«ཧི་མ་ལ་ཡའི་དབྱངས་རོལ་གྱི་བསྟན་བཅོས»མཉམ་སྤྱོད་ཚོགས་འདུ་འཚོགས་པ།
རྩོམ་པ་པོ།：
ཡོང་ཁུངས།：ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།
དུས་ཚོད།：2024-10-12
ཀློག་གྲངས།：
ཟླ10ཚེས11ཉིན་གྱི་སྔ་དྲོ«ཧི་མ་ལ་ཡའི་དབྱངས་རོལ་གྱི་བསྟན་བཅོས»ལྟ་ཀློག་མཉམ་སྤྱོད་ཚོགས་འདུ་དེ་ཁྲེན་ཏུའུ་གྲོང་ཁྱེར་ཐེན་ཧྥུའུ་དཔེ་དེབ་འགྲེམ་ཚོགས་ལྟེ་གནས་སུ་འཚོགས་པ་དང་། དེབ་དེ་ནི་སི་ཁྲོན་གྱི་ཞིང་ཆེན་རིམ་པའི་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་སྐུ་རྒྱབ་ཚུལ་ཁྲིམས་སྙིང་པོས་བརྩམས་ཤིང་སི་ཁྲོན་མི་རིགས་དཔེ་སྐྲུན་ཁང་གིས་དཔེ་སྐྲུན་འགྲེམ་སྤེལ་བྱས་པ་ཞིག་རེད།
ཚོགས་འདུའི་ཐོག དེབ་དེའི་རྩོམ་པ་པོ་སྐུ་རྒྱབ་ཚུལ་ཁྲིམས་སྙིང་པོས་གསར་རྩོམ་གྱི་བརྒྱུད་རིམ་དང་ཉམས་མྱོང་ལྷུག་པོར་བརྗོད་པ་དང་། སི་ཁྲོན་མི་རིགས་དཔེ་སྐྲུན་ཁང་གི་འགོ་འཛིན་གཞོན་པ་འོད་ཟེར་གྱིས་དེབ་དེ་དཔེ་སྐྲུན་གྱི་དོན་སྙིང་སོགས་ཀྱི་ཐད་ནས་གཏམ་བཤད་སྤེལ་བ་མ་ཟད། དེབ་དེ་དཔེ་སྐྲུན་འགྲེམ་སྤེལ་བྱས་པ་དེས་ཀློག་པ་པོར་མི་རིགས་ཀྱི་རོལ་མོའི་རིག་གནས་འཕེལ་རྒྱས་དང་རྒྱུན་འཛིན་ལ་སྐུལ་འདེད་གཏོང་བའི་ཐད་ནུས་པ་ངེས་ཅན་ཐོན་རྒྱུ་ཡིན་པའི་ངོས་འཛིན་གནང་ཡོད།
བོད་ཀྱི་གཞས་གདངས་རྩོམ་མཁན་གྲགས་ཅན་ཆོས་རྒྱ་མཚོ་སོགས་རོལ་མོ་དང་སྒྱུ་རྩལ་མཁས་པ་ཁག་གཅིག་གིས་ཡུལ་དངོས་ནས་དེབ་དེ་ལྟ་ཀློག་གི་མྱོང་ཚོར་མཉམ་སྤྱོད་གནང་ཡོད། གཞན་ཡང་། སྨྱན་སྦྱོར་ཁག་གི་གསར་འགོད་པ་དང་ཀློག་པ་པོ་སོགས་ཁྱོན་མི་བརྒྱ་ཙམ་བྱེད་སྒོའི་ནང་ཞུགས་ཡོད།
ཤེས་རྟོགས་བྱུང་བར་གཞིགས་ན། «ཧི་མ་ལ་ཡའི་དབྱངས་རོལ་གྱི་བསྟན་བཅོས»ཅེས་པའི་དེབ་དེའི་ནང་། དབྱངས་རོལ་གྱི་བྱུང་བ་དང་གོ་དོན། དབྱངས་ཇི་ལྟར་སློབ་ཚུལ་དང་། སྒྲ་དང་དབྱངས་དང་སྙན་དང་འཇེབས་སོགས་ཀྱི་གོ་དོན། དབྱངས་ཡིག་དང་འབྲེལ་ནས་འགྱུར་ཁུག་འདེགས་འཇོག་སོགས་ཀྱིས་མཚོན་པའི་དབྱངས་ཀྱི་རྩ་བའི་དབྱེ་བ་དགུ་དང་ཡན་ལག་གི་དབྱེ་བ་ཉི་ཤུ་རྩ་དྲུག་ངོས་འཛིན་ཚུལ། དབྱངས་ཀྱི་མཐོ་དམན་དང་དལ་མྱུར། ས་མཚམས་སོགས་ཀྱི་ངོ་སྤྲོད། དབྱངས་ཡིག་གི་སྲོལ་དར་ཚུལ་དང་དེའི་མཚོན་དོན་ཁྱད་ཆོས་སོགས་ཀྱི་སྐོར། ད་དུང་འབུད་རྡུང་དཀྲོལ་སྦྲེང་གི་རོལ་ཆ་མི་འདྲ་བ་དྲུག་ཅུ་རེ་བཞིའི་པར་དང་ངོ་སྤྲོད་ཆ་ཚང་། དབྱངས་དང་རང་བྱུང་ཁམས་ཀྱི་འབྲེལ་བ། སྒྲ་དབྱངས་ཉམས་སུ་ལེན་པའི་རིམ་པའམ་དབྱངས་རོལ་སེམས་ཁམས་རིག་པའི་སྐོར། དེ་མིན་མགྲིན་པའི་རྩ་མདུད་གྲོལ་ཚུལ་དང་དབུགས་སྣ་རིང་དུ་གཏོང་བའི་ཐབས་ལམ་སོགས་བཀོད་ཡོད་པ་རེད།
འབྲེལ་ཡོད་འོས་སྦྱོར།
