མཚར་སྡུག་གི་གུང་ཧོའི་མཛེས་ཉམས་གསར་བ་མངོན།

       མཚོ་ལྷོ་བོད་རིགས་རང་སྐྱོང་ཁུལ་བཙུགས་ནས་ལོ་འཁོར༧༠ཐོན་ལ་ཉེ་བའི་སྐབས་འདིར། གུང་ཧོ་རྫོང་སྡོད་ཁང་འཛུགས་སྐྲུན་ཅུ་ཡིས་གྲོང་ཁྱེར་གྱི་མཚན་མོའི་གློག་སྒྲོན་དང་ཁོར་ཡུག་མཛེས་བཟོ་བྱེད་པ་གཉིས་ཟུང་འབྲེལ་བྱས་ཏེ། དྭངས་གཙང་དཔལ་ཡོན་ལྡན་པའི་གྲོང་ཁྱེར་གྱི་ཁོར་ཡུག་གསར་བ་ཞིག་བསྐྲུན་པར་ནུས་ཤུགས་བཏོན་ཡོད་ལ། གྲོང་ཁྱེར་གྱི་གྲུ་ཟུར་རེ་རེ་ལ་ས་གནས་ཀྱི་ཁྱད་ཆོས་ལྡན་ཞིང་དུས་ཆེན་གྱི་ཉམས་སྣང་མཚོན་པའི་གློག་སྒྲོན་དང་པར་རིས། བཟོ་བཀོད་སོགས་གསར་དུ་སྒྲིག་ཡོད་པར་སྔོན་དང་མི་འདྲ་བ་ཞིག་ཏུ་གྱུར་འདུག

       གུང་ཧོ་རྫོང་སྡོད་ཁང་འཛུགས་སྐྲུན་ཅུའུ་ཡིས་མཚོ་སྔོན་པོའི་ལམ་དང་རྨ་ཆུའི་ལམ་འགྲམ་གྱི་གློག་སྒྲོན༣༧༠ལྷག་གསར་དུ་བརྗེ་སོར་བྱས་ཏེ། མཁར་གྲོང་རྙིང་བའི་ཞིག་རལ་གྱི་གནད་དོན་ཐག་གཅོད་བྱས་ཤིང་། ལམ་འགྲམ་གྱི་གད་སྙིགས་སྒམ་དང་མེ་ཏོག སྤྱི་སྤྱོད་རླངས་འཁོར་སྒུག་གནས། མི་འགྲོད་ལམ། བར་གྱང་ལྕགས་ར་སོགས་གསར་དུ་སྒྲིག་ཏེ་མང་ཚོགས་ཀྱི་འཚོ་བའི་ཁོར་ཡུག་ལེགས་བཅོས་དང་ཁོར་ཡུག་མཛེས་བཟོ། བདེ་འཇགས་བགྲོད་ལམ། མཚན་མོའི་གློག་འོད་སོགས་ཀྱི་རྨང་གཞིའི་སྒྲིག་ཆས་གང་ལེགས་བསྐྲུན་པ་དང་། འགྲོ་སོང་སྒོར་ཁྲི༣༠སྤྱད་ནས་པེན་ཧུའུ་ཤར་ལམ་གྱི་ཁམས་གསོ་སྤྱི་གླིང་འཛུགས་སྐྲུན་བྱས་ཤིང་། འགྲོ་སོང་སྒོར་ཁྲི༥༠སྤྱད་ནས་ཆབ་ཆ་གྲོང་ཁུལ་སྲང་ལམ་གྱི་གློག་སྒྲོན༨༦༣བརྗེ་སོར་བྱས་ཡོད་པ་དང་། མཁར་བྱང་ཁུལ་གསར་གྱི་གློག་སྣོན་སྒྱུར་ཆས་གཉིས་གསར་དུ་བསྣན་ཡོད།

