«“ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་བརྟན་པོར་འཆང་བ་”ཡི་བརྗོད་དོན་གཙོ་བོའི་སློབ་གསོའི་ཕྱོགས་བསྡོམས་ཚོགས་ཆེན་ཐོག་གནང་བའི་གསུང་བཤད།»

       ཀྲུང་གོའི་གུང་ཁྲན་ཏང་མི་ནི་སློབ་སྦྱོང་ལ་བརྟེན་ནས་ད་ལྟའི་བར་དུ་སླེབས་པ་དང་། སློབ་སྦྱོང་ལ་བརྟེན་ནས་མ་འོངས་པར་བསྐྱོད་ངེས་ཡིན། ཏང་ཡོངས་ཀྱི་བློ་མཐུན་ཚོས་དུས་རབས་ཀྱི་གོམ་སྟབས་ཀྱི་རྗེས་སྙེག་དགོས་པ་ལས་ལུས་པོ་དུས་རབས་གསར་པར་སླེབས་ཀྱང་བསམ་བློ་ད་དུང་འདས་ཟིན་པའི་དུས་ལ་རང་འཇགས་སུ་སྡོད་མི་རུང་ལ། གནད་དོན་ལ་ལྟ་བ་དང་། ཇུས་ཐག་གཅོད་པ། ལས་ཀར་སྐུལ་འདེད་གཏོང་བ་བཅས་ཀྱི་འདུ་ཤེས་དང་ཐབས་ལམ་དང་ཐབས་ཤེས་རྙིང་པ་ཡིན་མི་རུང་། དེ་ལྟར་ལུས་ཚེ་དུས་རབས་ཀྱི་རྗེས་ཟིན་དཀའ་ལ་ལས་དོན་ཡག་པོ་སྒྲུབ་མི་ཐུབ་པར་མ་ཟད། ད་དུང་གོ་སྐབས་ཤོར་འགྲོ་བ་དང་ལས་དོན་འཐུས་ཤོར་ཡོང་གི་ཡིན། གནད་དོན་འདིར་ཏང་ཡོངས་ཀྱི་བློ་མཐུན་སྤྱི་དང་ལྷག་པར་དུ་རིམ་པ་ཁག་གི་འགོ་ཁྲིད་ལས་བྱེད་པ་ཚོས་ངེས་པར་དུ་ཚད་མཐོའི་མཐོང་ཆེན་བྱེད་དགོས། དུས་བསྟུན་མདུན་སྐྱོད་བྱ་རྒྱུ་དེ་བསམ་བློ་དང་བྱ་སྤྱོད་དངོས་ཀྱི་ཐོག་ཏུ་དོན་འཁྱོལ་བྱེད་དགོས་པ་ལས་འབོད་ཚིག་སྒྲོག་པ་ཙམ་དུ་ལུས་མི་རུང་། “ཧན་རྒྱལ་རབས་ཟེར་བ་གོ་མ་མྱོང་། །ཝེ་ཅིན་རྒྱལ་རབས་གཉིས་ནི་ལྟ་ཅི་སྨོས། །”ཞེས་པའི་དབེན་གནས་འགྲིམས་མཁན་ལྟ་བུ་ཞིག་བྱེད་མི་རུང་།