ལག་ལེན་གྱི་ཁྲོད་ནས་སློབ་གསོ་ལ་ཕྱིར་ལྟ་བྱས་པ།

བཅར་འདྲའི་དུས་ཚོད། སྤྱི་ལོ2017ལོའི་ཟླ2པའི་ཚེས18ཉིན།
བཅར་འདྲིའི་ས་གནས། མཚོ་སྔོན་ཟི་ལིང་གྲོང་ཁྱེར།

ནོར་བུ་འབུམ། རྒན་ལགས་སྐུ་ཁམས་བདེ་མོ་ཡིན་ནམ།
མཁའ་འགྲོ་སྐྱབས། བདེ་མོ་ཡིན།
ནོར་བུ་འབུམ། རང་རེའི་མང་རྫོང་ནས་སྲིད་གཞུང་གིས་མ་དངུལ་བཏོན་ཏེ། 《མང་རྫོང་སློབ་གསོའི་ལྟ་སྐུལ》ཟེར་བའི་ལོ་ཕྱེད་དེབ་ཅིག་གཙོ་གཉེར་བྱེད་ཀྱིན་ཡོད་ལ། དེའི་ནང་དུ་སློབ་གསོའི་ལམ་ཟེར་བའི་ལེ་ཚན་ཞིག་ཁ་སྣོན་བྱས་ཏེ། མང་རྫོང་གི་སློབ་གསོ་བ་རྒན་གྲས་རྣམས་ལ་སློབ་གསོའི་ཕྱོགས་ཀྱི་བཅར་འདྲི་གནང་ས་ཞིག་བཟོས་ཡོད། དེ་རིང་ང་ཁྱེད་ཀྱི་སྐུ་མདུན་དུ་བཅར་དོན་ཡང་ཉིད་ཀྱིས་དེ་སྔོན་སློབ་གསོ་ཇི་ལྟར་གནང་ཚུལ་སྐོར་ནས་ཁ་བརྡ་ཞིག་བྱེད་འདོད་པ་དེ་ཡིན། དེས་ན་ཉིད་ཀྱིས་ཐོག་མར་རང་ཉིད་ངོ་སྤྲོད་ཅིག་གནང་རོགས།
མཁའ་འགྲོ་སྐྱབས། ང་ཡིན་ན་སྤྱི་ལོ1937ལོའི་ཟླ་བ་བཅུ་གཅིག་པའི་ནང་མང་ར་གསེར་གཞུང་རིང་མོའི་མང་སྨད་ནས་སྐྱེས། རང་ལོ་དྲུག་གི་སྟེང་ཕ་མ་གཉིས་མེད་མུག་གིས་དེད་དེ་དེང་གི་མང་རྫོང་འཇག་རི་སུམ་མདོར་ཡུལ་འཁྱམས་སྒོས་རྟ་རྫི་བྱས། ལོ་དགུ་ལ་བུད་མ་ཐག་དྲིན་མོ་ཆེར་ནད་ལྕི་མོ་ཞིག་ཕོག་རྐྱེན་ས་ཕུག་ཅིག་ཏུ་ཚེ་ལས་འདས། དེའི་རྗེས་ང་རང་མང་རའི་ཡུལ་གྱི་ཁང་གཞུང་དང་གུར། ཧོ་རན། དགོ་རྭ་གོང་འོག་གི་སྡེ་བ་སོ་སོར་སྔ་གཞུག་ཏུ་ཟོག་རྫི་བྱས་ནས་འཚོ་ཐབས་བྱས། སྤྱི་ལོ1952ལོར་དཀའ་སྡུག་གི་འཆིང་བ་ལས་གྲོལ་ཏེ་ནུབ་བྱང་མི་རིགས་སློབ་གྲྭ་ཆེན་མོ་འགྲིམས། སྤྱི་ལོ1954ལོའི་ཟླ་དགུ་བའི་ནང་མཚོ་སྔོན་མི་རིགས་དགེ་ཐོན་སློབ་ཆེན་འགྲིམས། སྤྱི་ལོ1956ལོའི་ཟླ་དྲུག་པའི་ནང་སློབ་མཐར་ཕྱིན་ནས་སློབ་གྲྭ་དེའི་དགེ་རྒན་ལ་བསྐོས། སྤྱི་ལོ1961ལོར་རྐྱེན་དབང་དུ་མས་སློབ་གྲྭ་དེ་ཉིད་གཏོར་བ་ན་ང་རང་མཚོ་སྔོན་དགེ་ཐོན་སློབ་གྲྭ་ནས་ཕ་ཡུལ་མང་རྫོང་དུ་ཕྱིར་ལོག་སྟེ་སྔ་གཞུག་ཏུ་མགོ་མང་གི་བྲག་དཀར་སློབ་ཆུང་དང་སུམ་མདོའི་འབའ་མཐའ་མའི་སློབ་ཆུང་། རྫོང་མི་རིགས་ཆ་ཚང་སློབ་ཆུང་སོགས་སུ་རིམ་པར་དགེ་རྒན་བྱས། སྤྱི་ལོ1966ལོར་རིག་གསར་གྱི་དྲག་རླུང་ཁྲོད་རྫོང་མི་རིགས་ཆ་ཚང་སློབ་ཆུང་དེ་ཡང་མེད་པར་བཟོས་རྐྱེན། ཁྱོ་ཤུག་གཉིས་མང་རྫོང་གི་ཐར་ཤུལ་ཡུལ་ཚོའི་རྟ་མང་དང་རྫ་རྒན་མཉམ་བསྲེས་སློབ་ཆུང་དུ་ལོ་ངོ་བདུན་དང་ཤེའུ་ལུང་སློབ་ཆུང་དུ་ལོ་གསུམ་སྟེ། མི་ལོ་བཅུའི་རིང་ལ་འཚོ་སློབ་སློབ་ཆུང་དང་འཚོ་ཕྱེད་སློབ་ཆུང་། རྟ་ཐོག་སྒོ་སམ་སློབ་ཆུང་། སྦྲ་གུར་སློབ་ཆུང་། ཉིན་ཕྱེད་སློབ་ཆུང་། ཉིན་ཧྲིལ་སློབ་ཆུང་སོགས་ནས་སློབ་གསོའི་ལས་དོན་ལ་འབད་འབུངས་བྱས་ཏེ་གཞི་རིམ་ཁོ་ན་ནས་མི་ལོ་བཅུ་བདུན་འདས། སྤྱི་ལོ1977ལོར་མང་རྫོང་མི་རིགས་སློབ་འབྲིང་གི་སློབ་གཙོར་བསྐོས། སྤྱི་ལོ1981ལོར་རྫོང་ཨུའི་ཏང་གི་སློབ་གྲྭའི་སློབ་གཙོ་གཞོན་པ་དང་སྤྱི་ལོ1985ལོར་རྫོང་རིག་གནས་ཅུ་ཡི་ཅུ་ཀྲང་གཞོན་པ། སྤྱི་ལོ1986ལོར་རྫོང་ཨུའི་དྲིལ་སྒྲོག་པུའུ་ཡི་པུའུ་ཀྲང་གཞོན་པ། སྤྱི་ལོ1987ལོར་རྫོང་མི་རིགས་སྐད་ཡིག་གཞུང་ལས་ཁང་གི་ཀྲུའུ་རེན་གྱི་འགན་ཁུར། སྤྱི་ལོ1988ལོ་ནས་སྤྱི་ལོ1995ལོའི་བར་རྫོང་སློབ་གསོ་ཅུ་ཡི་ཅུ་ཀྲང་གི་འགན་ཁུར་ཞིང་རྫོང་ཡོངས་སུ་སློབ་གྲྭ་གསར་འཛུགས་དང་སློབ་གྲྭ་ཁག་གི་ཉེན་ཁང་ཞིག་གསོ། སློབ་དཔྱོད་ཞིབ་འཇུག་དང་དགེ་རྒན་གསོ་སྦྱོང་སོགས་བྱས། སྤྱི་ལོ1998ལོའི་ཟླ་ལྔ་བར་ལས་ཁྱུར་ངལ་གསོ་བྱས་རྗེས། བོད་ཀྱི་རྩོམ་རིག་དང་ལོ་རྒྱུས་ཀྱི་དཔེ་ཆ་མང་པོར་ཞིབ་འཇུག་བྱས་པར་མ་ཟད།《ལཱ་མོ་ཞབས་དྲུང་དཀར་བོའི་བླ་རབས་མདོར་བསྡུས》དང་《མང་ར་གསེར་གཞུང་རིང་མོའི་དེབ་ཐེར་སེང་གེ་རྒྱལ་མཚན》《རྡོ་སྦིས་བདེ་སྨན་ཙ་ནེའུ་ཚོ་བའི་ལོ་རྒྱུས་གཟི་ཆུང་འོད་འབར》《བོད་ཀྱི་དེབ་ཐེར་དཔྱིད་ཀྱི་རྒྱལ་མོའི་གླུ་དབྱངས་ཀྱི་རྩ་བ་དང་དེའི་འགྲེལ་བ་ཀུན་བཏུས་བསྒྲིགས་རྩོམ་དགའ་ཚལ》སོགས་དེབ་མང་པོ་དཔར་བསྐྲུན་བགྱིས་ལ། སྔ་གཞུག་ཏུ《མཚོ་སྔོན་སྙིང་རྗེ》དང《མཚོ་སྔོན་བོད་ཀྱི་སྐད་ཡིག》《མཚོ་སྔོན་བོད་རིགས་ཞིབ་འཇུག》《མཚོ་སྔོན་སློབ་གསོ》བཅས་དུས་དེབ་སྟེང་རྩོམ་ཡིག་ཉི་ཤུ་ལྷག་སྤེལ།  གཞན་ད་དུང་སྤྱི་ལོ2003ལོ་ནས་བཟུང་མཚོ་སྔོན་སྙིང་རྗེ་རོགས་སྐྱོར་ཚོགས་པ་དང་སྒྲོལ་མའི་སློབ་གསོ་རོགས་སྐྱོར་ཚོགས་པ་སོགས་བཙུགས་ནས། ཞིང་ཆེན་མངའ་ཁོངས་ཀྱི་སློབ་མ་དཀའ་ཁག་ཅན་ལ་སྒོར་མོ་བསྡོམས་པསཆིག་འབུམ་བཞི་ཁྲི་ལྷག་གིས་རོགས་སྐྱོར་བྱས།
ནོར་བུ་འབུམ། ངོ་མ་ཁྱེད་རང་གི་ལོ་རྒྱུས་དང་མྱངས་པའི་དཀའ་སྡུག བསྒྲུབས་པའི་མཛད་རྗེས་སོགས་མཐོང་ན་ང་རང་ཚོ་ངོ་གནོང་དགོས་པའི་ཚོད་དུ་འདུག དེས་ན་ཁྱེད་རང་ནི་མང་རྫོང་ས་ཁུལ་འདི་ནས་སྐྱེས་ཤིང་འཚར་བ་ཡིན་པས། མང་རྫོང་གི་སློབ་གསོའི་ལོ་རྒྱུས་ཏེ། ཁྱད་པར་དུ་བཅིངས་འགྲོལ་ཡར་སྔོན་གྱི་སློབ་གསོ་དང་སློབ་གྲྭའི་གནས་ཚུལ་མཁྱེན་སྲིད་པས། འདིའི་ཐད་ནས་ངོ་སྤྲོད་ཅིག་གནང་ན་ཅི་འདྲ་རེད།
མཁའ་འགྲོ་སྐྱབས། བཅིངས་འགྲོལ་མ་ཐོབ་པའི་ཡར་སྔོན་དུ། མང་རྫོང་འདིར་སློབ་གསོ་དང་སློབ་སྒྲུབ་ཟེར་བ་ཧ་ཅང་རྗེས་ལུས་དང་། སློབ་གསོའི་ལས་ཁུངས་ཟེར་བ་དེ་ལས་ཀྱང་རི་བོང་གི་རྭ་དང་མཚུངས། ཆིན་རྒྱལ་རབས་ཀྱི་ཞོན་ཐོང་ཁྲི་ལོ་དང་པོ་སྟེ། སྤྱི་ལོ1909ལོར་མང་རྫོང་རབ་འོག་ས་ཁུལ་གྱི་རྒྱ་ཐོག་སྡེ་བར་སློབ་ཆུང་ཞིག་གསར་བསྒྲུབས་བྱས། སྐབས་དེར་སློབ་ཁང་ཁང་མིག་གསུམ་དང་། སློབ་མ་བཅོ་བརྒྱད་ཡོད། སྡེ་བས་དགེ་རྒན་གླས་ནས་རྒྱ་ཡིག་སྦྱོང་བཞིན་ཡོད་ལ། དགེ་རྒན་གྱི་གླ་ཕོགས་ལ་ཁྱིམ་ཚང་སོ་སོ་ནས་འབྲུ་རིགས་བསྡུས། ཀྲུང་ཧྭ་མིན་གོའི་དུས་ལོ་ཉེར་དགུ་བ་སྟེ། སྤྱི་ལོ1940ལོར་མིན་གོ་སྲིད་གཞུང་མཐའ་མཚམས་སློབ་གསོ་པུའུ་ཡིས་ད་ལྟའི་མང་རའི་ཁང་གཞུང་སྡེ་བ་དང་བྱ་མདོའི་སྤྲེལ་ནག་སྡེ་བ་གཉིས་ནས་ལས་རིགས་སློབ་གྲྭ་གཉིས་བསྒྲུབས། སློབ་གྲྭ་དེ་གཉིས་ལ་སློབ་མ་བརྒྱ་ལྷག་དང་། ལས་བཟོ་བ་བཅུ་ལྷག་ཡོད། སྤྱི་ལོ1947ལོར་སློབ་གྲྭ་འདི་གཉིས་ད་ལྟའི་སྟོང་སྐོར་རྫོང་དུ་གནས་སྤོར་བྱས་ཤིང་། དེང་གི་སྟོང་སྐོར་ཕྱུགས་ལས་སློབ་གྲྭ་འདིའི་རྨང་གཞི་ཡིན།
ནོར་བུ་འབུམ། རེད། བཅིངས་གྲོལ་ཐོབ་རྗེས་མང་རྫོང་གི་སློབ་གསོ་དང་སློབ་གྲྭའི་གནས་ཚུལ་ཅི་འདྲ་ཡིན། སློབ་གསོ་དང་སློབ་གྲྭ་འདི་མེད་པ་ནས་ཡོད་པ་དང་། ཡོད་པ་ནས་གོང་འཕེལ་དུ་ཇི་ལྟར་སོང་བ་རེད། སྤྱིའི་གནས་ཚུལ་གྱི་སྐོར་ནས་ཁ་བརྡ་ཞིག་གནང་རོགས།
