ང་ཚོར་བསྐོས་པའི་བཀོད་ཐང་འདི་ལྕི་དྲགས་མེད་དམ།
——བོད་ཀྱི་སློབ་ཆེན་ཁག་གི་ཆེད་ལས་བཀོད་སྒྲིག་ཐད་ཀྱི་བསམ་ཚུལ་འགའ།
གཅིག
མཐའ་ལ་ལ་ནས་བལྟས་ན། མི་རིགས་འདིའི་བསྐོས་བབ་ཀྱི་འགན་འཁྲིའི་རྡོག་ཁྲེས་སྒལ་རྩིབ་ཏུ་བླངས་ཤིང་། འབྱུང་འགྱུར་གྱི་རེ་བའི་ས་བོན་སྙིང་ཁོང་དུ་བཙུགས་པའི་སློབ་ཆེན་པ་ཚོ་ནི་ དབུ་ནག་བོད་པའི་རྟེན་ཕུར་དུ་ཆགས་པའི “མཐོ་སྒང་གི་གྲུ་གཟིངས” གསོན་པོ་ཏག་ཏག་རེད་སྙམ།
གཉིས།
མ་གཞི་ནས་སློབ་ཆེན་གྱི་ཆེད་ལས་དེ་ཉིད་སྲབ་མདའ་ཞིག་དང་འདྲ་དགོས་པར། བློ་ལྡན་རྣམས་ཐོས་གཉེར་གྱི་ལམ་བུར་ཆར་སྣེ་རླུང་ཁྲིད་ལྟར་དཀྱུ་དགོས་ནའང་། དུས་རྐྱེན་སྣ་ཚོགས་ཀྱི་དབང་གིས་བོད་ཀྱི་སློབ་ཆེན་ཁག་གི་ཆེད་ལས་བཀོད་སྒྲིག་དེ་གང་ནས་གང་ཞིག་ཏུ་སྐྱེལ་དགོས་པའི་དོས་ཁལ་ལྗིད་མོ་ཞིག་དང་འདྲ་ལ། བོད་ཀྱི་སློབ་ཆེན་པ་དག་ནི་དོས་ཁལ་ལྗིད་མོ་དེ་སྒེར་གྱི་སྒལ་རྩིབ་ཏུ་ཁུར་ཏེ་གང་ནས་གང་ཞིག་ཏུ་སྐྱེལ་བའི “མཐོ་སྒང་གི་གྲུ་གཟིངས” ལྟ་བུ་ཞིག་རེད།
ན་གཞོན་ནི་འབྱུང་འགྱུར་གྱི་རེ་བ་ཉག་གཅིག་ཡིན་ལ། དེ་བས་ཀྱང་ན་གཞོན་གྲས་ཀྱི་དྭངས་རྩེ་རུ་གྱུར་པའི་སློབ་ཆེན་པ་དག་ནི་མ་འོངས་པའི་བདག་པོ་ཡིན་གཤིས། རྒྱལ་ཁབ་ཡིན་ན་འདྲ། མི་རིགས་ཡིན་ཡང་ཆོག ཡང་ན་སྤྱི་ཚོགས་སོགས་གང་གིས་ཀྱང་སློབ་ཆེན་པ་དག་གི་འཚར་ལོངས་དང་འཕེལ་རྒྱས་ཀྱི་སླད་དུ། ནུས་ཡོད་ཅི་ལྕོགས་སྒོས་འགལ་རྐྱེན་མཐའ་དག་སེལ་ཅིང་མཐུན་རྐྱེན་ཡོད་ཚད་བསྐྲུན་པའི་འགན་ཁུར་ཞིག་མ་བསྐོས་རང་བབ་ཏུ་གྲུབ་ཡོད་ལ། སློབ་ཆེན་པ་དག་གིས་ཀྱང་གསར་སྐྱེས་ཀྱི་སྙིང་སྟོབས་དང་རྒྱུ་འབྲས་ཀྱི་བློ་མིག་གིས་རྒྱལ་ཁབ་དེ་དང་མི་རིགས་དེ། ཡང་ན་སྤྱི་ཚོགས་དེའི “མདུན་དུ་སྐྱོད་པའི་སྦས་ཤུགས་མཐུན་རྐྱེན་འཚོལ་དགོས་ལ། རྗེས་སུ་ལུས་པའི་གབ་གནས་འགལ་རྐྱེན་དེའང་འཚོལ” (འཇུ་སྐལ་བཟང་གི་སྙན་ཚིག་ཅིག་ལས་དྲངས།)དགོས་པར་སྙམ་མོ། །
