སི་ཁྲོན་བོད་ཡིག་གནའ་དཔེ་ལེགས་སྒྲིག་ཁང་གི་གནའ་དཔེ་ལེགས་སྒྲིག་པར་སྐྲུན་གྲུབ་འབྲས་འགྲེམས་སྟོན་དང་དཔེ་སྦྱིན་མཛད་སྒོ་མཚོ་སྔོན་དུ་བསྐྱོད་པ་ཞེས་པ་གནའ་མཁར་ཟི་ལིང་དུ་འཚོགས།

       སི་ཁྲོན་ཞིང་ཆེན་སྤོས་ལྡན་བོད་ཡིག་གཙུག་ལག་རྟེན་མཛོད་གླིང་གི་དབུ་འཛིན། སི་ཁྲོན་བོད་ཡིག་གནའ་དཔེ་ལེགས་སྒྲིག་ཁང་གི་སྤྱི་ཁྱབ་ལག་བསྟར་གཙོ་སྒྲིག་པ་ཀླུ་རྡེའུ་རྟ་མགྲིན་སྐྱབས་ཀྱིས། སྤོས་ལྡན་བོད་ཡིག་གཙུག་ལག་ལས་དོན་ཚོམས་ཀྱི་གནའ་དཔེ་ལེགས་སྒྲིག་པར་སྐྲུན་དང་སྲུང་སྐྱོབ་བེད་སྤྱོད་ཀྱི་གནས་ཚུལ་ངོ་སྤྲོད་གནང་། ཁོང་གིས་མཚམས་སྦྱོར་གནང་བ་ལྟར་ན། ལས་དོན་ཚོམས་དེ་ནི་སི་ཁྲོན་བོད་ཡིག་གནའ་དཔེ་ལེགས་སྒྲིག་ཁང་དང་སི་ཁྲོན་ཞིང་ཆེན་སྤོས་ལྡན་བོད་ཡིག་གཙུག་ལག་རྟེན་མཛོད་གླིང་། མི་རིགས་ཡིག་ཚངས་འགྲེམས་སྟོན་ཁང་། མ་ལ་ཡ་དཔེ་མཛོད་ཁང་། བོད་ཀྱི་རིག་གནས་མངོན་མིན་ཤུལ་བཞག་བརྒྱུད་སྤེལ་མྱོང་རོལ་ལྟེ་གནས། སི་ཁྲོན་ཞིང་ཆེན་སྤོས་ལྡན་བོད་ཡིག་གཙུག་ལག་རྟེན་མཛོད་གླིང་གི་ཏང་ཀྲི་པུའུ་བཅས་ལས་གྲུབ་པ་དང་། ལས་དོན་སྒྲུབ་ཕྱོགས་ཐད་གནའ་དཔེ་ལེགས་སྒྲིག་དང་སྲུང་སྐྱོབ། བེད་སྤྱོད། གསུང་རབ་འགྲེམས་སྟོན། དཔེ་ཀློག་ཁྱབ་གདལ། མངོན་མིན་རིག་གནས་ཤུལ་བཞག་རྒྱུན་འཛིན། ཏང་འཛུགས་ལས་ཀ་སོགས་བརྗོད་བྱ་སྣ་མང་འདུས་ཡོད།        ཡུས་ཧྲུའུ་ཁུལ་དཔེ་མཛོད་ཁང་གི་འགོ་གཙོ་གཞོན་པ་ཉིའུ་ཡུང་ཧྲེང་གིས། དཔེ་སྦྱིན་གནང་ཡུལ་ལས་ཁུངས་ཀྱི་སྐུ་ཚབ་མཛད་དེ་གཏམ་བཤད་གནང་། ཁོང་གིས་དཔེ་ཆ་འདི་དག་ལ་གཅེས་སྤྲས་དང་བེད་སྤྱོད་ལེགས་པོ་བྱ་རྒྱུ་ཡིན་པ་དང་། དཔེ་ཆ་དེ་དག་ལ་ཐོ་འགོད་ཞིབ་ཚགས་གནང་སྟེ། དཔེ་ཀློག་ཞབས་ཞུའི་ལས་དོན་ཡག་པོ་གཉེར་རྒྱུ་མ་ཟད། དཔེ་ཆ་དེ་དག་གིས་སློབ་ཁྲིད་དང་ཚན་རིག་ཞིབ་འཇུག །སྤྱི་པའི་དཔེ་ཀློག །གནའ་དཔེ་སྲུང་སྐྱོབ་བཅས་ལ་ཕན་འབྲས་དངོས་སུ་ཐོན་པར་བྱ་རྒྱུ་ཡིན་ཞེས་གསུངས།