མཚོ་ལྷོ་ཁུལ་མི་རིགས་མཐོ་འབྲིང་དང་པོས་བྲིས་པ་ཆུང་ཆུང་རྟགས་མའི་ཡིག་གཟུགས་འགྲན་སྡུར་སྐབས་བཅུ་བདུན་པ་སྤེལ་བ།

       ཐེངས་འདིའི་ཡིག་གཟུགས་འགྲན་སྡུར་གྱིས་སློབ་རའི་འཚོ་བ་ལ་སྔར་ལས་ལྷག་པའི་མཛེས་སྡུག་ཅིག་བསྐྲུན་ཡོད་པ་མ་ཟད། སློབ་མའི་ཡིག་གཟུགས་ཀྱི་ཆུ་ཚད་ཀྱང་གསལ་བོར་མཚོན་ཐུབ། སློབ་མ་རྣམས་ནི་མི་རིགས་རང་གི་སྐད་དང་ཡི་གེ་ལ་དགའ་ཞིང་། མི་རིགས་རང་གི་སྐད་དང་ཡི་གེའི་རྒྱུན་འཛིན་པ། དེ་ལས་བྱུང་བའི་དགའ་མགུ་དང་ཡིད་ཆེས་ཀྱིས་ཡིད་སེམས་རབ་ཏུ་སྤྲོ་བའི་རྣམ་པ་ཞིག་ཀྱང་མངོན་ཐུབ།
       འདི་ལྟ་བུའི་ཡིག་གཟུགས་འགྲན་སྡུར་སྤེལ་བ་དེས་སློབ་མ་རྣམས་ཀྱིས་ཡིག་གཟུགས་ཚད་ལྡན་དུ་བྲི་བ་ལ་རྨང་བཏིང་ཡོད་པ་མ་ཟད། ཡིག་གཟུགས་ལ་གཟབ་ནན་དང་དོ་སྣང་གལ་ཆེ་བ་བྱ་དགོས་པའི་གནས་ལུགས་ཀྱང་ཞར་ལ་བསྟན་ཡོད། ཡིག་གཟུགས་ནི་ཡི་གེའི་གཟུགས་ཙམ་ཕབ་སྟེ་རྩེད་འཇོའི་གར་ལ་རོལ་བ་ཙམ་མ་ཡིན་པར། ཆ་ཚང་བའི་མ་ལག་ཅིག་རྒྱུན་འཛིན་བྱེད་པ་ཡིན་པས་འདི་ལས་ཡབ་མེས་ཚོའི་བློ་གྲོས་ཀྱི་ཉིང་བཅུད་དང་གསར་གཏོད་ཀྱི་སྙིང་སྟོབས་མཚོན་པ་ཡིན། ང་ཚོས་ལག་ལ་གང་བྱུང་བྲི་བ་གཙོ་བོ་མ་ཡིན་པར་བྲིས་རྒྱུན་ཡོད་པའི་ཁུངས་གཙང་མ་ཞིག་བྲི་རྒྱུ་ནི་ཡིག་གཟུགས་རྒྱུན་འཛིན་དང་འཕེལ་རྒྱས་ཀྱི་ཐབས་གཙོ་བོ་ཞིག་ཡིན་པ་མ་ཟད། ཡིག་གཟུགས་སྒྱུ་རྩལ་ལ་སེམས་ཀྱི་གཏིང་ནས་བཀུར་བཟོ་ཞུ་སྟངས་ཤིག་ཀྱང་ཡིན།