མཚོ་ལྷོ་ཁུལ་གྱིས་ལས་བྱེད་པ་རྒན་པའི་བཞུགས་མོལ་ཚོགས་འདུ་བསྡུས།

མཚོ་ལྷོ་ཁུལ་གྱིས་རང་སྐྱོང་ཁུལ་དབུ་བརྙེས་ནས་ལོ་འཁོར70ལོན་པར་རྟེན་འབྲེལ་ཞུ་བའི་ལས་བྱེད་པ་རྒན་པའི་བཞུགས་མོལ་ཚོགས་འདུ་བསྡུས།
 

       ཟླ8པའི་ཚེས1ཉིན། རང་ཁུལ་གྱིས་རང་སྐྱོང་ཁུལ་དབུ་བརྙེས་ནས་ལོ་འཁོར70ལོན་པར་རྟེན་འབྲེལ་ཞུ་བའི་ལས་བྱེད་རྒན་པའི་བཞུགས་མོལ་ཚོགས་འདུ་བསྡུས་ཏེ། བཞུད་ཟིན་པའི་ལོ་ངོ་བདུན་ཅུའི་མཚར་སྡུག་གི་གཏམ་རྒྱུད་ལ་ཕྱིར་དྲན་དང་བླངས་ཟིན་པའི་འོད་སྟོང་གི་གྲུབ་འབྲས་ལ་ཡི་རང་བྱེད་པ། རེ་བ་གསར་བའི་འཕེལ་རྒྱས་ཀྱི་མདུན་ལམ་ལ་རྒྱང་ལྟ་བཅས་བྱས་ཏེ་ཐུན་མོང་འབད་འཐབ་ཀྱིས་སྟོབས་ཤུགས་གཅིག་ཏུ་སྒྲིལ་ཡོད། ཚོགས་ཐོག་ཏུ་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པའམ་ཁུལ་ཨུའི་ཧྲུའུ་ཅི་ལིས་ཀང་དང་། ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀརྨ་ཕུན་ཚོགས། ཁུལ་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་མཱ་ཅན་ཧུང་། ཁུལ་སྲིད་གྲོས་ཀྱི་ཀྲུའུ་ཞི་ཚེ་རིང་། ཁུལ་ཨུའི་རྒྱུན་ཨུའམ་ཁུལ་དཔོན་གཞོན་པ་ཆན་གོ་ཆིང་། ཁུལ་ཨུའི་རྒྱུན་ཨུའམ་རྩ་འཛུགས་པུའུ་ཡི་པུའུ་ཀྲང་ཡོན་ཡུས་ལུང་དང་། དེ་མིན་ཁུལ་སྲིད་གཞུང་གི་ཁུལ་དཔོན་སྔོན་མ་བསོད་ནམས་དོན་གྲུབ་སོགས་ལས་བྱེད་པ་རྒན་པ28བཞུགས་མོལ་ཚོགས་འདུར་ཞུགས་པ་རེད། ཁུལ་ཨུའི་ཧྲུའུ་ཅི་གཞོན་པའམ་སྲིད་ཁྲིམས་ཨུ་ཡོན་ལྷན་ཁང་གི་ཧྲུའུ་ཅི་ཝང་ཀྲུང་དབྱིས་ཚོགས་འདུར་མགོ་འཛིན་གནང་བ་རེད།