མཁའ་འགྲོ་སྐྱབས། བཅིངས་གྲོལ་ཐོབ་རྗེས། སློབ་གསོའི་བྱ་བར་ཏང་དང་སྲིད་གཞུང་གིས་རིམ་བཞིན་མཐོང་ཆེན་བྱས་པ་སྟེ། སྤྱི་ལོ1950ལོ་ནས1958ལོའི་བར། མང་ཡུལ་ཐུད་རོལ་སྡེ་བར་སྔགས་འཆང་པདྨ（སྔགས་མཚན་ལ་འཇིགས་མེད་བདེ་ཆེན་རང་གྲོལ）མཆོག་གིས་ཏང་གི་བཀའ་གསུང་དང་དུ་བླངས་ནས་སློབ་ཆུང་ཞིག་བཙུགས་ལ། དེར་དགོ་རྭ་དང་ལྕང་སྡོང་། རབ་རྒན་སོགས་སྡེ་བ་དུ་མ་ནས་སློབ་མ་ཕོ་མོ་གང་མང་ཞིག་ཡོང་གིན་ཡོད་པས། དེའི་སློབ་མ་ཁག་ཅིག་རྒྱལ་ཁབ་ཀྱི་ལས་བྱེད་པར་གྱུར་ཞིང། ཁག་ཅིག་སྡེ་བ་རིམ་པར་དམངས་སྒྲུབ་དགེ་རྒན་བྱེད་དུ་སོང་བ་རེད། དེ་ནས་རིམ་གྱིས་མང་རྫོང་གི་ས་གནས་སོ་སོར་སློབ་ཆུང་རེ་འགའ་ཡོད་པར་གྱུར་བ་སྟེ། མང་རའི་ཁུ་ཇོ་སྡེ་བའི་སློབ་ཆུང་དེའི་དགེ་རྒན་བློ་བཟང་ཡིན་ལ། རབ་རྒན་སྡེ་བའི་དགེ་རྒན་འབྲུག་ལྷ། མགུར་འོག་དང་མར་ཁུ་ཐང་གི་དགེ་རྒན་ཉི་མ། ལྕང་སྡོང་གི་དགེ་རྒན་རབ་གསལ། ཐུད་རོལ་དང་དགོ་རྭའི་དགེ་རྒན་པདྨ། གུར་དང་ཁང་གཞུང་གི་དགེ་རྒན་ང་བཟོད། ཧོ་རན་སྡེ་གསུམ་དང་མཆོད་རྟེན་ཐང་གི་དགེ་རྒན་མཁས་བཙུན། ལོ་བའི་དགེ་རྒན་བློ་བཟང་བཅས་ཡིན་པ་རེད།
        སྤྱི་ལོ1958ལོར་ཁྱབ་བརྡལ་སློབ་གསོ་བྱ་བའི་འགོ་བརྩམས། སྡེ་བ་རེ་རེར་སློོབ་ཆུང་དང་སྤྱི་ཁང་རེ་རེར་སློབ་འབྲིང་། གང་ན་སློབ་མ་ཡོད་ན་དེ་རུ་སློབ་གྲྭ་སྒྲུབ་པའི་ཁ་གཡང་བསྒྲགས། དེའི་རྐྱེན་གྱིས་ལོ་དེའི་ལོ་སྟོད་ལ་རྫོང་ཡོངས་སུ་སློབ་གྲྭ་ཉེར་གཉིས་ཡོད་ལ། སློབ་མ2953ལ་སླེབས། ཐར་ཤུལ་ཞང་གི་འབྲོག་དམངས་རྣམས་ཆུ་བཟང་ཁ་རུ་འདུས་སྡོད་སྒོས་སྔར་གྱི་ཆུ་བཟང་དགོན་པ་སློབ་གྲྭར་བསྒྱུར་ཅིང་། ཉིན་ཧྲིལ་ལུགས་ཀྱི་འགྲོ་འོང་སློབ་མ་བཞི་བརྒྱ་ལྷག་ལ་སླེབས། སོའུ་རྒན་ལུང་བའི་ནང་དུ་སུམ་མདོ་ཞང་གི་འབྲོག་དམངས་འདུས་སྡོད་བྱས་ཤིང་། ཉིན་ཧྲིལ་ལུགས་ཀྱི་འགྲོ་འོང་སློབ་ཆུང་བཙུགས། སྐབས་དེར་དགེ་སློབ་ངལ་རྩོལ་དུ་ཞུགས་ཚད་མང་དྲགས་པས། སློབ་ཁྲིད་ཀྱི་རྒྱུ་སྤུས་གླེང་ཐབས་མེད། སྤྱི་ལོ1961ནས་བཟུང་སློབ་གྲྭ་དང་སློབ་མ་ཇེ་ཉུང་དུ་སོང་། དེའི་རྗེས་ཀྱི་སྤྱི་ལོ1963ལོའི“དག་སྒྲིག་དང་སྲ་བརྟན། འཐུས་ཚང་། མཐོར་འདེགས”བཞི་ཡི་རྩ་དོན་ལག་བསྟར་བྱས་པ་བརྒྱུད། རྫོང་ཡོངས་སུ་སློབ་གྲྭ་ཇེ་མང་དུ་སོང་སྟེ་ཉེར་བདུན་ལ་བུད། དེའི་ནང་དུ་གཞུང་སྒྲུབ་སློབ་གྲྭ་ཉེར་གཅིག་དང་དམངས་སྒྲུབ་སློབ་གྲྭ་དྲུག་ཡོད། དེ་དག་ལ་སློབ་མ1065ལས་མེད།
        རིག་གསར་སྐབས་སུ། རང་རྫོང་དུ་ཞིང་དབུལ་དོ་དམ་ཨུ་ཡོན་ལྷན་ཁང་གིས་སློབ་གསོར་འགོ་ཁྲིད་བྱས་སྟབས། སློབ་ཆུང་གི་སློབ་གསོ་ཉམས་རྒུད་ཀྱི་གནས་སུ་ལྷུང་། སྤྱི་ལོ1960ལོ་ནས1980ལོའི་མི་ལོ་ཉི་ཤུའི་བར་དུ་འབྲོག་ཁུལ་ཡོངས་སུ་འཁོར་སྐྱོད་སློབ་གྲྭ་དང་ཉིན་ཕྱེད་སློབ་གྲྭ། སྦྲ་གུར་སློབ་གྲྭ། རྟ་ཐོག་སྒོ་སམ་སློབ་གྲྭ། མཚན་སྦྱོང་སློབ་གྲྭ། འཚོ་སློབ་སློབ་གྲྭ། གཏན་སྡོད་སློབ་གྲྭ། རྨོངས་སེལ་སློབ་གྲྭ། ཆ་ཚང་སློབ་གྲྭ་བཅས་རྣམ་མང་གི་སློབ་གྲྭ་གཉེར་བ་དང་། སློབ་ཁྲིད་ཀྱི་རྒྱུ་སྤུས་ཞན་ཕྱིར། ཡིག་རྨོངས་ཙམ་སེལ་པའི་གནས་སུ་གྱར་ཡོད། དེར་བརྟེན་མང་ཚོགས་ཀྱི་མིག་ལམ་དུ་དགེ་རྒན་ནི་ཐོབ་ཐང་ཅི་ཡང་མེད་པའི་མི་སྡེ་ཞིག་སྟེ། གླ་ཕོགས་ཉུང་ཞིང་ཆབ་སྲིད་ཀྱི་གོ་གནས་མེད་སྟབས། “མི་དེ་ནི་ལས་བྱེད་པ་ཞིག་མ་རེད། དགེ་རྒན་ཞིག་རེད”ཅེས་པའི་ཁ་དཔེ་བྱུང་བ་ལྟ་བུ་རེད།
