«ཏང་གི་བཀོད་འདོམས་ལ་ཉན་པ་དང་། རྒྱལ་ཁ་ལེན་ཐུབ་པ། སྤྱོད་ཚུལ་བཟང་བ་བཅས་ཀྱི་མི་དམངས་དམག་དཔུང་ཞིག་འཛུགས་སྐྲུན་ཧུར་ཐག་བྱེད་དགོས།»

       རྒྱལ་སྲུང་དང་དམག་དཔུང་འཛུགས་སྐྲུན་བྱ་རྒྱུ་ནི་རྒྱལ་ཁབ་བདེ་འཇགས་ཀྱི་སྟོབས་དང་ལྡན་པའི་རྒྱབ་རྟེན་ཡིན། སྲ་བརྟན་གྱི་རྒྱལ་སྲུང་ཞིག་མེད་པ་དང་། སྟོབས་དང་ལྡན་པའི་དམག་དཔུང་ཞིག་མེད་ན། ཞི་བའི་འཕེལ་རྒྱས་ཡོང་བར་འགན་སྲུང་ཡོད་པ་མ་རེད། ཀྲུང་གོ་གསར་པ་དབུ་བརྙེས་པ་ནས་བཟུང་། ང་ཚོས་རྒྱལ་སྲུང་འཛུགས་སྐྲུན་ལ་ཚད་མཐོའི་མཐོང་ཆེན་བྱས་པ་དང་། འགག་རྩའི་དུས་སུ་རལ་གྲི་འཕྱར་ཕོད་པ་བྱས་པས། ད་གཟོད་ཕྱི་རོལ་ནས་ཡོང་བའི་གནོན་ཤུགས་སྣ་ཚོགས་ཐེག་ནས་རྒྱལ་ཁབ་ཀྱི་རང་བཙན་དང་། རང་བདག། བདེ་འཇགས། ལ་རྒྱ་བཅས་སྲུང་སྐྱོང་བྱས་ཡོད། ད་ལྟ་རྒྱལ་ཁབ་ཀྱི་བདེ་འཇགས་སྲུང་སྐྱོང་བྱེད་ཐབས་དང་གདམ་གསེས་ཇེ་མང་དུ་སོང་ཞིང་། ང་ཚོས་སྟབས་བསྟུན་བེད་སྤྱོད་དང་ཕར་ཕྲལ་ཚུར་འདུམ་བྱས་ཀྱང་ཆོག་མོད། འོན་ཀྱང་དམག་དོན་གྱི་བྱེད་ཐབས་ནི་ཐོག་མཐའ་བར་གསུམ་དུ་མཐའ་ཚད་སྲུང་བྱེད་ཀྱི་ཐབས་ཡིན་པ་གཏན་ནས་བརྗེད་མི་རུང་། རང་དམག་དེང་རབས་ཅན་གྱི་ཆུ་ཚད་དེ་རྒྱལ་ཁབ་བདེ་འཇགས་དགོས་མཁོ་དང་བསྭར་ན་ད་དུང་ཧེ་བག་ཧ་ཅང་ཆེན་པོ་ཡོད་ལ། འཛམ་གླིང་གི་སྔོན་ཐོན་དམག་དོན་ཆུ་ཚད་དང་བསྡུར་ནའང་ད་དུང་ཧེ་བག་ཧ་ཅང་ཆེན་པོ་ཡོད་པས། ངེས་པར་དུ་དུས་ཚོད་སྐར་ཆ་ཙམ་ཡང་བརྩོན་ལེན་བྱེད་པའི་སྙིང་སྟོབས་ལ་བརྟེན་ནས་དམ་འཛིན་དང་རྗེས་ཟིན་ཐུབ་པ་བྱེད་དགོས།