ཨ་མདོ་བརྙན་འཕྲིན་གཏོང་མགོ་ཚུགས་ནས་ལོ་འཁོར༤༠ལོན་པའི་བཞུགས་མོལ་ཚོགས་འདུ་དང་རིག་རྩལ་དགོང་ཚོགས་འཚོགས།

       ཟླ་བཅུ་པའི་ཚེས༡༨ཉིན་གྱི་སྔ་དྲོར། ཨ་མདོ་བརྙན་འཕྲིན་གཏོང་མགོ་ཚུགས་ནས་ལོ་འཁོར་༤༠ལོན་པའི་བཞུགས་མོལ་ཚོགས་འདུ་འཚོགས་པ་རེད། མཚོ་སྔོན་ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་མི་དམངས་སྲིད་གཞུང་གི་ཀྲུའུ་རེན་ཁྲེན་ཀང་དང་། མཚོ་སྔོན་ཞིང་ཏང་ཨུའི་ཧྲུའུ་ཅི་གཞོན་པ། ཞིང་ཆེན་མི་དམངས་སྲིད་གཞུང་གི་འགོ་འཛིན་ཝུའུ་ཞའོ་ཅུན་གཉིས་ཀྱིས་ཤིས་འཕྲིན་ཕུལ་བ་དང་། མཚོ་སྔོན་ཞིང་ཆེན་ཏང་ཨུའི་རྒྱུན་ཨུ།དྲིལ་བསྒྲགས་པུའུ་ཡི་པུའུ་ཀྲང་ཝང་ཏཱ་ནན་གྱིས་གསུང་བཤད་གནང་། མཚོ་སྔོན་ཞིང་ཆེན་སྲིད་གཞུང་གི་འགོ་འཛིན་གཞོན་པ་ཝང་ཧའེ་ཧུང་གིས་ཚོགས་འདུ་གཙོ་སྐྱོང་གནང་བ་དང། ཞིང་ཆེན་སྲིད་གྲོས་ཀྱི་ཀྲུའུ་ཞི་མཱ་ཧྥེང་ཧྲེང་ཚོགས་འདུར་ཞུགས་པ་རེད།

       ཁྲེན་ཀང་དང་ཝུའུ་ཞའོ་ཅུན་གཉིས་ཀྱི་ཤིས་འཕྲིན་ནང་། ལོ་ངོ་བཞི་བཅུའི་རིང་ལ་ཨ་མདོ་བརྙན་འཕྲིན་གྱིས་ཏང་གིས་འཕྲིན་སྦྱོར་དོ་དམ་བྱེད་པའི་རྩ་དོན་རྒྱུན་འཁྱོངས་དང་། ཆབ་སྲིད་པས་བརྙན་འཕྲིན་ཁང་འཛུགས་པ་རྒྱུན་འཁྱོངས་བྱས་ཏེ། ཏང་གི་གསུང་སྐད་སྒྲོག་པ་དང་། མི་དམངས་མང་ཚོགས་ཀྱི་རེ་འདུན་མཚོན་པ། མཚོ་སྔོན་གྱི་འཕེལ་རྒྱས་བརྒྱུད་རིམ་ཟིན་ཐོར་འགོད་པ། བོད་འབྲེལ་ས་ཁུལ་གྱི་འཕོ་འགྱུར་གླེང་བ། མི་རིགས་སོ་སོའི་མི་དམངས་ཀྱིས་དཀའ་སྤྱད་འབད་བརྩོན་ལ་བསྟོད་གླུ་བླངས་པ་བཅས་བྱས་ནས་ཕུལ་དུ་བྱུང་བའི་ལེ་ཚན་མང་པོ་ཕབ་སྐྲུན་བྱས་ཤིང་། མི་རིགས་འབྲེལ་འདྲིས་དང་ཐུན་མོང་འཕེལ་རྒྱས་ལ་བྱས་རྗེས་གང་ལེགས་བཞག་པ་རེད། རྗེས་ཕྱོགས་ཏང་གི་ཡང་དག་པའི་བསམ་སྲིད་ལམ་ཕྱོགས་དང་གླེང་ཕྱོགས་རྒྱུན་འཁྱོངས་བྱས་ཏེ། ཏང་གི་གཏམ་རྒྱུད་ཡག་མོ་གླེང་ནས། སྤྱི་ཁྱབ་ཧྲུའུ་ཅི་ཞི་ཅིན་ཕིང་དང་ཏང་ཀྲུང་དབྱང་གི་ཐུགས་ཁུར་དེ་བོད་འབྲེལ་ས་ཁུལ་གྱི་མི་དམངས་མང་ཚོགས་ལ་ལེགས་པར་སྒྲོག་པ་དང་། མི་རིགས་སོ་སོའི་མང་ཚོགས་ཀྱིས་ཏང་གི་ཁ་ལ་ཉན་པ་དང་། ཏང་གི་བཀའ་དྲིན་དྲན་པ། ཏང་གི་རྗེས་སུ་འབྲངས་པར་སྣེ་ཁྲིད་དང་སློབ་སྟོན་བྱས་ནས། ཨ་མདོའི་བརྙན་འཕྲིན་ཁང་ནི་ཏང་གི་གསུང་སྐད་སྒྲོག་པ་དང་། མི་རིགས་ཀྱི་ཕུལ་བྱུང་རིག་གནས་དར་སྤེལ་གཏོང་བ། མི་རིགས་མཐུན་སྒྲིལ་ལ་སྐུལ་མ་གཏོང་བ། མཚོ་སྔོན་གྱི་སྣང་བརྙན་མཚོན་པ་བཅས་ཀྱི་བརྒྱུད་སྒྲོག་སྟེགས་བུ་གལ་ཆེན་ཞིག་ཏུ་འཛུགས་སྐྲུན་བྱས་ནས། ཁྱོན་ཡོངས་ནས་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་བྱེད་པའི་མཚོ་སྔོན་གྱི་ལེའུ་གསར་དུ་བསྐྲུན་པར་བསམ་བློའི་ཁག་ཐེག་དང་བསམ་བློའི་སྟོབས་ཤུགས་མཁོ་འདོན་བྱེད་དགོས་ཞེས་བསྟན་པ་རེད།