        སྤྱི་ལོ1973ལོ་ཡི་རྙོག་བསྲང་དྲང་བཅོས་བརྒྱུད། རྫོང་ཡོངས་ལ་སློབ་གྲྭ་སྣ་ཚོགས་བདུན་ཅུ་དོན་ལྔ་ཡོད་པ་དང་། དེའི་ནང་གཞུང་སྒྲུབ་སློབ་ཆུང་སོ་གཅིག་དང་། དམངས་སྒྲུབ་སློབ་ཆུང་ཞེ་བཞི་ཡོད་ལ། སློབ་ཞུགས་སློབ་མ2822ཡོད། སྤྱི་ལོ1977ལོར་རྫོང་ཡོངས་ལ་སློབ་ཆུང་བརྒྱ་དང་བཅུ་གཉིས་ལ་བུད་པ་དང་སློབ་ཞུགས་སློབ་མ་4916ལ་བུད། སྐབས་དེའི་རིག་གནས་འཕྲོད་བསྟེན་ཁོ་ཡི་ཁོ་ཀྲང་བློ་མཐུན་དོན་གྲུབ་རྒྱལ（རྗེས་སུ་མཚོ་ལྷོ་ཁུལ་ཨུའི་ཧྲུའུ་ཅིའི་འགན་བཞེས）གྱིས་མང་རྫོང་གི་སློབ་སྒྲུབ་རྣམ་གྲངས་མང་ཞིང་། ཕྱི་རྫིག་ནང་སྟོང་གི་འབྲོག་ཁུལ་སློབ་གསོའི་མ་ལག་དེ་གནས་ཚུལ་དངོས་དང་མི་མཐུན་པ་རྟོགས་ནས། རྫོང་ཡོངས་ཀྱི་འབྲོག་ཁུལ་དུ་བཅའ་སྡོད་སློབ་གྲྭ་འཛུགས་པའི་ཁ་ཕྱོགས་གསར་བར་བསྒྱུར་ཏེ་སྡེ་བ་འགའ་རེར་མཉམ་སྒྲུབ་སློབ་གྲྭ་དང་། ཞང་སོ་སོར་ཆ་ཚང་དཀྱིལ་སྙིང་བཅའ་སྡོད་སློབ་གྲྭ་བཙུགས། སློབ་མའི་འཚོ་བའི་ཁ་གསབ་ལ་ལོ་རེར་ལུག་ཤ་གཉིས་རེ་དང་མར་ཆུར་རྒྱ་མ་ལྔ་རེ། འབྲུ་རིགས་རྒྱ་མ་སུམ་བརྒྱ་དང་སློབ་གྲྭ་རེར་བཞོན་མ་བཅུ། ཇ་ཁང་དང་ཉལ་ཁང་། སློབ་ཁང་སོགས་ལ་སྒྲོན་པའི་འབར་རྫས་བཅས་ཐོན་སྐྱེད་རུ་ཁག་གིས་འགན་ལེན་པའི་ལམ་ལུགས་བཙུགས། ད་དུང་རྫོང་ནོར་སྲིད་སྡེ་ཁག་གིས་སློབ་མ་རེར་ཟླ་རེར་མི་དམངས་ཤོག་སྒོར་བཅུ་ཡི་འཚོ་བའི་རོགས་དངུལ་གནང་། སྐབས་དེར་ཁོང་གིས་བཏོན་པའི་སློབ་གསོའི་ཕྱོགས་ཀྱི་སྲིད་ཇུས་ནི། 1. ཞང་དང་སྡེ་བ་སོ་སོས་ས་ཕག་ཅན་གྱི་སློབ་ཁང་དང་ཉལ་ཁང་བསྐྲུན་པ། 2. མང་རྫོང་འབྲོག་ཁུལ་གྱི་གནས་ཚུལ་དངོས་དང་མཐུན་པའི་སློབ་སྒྲུབ་འཆར་གཞི་རྫོང་རིམ་པའི་འབྲེལ་ཡོད་སྡེ་ཁག་ལ་ཡར་ཞུ་དང་། ཞང་དང་སྡེ་བ་སོ་སོས་ཁྱབ་བརྡལ་དུ་གཏོང་བ། 3. འབྲོག་ཁུལ་གྱི་བཅའ་སྡོད་སློབ་གྲྭ་སྲ་བརྟན་གཏོང་ཆེད། སློབ་གསོའི་བདག་དོམ་ལམ་ལུགས་དང་། ནོར་སྲིད་བདག་དོམ་ལམ་ལུགས། སློབ་ཁྲིད་ཀྱི་བདག་དོམ་ལམ་ལུགས་དང་། སློབ་མའི་འཚོ་བ་ལེགས་སྒྲུབ་བྱེད་པའི་དོ་དམ་ལམ་ལུགས་འཐུས་ཚང་བཟོ་བ། 4. ལོ་རེའི་དབྱར་དགུན་གནང་གི་སྐབས་སུ། གཞུང་སྒྲུབ་དང་དམངས་སྒྲུབ་དགེ་རྒན་གྱི་སྦྱོང་བརྡར་འཛིན་གྲྭ་སྒྲུབ་པར་ཤུགས་སྣོན་བྱེད་པ། 5. སློབ་གྲྭ་དང་སློབ་གྲྭ་བར། སློབ་ཁྲིད་རྒྱུ་སྤུས་དང་འཚོ་བའི་བདག་གཉེར། དགེ་བཟོ་བའི་བདག་གཉེར་ཕྱོགས་ཀྱི་བཟང་ངན་ཤན་འབྱེད་བྱ་ཆེད། ཕན་ཚུན་དབར་ཉམས་མྱོང་བརྗེ་རེས་ཀྱི་བགྲོ་གླེང་ཚོགས་འདུ་སྤེལ་ནས་བཟང་ལ་བྱ་དགས་བསྟོད་པ་དང་། ངན་ལ་སྐྱོན་བརྗོད་དང་བླང་བྱ་ནན་མོ་བཏོན་ནས། རྫོང་ཞང་སྡེ་གསུམ་གྱི་སློབ་གསོའི་མ་ལག་འཐུས་ཚང་བཟོས་པས། རྫོང་ཡོངས་སུ་བཅའ་སྡོད་སློབ་གྲྭ་ཉེར་བརྒྱད་ལ་བུད་པ་དང་སློབ་ཞུགས་སློབ་མ2952ལ་སླེབས།
        ཏང་གི་སྐབས་བཅུ་གཅིག་པའི་ཀྲུང་ཨུ་ཚང་འཛོམས་གྲོས་ཚོགས་གསུམ་པའི་རྗེས་ནས་བཟུང་། ཆུང་འབྲིང་སློབ་གསོའི་བྱ་བ་འདི་རྫོང་ཞང་སྲིད་འཛིན་སྡེ་ཁག་གི་ཉིན་རྒྱུན་གྱི་གྲོས་གཞིར་བཞག་ཅིང་། སློབ་ཞུགས་སློབ་མ་སྲ་བརྟན་བཏང་བ་དང་བསྟུན། སློབ་ཁྲིད་ཀྱི་རྒྱུ་སྤུས་དང་སློབ་མའི་ཞུགས་ཚད། དགེ་རྒན་གྱི་དོ་དམ་སོགས་ཁྱོན་ཡོངས་ཀྱི་འཕེལ་རྒྱས་ལ་རེ་བའི་མྱུ་གུ་འབུས། ཁྱད་པར་དུ་ཕྱིའི་རྣམ་པ་ཙམ་གྱི་སློབ་གྲྭ་ཇེ་ཉུང་དང་སྡེབ་སྒྲིག་ལ་ཤུགས་སྣོན་བྱས་ཐོག 1979ལོར་རྫོང་ཡོངས་སུ་སྣ་མང་སློབ་གྲྭ་གོ་གསུམ་དུ་བཏང་ལ། སློབ་ཞུགས་སློབ་མ3745ཡོད། 1985ལོར་མང་རྫོང་གི་སློབ་གསོར་གྲུབ་འབྲས་ངེས་ཅན་ཐོབ་པས། ཞིང་ཆེན་ཡོངས་ཀྱི་སློབ་གསོའི་བྱ་བའི་གྲོས་ཚོགས་སྟེང་གཟེངས་རྟགས་ཐོབ། སྐབས་དེར་རྫོང་ཡོངས་ཀྱི་སློབ་ཞུགས་སློབ་མ5120ལ་སླེབས། འདི་དུས་ཁྱེད་རང་ཡང་འདིའི་ཁྲོད་ཀྱི་སློབ་མར་གྱུར་ཡོད་པ་དེ་བཞིན་རེད།
