མཚོ་ལྷོའི་དཔལ་འབྱོར་བཟོ་ཚོང་ཨུ་ལྷན་གྱི་ཀྲུའུ་རིན་གྱིས་སྐམས་ཤ་སོགས་ཀྱི་རིན་གོང་གནད་དོན་གླེང་བ།
དེ་རིང་སྔ་དྲོར། མཚོ་ལྷོ་ཁུལ་སྲིད་གཞུང་དྲ་བའི་གསར་འགོད་པས་ད་ལོའི་སྟོན་ཁར་སྐམས་ཤ་དང་ལུག་ཤའི་ཚོང་རའི་རིན་གོང་མར་གྲིལ་ཏེ་ཐོན་སྐྱེད་པའི་རང་འགུལ་རང་བཞིན་མར་ཆག་པ་དང་། ཞིང་ཕྱུགས་མང་ཚོགས་ཀྱིས་དོ་སྣང་བྱེད་པའི་སྤྱི་ཚོགས་ཀྱི་རྒྱུན་ཚུལ་དང་བསྟུན་ཏེ། མཚོ་ལྷོ་ཁུལ་དཔལ་འབྱོར་བཟོ་ཚོང་ཨུ་ཡོན་ལྷན་ཚོགས་ཀྱི་ཀྲུའུ་རིན་ཚོའུ་ཡུང་ལ་མཇལ་ཏེ་ཁོང་གིས་ང་ཚོར་སྤྱི་ཚོགས་ཀྱི་གནད་འདི་དབྱེ་ཞིབ་དང་གསལ་འགྲེལ་བྱས།
མཚོ་ལྷོའི་སྲིད་གཞུང་དྲ་བའི་གསར་འགོད་པ། ཉེ་དུས། སྐམས་ཤ་དང་ལུག་ཤའི་ཚོང་རའི་རིན་གོང་མར་གྲིལ་བའི་དབང་གིས་ཞིང་ཕྱུགས་མང་ཚོགས་ལ་སེམས་ཁུར་ཆེན་པོ་གཏད་པར་བརྟེན། སྲིད་གཞུང་གི་གཙོ་དམ་སྡེ་ཁག་གི་འགན་ཁུར་བ་ཡིན་པའི་ཆ་ནས་ཁྱེད་ལ་ལྟ་ཚུལ་ཅི་ཞིག་ཡོད་དམ།
ཚོའུ་ཡུང་། ཉེ་དུས་བྱུང་བའི་སྐམས་ཤ་དང་ལུག་ཤའི་ཚོང་རའི་རིན་གོང་མར་གྲིལ་ཏེ་ཞིང་ཕྱུགས་མང་ཚོགས་ཀྱི་སེམས་ཁམས་སྡུག་ལ་སྦྱར་བར། མཚོ་ལྷོའི་ཁུལ་ཨུ་དང་ཁུལ་སྲིད་གཞུང་གིས་མཐོང་ཆེན་སྒོས་དེ་མུར་ཆེད་དོན་གྲོས་ཚོགས་བསྡུས་ནས་རྒྱུ་རྐྱེན་ལ་དབྱེ་ཞིབ་བྱས་ཏེ་བྱེད་ཐབས་སྤེལ་བ་དང་། ས་གནས་སོ་སོའི་སྡེ་ཁག་དག་གིས་ཡང་དག་པའི་སྣེ་ཁྲིད་བྱེད་དགོས་ལ། ང་ཚོས་ཕྱོགས་བསྡུས་སྒོས་དབྱེ་ཞིབ་བྱས་པ་ལྟར་ན། ད་ལོའི་སྐམས་ཤ་དང་ལུག་ཤའི་རིན་གོང་མར་གྲིལ་བ་དེ་ནི། གཅིག་ནས་ད་སྔའི་ཚོང་རའི་དཔལ་འབྱོར་འཕེལ་རྒྱས་ཉིན་བཞིན་གཏན་འཇགས་དང་ཚད་ལྡན་ཡིན་པའི་གནས་ཚུལ་འོག