ཀོས་ནན་རྫོང་གི་སྐབས་དགུ་པའི་རིག་གནས་ཡུལ་སྐོར་དུས་ཆེན་འགོ་ཚུགས།

       ཟླ8པའི་ཚེས10ཉིན། མཚོ་ལྷོ་བོད་རིགས་རང་སྐྱོང་ཁུལ་བཙུགས་ནས་ལོ་འཁོར་བདུན་ཅུ་ལོན་པར་རྟེན་འབྲེལ་ཞུ་བ་དང་ཀོས་ནན་རྫོང་གི་སྐབས་དགུ་པའི་བོད་ཀྱི་གཙག་དྲུབ་དང་། རོལ་དབྱངས། ནོར་ནག་ཡུལ་སྐོར་རིག་གནས་དུས་ཆེན་དེ་ཀོས་ནན་རྫོང་དུ་གཟབ་རྒྱས་ངང་བསྡུས། “ལོ་ངོ་བདུན་ཅུར་ཤིས་པ་སྩོལ། །རྒྱང་ལམ་གསར་པར་འབད་པས་བསྐྱོད། །”ཅེས་པ་བརྗོད་དོན་ཡིན་པའི་ཐེངས་འདིའི་བྱེད་སྒོ་ལ། ཀོས་ནན་གྱི་ཁྱད་ལྡན་སྤུས་རྟགས་ཐོན་རྫས་དང་རིག་གནས་ཡུལ་སྐོར། རང་ས་གནས་ཀྱི་ཁྱད་ཆོས་ལྡན་པའི་ལུས་རྩལ་རྣམ་གྲངས་སོགས་དྲིལ་སྒྲོག་དང་། དེ་མིན་བོད་ཀྱི་གཙག་དྲུབ་དང་གླུ་གར། ནོར་ནག་སོགས་ཁྱད་ཆོས་ལྡན་པའི་ཞིང་ཕྱུགས་ཀྱི་ཁྱད་ལྡན་སྤུས་རྟགས་ཐོན་རྫས་རྒྱུན་མཐུད་ངང་ལས་གཏོད་དང་འཕེལ་རྒྱས་སུ་གཏོང་བ་དང་། ཕྱི་ཕྱོགས་སུ་ཤུགས་ཆེར་ཁྱབ་གདལ་དུ་བཏང་ནས་ས་གནས་དཔལ་འབྱོར་སྔར་ལས་འཕེལ་བར་སྐུལ་འདེད་གཏོང་རྒྱུ་དེ་རེད།
       མཛད་སྒོའི་སྟེང་ད་ལོའི་འབྲིང་རྒྱུགས་དང་མཐོ་རྒྱུགས་ཀྱི་གཡུལ་ས་ལས་རྣམ་པར་རྒྱལ་བའི་ས་གནས་ཀྱི་ཕུལ་བྱུང་སློབ་མར་བྱ་དགའ་ཡང་གནང་།

       ཐེངས་འདིའི་བྱེད་སྒོའི་དུས་ཡུན་ཉིན་དྲུག་རིང་སྲོལ་རྒྱུན་ལུས་རྩལ་འགྲན་སྡུར་དང་རྟ་རྒྱུགས། ཡིག་གཟུགས་དང་རི་མོའི་བརྩམས་ཆོས་འགྲེམ་སྟོན། ཟས་རིགས་འགྲན་སྡུར་སོགས་ནང་དོན་ཕུན་སུམ་ཚོགས་ཤིང་རྣམ་གྲངས་མང་།