ནོར་བུ་འབུམ། རྒན་ལགས་ཐུགས་རྗེ་ཆེ། ང་རང་སྤྱི་ལོ1985ལོར་རྫོང་མི་རིགས་སློབ་འབྲིང་གི་སློབ་མར་གྱུར་ཡོད། དེའི་རྗེས་ཀྱི་སློབ་གསོའི་གནས་ཚུལ་ལ་རྒྱུས་མངའ་ཅུང་ཙམ་ཡོད་ནའང་། ད་དུང་མི་ཤེས་ས་མང་པོ་འདུག དཔེར་ན་རྒྱ་ཡིག་གི་སློབ་འབྲིང（ཀོས་ནན་སློབ་འབྲིང）འདི་འཛུགས་སྔ་བ་ཨེ་རེད། རྫོང་མི་རིགས་སློབ་འབྲིང་ལས་ལོ་རྒྱུས་རིང་བ་ཡིན་ནམ། འདིའི་སྐོར་ནས་གསུང་བཤད་ཅིག་གནང་ན་ཅི་འདྲ་རེད།
མཁའ་འགྲོ་སྐྱབས། རེད། རྒྱ་ཡིག་གི་སློབ་འབྲིང་འདི་སྤྱི་ལོ1958ལོར་ཆོས་ལུགས་ལ་བཅོས་བསྒྱུར་བྱེད་པའི་སྐབས་དེར། ཀླུ་ཚང་དགོན་པའི་འདུ་ཁང་དང་བླ་བྲང་། གྲྭ་ཤག་སྐོར་ཞིག་སློབ་ཁང་དང་ཉལ་ཁང་། ཇ་ཁང་དང་དོན་གཅོད་ཁང་བཅས་ལ་བསྒྱུར་ནས་ད་གཟོད་རྒྱ་ཡིག་གི་དམའ་རིམ་སློབ་འབྲིང་བཙུགས། རྫོང་སྲིད་གཞུང་གིས་དེར་སྒོར་ཁྲི་གཅིག་གནང་སྟེ་སློབ་སྒྲུབ་འགྲོ་སོང་ལ་བཏང་། སྐབས་དེའི་སློབ་གྲྭ་དེར་དགེ་རྒན་ལྔ་དང་སློབ་མ་བཅུ་དྲུག་གི་སློབ་ལོ་དང་པོའི་འཛིན་གྲྭ་བསྒྲུབས། སྤྱི་ལོ1960ལོར་དགེ་རྒན་བརྒྱད་དང་སློབ་མ་ང་གཅིག་ལ་འཛིན་གྲྭ་གསུམ་དུ་བགོས། སྤྱི་ལོ1961ལོར་སློབ་གྲྭ་དེ་ཉིད་ཀླུ་ཚང་དགོན་ནས་རྫོང་ནགས་ལས་ས་ཚིགས་སུ་གནས་སྤོར་བྱས། སྤྱི་ལོ1962ལོར་རྒྱ་ཡིག་སློབ་འབྲིང་གི་སྐབས་དང་པོའི་སློབ་མ་བཅུ་གཅིག་དངོས་སུ་སློབ་མཐར་ཕྱིན། དེའི་ནང་སློབ་འབྲིང་འདིའི་སྐབས་དང་པོའི་སློབ་མ་བདུན་མཐོ་འབྲིང་སློབ་གྲྭར་ཞུགས། སློབ་མ་བཞི་ཆེད་ལས་སློབ་འབྲིང་དུ་བསྡུ་ལེན་བྱས། ལོ་དེའི་ཟླ་བརྒྱད་པའི་ནང་སློབ་གྲྭ་འདི་ནགས་ལས་ས་ཚིགས་ནས་རྫོང་མཁར་གྱི་སློབ་ཆུང་ལ་གནས་སྤོར་བྱས། 1964ལོའི་ཟླ་དང་པོར་རྒྱ་ཡིག་སློབ་འབྲིང་འདི་མེད་པར་བཟོས། 1967ལོར་སླར་ཡང་བཙུགས། 1975ལོར་ད་ལྟའི་གནས་མལ་དུ་སྤར་ཏེ་གཞི་རྒྱ་ཇེ་ཆེར་བཏང་། 1980ལོར་ཞིང་ཆེན་ཡོངས་ཀྱི་གནད་སའི་སློབ་འབྲིང་ཉེར་གསུམ་གྱི་གྲས་སུ་ཚུད་ཅིང་། བསྟུད་མར་ལོ་གསུམ་ལ་སྒོར་ཁྲི་ཚོ་གསུམ་གྱི་སློབ་དཔྱོད་སྒྲིག་ཆས་གནང་། 1985ལོར་སློབ་འབྲིང་འདིར་འཛིན་གྲྭ་བཅུ་ལ་འཕར་ཞིང་། དེའི་ནང་མཐོ་རིམ་སློབ་འབྲིང་གི་འཛིན་གྲྭ་བཞི་དང་། དམའ་རིམ་སློབ་འབྲིང་གི་འཛིན་གྲྭ་དྲུག་ལ་སློབ་མ480དང་། དགེ་བཟོ་བ་བཞི་བཅུ་ཞེ་ལྔ་ཡོད། ལོ་རེར་སློབ་ཆེན་ལ་སློབ་མ་གང་མང་ཞིག་བསྐྱལ་སྟབས། གོང་རིམ་འབྲེལ་ཡོད་སྡེ་ཁག་གིས་གདེང་འཇོག་དང་བསྔགས་བརྗོད་བླ་མེད་མཛད།
ནོར་བུ་འབུམ། དངོས་ནས་བརྗེད་མི་རུང་བའི་སློབ་གསོའི་ལོ་རྒྱུས་གལ་ཆེན་ཞིག་རེད། དེས་ན་ཁྱེད་རང་མང་རྫོང་མི་རིགས་སློབ་འབྲིང་གི་སློབ་གཙོར་བཞུགས་དུས་རྫོང་སློབ་གསོ་ཅུ་ཡི་འགོ་བ་སུ་ཡིན་པ་དང་། མང་རྫོང་གི་སློབ་གསོའི་ཕྱོགས་ལ་གལ་ཆེ་བའི་བྱ་བ་གང་དག་བསྒྲུབས་པ་རེད། ཉིད་ཀྱིས་འདིའི་ཕྱོགས་ནས་ཁ་བརྡ་ཞིག་གནང་ན་ཅི་འདྲ་རེད།
