མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་དང་པོས་སློབ་མའི་རྩོད་གླེང་འགྲན་སྡུར་འདི་འདྲ་ཞིག་སྤེལ།

       མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་དང་པོའི་སློབ་གྲྭའི་ཏང་ཀྲི་པུའུ་དང་པོ་དང་མཐོ་གཉིས་ལོ་རིམ་ཁག་བོད་ཡིག་སློབ་ཁྲིད་གྲ་སྒྲིག་ཚན་ཁག་གཉིས་ཀྱིས་མཉམ་འབྲེལ་སྒོས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་བཙུགས་ནས་ལོ་འཁོར༧༥ལོན་པར་རྟེན་འབྲེལ་ཞུ་བ་དང་ཆབས་ཅིག་ཏུ་སློབ་མའི་བསམ་བློ་ཀུན་སྤྱོད་ཐད་ཀྱི་སློབ་གསོར་ཤུགས་སྣོན་དང་། སློབ་རའི་སློབ་སྦྱོང་གི་མཁའ་དབུགས་ལེགས་བཅོས་སུ་གཏོང་བ། ལྷག་པར་དུ་སློབ་མའི་སྨྲ་བརྗོད་ཀྱི་ནུས་པ་དང་གཏན་ཚིགས་བསམ་གཞིགས་ཀྱི་ནུས་པ་སོགས་སྐྱེད་སྲིང་དང་སྦྱོར་བརྡར་བྱ་ཆེད། མཚོ་ལྷོ་ཁུལ་མི་རིགས་མཐོ་འབྲིང་དང་པོའི་མཐོ་གཉིས་ལོ་རིམ་ཁག་བོད་སྐད་ཡིག་སློབ་ཁྲིད་གྲ་སྒྲིག་ཚན་ཆུང་གིས་ཟླ༡༡ཚེས༡ཉིན་གྱི་དགོང་དྲོའི་ཆུ་ཚོད་བདུན་སྟེང་། སློབ་གྲྭའི་སྙན་ཞུའི་ཚོམས་ཆེན་དུ་སློབ་མའི་རྩོད་གླེང་འགྲན་སྡུར་གཟབ་རྒྱས་ངང་སྤེལ་ཞིང་། སློབ་གྲྭའི་མགོ་ཁྲིད་ཚན་ཁག་དང་རང་རེའི་བོད་ཡིག་བསླབ་ཁག་གི་དགེ་རྒན་རྣམས་བྱ་འགུལ་གྱི་ཡུལ་དངོས་ལ་ཕེབས་ནས་རྩོད་གླེང་གི་རིག་པའི་དགའ་སྟོན་ལ་མྱོང་རོལ་བྱས།

       ཐེངས་འདིའི་འགྲན་སྡུར་དུ་མཐོ་གཉིས་ལོ་རིམ་ཡོངས་ནས་བསྡོམས་པས་སློབ་བུ༥༦ཐོག་མའི་འགྲན་རྩོད་ལ་ཞུགས་ཤིང་། རྟིང་རྩོད་འགྲན་རིམ་ཁྲོད་བློ་རིག་མྱུར་ལ་སྨྲ་ལྕེ་དག་པ། རིགས་ལམ་གསལ་ལ་སྤོབས་པ་ཆེ་བའི་སློབ་གྲོགས༣༢སློབ་བུ་འགྲན་རྩོད་ལ་དངོས་སུ་ཞུགས། སློབ་གྲོགས་ཚོས་དེང་གི་འགྲན་རྩོད་ཀྱི་དུས་འདིར་མི་ཆོས་ཀུན་སྤྱོད་གཙོའམ་རྒྱལ་ཕམ་འགྲན་རྩོད་གཙོ་ཞེས་པ་དང་། དྲ་རྒྱས་སློབ་སྦྱོང་ལ་མཐུན་རྐྱེན་སྐྲུན་ནམ་འགལ་རྐྱེན་བཟོ། སློབ་སྦྱོང་ལ་བརྩོན་པ་གཙོའམ་བྱེད་ཐབས་གཙོ་ལ་སོགས་པ་བརྗོད་གཞིར་བཟུང་ནས་རྩོད་པའི་གཡུལ་ངོར་ཆས། སྔ་རྒོལ་གྱི་རིག་པ་གློག་བཞིན་འཁྱུག་ཚེ། ཕྱི་རྒོལ་གྱི་རྒོལ་ལན་འབྲུག་བཞིན་ལྡིར་བས། འགྲན་སྡུར་ཡུལ་དངོས་ཀྱི་དགེ་སློབ་དགུ་བརྒྱ་ལྷག་གི་ཡིད་ཀྱི་དང་བ་ཅིག་ཅར་དུ་དྲངས་ཤིང་བསྟོད་པའི་མཐེ་བོང་མཁའ་རུ་བསྒྲེངས།

