སྒྲུང་མཁན་ཆོས་བཟང་དང་ཉེ་བར་བཅར་བ།

བཅར་འདྲི་མཁན། “འོ་སྐུ་ཁམས་བཟང་། ངའི་མིང་ལ་བསོད་ནམས་དཔལ་འབྱོར་ཟེར། པིར་མིང་དུ་གཟི་མིག་དགུ་པ་འབོད་ཀྱི་ཡོད། ད་ལྟ་ནག་ཆུ་གྲོང་ཁྱེར་གསེར་རྙེད་ཁུལ་སློབ་འབྲིང་གཉིས་པའི་དགེ་རྒན་ཞིག་ཡིན། ཁྱེད་སྒྲུང་མཁན་ཞིག་ཡིན་པ་གོ་ཐོས་བྱུང་ལ། མ་ཟད་སྒྲུང་མང་པོ་ཤོད་ཤེས་པ་དང་ད་ལྟ་ལྗོངས་རིམ་པའི་སྒྲུང་གཏམ་སྒྱུ་རྩལ་གྱི་རྒྱུན་འཛིན་མི་སྣ་ཡང་ཡིན་སྐད། དེར་བརྟེན་ཁྱེད་ལ་སྒྲུང་བབས་ཚུལ་དང་འབྲེལ་བའི་སྐོར་བཅར་འདྲི་ཞིག་བྱེད་དགོས་ཡོད། ཁྱེད་ཀྱིས་རང་ཉིད་ངོ་སྤྲོད་མདོར་བསྡུས་ཤིག་དང་ཁྱེད་ལ་ཐོག་མར་སྒྲུང་ཇི་ལྟར་བབས་ཚུལ་སྐོར་སོགས་ཡིད་ལ་ངེས་པ་གང་ཡོད་ངར་གསུང་རོགས།  ངས་ཟིན་ཐོར་འདེབས་ཀྱི་ཡིན། ”
སྒྲུང་མཁན་ཆོས་བཟང་། “འོ་ལགས་སོ། །ངས་གང་དྲན་ཞུ་ཆོག ”
བཅར་འདྲི་མཁན། “འོ་ཡཱ་་་་་། བྱས་ན་གསུང་དང་། ”
སྒྲུང་མཁན་ཆོས་བཟང་། “ད་གང་ནས་འགོ་བརྩམས་ཏེ་འཆད་དགོས་མིན་མ་ཤེས། ཕལ་ཆེར་བོད་ཟླ་དྲུག་པའི་དབྱར་གཞུང་དེར་རེད།  སྤང་ལ་མེ་ཏོག་བཀྲ་ཞིང་རི་ལུང་ཡོད་ཚད་རྩྭ་ཆུ་འཛོམས། གཡང་དཀར་ལུག་གི་འབའ་སྒྲ་དང་གནག་ཕྱུགས་ནོར་གྱི་ངུར་སྒྲ། འདོ་བ་རྟ་ཡི་འཚེར་སྒྲས་གནམ་སྔོན་དང་སྤྲིན་དཀར་བཤོས་པའི་མཐའ་ཡས་ཀྱི་རྩྭ་ཐང་དེའི་འཇིག་རྟེན་ཡོམ་ཡོམ་དུ་བསྒུལ་ཞིང་གཉིད་ལས་དཀྲོགས། སྦྲ་ནག་གི་ཆོན་ཐག་ཕྱོགས་བཞིར་བརྐྱངས་པའི་འབྲོག་སྡེ་རེ་རེའི་སྒོ་འགྲམ་དུ་ཕྱུར་ཐང་དང་ལུག་ཁྱུ་སྐར་ཚོགས་བཞིན་བཀྲ། རྫི་བོའི་གླུ་སྐད་ཀྱིས་རྩྭ་ཐང་དེའི་ལྷིང་འཇགས་དཀྲོགས་ཤིང་དཀར་ནག་འབའ་ངུར་གྱིས་ས་ཆེན་པོའི་གློ་སྙིང་འཕག་ཏུ་བཅུགས་པའི་དུས་ཚིགས་དེར། ཁོ་བོ་གཡང་དཀར་ལུག་གི་རྨིག་རྗེས་ཉུལ་ཏེ་རི་ལུང་གི་མཛེས་སྡུག་ཡོད་ཚད་འགམ་པའི་ནམ་ཟླ་ཞིག་རེད