མཁའ་འགྲོ་སྐྱབས། སྐབས་དེ་དུས་སློབ་གསོ་ཅུ་མི་ཟེར་བར་རིག་གནས་འཕྲོད་བསྟེན་ཁོ་ཟེར་བ་དང་། འགོ་བ་ནི་ང་ཚོས་བསྟོད་འོས་པའི་བློ་མཐུན་དོན་གྲུབ་རྒྱལ་མཆོག་ཡིན། ཁོང་གིས་མང་རྫོང་གི་མི་རིགས་སློབ་གསོའི་བྱ་བར་དཔྱིད་དཔལ་གསར་བའི་ལྗང་མྱུག་ཅིག་འབུས་དགོས་ན། མང་རྫོང་དུ་མི་རིགས་སློབ་འབྲིང་ཞིག་འཛུགས་གྲུབ་འབྱུང་རྒྱུ་དེ་ནི་གཙུག་གི་ནོར་བུ་དང་། མང་ཚོགས་ཀྱི་རེ་སྨོན་ཡིན་པར་དགོངས་ནས་ཁུལ་སྲིད་གཞུང་དང་ཁུལ་སློབ་གསོ་ཅུ་ལ་སྙན་ཞུ་སྒྲོན་ཏེ། སྤྱི་ལོ1976ལོར་མཚོ་ལྷོ་མི་རིགས་དགེ་ཐོན་སློབ་གྲྭའི་ཚབ་སྒྲུབ་གསོ་སྦྱོང་འཛིན་གྲྭ་རང་རྫོང་ནས་བསྒྲུབས་ཐུབ་པ་བྱུང་ལ། དེ་ཉིད་རྒྱལ་ཁབ་ཀྱི་གཅིག་བསྡུས་འཆར་གཞིའི་ནང་བཀོད་དེ་བྱ་བ་ཡང་བཀོད་སྒྲིག་བྱ་རྒྱུའི་རེ་སྨོན་བཞིན། འཛིན་གྲྭ་གཉིས་དང་སློབ་མ་བཞི་བཅུ་བསྡུ་བའི་ཆོག་མཆན་ལྟར། རྫོང་ཡོངས་ཀྱི་ཞང་དྲུག་ནས་སློབ་མ་བསྡུ་བའི་བརྡ་སྦྱོར་སྤེལ། དེ་ལྟར་སློབ་མ་བཞི་བཅུ་བསྡུ་ལེན་བྱས་པ་དེ་མང་རྫོང་མི་རིགས་སློབ་འབྲིང་གི་རྨང་གཞིར་གྱུར་སོང་། དེ་དུས་དམའ་འབྲིང་གྲ་སྒྲིག་འཛིན་གྲྭར་སློབ་མ་ཉེར་བདུན་དང་། དམའ་འབྲིང་ལོ་རིམ་གཉིས་པར་སློབ་མ་བཅུ་གསུམ་ལ་བུད་པ་དང་། དེ་དག་ལ་བོད་ཡིག་དང་རྒྱ་ཡིག རྩིས་རིག་གསུམ་གནད་དུ་བཟུང་ཐོག ས་རྒྱུས་དང་ལོ་རྒྱུས། ལུས་རྩལ། གླུ་དབྱངས། རི་མོ་བཅས་བཀོད་སྒྲིག་བྱས། སྤྱི་ལོ1981ལོར་སློབ་མ་བཅུ་གསུམ་སློབ་མཐར་ཕྱིན་ཏེ། འབྲོག་ཁུལ་གྱི་སློབ་གསོའི་ལས་གནས་དང་པོར་ཞུགས་ནས་བྱ་བ་སྒྲུབ་འགོ་བརྩམས། སྤྱི་ལོ1982ལོར་དམའ་འབྲིང་གྲ་སྒྲིག་འཛིན་གྲྭ་མཐར་ཕྱིན་པ་དང་། སྔར་ལྟར་སློབ་གསོའི་ལས་གནས་དང་པོར་བྱ་བ་བྱེད་དུ་མངགས།
        སྤྱི་ལོ1978ལོར་བློ་མཐུན་དོན་གྲུབ་རྒྱལ་རྒྱལ་གྱིས་རོང་འབྲོག་པའི་འབྱུང་གཞིའི་སྲུང་སྐྱོབ་ལ་དམིགས་ནས་རྫོང་ཨུ་དང་རྫོང་མི་དམངས་སྲིད་གཞུང་ལ་སྨན་དཔྱད་འཛིན་གྲྭ་ཞིག་བསྒྲུབ་རྒྱུའི་སྙན་ཞུ་ཕུལ་བར་ཆོག་མཆན་ཐོབ་ཅིང་། སྤྱི་ལོ1979ལོའི་ཟླ9བའི་ནང་མང་རྫོང་རོང་འབྲོག་ས་ཁུལ་ནས་འོང་བའི་སྨན་དཔྱད་སློབ་མ་ཉི་ཤུ་ལ་འཛིན་གྲྭ་བསྒྲུབས་ཤིང་། མི་ལོ་གསུམ་གྱི་དཀའ་སྡུག་གི་སློབ་སྦྱོང་བརྒྱུད། སྤྱི་ལོ1982ལོའི་ཟླ7པའི་ནང་སློབ་མཐར་ཕྱིན་ཏེ་མང་རྫོང་གི་རོང་འབྲོག་ས་ཁུལ་གྱི་འཕྲོད་བསྟེན་ཁང་དུ་ལས་བགོས་བྱས་ལ། དེ་དག་གིས་གཞི་རིམ་མང་ཚོགས་ལ་ནད་བཅོས་སྨན་དཔྱད་ཀྱི་བྱ་བ་བསྒྲུབས། དེ་ལྟར་སྤྱི་ལོ1980ལོ་ནས་བཟུང་། ལོ་རེར་ཞང་སོ་སོའི་སློབ་ཆུང་མཐར་ཕྱིན་སློབ་མ་བསྡུ་ལེན་བྱས་ཤིང་། སྤྱི་ལོ1983ལོར་མང་རྫོང་མི་རིགས་སློབ་འབྲིང་གིས་མཚོ་ལྷོ་མི་རིགས་དགེ་ཐོན་སློབ་གྲྭར་སློབ་མ་སོ་གསུམ་བསྐྱལ། དུས་དེ་ནས་བཟུང་། སློབ་གསོའི་ལམ་ལུགས་འཐུས་ཚང་དང་སློབ་མ་འཕར་ཚད་ཇེ་མགྱོགས་སུ་སོང་བ་རེད།
ནོར་བུ་འབུམ། ཐུགས་རྗེ་ཆེ། མཚམས་འདི་ནས་ཁྱེད་རང་སློབ་ཆུང་དང་སློབ་འབྲིང་། སློབ་གསོ་ཅུ་སོགས་ནས་དགེ་རྒན་དང་སློབ་གཙོ། ཅུ་ཀྲང་སོགས་ཀྱི་འགན་བཞེས་ནས་མང་རྫོང་གི་སློབ་གསོའི་བྱ་བ་ཇི་ལྟར་གཉེར་བའི་སྐོར་ནས་གསུང་བཤད་ཅིག་གནང་རོགས།
