རང་སྐྱོང་ཁུལ་བཙུགས་ནས་ལོ་འཁོར70ལོན་པའི་བྱ་འགུལ་མཇུག་སྒྲིལ།
རྩོམ་པ་པོ།：
ཡོང་ཁུངས།：མཚོ་ལྷོ་བོད་ཡིག་ཚགས་པར།
དུས་ཚོད།：2023-08-04
ཀློག་གྲངས།：
མཚོ་ལྷོ་བོད་རིགས་རང་སྐྱོང་ཁུལ་དབུ་བརྙེས་ནས་ལོ་འཁོར70ལོན་པར་རྟེན་འབྲེལ་ཞུ་བའི་རིམ་སྤེལ་རིག་རྩལ་བྱ་འགུལ་བདེ་བླག་ངང་མཇུག་སྒྲིལ།
ཟླ8པའི་ཚེས3ཉིན་གྱི་ཕྱི་དྲོར། མཚོ་ལྷོ་བོད་རིགས་རང་སྐྱོང་ཁུལ་དབུ་བརྙེས་ནས་ལོ་འཁོར70ལོན་པར་རྟེན་འབྲེལ་ཞུ་བའི་རིམ་སྤེལ་རིག་རྩལ་བྱ་འགུལ་བདེ་བླག་ངང་མཇུག་སྒྲིལ་བ་དང་། ད་ལོའི་ཟླ5པ་ནས་བཟུང་། ཁུལ་ཡོངས་ཀྱི་ས་གནས་སོ་སོས་ཁུལ་སྟོན་བསུ་བའི་རིག་རྩལ་དགོང་ཚོགས་དང་རྫོང་ལྔའི་གྲུབ་འབྲས་འགྲེམས་སྟོན་བྱེད་པ་སོགས་ཀྱི་བྱ་འགུལ་སྣ་ཚོགས11སྤེལ་བའི་ཁྲོད་རིག་གནས་བྱ་འགུལ་ཐེངས30ལྷག་ཙམ་སྤེལ།
མཚོ་ལྷོ་ཁུལ་གྱི་ལོ་ངོ་བདུན་ཅུའི་རིང་གི་སྤྱི་ཚོགས་དཔལ་འབྱོར་གྱི་འཕེལ་རྒྱས་དང་འཚོ་བའི་འགྱུར་ལྡོག་དེ། བྱ་འགུལ་སྣ་ཚོགས་ཀྱི་མཐོང་སྣེ་མི་འདྲ་བ་བརྒྱུད་ནས་མཚོ་ལྷོའི་མི་དམངས་ཀྱི་སྤྱན་སྔར་བཀྲམ་ཞིང་། ཐེངས་འདིའི་རིམ་སྤེལ་རིག་རྩལ་ལ་བྱ་འགུལ་ཕྱོགས་མི་འདྲ་བ་ནས་བལྟས་ན་ཐུན་མོང་མ་ཡིན་པའི་ཁྱད་ཆོས་དུ་མ་ཞིག་ལྡན་ཏེ། ཆབ་སྲིད་རང་བཞིན་ཁོང་དུ་ཆུད་ཡོད་པ་དང་མི་དམངས་རང་བཞིན་ལེགས་པར་མངོན་པ། དུས་རབས་ཀྱི་རང་བཞིན་འབུར་དུ་ཐོན་པ་བཅས་བྱས་ཏེ། ཁུལ་ཡོངས་ཀྱི་སྤུས་ཚད་མཐོ་བའི་སྤྱི་ཚོགས་དཔལ་འབྱོར་འཕེལ་རྒྱས་ཀྱི་རྣམ་པ་གསར་བ་དང་གནས་བབ་གསར་བ་གཅིག་བསྡུས་ཀྱིས་མཚོན་པར་བྱས།
ཡིད་དབང་འཕྲོག་པའི་མི་རིགས་ཀྱི་རིག་གནས་དང་རིགས་སོ་སོའི་མི་དམངས་ཀྱིས་འཚོ་བར་བཅངས་བའི་རེ་སྨོན་ལས་བརྩོན་སེམས་ཆེ་བའི་ཕ་ཡུལ་མཚོ་ལྷོའི་སྣང་བརྙན་གསར་བ་དེ་མཐོང་ཐུབ།
ཁུལ་སྟོན་གྱི་རིག་གནས་བྱ་འགུལ་རིམ་སྤེལ་ལེགས་འགྲུབ་བྱུང་བ་དེས་ཁུལ་ཡོངས་ཀྱི་རིགས་སོ་སོའི་མི་དམངས་ཀྱིས་ཏང་གི་ཚོགས་ཆེན་ཐེངས་ཉི་ཤུ་བའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱ་རྒྱུར་སྔར་ལས་ལྕག་སྐུལ་བཏང་ཡོད་པར་མ་ཟད། “རབ་མཛེས་མཚོ་སྔོན། གནས་མཆོག་མཚོ་ལྷོ”ཞེས་པའི་སྣང་བརྙན་གསོན་པོ་མངོན་ཡོད། རིགས་སོ་སོའི་མི་དམངས་ཀྱིས“ཏང་གི་དྲིན་ཚོར་བ་དང་ཏང་གི་བཀའ་ལ་ཉན་པ། ཏང་གི་རྗེས་སུ་འབྲང་བ”བཅས་ཀྱི་ཆོད་སེམས་ཇེ་བརྟན་དུ་བཏང་སྟེ། ཁུལ་ཡོངས་ཀྱི་གོང་འོག་ཚང་མས་དེང་རབས་ཅན་གྱི་མཚོ་ལྷོ་གསར་བ་འཛུགས་སྐྲུན་བྱེད་པའི་བརྩོན་སེམས་འདོན་སྤེལ་བྱས།
མཇུག་སྒྲིལ་མཛད་སྒོའི་སྟེང་རྫོང་རིམ་པ་ཁག་གིས་འཁྲབ་སྟོན་གྱ་ནོམ་པ་བྱས་ཤིང་། འཁྲབ་སྟོན་མཇུག་སྒྲིལ་རྗེས་མཚོ་ལྷོ་བོད་རིགས་རང་སྐྱོང་ཁུལ་བཙུགས་ནས་ལོ་འཁོར70ལོན་པར་རྟེན་འབྲེལ་ཞུ་བའི་རིམ་སྤེལ་རིག་གནས་བྱ་འགུལ་ཏེ“གླུ་གར་གྱི་མཚོ་ལྷོ། ཕ་ཡུལ་གྱི་བསྟོད་གླུ”ཞེས་པའི་རྫོང་ལྔའི་ཆེད་དོན་རིག་རྩལ་འཁྲབ་སྟོན་གྱི་ཕུལ་བྱུང་མི་སྒེར་དང་ཕུལ་བྱུང་ལེ་ཚན། དེ་མིན་མཚོ་ལྷོ་བོད་རིགས་རང་སྐྱོང་ཁུལ་དབུ་བརྙེས་ནས་ལོ་འཁོར70ལོན་པར་རྟེན་འབྲེལ་ཞུ་བའི་རིམ་སྤེལ་རིག་གནས་བྱ་འགུལ་ལས་སྐོར་བྲོའི་འགྲན་བསྡུར་གྱི་རུ་ཁག་དག་ལ་བྱ་དགའ་གནང་བ་རེད།
འབྲེལ་ཡོད་འོས་སྦྱོར།