། དབྱར་གྱི་ལང་ཚོ་ཡིས་བསླུ་བྲིད་མོད་ལ་ཉི་མའི་དགྱེས་འཛུམ་གྱིས་སྐྱེ་འགྲོ་ཕལ་མོ་ཆེའི་ཚོར་ཤེས་རེ་ཞིག་གཉིད་ལམ་གྱི་ཡུལ་དུ་འཁྲིད་པའི་ཉིན་མོ་སྟེ། དེ་ནི་ཁོ་བོའི་མི་ཚེ་ཡི་གཏམ་རྒྱུད་ཅིག་གི་དབུ་ཁྱུད་དང་རྨི་ལམ་ཞིག་གི་ཐོག་མ། དཀྱོགས་མཚམས་ཤིག་གི་ལེའུ་འགོ་བརྩམས་པ་རེད། དོན་དུ་ང་རང་སྐྱེ་བོ་ཕལ་པའི་ཚོར་ཤེས་ལས་བརྒལ་ཏེ་སྒྱུ་རྩལ་གྱི་ཞིང་ཁམས་ཉུལ་བའི་ཐེམ་སྐས་སམ། ཁོ་བོ་ལྷ་སྒྲུང་ཀློང་གི་འཇིག་རྟེན་གཞན་ཞིག་ལ་བསྙེགས་པའི་དུས་ཚིགས་དེའི་དཀར་ཆག་འབྲི་འགོ་ཚུགས་པ་འདྲ། ངའི་དྲན་པའི་ཡོལ་བའི་ངོས་སུ་གསལ་ལ་མི་གསལ་དུ་འཆར་བ་སྟེ། གང་ལྟར་དབྱར་གཞུང་དེའི་ཉིན་གཅིག་གི་ཆོ་འཕྲུལ་ལས་རང་ཉིད་སྒྱུ་རྩལ་དང་འཁྲུལ་སྣང་། འཆར་ཡན། རྟོག་འཆར། འཇིགས་སྣང་སོགས་ཀྱིས་བསྡུས་གཟུགས་ལས་གྲུབ་པའི་ཡ་མཚན་གྱི་ཞིང་ཁམས་ཤིག་ལ་ཆས་སོང་བ་རེད། གཉིད་དུ་ཡུར་ནས་ཡུན་རིང་མ་སོང་བར་བྱིས་དུས་ཀྱི་བག་ཆགས་ཀློང་དུ་གླིང་སྒྲུང་ཁྲོད་ཀྱི་དཔའ་རྟུལ་ཞེས་སེམས་ངོས་སུ་གསོན་ཉམས་ཀྱིས་ཡང་ཡང་འགྱིང་མྱོང་བའི་མི་ཕོ་ཞིག་གིས།བདག་ལུས་འགུལ་མེད་དུ་བསྣན་ཏེ་སྨྲས་དོན། ཁྱེད་ཀྱིས་གླིང་སྒྲུང་ཤོད་ཤེས་པའི་གཏམ་རྒྱུད་ཅིག་ཁོ་བོས་ཐོས་ནས་ཡུན་རིང་སོང་རུང་། དུས་དེ་རིང་བར་དུ་ཁྱོད་དང་འཕྲད་པའི་བསྐལ་བ་མ་ཐོབ། སྟེས་དབང་སྟབས་ལེགས་ཤིག་གམ་ལྷ་འདྲེའི་ཆོ་འཕྲུལ་ཞིག་ལས་དེ་རིང་འུ་གཉིས་འདི་ནས་འཛོམས་པ་རེད།” སྒྲུང་མཁན་ཆོས་བཟང་། “འོ་ད་ལྟ་ངའི་མིང་ལ་ཆོས་བཟང་ཟེར། ཆུང་དུས་ཡུལ་མི་ཚོས་ངར་བུ་ཚེ་རིང་ཡང་འབོད་ཀྱིན་རེད། ལོ་རབས་བརྒྱད་ཅུའི་སྟོད་དེ༡༩༨༡ལོར་བོད་བྱང་ཐང་ནག་ཆུ་རྫོང་གསེར་གཞུང་ཤང་གི་འབྲོག་པའི་ཁྱིམ་ཚང་ཞིག་ཏུ་སྐྱེས། སྐབས་དེར་ངའི་ཁྱིམ་ཚང་གི་སློབ་གསོའི་ཁོར་ཡུག་དེ་ཙམ་ལེགས་པོ་མིན་རུང་། རང་ཡུལ་གྱི་མཐའ་ཡས་པའི་སྤང་ལྗོངས་དང་སྣ་མང་བའི་མེ་ཏོག  