐེངས་འདིའི་རྩོམ་རིག་བྱ་དགའི་སྦྱིན་བདག་ཀན་སུའུ་ཛམ་དཀར་ཨར་ལས་འཛུགས་སྐྲུན་ཚད་ཡོད་ཀུང་སིའི་འགན་འཛིན་པ་ནོར་བུ་ལགས་ལ་དྲན་རྟེན་གྱི་རྟགས་མ་གནང་།

       བྱ་དགའ་སྩོལ་བའི་མཛད་སྒོ་གྲོལ་མ་ཐག མཚོ་སྔོན་མི་རིགས་དཔེ་སྐྲུན་ཁང་གི་ཧྲེ་ཀྲང་གཞོན་པའམ་སྤྱི་ཁྱབ་རྩོམ་སྒྲིག་པ་གཞོན་པ་བཀྲ་ཤིས་དོན་གྲུབ་ཀྱིས་མགོ་འཛིན་མཛད་ནས“བཅོལ་གདམས་ཡིད་ལ་དམ་བཅངས་ཏེ། །དྲིན་གཟོའི་སྒོ་ནས་མདུན་དུ་སྐྱོད”ཅེས་པའི་རྩོམ་རིག་གསར་རྩོམ་བགྲོ་གླེང་གི་མགོ་བརྩམས། ཚོགས་ཐོག་ཏུ་བདུད་ལྷ་རྒྱལ་དང་། རིན་ཆེན་བཀྲ་ཤིས། ཡུལ་ལྷ་ཐར། དཔའ་རྩེ། བྱ་མདོ་དོན་གྲུབ་ཚེ་རིང་། མཚོ་སྐྱེས། ཕྱག་རྡོར་ཚེ་རིང་། ཆས་པ་རྟ་མགྲིན་ཚེ་རིང་། འབྲོང་བུ་རྡོ་རྗེ་རིན་ཆེན། རང་སྒྲ། མཛེས་སེ། རེ་རྐང་གླིང་། ཁྱུང་ཐར་རྒྱལ། རིག་ལྡན་རྒྱ་མཚོ་སོགས་རྩོམ་རིག་དཔྱད་བརྗོད་པ་དང་རྩོམ་པ་པོ། རྩོམ་སྒྲིག་པ་བཅུ་ལྷག་གིས་བགྲོ་གླེང་གི་བརྗོད་གཞི་དང་འབྲེལ་ཏེ། རང་རང་གི་ལྟ་ཚུལ་ལྷུག་པོར་བརྗོད། ཚོགས་ཞུགས་པ་རྣམས་ཀྱིས་ཀྱང་བོད་ཀྱི་དེང་རབས་རྩོམ་རིག་དང་སྒོས་སུ«སྦྲང་ཆར»དུས་དེབ་བརྗོད་གཞིར་བཟུང་སྟེ། ད་ལྟའི་རྩོམ་རིག་བརྩམས་ཆོས་ཀྱི་དགེ་སྐྱོན་དང་ལེ་ཚན་སྒྲིག་སྟངས། བརྗོད་བྱ་དང་རྗོད་བྱེད་སོགས་ཀྱི་ཐད་ནས་བགྲོ་གླེང་གྱ་ནོམ་པ་བྱས་སོ། །

       ཐེངས་འདིའི་ཚོགས་འདུ་ནི་མཚོ་སྔོན་ཞིང་ཆེན་རྨ་ལྷོ་ཁུལ་ཐུན་རིན་གྲོང་ཁྱེར་གྱི་རྨ་ལྷོ་སྒྱུ་རྩལ་ཁང་དུ་བསྡུས་པ་དང་། མཚོ་སྔོན་མི་རིགས་དཔེ་སྐྲུན་ཁང«སྦྲང་ཆར»རྩོམ་སྒྲིག་ཁང་གིས་གཙོ་སྒྲུབ་བྱས་ཤིང་། མཚོ་སྔོན་ཞིང་ཆེན་རྨ་ལྷོ་ཁུལ་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་རྩོམ་པ་པོའི་མཐུན་ཚོགས་ཀྱིས་རོགས་སྒྲུབ་བྱས་ལ། འབྲེལ་ཡོད་མགོ་ཁྲིད་དང་རྩོམ་པ་པོ། རྩོམ་སྒྲིག་པ་སོགས་མི་སྣ་དྲུག་ཅུ་ལྷག་ཚོགས་འདུར་ཞུགས།