རྨ་ལྷོ་ཁུལ་གྱི་སློབ་འབྲིང་སློབ་མའི་ལྷུག་རྩོམ་འགྲན་བསྡུར་སྐབས་ལྔ་པའི་བྱ་དགའ་སྤྲོད་པའི་མཛད་སྒོ་རེབ་གོང་དུ་བསྡུས་པ།

       རེབ་འདིའི་འགྲན་བསྡུར་ལ2025ལོའི་ཟླ9པའི་ཚེས26ཉིན་ནས2026ལོའི་ཟླ7པའི་ཚེས30ཉིན་བར་འགྲན་ཞུགས་རྩོམ་ཡིག170ལྷག་འབྱོར་བ་ལས་ལེགས་འདེམས་བྱས་པ་བརྒྱུད། བརྩམས་ཆོས90ཙམ«རྨ་ལྷོ་ཚགས་པར»དང«རྨ་ལྷོ་བོད་ཡིག་ཚགས་པར»དུ་བཀོད་པ་དང་། དཔྱད་འདེམས་ཨུ་ལྷན་གྱིས་སྔ་ཕྱི་ཐེངས་གསུམ་ལ་དཔྱད་འདེམས་བྱས་པ་བརྒྱུད་བརྩམས་ཆོས24ལ་བྱ་དགའ་སྤྲད།        བྱ་འགུལ་གྱི་མཇུག་ཏུ། རྨ་ལྷོ་ཁུལ་ཨུའི་དྲིལ་སྒྲོག་པུའུ་ཡི་པུའུ་ཀྲང་གཞོན་པའམ་རྨ་ལྷོ་ཁུལ་མཉམ་འདྲེས་སྨྱན་སྦྱོར་ལྟེ་གནས་ཀྱི་ཀྲུའུ་རེན་རྟ་མགྲིན་རྡོ་རྗེ་ཡིས་གཏམ་བཤད་གནང་སྐབས་བསྟན་དོན། རྨ་ལྷོ་ཁུལ་གྱི་སློབ་འབྲིང་སློབ་མའི་ལྷུག་རྩོམ་འགྲན་བསྡུར་སྐབས་དང་པོ་ནས་སྐབས་ལྔ་པའི་བར་ཐོག་མའི་བསམ་འདུན་ལ་གཡོ་བ་མེད་པར་འགྲན་བསྡུར་འདི་བསྟུད་མུར་སྤེལ་ཅིང་། རྨ་ལྷོ་ཁུལ་མཉམ་འདྲེས་སྨྱན་སྦྱོར་ལྟེ་གནས་ཀྱི་ཚགས་པར་དང་འཕྲིན་སྟེགས་ཀྱི་སྡིངས་ཆ་ལེགས་པར་སྤྱད་ནས་རང་ཁུལ་གྱི་སློབ་མ་རྣམས་ལ་རྩོམ་ཡིག་འགྲན་བསྡུར་གྱི་གར་སྟེགས་ལེགས་པོ་བསྐྲུན་པ་ཡིན། རྨ་ལྷོ་ཁུལ་མཉམ་འདྲེས་སྨྱན་སྦྱོར་ལྟེ་གནས་ནི་བསམ་བློ་དྲིལ་སྒྲོག་གི་འཐབ་ར་དང་པོ་ཡིན་པའི་ཆ་ནས། རྗེས་ཕྱོགས་མུ་མཐུད་དུ་རྨ་ལྷོའི་ན་གཞོན་སློབ་མ་རྣམས་ཀྱིས་ཕ་ཡུལ་དང་འཚོ་བ་ལ་བཅངས་པའི་བརྩེ་བ་མཚོན་པའི་རྩོམ་ཡིག་ལེགས་པོ་དག་སྡིངས་ཆ་འདི་བརྒྱུད་ནས་ཕྱི་ལ་སྟོན་པ་དང་། རྨ་ལྷོའི་ལོ་ཆུང་གཞོན་ནུའི་ཉམས་འགྱུར་བཟང་པོ་ཕྱིར་མཚོན་བྱ་རྒྱུ་ཡིན་པ་དང་།  མུ་མཐུད་དུ་འགྲན་བསྡུར་འདི་ཇེ་ལེགས་ཇེ་རྒྱས་སུ་བཏང་ནས་རྨ་ལྷོའི་གཞོན་ནུ་སློབ་མ་རྣམས་ཀྱི་འཚར་ལོངས་ལ་སྔར་ལས་ལྷག་པའི་གར་སྟེགས་བཟང་པོ་བསྐྲུན་རྒྱུ་ཡིན། རེ་བར་གཅིག་ནས་སྨྱུ་གུ་ལ་བརྟེན་ནས་ཕ་ཡུལ་གྱི་འཕེལ་རྒྱས་དང་འགྱུར་ལྡོག་དྲིལ་སྒྲོག་བྱེད་པའི་ཕ་ཡུལ་གྱི་སྒྲོག་སྤེལ་མཁན་ཆུང་ཆུང་བྱེད་པ་དང་། གཉིས་ནས་སེམས་ལ་མེས་རྒྱལ་དང་ཕུགས་བསམ་བཅངས་ཏེ་ཁུར་ཆེན་འདེགས་བཟོད་པའི་ཀུན་སྤྱོད་སྐྱེད་སྲིང་བྱེད་པ། གསུམ་ནས་རྒྱུན་མཐུད་འགྱུར་མེད་ངང་དགའ་ཕྱོགས་བརྟན་སྲུང་བྱས་ཏེ་རྩོམ་ཡིག་གིས་འཚོ་བ་མཚོན་པ་དང་སེམས་འདུན་མཚོན་པ། ཡ་རབས་ལང་ཚོ་ཡི་མིག་དཔེ་སྟོན་དགོས་ཞེས་ཟེར།