       ཚོགས་འདུའི་ཐོག་ཀརྨ་ཕུན་ཚོགས་ཀྱིས་ལོ70རིང་གི་རང་སྐྱོང་ཁུལ་གྱི་སྤྱི་ཚོགས་དཔལ་འབྱོར་འཕེལ་རྒྱས་སྐོར་གྱི་གནས་ཚུལ་ངོ་སྤྲོད་བྱས་ཤིང་། ཁོང་གིས་བསྟན་དོན། ཀྲུང་གོ་གུང་ཁྲན་ཏང་གི་མགོ་ཁྲིད་དང་ཏང་གི་མི་རིགས་སྲིད་ཇུས་ཀྱི་འོག་ཏུ། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་མགོ་ཁྲིད། སྐབས་རིམ་བྱུང་གི་ཁུལ་ཨུ་དང་ཁུལ་སྲིད་གཞུང་གི་སྣེ་ཁྲིད། མགོ་ཁྲིད་ལས་བྱེད་པ་རྒན་པ་རྣམས་ཀྱི་དཀའ་སྤྱད་འབད་བརྩོན་ཀྱི་གྲུབ་འབྲས་ལ་བརྟེན་ཏེ། ཁུལ་ཡོངས་ཀྱི་མི་རིགས་ཁག་གི་མི་དམངས་ཀྱིས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རླབས་ཆེན་དར་ཆ་མཐོན་པོར་བསྒྲེངས་ནས་རྗེས་ལུས་ནས་ཡར་ཐོན་དང་། ཕྱི་ཕྱོགས་སུ་སྒོ་འབྱེད་བྱེད་པ། དབུལ་ཕོངས་ནས་འབྱོར་ཕྱུག་གི་ཕྱོགས་སུ་བསྐྱོད་པའི་ལོ་རྒྱུས་ཀྱི་ལེའུ་གསར་བ་ཞིག་བརྩམས་པ་རེད། ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དུས་རབས་གསར་བའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་མཛུབ་ཁྲིད་འོག་ཏུ། ཁུལ་ཡོངས་ཀྱི་མི་རིགས་ཁག་གི་མི་དམངས་ཚོས་བློ་བརྟན་འགྱུར་མེད་ངང་སྤྱི་ཁྱབ་ཧྲུའུ་ཅིས་མཚོ་སྔོན་ལ་རྟོག་ཞིབ་གནང་སྐབས་ཀྱི་དགོངས་དོན་དོན་འཁྱོལ་བྱས་ནས། དབུལ་ཐར་འགག་སྒྲོལ་དང་འབད་འབུངས་ཡར་བརྩོན་གྱིས་འབྱོར་འབྲིང་སྤྱི་ཚོགས་ཀྱི་ལམ་དུ་བསྐྱོད་དེ།  སྤྱི་ཚོགས་རིང་ལུགས་དེང་རབས་ཅན་གྱི་རྒྱང་བསྐྱོད་ལམ་བུ་བདེ་བླག་ངང་བཏོད་དགོས་པར་བསྟན།

       ཁུལ་སྲིད་གྲོས་ཀྱི་ཀྲུའུ་ཞི་ཟུར་པ་ཞིས་བའེ་ཀོང་དང་ཁུལ་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ཟུར་པ་མཁའ་འགྲོ་རྒྱལ་གཉིས་རང་སྐྱོང་ཁུལ་གྱི་ལོ་རྒྱུས་ཀྱི་བདེན་དབང་པ་ཞིག་ཡིན་པའི་ཆ་ནས། རང་ཉིད་བརྒྱུད་མྱོང་བའི་གསར་བརྗེ་འཛུགས་སྐྲུན་གྱི་འཕེལ་རྒྱས་ལས་དོན་ལ་འབད་བརྩོན་བྱས་པའི་ལམ་བུར་ཕྱིར་དྲན་བྱས་ཤིང་། ལོ་ངོ་བདུན་ཅུའི་གཡུར་ཟའི་འབྲས་བུ་དང་འཕེལ་རྒྱས་གླེང་བར་མ་ཟད། ཏང་དང་རྒྱལ་ཁབ། ཕ་ཡུལ་བཅས་ལ་དགའ་བའི་བརྩེ་སེམས་དེ་མཚོན་པར་བྱས་ནས་རང་སྐྱོང་ཁུལ་གྱི་སྤྱི་ཚོགས་དཔལ་འབྱོར་འཕེལ་རྒྱས་ཀྱི་ལས་དོན་ཁག་ཡར་རྒྱས་ཡོང་བར་སྨོན་འདུན་ཞུས་པ་རེད།

       ལིས་ཀང་གིས་གཏམ་བཤད་ཁྲོད་ཁུལ་ཡོངས་ཀྱི་ལས་བྱེད་རྒན་པ་དག་གིས་དུས་ཡུན་རིང་བོའི་ནང་རང་སྐྱོང་ཁུལ་གྱི་སྤྱི་ཚོགས་དཔལ་འབྱོར་འཕེལ་རྒྱས་ཀྱི་ལས་དོན་ཁག་ལ་བཞག་པའི་བྱས་རྗེས་ལ་བསྔགས་བརྗོད་བྱས་པར་མ་ཟད། ཁྱོན་ཡོངས་ནས་རང་སྐྱོང་ཁུལ་དབུ་བརྙེས་ནས་ལོ་འཁོར70ལོན་པའི་མཚར་སྡུག་གི་ལོ་རྒྱུས་ཀྱི་གྲུབ་འབྲས་ལ་ཕྱིར་དྲན་བྱས་པ་དང་། མཚོ་ལྷོའི་འབྱུང་འགྱུར་འཕེལ་རྒྱས་ཀྱི་ལེའུ་གསར་བར་དབུ་ཁྱུད་བྲིས། ཁོས་བསྟན་དོན། རང་སྐྱོང་ཁུལ་དབུ་བརྙེས་ནས་ལོ་འཁོར70ལོན་པའི་རིང་གི་གྲུབ་འབྲས་ནི་ཏང་གི་སྣེ་ཁྲིད་བཟང་བོ་དང་སྐབས་སོ་སོའི་མགོ་ཁྲིད་ཚན་སྐོར་གྱིས་ཁུལ་ཡོངས་ཀྱི་མི་དམངས་ལ་སྣེ་ཁྲིད་བྱས་པའི་འབད་བརྩོན་གྱི་འབྲས་བུ་ཡིན་པར་མ་ཟད། ལས་བྱེད་རྒན་པ་དང་སྔོན་གྱི་མེས་པོ་ཚོས་ཕུལ་བའི་དཀའ་སྡུག་གི་རྔུལ་ཁྲག་ཀྱང་ཡིན།

