«སློབ་གསོའི་བྱ་གཞག་གི་འཕེལ་རྒྱས་ལ་ཚོད་འཛིན་ཐེབས་པའི་སྒྲིག་སྲོལ་དང་ལམ་སྲོལ་ཐད་ཀྱི་འགོག་རྐྱེན་མཐའ་གཅིག་ཏུ་སེལ་དགོས།»

       ང་ཚོས་རང་རྒྱལ་གྱི་སློབ་གསོ་དེང་རབས་ཅན་དུ་འགྱུར་བའི་སྤྱི་ཚོགས་རིང་ལུགས་ཀྱི་ཁ་ཕྱོགས་རྒྱུན་འཁྱོངས་དང་། སློབ་གསོའི་སྤྱི་ཕན་རང་བཞིན་གྱི་རྩ་དོན་རྒྱུན་འཁྱོངས་བྱས་ཏེ་སློབ་གསོ་དྲང་སྙོམས་ཡོང་བ་བྱ་རྒྱུ་དེ་རྒྱལ་ཁབ་ཀྱི་གཞི་རྩའི་སློབ་གསོ་སྲིད་ཇུས་བྱེད་དགོས་པ་དང་། སློབ་གསོའི་སྒྲིག་སྲོལ་བསྒྱུར་བཅོས་དང་གསར་གཏོད་བྱེད་པར་སྐུལ་འདེད་ཤུགས་ཆེན་གཏོང་དགོས། མི་ཚེ་གང་པོ་དང་འགྲོགས་པའི་སློབ་གསོ་གང་མགྱོགས་སུ་བསྐྲུན་ནས་སློབ་སྦྱོང་བྱ་རྒྱུ་དེ་མི་ཚང་མའི་འཚོ་བའི་གོམས་གཤིས་དང་འཚོ་བ་སྐྱེལ་སྟངས་ཤིག་ཆགས་པ་དང་། མི་ཚང་མས་སློབ་སྦྱོང་བྱེད་པ་དང་། གང་སར་སློབ་སྦྱོང་བྱེད་ཐུབ་པ། དུས་དང་རྣམ་པ་ཀུན་ཏུ་སློབ་སྦྱོང་བྱེད་ཐུབ་པ་བཅས་ཡོང་བ་བྱེད་དགོས། མི་ཚང་མ་འདྲ་མཉམ་དུ་འཛིན་པའི་སློབ་གསོ་གང་མགྱོགས་སུ་འཛུགས་སྐྲུན་བྱས་ཏེ། ཕོ་མོ་དང་། གྲོང་ཁྱེར་དང་གྲོང་གསེབ། ས་ཁོངས། དབུལ་ཕྱུག མི་རིགས་བཅས་ཀྱི་དབྱེ་བ་མེད་པར་ཚང་མར་སློབ་གསོ་བཟང་པོ་ཐོབ་གང་ཐུབ་བྱེད་དགོས། མི་རེ་རེར་འཚམ་པའི་སློབ་གསོ་གང་མགྱོགས་སུ་འཛུགས་སྐྲུན་བྱས་ཏེ། གཤིས་རྒྱུད་དང་བསྐོས་ཐང་དང་། དགའ་ཕྱོགས་དང་ཁྱད་ནུས། བྱང་ཚད་དང་བག་ཉལ་སྟོབས་ཤུགས་བཅས་མི་འདྲ་བའི་སློབ་མ་ཚང་མར་རང་ཉིད་འཚར་ལོངས་འབྱུང་བའི་དགོས་མཁོ་དང་འཚམ་པའི་སློབ་གསོ་ཐོབ་གང་ཐུབ་བྱེད་དགོས། སྔར་བས་སྒོ་འབྱེད་བབ་བསྟུན་གྱི་སློབ་གསོ་གང་མགྱོགས་སུ་འཛུགས་སྐྲུན་བྱས་ནས་སློབ་གསོའི་གདམ་ག་དེ་བས་མང་བ་དང་། འཚར་ལོངས་ཀྱི་འགྲོ་ལམ་དེ་བས་ཡངས་པོ་ཡོང་རྒྱུར་འབད་བརྩོན་བྱས་ཏེ། སྦྱངས་འབྲས་མཐོར་འདེགས་ཀྱི་རྒྱུག་ལམ་དང་། ལས་གནས་རིམ་འཕར་གྱི་རྒྱུག་ལམ། སྤྱི་ཚོགས་རིམ་འཕར་གྱི་རྒྱུག་ལམ་བཅས་སྔར་བས་ཤར་རྒྱུག་ཐུབ་པ་བྱེད་དགོས།