       མང་ཚོགས་ལ་མཚན་མོའི་སྤྲོ་གསེང་ཁོར་ཡུག་བཟང་པོ་ཞིག་སྐྲུན་ཏེ། མི་རྣམས་ཀྱི་བདེ་སྐྱིད་ཀྱི་ཚད་མཐོ་རུ་གཏོང་ཆེད། གུང་ཧོ་རྫོང་གིས་མ་དངུལ་སྒོར་ཁྲི༢༦༥བཏང་ནས་གྲོང་ཁྱེར་གྱི་རྣམ་པ་ལེགས་བཅོས་ཀྱི་བཟོ་སྐྲུན་ལག་བསྟར་དང་། སྤྱི་ལེ་༢ཀྱི་གཞུང་ལམ་གཙོ་བོའི་གཞོགས་གཉིས་ཀྱི་ཤིང་སྡོང་ལ་གློག་སྐུད་དཀྲིས་ཡོད་ལ། གུང་ཧོ་རྫོང་གི་ཟམ་པ༡༠ཡི་གློག་སྒྲོན་ཞིག་གསོ་བྱས། དེ་བཞིན་མཚོན་རྟགས་རང་བཞིན་གྱི་འཇིམ་རྐོས་ཁག་གཅིག་ལ་གློག་སྒྲོན་བསྣན་པ་ཡིན། དེའི་ཁྲོད་དུ་དཀྱིལ་གླིང་མེ་ཏོག་ར་བ་སོགས་འདུས། ཤམ་བྷ་ལྷའི་ཐང་ཆེན་དུ་རྣམ་པ་མི་འདྲ་བའི་གློག་སྒྲོན་བཙུགས་ཏེ། མཚན་མོའི་སྤྲོ་གསེང་དང་དཔལ་འབྱོར་འཕེལ་རྒྱས། གྲོང་ཁྱེར་གྱི་རྣམ་པ་ལེགས་བཅོས་གཏོང་བ་ལ་སྐུལ་འདེད་ཀྱི་ནུས་པ་གལ་ཆེན་ཐོན་སོང་།

       ས་སྲོད་ཀྱི་དུས་ལ་སླེབས་དུས། གྲོང་ཁྱེར་གྱི་སྲང་ལམ་དང་ཐང་ཆེན་ཀུན་ཏུ་གློག་འོད་སྣ་ཚོགས་འོད་ལམ་ལམ་དུ་འཚེར་ཞིང་། མི་ཚོགས་ཀྱང་སྐོར་དང་སྐོར་བྱས་ནས་འཆམ་འཆམ་དུ་ཡོང་བཞིན་ཡོད་ལ། གྲོང་ཁྱེར་གྱི་མཛེས་ལྗོངས་གསར་བ་འདིས་ཡུལ་མི་ཀུན་ལ་ཚོར་སྣང་སྐྱིད་པོ་རེ་སྟེར་བཞིན་ཡོད་པ་མ་ཟད། འཆམ་མཐུན་བདེ་སྐྱིད་ཀྱི་འཚོ་བའི་རྣམ་པ་འདིས་མཚོ་ལྷོ་བོད་རིགས་རང་སྐྱོང་ཁུལ་བཙུགས་ནས་ལོ་འཁོར༧༠ལོན་པར་བསུ་མ་བྱེད་བཞིན་ཡོད། དེ་མིན། རིགས་སོ་སོའི་སྤུན་ཟླ་རྣམས་ཀྱིས་ཀྲུང་གོ་གུང་ཁྲན་ཏང་གི་སྣེ་ཁྲིད་འོག་ཏུ་ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་ལྟ་བ་བསྐྲུན་པ་དང་། འབད་འབུངས་ཡར་བརྩོན་གྱིས་དུས་རབས་གསར་བའི་མི་རིགས་མཐུན་སྒྲིལ་ཡར་ཐོན་གྱི་ལས་དོན་གསར་བ་རྩོམ་པར་འབད་འབུངས་བྱེད་བཞིན་ཡོད།

       མཚན་མོའི་མཛེས་ལྗོངས་ཀྱི་བཟོ་བཀོད་གང་ལེགས་བྱས་པ་འདིས། ས་གནས་མང་ཚོགས་དང་ཡུལ་སྐོར་བ་རྣམས་ལ་སྔ་ན་མེད་པའི་ཚོར་སྣང་སྐྱིད་པོ་ཞིག་དང་རྣམ་པ་གསར་བ་ཞིག་བསྐྲུན་ཡོད་པ་རེད།