མཁའ་འགྲོ་སྐྱབས། རེད། ང་རང་སྤྱི་ལོ1961ལོར་མཚོ་སྔོན་དགེ་ཐོན་སློབ་གྲྭ་ནས་ཕ་ཡུལ་མང་རྫོང་དུ་ཕྱིར་ལོག་སྟེ་སྔ་གཞུག་ཏུ་མགོ་མང་གི་བྲག་དཀར་སློབ་ཆུང་དང་སུམ་མདོའི་འབའ་མཐའ་མའི་སློབ་ཆུང་། རྫོང་མི་རིགས་ཆ་ཚང་སློབ་ཆུང་། ཐར་ཤུལ་ཞང་གི་རྫ་རྒན་སློབ་ཆུང་དང་ཤེའུ་ལུང་སློབ་ཆུང་བཅས་ནས་དགེ་རྒན་བྱས། དེ་དུས་འབྲོག་ཁུལ་ཡོངས་སུ་འཁོར་སྐྱོད་སློབ་གྲྭ་དང་ཉིན་ཕྱེད་སློབ་གྲྭ། སྦྲ་གུར་སློབ་གྲྭ། རྟ་ཐོག་སྒོ་སམ་སློབ་གྲྭ། མཚན་མོའི་སློབ་གྲྭ། འཚོ་སློབ་སློབ་གྲྭ། གཏན་སྡོད་སློབ་གྲྭ་སོགས་འབྲོག་པ་མང་ཚོགས་དང་སློབ་མའི་རྗེས་འབྲངས་ནས་རྨོངས་སེལ་ལྟ་བུའི་སློབ་གྲྭ་སྒྲུབ་བཞིན་ཡོད་པས་སློབ་ཁྲིད་ཀྱི་རྒྱུ་སྤུས་ཧ་ཅང་ཞན། རྗེས་སུ་རྫོང་མི་རིགས་སློབ་འབྲིང་གི་སློབ་གཙོའི་འགན་ཁུར་བའི་སྐབས་དེར། རྫོང་དང་ཞང་། སྡེ་བ་སོ་སོས་སློབ་གྲྭ་རྒྱ་ཆེར་བསྒྲུབས་པས། སློབ་སྒྲུབ་ཀྱི་ཁ་ཕྱོགས་ལ་ངོ་བོའི་སྟེང་ནས་འགྱུར་བ་བྱུང་ཡོད། ཡིན་ནའང་། མི་ཤུགས་དང་རྒྱུ་ཤུགས། དངོས་ཤུགས་བཅས་ཧ་ཅང་གཉོམ་ཕྱིར། ཟ་ཁང་ཁང་མིག་གཉིས་དང་ཆུ་ཁོལ་ཁང་ཁང་མིག་གཅིག་ནི་ཁང་ལེབ་ཡིན། དགུན་ཁར་གྲང་བ་མི་ཁོག དཔྱིད་ཁར་རླུང་འཚུབ་དྲག་ཏུ་ལྡང་། དབྱར་ཁར་ཆུ་ཐིགས་རང་སར་བརྡོལ། དེར་ད་དུང་འབར་རྫས་ངེས་ཅན་ཞིག་དགོས་སྟབས། རིག་གནས་འཕྲོད་བསྟེན་ཁོ་ནས་སྐྱེལ་འདྲེན་ཡོ་བྱད་ལ་རྫོང་དཔེ་ཁང་གི་ཤིང་རྟ་རྙིང་བ་ཞིག་དང་དྲེལ་གཅིག་བྱིན། མཁོ་སྒྲུབ་ཀྱི་ལས་ཀ་གཙོར་མ་བཟུང་ན་དགེ་སློབ་ཀྱི་འཚོ་བའི་གནད་དོན་ཐག་མི་ཆོད་པས། རྫོང་གི་ཉེ་འཁོར་གྱི་མ་ནག་ཕྱུགས་ར་དང་ཐར་ཤུལ། གོང་བ། ཙག་ཀ གོང་བ་སུག་སྐོར་བཅས་སྡེ་བའི་དབྱར་ས་དང་དགུན་སར་སོང་ནས་འབར་རྫས་འཐུ་བཞིན་རང་ཁ་རང་གསོ་བྱ་དགོས། སྤྱི་ལོ1988ལོ་ནས་སྤྱི་ལོ1995ལོའི་བར་རྫོང་སློབ་གསོ་ཅུ་ཡི་ཅུ་ཀྲང་གི་འགན་ཁུར་ཞིང་རྫོང་ཡོངས་སུ་སློབ་གྲྭ་གསར་འཛུགས་དང་ཉེན་ཁང་ཞིག་གསོ། སློབ་དཔྱོད་ཞིབ་འཇུག་དང་དགེ་རྒན་གསོ་སྦྱོང་སོགས་བྱས་པར་མ་ཟད། ད་དུང་ཤུགས་སྣོན་གསུམ（སློབ་གྲྭའི་སྲིད་འཛིན་གྱི་བྱ་བར་ཤུགས་སྣོན། ནོར་སྲིད་འགྲོ་འོང་གི་བྱ་བར་ཤུགས་སྣོན། དགེ་སློབ་ཀྱི་འཚོ་བའི་བཀོད་སྒྲིག་ལ་ཤུགས་སྣོན）དང་གནད་འཛིན་གཉིས།（སློབ་ཁྲིད་རྒྱུ་སྤུས་མཐོར་འདེགས་ཀྱི་བྱ་བ་གནད་འཛིན་དང་། སློབ་ལོ་རན་པའི་སློབ་མའི་སློབ་ཞུགས་ཀྱི་བྱ་བ་གནད་འཛིན།）ནུས་འདོན་གསུམ（དགེ་རྒན་གྱིས་ནུས་ཤུགས་ཆེར་འདོན་པ་དང་། ཁྱིམ་བདག་གིས་ནུས་ཤུགས་ཆེར་འདོན་པ། སློབ་མས་ནུས་ཤུགས་ཆེར་འདོན་པ།）སོགས་ཀྱི་སྒྲིག་སྲོལ་བཙུགས་ནས་ཧུར་བརྩོན་བྱས་པར་མ་ཟད། ཞིང་ཆེན་ཡོངས་ཀྱི་འབྲོག་ཁུལ་བཅའ་སྡོད་སློབ་ཆུང་གི་ཉམས་མྱོང་བརྗེ་རེས་ཀྱི་ཚོགས་འདུ་མང་རྫོང་སུམ་མདོ་ཡུལ་ཚོ་ནས་འཚོགས་ལ། ཞིང་ཆེན་ཡོངས་ཀྱི་རྫོང་ཁག་ཞེ་དྲུག་གི་རྫོང་དཔོན་གཙོ་གཞོན་དང་སློབ་གསོ་ཅུ་ཀྲང་། སློབ་གཙོ་སོགས་མི་སྣ་མང་པོ་ཞུགས། སྐབས་དེར་མང་རྫོང་གི་སློབ་གསོའི་བྱ་བར་གྲུབ་འབྲས་འབུར་ཐོན་བླངས་པར་བརྟེན། ཞིང་ཆེན་དང་ཁུལ། རྫོང་རིམ་པ་བཅས་ཀྱིས་གཟེངས་རྟགས་མང་པོ་གནང་།
ནོར་བུ་འབུམ། རྒན་ལགས་ངོ་མ་བཀའ་དྲིན་ཆེ། མཇུག་མཐར་འདྲི་རྒྱུ་ཞིག་ཡོད་པ་ནི། མཚོ་ལྷོ་བོད་རིགས་རང་སྐྱོང་ཁུལ་གྱིས་སློབ་གྲྭ་ཐམས་ཅད་ཁུ་བསྡུ་བྱས་ཤིང་། སློབ་སྒྲུབ་ཀྱི་སྟོབས་ཤུགས་ཕྱོགས་གཅིག་ཏུ་འདོན་པའི་ལམ་ལུགས་བཙུགས་པའི་བྱ་བ་འདིར་ཁྱེད་རང་ལ་དགོངས་ཚུལ་ག་འདྲ་འདུག གཞན་ད་དུང་ཁྱེད་རང་གི་སེམས་ནས་བརྗོད་འདོད་པའི་སྐད་ཆ་ཞིག་ང་ཚོར་བསླབ་བྱའི་ཚུལ་དུ་གནང་ན་ག་འདྲ་རེད།