འདི་ནི་ཚོང་རའི་མཁོ་འདོན་འགྱུར་ལྡོག་བྱུང་བའི་ཕྱི་ཡུལ་གྱི་ཚུར་སྣང་དང་། ཚོང་རའི་རིན་གོང་དེ་ལུགས་མཐུན་སྒོས་ཕྱིར་ལོག་བྱུང་བ་ཡིན་ལ། ལོ་དུ་མའི་སྔོན་བྱུང་བའི་ཚོང་རའི་རིན་གོང་བསམ་ཡུལ་ལས་འདས་པར་ཇེ་མཐོར་སོང་བའི་དམིགས་བསལ་དུས་སྐབས་དང་མི་མཚུངས། གཉིས་ནས་རྒྱལ་སྤྱི་དང་རྒྱལ་ནང་གི་ཚོང་ར་ཉིན་བཞིན་གཅིག་གྱུར་ཅན་དང་། སྒོས་སུ་རང་རྒྱལWTOརུ་ཞུགས་པའི་སྲུང་སྐྱོབ་དུས་ཡུན་ལོང་བའི་གནས་ཚུལ་འོག འདི་ནི་རང་རྒྱལ་ཚོང་ར་སྔར་ལས་སྒོ་འབྱེད་བྱེད་པ་དང་། འཛམ་གླིང་དང་མཐུད་འབྲེལ། ཕྱི་རྒྱལ་གྱི་རིགས་མཚུངས་ཐོན་རྫས་མང་པོ་ནང་འདྲེན་བྱས་པའི་ཚོང་རའི་གདོང་ཐུག་དང་འབྲེལ་བ་ཡོད། གསུམ་ནས་རྒྱལ་ནང་གི་ས་ཁུལ་གཞན་གྱི་ཞིང་ཕྱུགས་ཐོན་ལས་འཕེལ་རྒྱས་རིམ་སྤར་དང་། སྐམས་ཤ་དང་ལུག་ཤའི་ཐོན་རྫས་མང་པོ་ཚོང་རར་བཀྲམ་པའི་དབང་གིས་རང་ཞིང་གི་ཕྱུགས་ལས་ཐོན་རྫས་ཉོ་བའི་དགོས་མཁོ་མར་ཆག་བ་ནི་རྒྱུ་རྐྱེན་ཆེན་པོ་ཞིག་ཏུ་ངེས།
མཚོ་ལྷོའི་སྲིད་གཞུང་དྲ་བའི་གསར་འགོད་པ། མིག་སྔའི་གནས་ཚུལ་ནི་སྐམས་ཤ་དང་ལུག་ཤའི་ཉོ་སྒྲུབ་རིན་གོང་མར་གྲིལ་ནའང་། དེའི་ལས་སྣོན་ཤ་རིགས་ཐོན་རྫས་ཀྱི་ཚོང་རའི་རིན་གོང་མར་གྲིལ་མེད་པས། ཁྱེད་རང་དེར་ལྟ་ཚུལ་ག་འདྲ་ཡོད།
ཚོའུ་ཡུང་། འདིར་ང་ཚོས་རྒྱུ་རྐྱེན་ཕྱོགས་ཆེ་བ་གཉིས་ཡོད་པར་བསམ་ཏེ། གཅིག་ནི་མཐོ་སྒང་གི་ཡུལ་སྐོར་ཚོང་ར་དར་བ་དང་ཡུལ་སྐོར་བའི་མི་གྲངས་མགྱོགས་མྱུར་འཕེལ་བས། ལས་སྣོན་ཤ་རིགས་ཀྱི་ཚོང་རའི་དགོས་མཁོ་སྔར་བཞིན་འཕར་བའི་སྣང་ཚུལ་བྱུང་། གཉིས་ནི་ལོ་འདི་འགར་ངལ་རྩོལ་ནུས་ཤུགས་ཀྱི་མ་རྩ་དང་ཚོང་གཉེར་མ་རྩ་སོགས་མུ་མཐུད་དུ་ཡར་འཕར་ལ། ལས་སྣོན་ཤ་རིགས་ཐོན་རྫས་ཀྱི་ཚོང་རའི་རིན་གོང་མར་གྲིལ་མེད། འདི་ནི་མཁོ་འདོན་རིན་གོང་དོ་མ་མཉམ་པའི་རྒྱུ་རྐྱེན་གལ་ཆེན་ཞིག་ཡིན།