རི་ལུང་ཐང་གསུམ་གྱི་མཛེས་སྡུག དཀར་ནག་ཕྱུགས་རིགས་ཀྱི་འབའ་ངུར་བཅས་ལྷད་མེད་རང་བྱུང་གི་མཛེས་པ་དེ་ཁོ་ནས་ངའི་འཚོ་བར་མཚར་སྡུག་བསྐྲུན་ཅིང་འཇིག་རྟེན་གཞན་ཞིག་གི་ཀློང་དུ་ཁྲིད་པ་གྲངས་ཀྱིས་མི་ལང་པ་ནི་བདག་དང་འགྲོགས་འདྲིས་ཆེ་བའི་རྒྱུས་ཡོད་ཅིག་གིས་གླེང་རྒྱུ་ལས་མ་འདས། ད་ཆ་ཁྱེད་ཀྱིས་ངར་སློབ་སྦྱོང་གི་གོ་རིམ་གང་འདྲ་དང་ཤེས་བྱའི་ཆུ་ཚད་ཅི་ཙམ། དེ་བཞིན་དངོས་ཐོབ་དང་བརྒྱུད་ཐོབ་ཀྱི་རྒྱུ་ཆ་གང་གིས་ངས་ཐོལ་བྱུང་དུ་གླིང་སྒྲུང་ཤོད་ཐུབ་པར་ཉི་མ་མེ་གྲོགས་དང་ཆར་པ་ཆུ་གྲོགས་ཀྱི་ཚུལ་དུ་ཕན་འབྲས་བྱུང་ཞེས་སྐད་ཆ་དྲིས་ན། ཁོ་བོས་ཐད་ཀར་བརྗོད་ཐུབ་པ་ནི། རང་ཉིད་འཚར་ལོངས་ཀྱི་རྒྱུད་རིམ་ནང་དམངས་ཁྲོད་ངག་རྒྱུན་ལ་དགའ་ཞེན། གླིང་སྒྲུང་ལ་དད་མོས། རང་བྱུང་ཁམས་ཆེན་མོའི་མཛེས་སྡུག་ལ་ཞེན་ཆགས་དང་དགའ་སྣང་ཡོད་ཚད་ཡིད་ལ་སྒོམ་སྟེ་རྟོག་འཆར་གྱིས་ངག་ནས་བཟློ་བ་སོགས་ཅི་རིགས་ཀྱི་རྨང་གཞིའི་ཐོག རྣམ་ཀུན་ཕ་ཡུལ་གྱི་སྲོལ་རྒྱུན་ལ་འཐིམ་པའི་དམངས་སྲོལ་རིག་གནས་ཀྱི་ཤུགས་རྐྱེན་ནམ་བག་ཆགས་ཤིག་གི་སྣང་བརྙན་ཏེ། ཁ་ཤགས་དང་གཏམ་དཔེ། རྫི་གླུ་དང་ལ་གཞས། དམངས་སྒྲུང་བཅས་ཀྱིས་ཁོ་བོའི་སྒྲུང་གཏམ་སྒྱུ་རྩལ་ལ་མི་མངོན་པའི་རམ་འདེགས་བྱེད་མྱོང་བར་ཚོད་དཔག་གིས་བཤད་ན་མ་གཏོགས། དེ་མིན་ཆུང་དུས་ཀྱི་མི་ཚེ་ཕལ་ཆེ་བ་དཀར་ནག་ཕྱུགས་རིགས་ཀྱི་རྨིག་རྗེས་ཁོ་ན་བསྙེག་པ་ལས་ཚད་ལྡན་གྱི་སློབ་གྲྭར་འགྲིམ་པའི་བསྐལ་བ་ནི་ཐོབ་མ་མྱོང་། དེ་བཞིན་དམངས་ཁྲོད་ཀྱི་དགེ་རྒན་ལ་བརྟེན་ནས་ཀ་མད་སུམ་ཅུའི་འབྲི་ཀློག་དང་རིག་གནས་གཞན་ཞིག་དེ་བས་སྦྱོང་མྱོང་མེད། ངར་སྒྲུང་འབབ་ཚུལ་གྱི་རྒྱུད་རིམ་ནི་གོང་དུ་ཞུས་པ་ལྟར་ལས་དམིགས་བསལ་གྱི་ལོ་རྒྱུས་ཡ་མཚན་ཅན་དེ་འདྲ་གང་ཡང་ཞུ་ཤེས་ཀྱི་མི་འདུག་ལགས། གང་ལྟར་སྐབས་དེར་བལྟོས་བཅས་ཀྱིས་བཤད་ན་རང་ཉིད་ཕ་ཡུལ་དེའི་སྒྲུང་མཁན་རྩེ་ཕུད་ཅིག་ཡིན་པར་ངོས་འཛིན་མཁན་ཧ་ཅང་མང་པོ་རེད། དེ་བཞིན་ཡུལ་མི་ཚོས་བདག་གི་སྒྲུང་ལ་ཧ་ཅང་དགའ་ཞིང་དབྱར་དགུན་གྱི་དུས་ཚིགས་ལ་མ་བལྟོས་པར་ཕ་ཡུལ་གྱི་དགའ་སྟོན་ཆེ་ཆུང་ཡོད་ཚད་ལ་ཁོ་བོ་མགྲོན་དུ་བོས་ཏེ་སྒྲུང་ཤོད་བཅུགས་ཀྱི་རེད་ལ། ངས་ཀྱང་སྒྲུང་ཤོད་པ་ནི་རང་གི་དགའ་ཞེན་དུ་གྱུར་པའི་འཚོ་བ་རོལ་སྟངས་ཤིག་ཏུ་གྲུབ་ཟིན་འདུག མ་ཟད་ཕ་ཡུལ་གྱི་སྤུན་ཟླ་མིང་སྲིང་ཚོར་སྒྲུང་བཤད་དེ་སྤྲོ་བ་སློང་རྒྱུ་ནི་འོས་འགན་ནམ་ཞབས་ཕྱི་ཞུ་སྟངས་ཤིག་ཀྱང་ཡིན་པར་སྙམ་པ་ཡིན། དེ་མིན་དམིགས་ཡུལ་གཞན་གང་ཡང་འཁྱེར་མྱོང་མེད་ལ། རང་ཉིད་སྒྲུང་གཏམ་སྒྱུ་རྩལ་གྱི་ཤུལ་འཛིན་མི་སྣ་ཞིག་ཆགས་ཀྱི་རེད་བསམ་མྱོང་མེད། ང་ཕུགས་བསམ་མེད་པ་ཞིག་རེད་འདུག་ག་་་་་་་་། ཧཧ་་་་་་། སྣང་བ་སྐྱིད་པོ་རེད་ད་་་་་་་།” སྒྲུང་མཁན་ཆོས་བཟང་། “ད་ནི་སྣ་ཟིན་སྤུ་ཟིན་གྱི་ཚུལ་དུ་རང་ཉིད་ནག་ཆུར་ཡོང་སྟེ་སྒྲུང་འཆད་ཚུལ་སྐོར་དང་། དེ་འབྲེལ་གྱི་དོན་དག་འགའ་ཞུ་ཆོག་པ་གྱིས།”
བཅར་འདྲི་མཁན། “འོ་ལགས་སོ། །མུ་མཐུད་གསུང་རོགས།”
སྒྲུང་མཁན་ཆོས་བཟང་། “དམངས་གཙོའི་བཅོས་བསྒྱུར་བྱས་ཚུན་ནས་བཟུང་ནག་ཆུ་ནི་ཚོང་འདུས་ཤིན་ཏུ་ཆེ་བའི་ས་ཁུལ་ཞིག་ཆགས་ཤིང་དབུས་ཉི་མ་ལྷ་ས་ཚུན་དང་སྟོད་མངའ་རིས་སྐོར་གསུམ་མན། དགའ་དཔལ་ལྡན་ཆབ་མདོ་ཡན་གྱི་བོད་ཁམས་སོ་སོའི་ཡུལ་ཟོག་ཐོན་རྫས་དང་མི་སྣ་ཅི་རིགས་འཛོམས་ཤིང་གཏན་སྡོད་བྱེད་མཁན་ཡང་ཇེ་མང་དུ་སོང་བ་དང་ཆབས་ཅིག་ཚོང་འདུས་ཀྱི་ཡོ་ལང་རྒྱས་པ་རེད། ང་ཚོ་བྱང་རྒྱུད་འབྲོག་ཁུལ་གྱི་ཤ་མར་ཐུད་གསུམ་དང་བལ་ཁུ་རྩིད་གསུམ། ཀོ་པགས་ཚིལ་གསུམ། དེ་བཞིན་ཚྭ་དང་བུལ་ཏོག་སོགས་ཡུལ་ཟོག་ཐོན་རྫས་ཅི་རིགས་ཁྲོམ་རྭར་མཁོ་འདོན་བྱེད་ལ། ཤར་རྒྱུད་ས་མ་འབྲོག་ཁུལ་གྱི་ཡུལ་ལུང་ཁག་སོ་སོ་ནས། ནས་ཡུང་སྲན་གསུམ་དང་དབྱར་རྩྭ་དགུན་འབུ། རྫ་ཡུང་། འབྲུ་རིགས་དང་སྨན་སྣ་ཅི་རིགས་ཁྲོམ་རྭར་མཁོ་འདོན་བྱེད་ཅིང་སྟོད་སྨད་བར་གསུམ་དང་རྒྱ་བོད་ཧོར་གསུམ་གྱི་མི་ཚོགས་ཁ་བ་བཞིན་འབབ་ལ། ཚོང་འདུས་བུ་ཡུག་ལྟར་འཚུབ། སྐབས་དེར་ནག་ཆུ་ཁར་གཅིག་ནས་ཁྲོམ་ར་འཁྲུག་ཆ་དོད་པ་མ་ཟད། སྤྱི་སྒེར་གང་རུང་གིས་གཉེར་བའི་ཟ་ཁང་དང་ཇ་ཁང་། ཆང་ཁང་། སྒྲུང་ཁང་སོགས་ཆེ་ཆུང་ཅི་རིགས་ཡོད་པས་རང་རེའི་ས་ཁུལ་གྱི་སྒྲུང་པ་ཁག་ཅིག་ནི་ནག་ཆུ་ས་གནས་སུ་མཉམ་ལས་བྱས་ཏེ་སྒྲུང་ཁང་བཙུགས་ཤིང་ཕྱོགས་གཅིག་ནས་དཔལ་འབྱོར་ཡོང་འབབ་འཚོལ་བ་དང་ཕྱོགས་གཞན་ནས་སྐུ་མགྲོན་དགྱེས་པའི་གླིང་སྒྲུང་སྣ་ཚོགས་འཆད་ཀྱིན་ཡོད་པ་གོ་ཐོས་བྱུང་། མ་ཟད་སྒྲུང་མཁན་འགས་བཤད་པའི་སྒྲུང་ནི་སྒྲ་བསྡུ་འཕྲུལ་ཆས་བརྒྱུད་ནས་ཉན་ཐུབ་པ་རེད། དེ་བཞིན་ནག་ཆུ་ས་ཁུལ་གྱི་གེ་སར་རིག་གནས་རྟ་རྒྱུག་སྒྱུ་རྩལ་དུས་ཆེན་ཞེས་པའི་དགའ་སྟོན་གྱི་ལྟད་མོ་ཆེན་པོ་ཞིག་ཀྱང་ལོ་ལྟར་ཟླ་བ་བརྒྱད་པའི་སྐབས་སུ་འཚོགས་ཤིང་ཕྱོགས་སོ་སོ་ནས་འདུས་པའི་སྒྲུང་པ་ཚོས་སྒྲུང་འཆད་དེ་གཟིགས་མོ་བས་དགའ་བསུ་ཆེན་པོ་ཐོབ། དུས་མཚུངས་ཕྱོགས་བཞིའི་སྐུ་མགྲོན་དང་འབྲེལ་ཡོད་ལས་ཁུངས་སོ་སོས་སྒྲུང་ལ་དོ་སྣང་ཆེ་རུ་སོང་ཡོད་པ་འདྲ། རྣམ་ཀུན་རླུང་འཕྲིན་དང་བརྙན་འཕྲིན་གྱི་བརྒྱུད་ལམ་ཁག་ནས་གླིང་སྒྲུང་ཉན་ཐུབ་པའི་བསྐལ་བ་ལྡན་ཞིང་གླིང་སྒྲུང་བླུགས་པའི་སྒྲ་ཐག་ཀྱང་ཉོ་ཐུབ་པ་རེད། དེ་ནི་རིམ་པ་ཁག་གི་འབྲེལ་ཡོད་དབུ་ཁྲིད་དང་སྤྱི་ཚོགས་ཧྲིལ་པོས་གླིང་སྒྲུང་ལ་དོ་སྣང་བྱེད་ཤུགས་ཆེ་རུ་