       ཚོགས་འདུའི་ཐོག་མཚོ་སྔོན་ཞིང་ཆེན་ཏང་ཨུའི་རྒྱུན་ཨུ། དྲིལ་བསྒྲགས་པུའུ་ཡི་པུའུ་ཀྲང་ཝང་ཏཱ་ནན་གྱིས་མཚོ་སྔོན་རྒྱང་སྒྲོག་བརྙན་འཕྲིན་ཁང་ལ་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་ཚོགས་པ་ཞེས་པའི་གཟེངས་རྟགས་དང་མིང་བྱང་གནང་བ་དང་། ཚོགས་ཞུགས་མགོ་ཁྲིད་རྣམ་པས་ཨ་མདོ་བརྙན་འཕྲིན་ཁང་གཏོང་མགོ་ཚུགས་ནས་ལོ་འཁོར་༤༠ལོན་པའི་རིང་གི་ལས་དོན་ཁྲོད་དུ་བྱས་རྗེས་བཞག་པའི་མི་སྣར་དཔང་ཡིག་གནང་བ་དང་། ན་གཞོན་ལས་སྒྲུབ་པ་དང་ལས་འཁྱུར་ངལ་གསོ་བ། ལྟད་མོ་བ་བཅས་ཀྱི་འཐུབ་ཚབ་ཀྱིས་གཏམ་བཤད་བྱས་པ་རེད།

       ཟླ༡༠ཚེས༡༨ཉིན་གྱི་དགོང་མོར། ཨ་མདོ་བརྙན་འཕྲིན་གཏོང་མགོ་ཚུགས་ནས་ལོ་འཁོར༤༠ལོན་པར་རྟེན་འབྲེལ་ཞུ་བའི་རིག་རྩལ་སྤྲོ་ཚོགས༼དུས་གསུམ་གྱི་གཟི་བྱིན༽ཞེས་པ་དེ་མཚོ་སྔོན་རྒྱང་སྒྲོག་བརྙན་འཕྲིན་ཁང་གི་འཁྲབ་གཏོང་ཚོམས་ཆེན་ནས་གཟབ་རྒྱས་ངང་བསྡུས་པ་རེད།

       ༼དུས་གསུམ་གྱི་གཟི་བྱིན༽ཞེས་པའི་རིག་རྩལ་སྤྲོ་ཚོགས་གྱིས་ཨ་མདོ་བརྙན་འཕྲིན་གཏོང་མགོ་ཚུགས་ནས་ལོ་ངོ་བཞི་བཅུའི་རིང་གི་འཕེལ་རྒྱས་ལམ་བུ་དང་ད་ལྟའི་གྲུབ་འབྲས། མ་འོངས་པའི་འགན་འཁྲི་བཅས་བརྗོད་གཞི་གཙོ་བོར་བཟུང་སྟེ། ཨ་མདོ་བརྙན་འཕྲིན་གྱི་འདས་ཟིན་པའི་བཤུལ་ལམ་ལ་ཕྱི་མིག་དང་མ་འོངས་པའི་འཕེལ་རྒྱས་ཀྱི་འཐབ་ལམ་གསར་བར་རྒྱང་ལྟ་བྱེད་པའི་རྣམ་པས། ཨ་མདོ་བརྙན་འཕྲིན་གྱིས་ཞིང་ཆེན་ཏང་ཨུའི་ཡང་དག་པའི་དབུ་ཁྲིད་དང་། ལས་བྱེད་མི་སྣ་རབ་དང་རིམ་པའི་དཀའ་སྤྱད་འབད་བརྩོན། དེ་མིན་བོད་འབྲེལ་ས་ཁུལ་གྱི་རྒྱ་ཆེའི་ལྟད་མོ་བའི་མང་ཚོགས་ཀྱི་རྒྱབ་སྐྱོར་བཅས་ལ་བརྟེན་ནས། མཚར་སྡུག་འོད་སྟོང་ལྡན་པའི་གྲུབ་འབྲས་བླངས་པ་ལ་རྗེས་སུ་ཡི་རང་དང་བསྔགས་བརྗོད་མཛད་ཡོད།