       ཏང་གི་ཚོགས་ཆེན་ཐེངས་ཉི་ཤུ་བས་ལོ་བརྒྱའི་འབད་འཐབ་དམིགས་འབེན་ཐེངས་གཉིས་པའི་འབོད་བརྡ་བཏང་སྟེ། 2035ལོའི་བར་དུ་སྤྱི་ཚོགས་རིང་ལུགས་དེང་རབས་ཅན་མངོན་འགྱུར་ཡོང་བར་བཀོད་འདོམས་དང2050ལོའི་བར་སྤྱི་ཚོགས་རིང་ལུགས་དེང་རབས་ཅན་གྱི་སྟོབས་ལྡན་རྒྱལ་ཁབ་འཛུགས་པའི་རླབས་ཆེན་དམིགས་འབེན་མངོན་འགྱུར་ཡོང་བར་བརྩོན། འབྱུང་འགྱུར་ལམ་བུར་ཁ་ཕྱོགས་ནས་ང་ཚོས་ཏང་ཀྲུང་དབྱང་གི་བཀོད་འདོམས་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པའི་མཛུབ་སྟོན་ལྟར་འབད་བརྩོན་ལྷོད་མེད་གནང་དགོས། འཕེལ་རྒྱས་ཡོད་ཚད་ལ་མི་རིགས་མཐུན་སྒྲིལ་ཡར་ཐོན་དང་ཀྲུང་ཧྭ་མི་རིགས་ཀྱི་ཐུན་མོང་འདུ་ཤེས་སྲ་བརྟན་ཡོང་བའི་སྲོག་ཤིང་བསྐྲུན་དགོས་ཏེ། མི་རིགས་མཐུན་སྒྲིལ་གྱིས་སྤྱི་འདོམས་གནང་ནས་གཞི་རིམ་སྤྱི་ཚོགས་བཅོས་སྐྱོང་དང་ཆོས་ལུགས་ལས་དོན་དོ་དམ་ལ་ཤུགས་བསྣན་ནས་མི་རིགས་མཐུན་སྒྲིལ་འཕེལ་རྒྱས་ཡོང་བའི་རྣམ་པ་བཟང་བོ་ཞིག་ཆགས་དགོས། འཕེལ་རྒྱས་ཡོད་ཚད་ལ་སྐྱེ་ཁམས་སྲུང་སྐྱོང་དང་ལྗང་མདོག་འཕེལ་རྒྱས་ཀྱི་དོན་སྙིང་བསྩལ་ཏེ་རྒྱལ་ཁབ་ཀྱི་ནུས་རྒྱུ་གསར་བའི་ཐོན་ལས་མཐོ་ས་བསྐྲུན་དགོས། ནུས་རྒྱུ་གཙང་མས་ཞིང་ཕྱུགས་ཐོན་ལས་དང་ཡུལ་སྐོར། གཞི་གྲངས་ཆེན་མོའི་འཕེལ་རྒྱས་བཅས་ལ་རམ་འདེགས་གནང་སྟེ་ཁྱོན་ཡངས་པའི་གུང་ཧོའི་གཤོངས་ས་དར་རྒྱས་ཡོང་བར་འབད་དགོས། རྒྱ་ཆེའི་ལས་བྱེད་རྒན་པ་ཡོངས་ཀྱིས་སྔར་བཞིན་མཚོ་ལྷོའི་འཕེལ་རྒྱས་ལ་ཐུགས་ཁུར་དང་རྒྱབ་སྐྱོར་གནང་དགོས་པ་དང་། ད་དུང་ཁུལ་ཨུ་དང་ཁུལ་སྲིད་གཞུང་གི་ལས་དོན་ཁག་སེམས་ལ་བཟུང་སྟེ་ང་ཚོ་ཐུན་མོང་གིས་མཚོ་ལྷོའི་མི་དམངས་མང་ཚོགས་ཀྱི་འཚོ་བར་རང་ཉིད་ཀྱི་ནུས་ཤུགས་ཡོད་རྒུ་འབུལ་དགོས་ཞེས་བསྟན།