ཕྱིན་པའི་མངོན་རྟགས་ཡིན་པ་མ་ཟད། གླིང་སྒྲུང་ནི་རང་རེའི་མེས་རྒྱལ་གྱི་རིག་གནས་བང་མཛོད་དུ་འོད་སྟོང་འཚེར་བའི་མི་རིགས་ཀྱི་རིག་གནས་ཤུལ་བཞག་ཅིག་ཡིན་པ་ངོས་འཛིན་བྱེད་ཀྱིན་དེར་སྲུང་སྐྱོབ་དང་རྒྱུད་འཛིན། དར་སྤེལ་བཅས་གཏོང་ཤུགས་ཆེ་རུ་སོང་། ཁོ་བོ་ཡང་སྤྱི་ཚོགས་ཀྱི་རྣམ་པ་དེ་ལྟ་བུར་འགྲོགས་ཏེ་རང་ཡུལ་དང་མི་རིང་བའི་བྱང་ནག་ཆུ་ཁར་ཡོང་ནས་སྒྲུང་འཆད་འགོ་བརྩམས་པ་ཡིན།”
བཅར་འདྲི་མཁན། “ཨ་ལགས། ཁྱེད་ཀྱིས་སྒྲུང་མཁན་གཞན་གྱི་སྒྲུང་ལ་ཉན་ཏེ་རང་གིས་སྒྲུང་ཤོད་པ་ཨེ་རེད།”
སྒྲུང་མཁན་ཆོས་བཟང་། “མ་རེད། མ་རེད། གོང་དུ་ཞུས་པ་བཞིན་ང་སྔར་ནས་སྒྲུང་བབས་པ་རེད། ང་ལ་མཚོན་ན། དེ་སྔོན་ཕ་ཡུལ་གྱི་རི་གྲོང་ཆུང་ཆུང་དེར་གླིང་སྒྲུང་འཆད་དེ་ལོ་མང་སོང་མོད། ད་ལྟ་ནི་ཁོར་ཡུག་དེ་ལས་ཁོར་ཡུག་གཞན་ཞིག་བརྒལ་བ་རེད་ལ། ད་ལྟ་ངའི་སྒྲུང་ཉན་མཁན་ནི་རང་ཡུལ་གྱི་འབྲོག་དམངས་དཀྱུས་མ་དེ་ཚོ་ཙམ་མ་ཡིན་པར། སྟོད་སྨད་བར་གསུམ་གྱི་མི་ཚོགས་རེད། ཐོག་མར་ངས་སྒྲུང་ཤོད་ས་ད་ཡོད་ནག་ཆུ་ས་གནས་སློབ་འབྲིང་གི་གཡས་ཟུར་སྒྲུང་ཁང་ཞིག་ཏུ་སྒྲུང་བཤད་དེ་བསྡད་པ་ཡིན། སྐབས་དེར་ངའི་སེམས་སུ་རང་ལ་འབབ་པའི་སྒྲུང་རྣམས་དེ་སྔོན་མི་རིགས་དཔེ་སྐྲུན་ཁང་དང་བོད་ལྗོངས་མི་དམངས་དཔེ་སྐྲུན་ཁང་། མཚོ་སྔོན་མི་རིགས་དཔེ་སྐྲུན་ཁང་སོགས་ནས་དཔར་དུ་བསྐྲུན་པའི་དཔེ་ཆའི་ནང་གི་གླིང་སྒྲུང་ཁག་གི་ནང་དོན་དང་འདྲ་ཡོད་མེད། སྒྲུང་པ་གཞན་པ་ཚོས་ཇི་ལྟར་འཆད་བཞིན་ཡོད་མེད་སོགས་ལ་མཐུན་མིན་མ་བལྟོས་པར། རང་ཉིད་ཀྱི་སེམས་སུ་ཇི་ལྟར་ཤར་པ་དག་ཐད་ཀར་འཆད་ཅིང་གླུ་རུ་བླངས་པ་ཡིན། སྐབས་དེར་ངས་དགུ་སེང་དྲུག་འགྱུར་དང་ཁྲོམ་ཆེན་ཟིལ་ནོན། དལ་འབབ་རིང་མོ་དང་ཐ་ལ་དྲུག་འགྱུར་སོགས་གླིང་གི་དཔའ་རྟུལ་དང་མ་སྲུ་མོ་སྨན་གྱིས་གཙོས་ཧོར་འཇང་མོན་གསུམ་དང་། བདུད་སྟག་གྲུ་གསུམ་སོགས་ཀྱི་རྒྱལ་བློན་ཁག་གི་ངག་རྟ་མི་འདྲ་བ་སུམ་བརྒྱ་ལྷག་ཙམ་འགུགས་ཤེས་པའི་ཁར། «བདུད་གླིང» «ཧོར་གླིང» «འཇང་གླིང» «མོན་གླིང» «སྟག་གཟིག» «བྱེ་གླིང» «ཨ་བྲག་གཟི་རྫོང» «ལྷ་གླིང་གབ་རྩེང་འགུ་སྐོར» «འཁྲུངས་གླིང་པདྨའི་སྡོང་པོའམ་མེ་ཏོག་ར་བ»སོགས་རྒྱལ་ཁབ་མ་འདྲ་བ་དྲུག་ཅུ་ལྷག་གི་སྒྲུང་ཤོད་པར་ཐོག་པ་མེད། དེ་བཞིན་སྐབས་དེའི་སྤྱི་ཚོགས་ཡོངས་ཀྱིས་གླིང་སྒྲུང་ལ་དད་མོས་དང་དགའ་ཞེན་ཆེན་པོ་ཡོད་པ་རེད། ངས་དེ་ལྟར་ལོ་གཉིས་ཙམ་རིང་སྒྲུང་ཁང་དེར་སྒྲུང་འཆད་དེ་བསྡད་པ་ཡིན།”    
སྒྲུང་མཁན་ཆོས་བཟང་། “སྤྱི་ལོ2002ལོར་བོད་ལྗོངས་སྤྱི་ཚོགས་ཚན་རིག་ཁང་གིས་ངས་བཤད་པའི་སྒྲུང«ཨ་བྲག་གཟི་རྫོང»ཆ་ཚང་སྒྲ་ཐག་ཏུ་ཕབ་སྟེ་ཉར་ཚགས་བྱས་སོང་། སྐབས་དེར་ང་ཡང་དགའ་ཚོར་ཆེན་པོ་བྱུང་། ད་ཆ་སྒྲུང་དེ་དཔེ་གཟུགས་སུ་བསྐྲུན་ཡོད་མེད་ནི་མ་ཤེས། དེ་མིན་ཧོར་གླིང་དང་ཤིང་ཁྲི་དམུ་སྐས་གཅོད་ས། ཧོར་གུར་དཀར་གཉའ་སྒ་གཏོད་ས། ས་དམ་སྲོག་རྩ་གཅོད་ས་སོགས་རྟག་ཏུ་འཆད་ཀྱི་ཡོད་ལ། ཉན་མཁན་ཚོས་དགའ་བསུ་ཆེན་པོ་ཐོབ་མྱོང་། 2005ལོར་ད་ལྟ་ནག་ཆུ་ས་ཁུལ་བདེ་འཇགས་ཁྲོམ་རྭའི་ཟུར་དུ་སྒྲུང་ཁང་ཞིག་བཙུགས་ཏེ་སྒྲུང་འཆད་པ་ཡིན། སྐབས་དེར་དམངས་ཁྲོད་ཀྱི་ཉན་པ་པོ་མང་པོས་བདག་གི་སྒྲུང་ལ་དགའ་བསུ་ཆེན་པོ་ཐོབ་མྱོང་ལ། འུད་ཅུང་ཙམ་བཤད་ན་ངའི་སྒྲུང་ལ་སྐད་གྲགས་ཀྱང་གང་འཚམ་བྱུང་བ་རེད།”
བཅར་འདྲི་མཁན། “ལགས་སོ། །ཧ་ཅང་ཡག་པོ་རེད་ཟིག། མུ་མཐུད་གསུང་དང་།” བཅར་འདྲི་མཁན། “འོ་ལགས་སོ། །བཀའ་དྲིན་ཆེ།”
རྩོམ་འདི་ནག་ཆུའི་རྒྱལ་ཁབ་རིམ་པ་དང་ལྗོངས་རིམ་པའི་གེ་སར་སྒྲུང་པའི་ངག་བརྗོད་ལོ་རྒྱུས«སྒྱུ་རྩལ་གྱི་མི་ཚེ»ལས་བཏུས།