མཁའ་འགྲོ་སྐྱབས། དོན་དག་འདི་དྲིས་པ་ཧ་ཅང་འགྲིག་འདུག་ལ་སྔོན་ཆད་ངས་མང་དུ་ཡང་བཤད་མྱོང་། མཚོ་ལྷོ་ཁུལ་གྱིས་སློབ་གྲྭ་ཁུ་བསྡུ་བྱས་པའི་དོན་དག་འདི་ངོ་མ་དམིགས་རྒྱང་ཡོད་པའི་བྱ་བ་ཞིག་ཡིན་པས་ང་རང་ལ་མཚོན་ན་ཧ་ཅང་ཡིད་འཐད་ཡོད། རྒྱུ་མཚན་ནི་མི་ཤུགས་དང་དངོས་ཤུགས། རྒྱུ་ཤུགས་སོགས་ཕྱོགས་གཅིག་ཏུ་བཏོན་ནས་སློབ་གསོ་གཉེར་སྟངས་འདི་འགྲིག་ཡོད་པ་ཞིག་རེད། ཁྱད་པར་དུ་སྡེ་བ་རིམ་པའི་དགེ་རྒན་རྣམས་ཡ་ལས་ཡང་འགྲོ་དང་ཁ་རྒྱལ་མགོ་རྒྱལ་ལྟར་སྡོད་པའི་སྣང་ཚུལ་དེ་མེད་པར་བཟོས་ཡོད་ལ། སློབ་མ་རྣམས་ཀྱིས་རིམ་པ་མཐོ་བའི་སློབ་གསོ་མྱོང་བཞིན་ཡོད་པས་བཟང་མོད། འོན་ཀྱང་ལོ་རིམ་དང་པོ་ནས་གསུམ་པའི་བར་གྱི་སློབ་མ་རྫོང་རིམ་པར་བླངས་པ་དེ་འགྲིག་མི་འདུག་སྟེ། རྒྱུ་མཚན་ནི་བདག་དོམ་བྱེད་བདེ་བོ་མེད་པས་ཡིན། རབ་ཡིན་ན་ལོ་རིམ་དང་པོ་ནས་གསུམ་པའི་བར་ཞང་རིམ་པ་ནས་འཛུགས་པ་དང་ལོ་རིམ་བཞི་བ་ནས་དྲུག་པའི་བར་རྫོང་རིམ་པ་ནས་སློབ་གྲྭ་བཙུགས་ན། བདག་དོམ་བྱེད་བདེ་ལ་སློབ་གསོ་ཡང་གཏོང་བདེ་བོ་ཡོད།
        དེའི་འཕྲོར་ང་རང་གི་སེམས་ནས་བརྗོད་འདོད་པ་དང་རེ་བ་ཞིག་ཡོད་པ་ནི། སློབ་གྲྭ་གང་ཞིག་ལ་མཚོན་ན་སློབ་གཙོའི་བསྐོ་འཇོག་ནོར་མི་རུང་བ་ཡིན། སློབ་གཙོ་ནི་སློབ་གྲྭ་ཞིག་ལ་མཚོན་ན་མིག་ལྟ་བུ་རེད། སློབ་གཙོའི་རྒྱུད་ན་མི་རིགས་ལ་ཤ་ཚ་སྙིང་ཉེ་ཡོད་ན། དགེ་རྒན་གྱི་བྱ་བ་འཛིན་ཐུབ་ཅིང་སློབ་མར་རང་བཞིན་གྱིས་འགན་འཁུར་ངེས་ཡིན་པ་དང་། སློབ་གསོའི་བྱ་བ་ལད་དུ་མི་འཇུག་པ་ངེས་ཅན་རེད། སློབ་གཙོའི་རྒྱུད་ན་མི་རིགས་མེད་ན། སློབ་མ་དང་སློབ་གསོ་ལ་འགན་མི་ཁུར་བའི་བྱ་སྤྱོད་ཅིག་ཐོན་ཡོང་ངེས་ཡིན། འདི་ནི་ངས་བཤད་འདོད་པའི་སྐད་ཆ་དང་པོ་ཡིན། དེའི་འཕྲོར་འཛིན་བདག་གི་བསྐོ་འཇོག་ཡང་ནོར་མི་རུང་བའི་དོན་དག་གལ་ཆེན་ཞིག་ཡིན། ཁྱིམ་བདག་རྣམས་ཀྱིས་རང་གི་ཤ་ལས་མཆེད་པའི་བྱིས་པ་རྣམས་དགེ་རྒན་གྱི་ལག་ཏུ་བཞག་ནས་སློབ་གསོ་མྱོང་དུ་འཇུག་དགོས་ན། དེར་ཤ་ཚ་ཚ་དང་སྙིང་ཉེ་ཉེ་བྱེད་མཁན་གྱི་འཛིན་བདག་ཅིག་ཡོད་ན་སེམས་བདེ་ཞིང་ཡིད་ཆེས་ངེས་ཡིན། འཛིན་བདག་ལ་ཡིད་ཆེས་ཡོད་པར་གྱུར་ན་རིམ་གྱིས་སློབ་གྲྭ་དང་སློབ་གསོ་ལ་ཡིད་ཆེས་ནས་སློབ་གསོའི་བྱ་བར་རྒྱབ་སྐྱོར་ཡོད་པར་འགྱུར། དེ་ལས་ལྡོག་སྟེ་ཁྱིམ་བདག་བློ་མི་བདེ་ཞིང་ཡིད་མི་ཆེས་པའི་དགེ་རྒན་ཞིག་ཡིན་ན། ཐ་ན་སློབ་མར་ཚིག་ལྕི་མོ་ཞིག་བཤད་ནའང་དགེ་རྒན་གྱིས་སློབ་མར་གཅར་རྡུང་བྱས་སོང་ཞེས་སློབ་གྲྭའི་ནང་གྱོད་རྒྱག་ཏུ་ཡོང་བ་ལྟ་བུ་རེད། འདི་ནི་ངས་བཤད་འདོད་པའི་སྐད་ཆ་གཉིས་པ་དེ་ཡིན། དེའི་འཕྲོར་དགེ་སློབ་གཉིས་ཀྱི་འཚོ་བར་གནད་དོན་འབྱུང་དུ་འཇུག་མི་རུང་། དགེ་སློབ་རྣམས་ཀྱི་འཚོ་བ་བཟང་ན་སློབ་དང་ཁྲིད་ཀྱི་གནད་དོན་རང་བཞིན་གྱིས་ཡོང་ཐུབ་པ་དང་། བྱིས་པའི་ཕ་མ་དག་གི་སེམས་ཡང་བདེ་བར་འགྱུར་བ་ཆོས་ཉིད་ཀྱིས་གྲུབ་ཡོད། འདི་ངས་བཤད་འདོད་པའི་སྐད་ཆ་གསུམ་པ་ཡིན། ད་དེ་འདྲ་ཞིག་རེད།
ནོར་བུ་འབུམ། རྒན་ལགས་ཀྱིས་དེ་རིང་གསེར་ལས་ལྷག་པའི་ཉམས་མྱོང་མང་པོ་ངོ་སྤྲོད་གནང་སོང་བས་ཐུགས་རྗེ་ཆེ་ཞུ།
མཁའ་འགྲོ་སྐྱབས། ཡ་ཡ། ད་བཀའ་དྲིན་ཞུ་དགོས་ནི་མ་རེད།

ཡོང་ཁུངས། 2017ལོའི་མང་རྫོང་སློབ་གསོའི་ལྟ་སྐུལ།