       མ་ཟད་དཔྱད་འདེམ་དགེ་རྒན་རྣམ་པས་རྩོད་སྐོར་རེ་རེའི་ནང་དོན་ལ་གཞིགས་ནས་དྲི་བ་བཏོན་ཞིང་། འགྲན་ཞུགས་སློབ་མ་རྣམས་ཀྱིས་དུས་ཐོག་ཏུ་ལན་བཏབ་སྟེ་རྩོད་པའི་ཡུལ་དངོས་འཁྲུག་ཆ་དོད་པར་བྱས། ཚོགས་རའི་ཛ་དྲག་གི་ཁོར་ཡུག་ལ་དབུགས་དབྱུང་ཕྱིར་བར་མཚམས་སུ་སློབ་གྲོགས་རེ་འགས་སྙན་མོ་གླུ་ཡི་དབྱངས་རྟ་ངག་ལ་བཀུགས། ཐེངས་འདིའི་རྩོད་གླེང་འགྲན་སྡུར་ཁྲོད་མཛེས་བློ་སོགས་སློབ་གྲོགས༨ལ་ཕུལ་བྱུང་རྩོད་གླེང་བའི་བྱ་དགའ་དང་རྡོ་རྗེ་སྒྲོལ་མཚོ་སོགས་སློབ་གྲོགས༢༤ལ་ཕུལ་བྱུང་བྱ་དགའ་ཐོབ།

       མཇུག་ཏུ་རྒན་དངོས་གྲུབ་ཚེ་རིང་ལགས་ཀྱིས་དཔྱད་འདེམ་དགེ་རྒན་རྣམ་པའི་ཚབ་བྱས་ཏེ་འགྲན་སྡུར་གྱི་གནས་ཚུལ་ལ་སྤྱི་སྡོམ་བྱས། ཁོས་འགྲན་ཞུགས་སློབ་གྲོགས་ཡོངས་ཀྱི་ཐོག་མའི་བསྒྲུབ་བྱ་གཏན་ལ་ཕབ་སྟངས་དང་སྒྲུབ་བྱེད་འཚོལ་སྡུད་བྱས་ཚུལ། བར་དུ་རྩོད་པའི་གཡུལ་ངོར་ཞུགས་པའི་ཚེ་ན། སྤོབས་པའི་གདེངས་དང་རིག་པའི་རྩལ། སྐད་ཆའི་ཉམས་འདོན་སྟངས་སོགས་ཟུར་ངོས་མི་འདྲ་མང་པོ་ནས་རྣག་ཐོག་ཁབ་གཙགས་ཀྱི་ཚུལ་དང་ཞ་རར་ལམ་སྟོན་གྱི་ཚུལ་གྱིས་གོ་བསྐོན་བློ་འགུགས་ཀྱི་གཏམ་མང་དུ་བཤད་དེ་ཡུལ་དངོས་ཀྱི་སློབ་གྲོགས་ཡོངས་ལ་སེམས་འཛིན་གྱི་ཚིག་དང་རུམ་འཛིན་གྱི་བྲོ་མང་དུ་བྱིན།