«ཏང་འཛུགས་སྐྲུན་གྱི་ལས་གྲྭ་རླབས་པོ་ཆེ་གསར་པར་སྐུལ་འདེད་གཏོང་རྒྱུ་དཀྱུས་གཅིག་ཏུ་དོན་འཁྱོལ་བྱེད་དགོས།»

       ངས་ཏང་གི་ཚོགས་ཆེན་བཅུ་དགུ་པའི་སྙན་ཞུའི་ནང་ནན་བཤད་བྱས་དོན། “ང་ཚོའི་ཏང་ནི་ཐོག་མཐའ་བར་གསུམ་དུ་དུས་རབས་ཀྱི་གདོང་ལེན་པ་དང་། མི་རིགས་ཀྱི་གདུང་འདེགས་ཀ་བ་ལྟ་བུ་ཆགས་དགོས་པ་དང་། ཐོག་མཐའ་བར་གསུམ་དུ་མར་ཁེ་སིའི་རིང་ལུགས་ཀྱི་སྲིད་སྐྱོང་ཏང་ཆགས་དགོས་ན། རང་ཉིད་ཐོག་མཐའ་བར་གསུམ་དུ་བཀན་མོ་ཡིན་དགོས་པ་རེད།” ཇི་ལྟར་བྱས་ན་ད་གཟོད་བཀན་མོར་བརྩི་བ་ཡིན་ཞེ་ན། རང་ངོས་གསར་བརྗེ་བྱེད་ཕོད་པ་དང་། གྲི་ཁ་ནང་ལ་གཏོད་ཕོད་པ། རུས་འབྲད་དུག་སེལ་བྱེད་ཕོད་པ། དཔའ་བོས་དཔུང་པ་དུག་ཅན་གཅོད་ཕོད་པ་བཅས་བྱས་ཏེ་རྐྱེན་ངན་ནང་ནས་མི་ཡོང་བར་བྱེད་དགོས། འདི་ནི་ང་ཚོའི་ཏང་གིས་རྒྱུན་ཆད་མེད་པར་རང་ངོས་གསར་བརྗེ་བྱེད་དགོས་པའི་རྩ་བའི་དོན་སྙིང་ཡིན།
       གནད་དོན་འདི་ཐག་གཅོད་བྱེད་ཆེད་ཀྲུང་གོའི་གསར་བརྗེར་རྒྱལ་ཁ་ཐོབ་པའི་སྐབས་སུ། ང་ཚོའི་ཏང་གིས་མགོ་ཁྲིད་ལས་བྱེད་པར་བླང་བྱ་གསུམ་བཏོན་པ་སྟེ། གཅིག་ནི་དུས་དང་རྣམ་པ་ཀུན་ཏུ་མི་དམངས་མང་ཚོགས་དང་ཁ་འབྲལ་མི་རུང་བར། རང་རྟོགས་ངང་མི་དམངས་ཀྱི་ལྟ་སྐུལ་དང་ལེན་བྱེད་དགོས། གཉིས་ནི་དུས་ནམ་ཡང་ང་རྒྱལ་ཁེངས་དྲེགས་སྐྱེས་མི་རུང་བར། ཐོག་མཐའ་བར་གསུམ་དུ་དཀའ་སྤྱད་འབད་བརྩོན་བྱེད་དགོས། གསུམ་ནི་དུས་དང་རྣམ་པ་ཀུན་ཏུ་མངར་ཆས་བཏུམས་པའི་མདེའུ་འགོག་ཟོན་བྱས་ཏེ། ཆབ་སྲིད་ཀྱི་རང་མདངས་ནམ་ཡང་མི་ཉམས་པར་འཛིན་དགོས། ང་ཚོའི་ཏང་ད་ལྟའི་དུས་སུ་སླེབས་ཐུབ་པའི་རྒྱུ་མཚན་ནི་བླང་བྱ་འདི་གསུམ་དང་འབྲལ་ཐབས་མེད། ང་ཚོའི་ཏང་གིས་མུ་མཐུད་ཡུན་རིང་སྲིད་དབང་སྐྱོང་དགོས་ན་བླང་བྱ་འདི་གསུམ་དང་ཁ་འབྲལ་ཐབས་མེད།