མཚོ་ལྷོའི་སྲིད་གཞུང་དྲ་བའི་གསར་འགོད་པ། གོང་གི་གནད་དོན་དེར་ཁྱེད་རང་སྲིད་གཞུང་དང་གཙོ་དམ་སྡེ་ཁག་ཅིག་གི་འགན་ཁུར་བ་ཡིན་པའི་ཆ་ནས་བྱེད་ཐབས་གང་དག་སྤྱད་དགོས་སྙམ།
ཚོའུ་ཡུང་། གོང་གི་གནད་དོན་དེ་དག་ལ། ཁུལ་ཨུ་དང་ཁུལ་སྲིད་གཞུང་གིས་དགོངས་ཚུལ་གསལ་བོར་བསྟན་པ་སྟེ། ཁུལ་ཡོངས་ཀྱི་རིམ་པ་སོ་སོའི་ཏང་སྲིད་རྩ་འཛུགས་དང་། སྒོས་སུ་སྲིད་གཞུང་གཙོ་དམ་སྡེ་ཁག་གིས་མཐོང་ཆེན་ཆེན་པོ་བྱས་ཏེ་དྲང་ཕྱོགས་ནས་བྱ་བའི་དྲིལ་སྒྲོག་ལ་ཤུགས་སྣོན་པ་གཙོར་བཟུང་ནས་མང་ཚོགས་ལ་ལུགས་ལྡན་གྱིས་གནས་ཚུལ་ལ་ལྟ་བ་དང་། སྔར་སྲོལ་ལ་ལོག་པ། རང་འགུལ་གྱིས་ཚོང་རའི་དཔལ་འབྱོར་རྒྱུན་ཚུལ་གསར་བར་གོམས་པར་སྔར་ལས་ལྷག་པར་སློབ་གསོ་དང་སྣེ་ཁྲིད་བྱེད་དགོས་ལ། སྒོས་སུ་ཚོང་རའི་དཔལ་འབྱོར་ལ་གཏན་དུ་རིན་གོང་ཡར་འཕར་བའི་སྔོན་དཔག་མེད་པར། ཏག་ཏག་ཡུན་གཏན་གྱི་ཉེན་ཁ་ཆེན་པོ་དང་འགྲན་རྩོད་ཁོ་ན་ཡོད་པའི་གནས་ལུགས་ངེས་སུ་འཇུག་དགོས། གནད་དོན་འདི་བྱུང་བ་ནི་གཞི་རྩའི་སྟེང་ནས་རང་ཁུལ་གྱི་ཞིང་ཕྱུགས་ལས་དཔལ་འབྱོར་འཕེལ་རྒྱས་ཀྱི་ཆུ་ཚད་སྔར་བཞིན་ཅུང་དམའ་བ་དང་སྡེབ་བཀྲམ་གྱི་གནས་ཚུལ་མཚོན་པ་དང་། སྒོས་སུ་ཞིང་ཕྱུགས་ལས་ས་ཁུལ་གྱི་ཐོན་སྐྱེད་བྱ་ཐབས་རྗེས་ལུས་དང་། ངལ་རྩལ་ཐོན་སྐྱེད་ལས་ཕྱོད་དམའ་བ། ཐོན་རྫས་ཀྱི་ཚོང་རའི་འགྲན་རྩོད་ནུས་ཤུགས་ཞན་པ་བཅས་ནི་རྩ་བའི་གནད་དོན་ཡིན། དེར་བརྟེན། མདོར་ན། ལམ་བུ་འདི་ལས་ཐར་དགོས་ན་ཐོན་སྐྱེད་བྱ་ཐབས་མགྱོགས་མྱུར་ངང་འགྱུར་བཅོས་དང་། ཁུལ་ཨུ་དང་ཁུལ་སྲིད་གཞུང་གིས་གཏན་འཁེལ་བྱས་པའི་དེང་རབས་སྐྱེ་ཁམས་ཞིང་ཕྱུགས་ལས་འཕེལ་རྒྱས་ཀྱི་མྱུར་ཚད་ཇེ་མགྱོགས་དང་སྐུལ་འདེད་གཏོང་ཞིང་། ཞིང་ཕྱུགས་ལས་མང་ཚོགས་ཀྱིས་ནུས་ཤུགས་ཡོད་རྒུས་གཅིག་འདུས་ཅན་དང་། གཞི་རྒྱ་ཅན། ཐོན་ལས་ཅན། ཚོང་ར་ཅན་བཅས་ཀྱི་འཕེལ་རྒྱས་ལམ་བུ་འདིར་སྤོ་བར་སྣེ་ཁྲིད་དང་རོགས་སྐྱོར་བྱེད་དགོས།
སྲིད་གཞུང་གི་འགན་ཁུར་སྟེང་ནས་བཤད་ན། མིག་སྔར་ང་ཚོས་ཕྱོགས་གསུམ་གྱི་སྒོ་ནས་སྒྲུབ་དགོས་ཏེ། གཅིག་ནི་སྔར་ལས་ལྷག་པར་ཚོང་རའི་ལམ་ལུགས་ཚད་གཞི་ཅན་སྒྲིག་འཛུགས་ལ་སྐུལ་འདེད་དང་། འདྲ་མཉམ་ངང་འགྲན་རྩོད་བྱེད་པའི་ཚོང་རའི་ཁོར་ཡུག་བཟང་པོ་ཞིག་སྐྲུན་དགོས་ལ། སྐབས་བསྟུན་གྱིས་ཚོང་གཉེར་དང་ཚོང་རའི་ཁོར་ཡུག་ལ་གཏོར་བརླག་གཏོང་བ་སོགས་ཁྲིམས་འགལ་གྱི་ལས་གཉེར་སྤྱོད་ཚུལ་ལ་ཞིབ་བཤེར་དང་རྡུང་རྡེག་གཏོང་དགོས། གཉིས་ནི་ཚོང་ར་དག་ཐེར་དང་ལྟ་ཞིབ་ནུས་ཤུགས་ལ་ཤུགས་བསྣན་ཏེ། ཁྲིམས་ལྟར་ཚོང་རའི་སྒྲིག་ལུགས་ལ་གཏོར་བརླག་གཏོང་བའི་ཁྲིམས་འགལ་བྱ་སྤྱོད་ལ་རྡུང་རྡེག་ནན་མོ་གཏོང་དགོས། གསུམ་ནི་རྒྱ་ཆེའི་མང་ཚོགས་ཀྱིས་བློ་སེམས་རྩེ་གཅིག་གིས་ཚོང་ལས་ཀྱི་ཐབས་ལམ་འགྱུར་བཅོས་དང་། སྒྲིག་གཞི་བཅོས་སྒྲིག ཡོང་སྒོའི་འཕར་འབྲས་དམ་འཛིན་བྱེད་པར་སློབ་གསོ་དང་སྣེ་ཁྲིད་བྱེད་དགོས། དེའི་མཚུངས་སུ་རྒྱ་ཆེའི་ཞིང་འབྲོག་མང་ཚོགས་ཀྱིས་འདོ་མེད་ཀྱི་དཀྲོག་གཏམ་ལ་ཡིད་མི་ཆེས་པ་དང་། དཀྲོག་གཏམ་མི་སྤེལ་བ། དཀྲོག་གཏམ་མི་བཟོ་བར། མིག་སྔའི་མི་རིགས་མཐུན་སྒྲིལ་འཕེལ་རྒྱས་དང་སྤྱི་ཚོགས་འཕེལ་རྒྱས་གཏན་འཇགས་ཀྱི་གནས་བབ་བཟང་པོ་ལ་གཅེས་འཛིན་བྱས་ནས། མི་རིགས་མཐུན་སྒྲིལ་དང་སྤྱི་ཚོགས་གཏན་འཇགས་ལ་གནོད་པའི་བྱ་ལས་མི་སྨྲ་མི་སྒྲུབ་ཅིང་། སེམས་ཤུགས་ཡོད་རྒུ་སྤྱི་ཚོགས་མགྱོགས་མྱུར་འཕེལ་རྒྱས་དང་ཁྱིམ་གཞིས་འཛུགས་སྐྲུན། བདེ་སྐྱིད་ཀྱི་འཚོ་བ་གསར་སྐྲུན་བྱ་རྒྱུར་འབད་འབངས་བྱེད་པར་གལ།
