ཀྲུང་དབྱང་ཏང་གི་སློབ་གྲྭའི(རྒྱལ་ཁང་སྲིད་འཛིན་སློབ་གླིང)༢༠༢༢ལོའི་དཔྱིད་ཀའི་སློབ་དུས་ཀྱི་ལས་བྱེད་པ་དར་གཞོན་གསོ་སྦྱོང་འཛིན་གྲྭ་སློབ་འགོ་ཚུགས་པའི་མཛད་སྒོའི་ཐོག་གནང་བའི་གསུང་བཤད།

       ན་གཞོན་ལས་བྱེད་པས་འགོ་ཁྲིད་ཀྱི་ལས་འགན་འཁུར་ཐུབ་པར་བྱེད་དགོས་ན། ཁོང་དུ་ཆུད་དགོས་པའི་འཇོན་ཐང་ཧ་ཅང་མང་པོ་ཡོད། ཆེས་རྩ་བར་གྱུར་པའི་འཇོན་ཐང་ནི་རིགས་པའི་གཞུང་ལུགས་ཀྱི་བྱང་ཚད་ཡིན། མར་ཁེ་སིའི་རིང་ལུགས་ཀྱི་ལངས་ཕྱོགས་ལྟ་བ་ཐབས་ཤེས་གསུམ་ནི་ལས་ཀ་ལེགས་པོ་སྒྲུབ་པའི་གཞི་རྩའི་འཇོན་ཐང་ཡིན་པ་དང་། ང་ཚོས་འཇིག་རྟེན་ངོས་འཛིན་དང་འཇིག་རྟེན་བསྒྱུར་བཀོད་བྱེད་པར་སློབ་སྟོན་བྱེད་པའི་བསམ་བློའི་མཚོན་ཆ་སྟོབས་ལྡན་ཡང་ཡིན། ཏང་ཡོན་ལས་བྱེད་པས་ངེས་པར་དུ་རིགས་པའི་གཞུང་ལུགས་སློབ་སྦྱོང་བྱེད་པར་ཤུགས་རྒྱག་པ་དང་། རིགས་པའི་གཞུང་ལུགས་ཀྱི་རྨང་གཞི་སྲ་བརྟན་བཏང་ནས། རང་རྟོགས་ཀྱིས་དུས་རབས་གསར་པའི་ཏང་གི་གསར་གཏོད་རིགས་པའི་གཞུང་ལུགས་སྤྱད་དེ་དུས་བབ་གསར་པར་ལྟ་ཞིབ་དང་། གནས་ཚུལ་གསར་པར་ཞིབ་འཇུག །གནད་དོན་གསར་པ་ཐག་གཅོད་བཅས་བྱས་ཏེ། ལས་དོན་ཁག་ཡང་དག་པའི་ཕྱོགས་སུ་སྐྱོད་པ་དང་། ཕྱི་རོལ་ཡུལ་གྱི་ཆོས་ཉིད་ལྟར་སྐུལ་འདེད་གཏོང་དགོས། རིགས་པའི་གཞུང་ལུགས་དང་ལག་ལེན་ཟུང་འབྲེལ་བྱ་རྒྱུ་རྒྱུན་འཁྱོངས་བྱས་ནས། ལག་ལེན་དངོས་ཀྱི་ཁྲོད་ཤེས་བྱ་ཡང་དག་སློབ་སྦྱོང་དང་བདེན་དོན་གྱི་སྙིང་པོ་རྟོགས་པ་དང་། སྦྱོང་བརྡར་ལ་ཤུགས་རྒྱག་པ། འཇོན་ཐང་ཆེ་རུ་གཏོང་བ་བཅས་གཙིགས་སུ་འཛིན་དགོས། གནད་འགག་ནི་ཁེངས་སྐྱུང་དང་སེམས་རྣལ་ལ་ཕབ་དགོས་ཤིང་། “སློབ་ཆུང་སློབ་མ”བྱེད་སྤྲོ་བ་དང་། མི་ཤེས་ན་འདྲི་བ་དང་། དམའ་སར་སྐད་ཆ་འདྲི་བར་ངོ་མི་ཚ་བ་བཅས་བྱས་ཏེ། རང་སྣང་གིས་ཐག་གཅོད་དང་མི་ཤེས་ཤེས་མདོག་གཏན་ནས་བྱེད་མི་རུང་།