«དུས་རབས་གསར་པའི་ཏང་གི་རྩ་འཛུགས་ལམ་ཕྱོགས་ལག་བསྟར་དོན་འཁྱོལ་ཡག་པོ་བྱེད་དགོས།»

       བསམ་བློ་དང་བཀོད་སྒྲིག་ཡོད་དུ་ཆུགས་ཀྱང་མི་ཕུལ་བྱུང་ཅན་གྱིས་མ་བསྒྲུབས་ན་བྱ་བ་འགྲུབ་དཀའ། དུས་རབས་གསར་པའི་ཏང་གི་རྩ་འཛུགས་ལམ་ཕྱོགས་ཀྱིས་སྤྱོད་ཡོན་གཉིས་ལྡན་དང་། ཀུན་སྤྱོད་གཙོ་བོར་འཛིན་པ། མཛངས་མི་ཁོ་ན་བསྐོ་གཞག་བྱེད་པ་བཅས་ཀྱི་བྱེད་ཕྱོགས་རྒྱུན་འཁྱོངས་བྱེད་དགོས་པ་བཏོན་པ་ནི། ལས་བྱེད་པ་འདེམས་སྒྲུག་དང་ཤེས་ལྡན་མི་སྣ་བཀོལ་སྤྱོད་བྱེད་པར་ཀུན་སྤྱོད་ལ་མཐོང་ཆེན་བྱེད་དགོས་ལ། འཇོན་ཐང་ལའང་སྣང་ཆུང་བྱེད་མི་རུང་བ་ནན་གྱིས་བསྟན་པ་ཡིན། འཇོན་ཐང་ལྡན་ཡང་ཀུན་སྤྱོད་མི་བཟང་ན་དོན་ཆེན་བརླག་སླ་ལ། ཀུན་སྤྱོད་ལྡན་ཡང་འཇོན་ཐང་མེན་ན་དོན་ཆེན་འགྲུབ་དཀའ། ཀུན་སྤྱོད་དང་འཇོན་ཐང་གཉིས་ཀ་འཛོམས་ན་ད་གཟོད་དོན་ཆེན་འགྲུབ་ཐུབ་པ་རེད། ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་ཐོག་བཅོས་སྐྱོང་ནུས་པ་ཆེ་རུ་གཏོང་རྒྱུ་དེ་དུས་རབས་གསར་པའི་ལས་བྱེད་པའི་དཔུང་ཁག་འཛུགས་སྐྲུན་བྱེད་པའི་ལས་འགན་གལ་ཆེན་ཞིག་ཏུ་འཛིན་དགོས་པ་ནན་གྱིས་བསྟན་ཡོད། བསམ་བློ་ཞུན་བརྡར་དང་། ཆབ་སྲིད་སྦྱོང་བརྡར། ལག་ལེན་སྦྱོང་བརྡར། ཆེད་ལས་སྦྱོང་བརྡར་བཅས་ལ་ཤུགས་སྣོན་རྒྱག་པའི་ཐོག་ནས། རྒྱ་ཆེའི་ལས་བྱེད་པ་ཚོས་གཟབ་ནན་ངང་ལམ་ལུགས་ལྟར་འགན་འཁྲི་སྒྲུབ་པ་དང་། དབང་ཆ་སྤྱོད་པ་དང་། ལས་དོན་སྤེལ་བར་སྐུལ་འདེད་གཏོང་དགོས།