གནད་འདི་དག་གི་དབང་གིས། ང་ཚོས་བོད་ཀྱི་སློབ་ཆེན་ཁག་གི་གནས་བབ་ངོ་མ་དང་བསྟུན་ཏེ། རྟོག་གེའི་མིག་དང་སྙོམས་འཇུག་གི་བློས་བསྔགས་པར་འོས་པ་ལ་དཔའ་དར་རིང་མོ་འཐེན་དགོས་ཤིང་། དགག་ཏུ་རུང་བ་ལ་རིགས་པའི་ཐོག་མདས་གཏོར་དགོས།
གསུམ།
སྤྱིར་རྒྱལ་ནང་གི་དམིགས་བསལ་གྱི་གནས་ཚུལ་རྐྱེན་དུ་བྱས་པས། གྲངས་ཉུང་མི་རིགས་རྣམས་ལ་ཆིན་ཧྭ་དང་པེ་ཅིན་སློབ་ཆེན་བཞིན་དུ། རང་གི་ཕ་སྐད་དང་མ་ཡིག་ལ་བསྟུན་ནས་ཆེད་དུ་བཙུགས་ཤིང་ཟུར་དུ་བཀར་ཆོག་ལ། ཆེད་ལས་དང་སྒྲིག་གཞི་ཡོངས་སུ་ཚང་བའི་སློབ་ཆེན་ནི་ཉུང་ཉུང་མ་གཏོགས་མེད་པས། སློབ་ཆེན་ཁག་གི་གྲངས་ཉུང་མི་རིགས་རྣམས་ཀྱི་ཆེད་ལས་ཀྱང་གྲངས་ཉུང་ཤ་སྟག་རེད། བོད་ཀྱི་སློབ་ཆེན་དག་གི་ཆེད་ལས་བཀོད་སྒྲིག་ཀྱང་དེ་ལས་མ་འདས་སོ། །
མིག་སྔར་བོད་ཀྱི་སློབ་ཆེན་ཁག་གི་ཆེད་ལས་བཀོད་སྒྲིག་གི་གནས་སྟངས་ནི། དེང་ཆར་བོད་ཀྱི་སློབ་ཆེན་དུ་འབོད་པའི་སློབ་གྲྭ་དེ་དག་ནི་རྒྱལ་གཉེར་གྱི་ཕྱོགས་བསྡུས་རང་བཞིན་གྱི་སློབ་ཆེན་དང་། མི་རིགས་སློབ་ཆེན་སློབ་ཆེན་གྱི་ཁོངས་གཏོགས་སུ་བོད་རིག་པའི་ཞིབ་འཇུག་སློབ་གླིང་ངམ་བོད་སྐད་ཡིག་རིག་གནས་སློབ་གླིང་། བོད་ཡིག་སྡེ་ཁག་སོགས་ཀྱི་རྣམ་པར་གནས་གཤིས། དེ་དང་བསྟུན་པའི་དངོས་གཞི་སློབ་མའི་ཆེད་ལས་ཀྱང་ཀྲུང་གོའི་གྲངས་ཉུང་མི་རིགས་སྐད་ཡིག་རིག་གནས་ཀྱི་ཆེད་ལས་ཡིན་ལ། དེའི་འུབས་སུ་བོད་ཀྱི་སྐད་ཡིག་དང་རྩོམ་རིག ལོ་ཙཱ། དགེ་ཐོན་སོགས་བསྡུས་ཡོད་ལ། གཞན་དུ་ན་སློབ་གྲྭ་རེ་གཉིས་སུ་རྩིས་འཁོར་དང་དྲུང་ཡིག བཟོ་ཚོང་དོ་དམ་ཕྱོགས་ཀྱི་ཆེད་ལས་ཀྱང་ཉུང་ཤས་ཤིག་ཡོད་པ་རེད།
དེས་ན། ཆེད་ལས་འདི་དག་ནི། བོད་ཀྱི་སློབ་གྲྭ་ཆེན་མོ་ཁག་གི་དངོས་གཞི་སློབ་མ་ཕལ་མོ་ཆེའི་སློབ་ཆེན་གྱི་སློབ་གཉེར་འཚོ་བའི་ཁ་ཕྱོགས་དང་གོ་རིམ་འབའ་ཞིག་ཡིན་ལ། དགེ་བའི་བཤེས་གཉེན་མང་ཆེ་བས་ལོ་ལ་ཟླ་བརྩེགས་ཏེ་བློ་གྲོས་ཀྱི་སྙུག་རྩེ་གཏོད་ཡུལ་ཉག་གཅིག་ཀྱང་ཡིན།
ཆེད་ལས་འདི་དག་གིས། བོད་བྱིངས་ཀྱི་ཆབ་སྲིད་དང་དཔལ་འབྱོར། རིག་གནས་ཡོངས་ཀྱི་གཞུང་རྟ་ནས་རྩ་བ། ཡལ་ག་ནས་ཡལ་འདབ་ཀུན་ལ་ཁེབས་དགོས་པ་མ་ཟད། ད་དུང་རྒྱུན་འཛིན་དང་དར་སྤེལ་གྱི་ནུས་པ་ཡང་ཐོན་དགོས།
ཆེད་ལས་འདི་དག་གི་གསོ་སྐྱོང་འོག གངས་ལྗོངས་ཀྱི་མ་འོངས་པའི་རེ་བར་སེམས་པའི་སློབ་ཆེན་པ་དག་གིས་བོད་ཆེན་པོའི་འཕེལ་རྒྱས་ལ་སྣེ་ཁྲིད་དང་གཞོགས་འདེགས་བྱ་དགོས།
མདོར་ན། ཆེད་ལས་འདི་དག་ནི་བོད་ཀྱི་སློབ་ཆེན་ཁག་གི་གནམ་ས་གཉིས་ཀྱི་གཞུང་ཤིང་རེད། བོད་ཀྱི་སློབ་ཆེན་ཁག་གོ་ལ་རིལ་མོ་འདི་ནས་ཆགས་པའི་རྟེན་ཕུར་རེད།
བཞི།
གོང་ལས་མཐུད་དེ་བཤད་ན། སློབ་ཆེན་གྱི་གཞུང་ཤིང་དང་རྟེན་ཕུར་དུ་ཆགས་པའི་ཆེད་ལས་དེ་དག་ཀྱང་དམིགས་བསལ་གྱི་དུས་ཀྱི་རྒྱབ་ལྗོངས་འོག་མེད་པ་ནས་ཡོད་པ་དང་། ཡོད་པ་ནས་དར་རྒྱས་སུ་སོང་བ་ཞིག་ཡིན་པས། རང་སྟེང་དུ་གནས་པའི་ལེ་ལན་དང་ཉེས་སྒྲིབ་ལ་ཁག་དཀྲི་ས་དང་ཁ་གཡར་ས་ཡོད་ཆོག་ཆོག་ཡིན་ལ། ང་ཚོས་ཀྱང་གུ་ཡངས་པའི་སྒོ་ནས་གདེང་འཇོག་བྱ་དགོས་མོད། དེའི་མ་ཚང་བ་དང་མི་འདང་ས། བསྒྱུར་དགོས་པ་དང་བཅོས་རུང་བ་སོགས་ཀྱང་མངོན་སུམ་ཡིན་པས་མ་ཚད་ཁ་ཚ་དགོས་གཏུགས་རེད།
འདིའི་ཕྱོགས་ལ༢༠༡༠ལོར་ཀྲུང་དབྱང་མི་རིགས་སློབ་གྲྭ་ཆེན་མོས་མིག་དཔེ་ཡག་པོ་ཞིག་བསྟན་པ་སྟེ། བོད་རིག་པའི་ཞིབ་འཇུག་སློབ་གླིང་གིས་རང་གི་ཞན་ཆ་མཐོང་སོང་ཟེར་ན་འདྲ། གཞན་གྱི་ལེགས་ཆ་རིག་སོང་ཟེར་ནའང་ཆོག གང་ལྟར། བོད་ཀྱི་སློབ་ཆེན་གྱི་དྭངས་རྩེ་དང་གསེར་ཏོག་ཏུ་གྱུར་ཅིང་། ༡༩༥༡ལོར་བོད་ཀྱི་སྐད་ཡིག་ཁྲིད་དཔྱོད་ཁང་ཞེས་རྟེན་འབྲེལ་གྱི་དྭངས་ཕུད་བསྒྲིགས་པ་ནས་ད་ལྟའི་བར་དུ། ཀྱག་ཀྱོག་གི་ལམ་ཕྲན་དུ་ཞུགས་ནས་རབ་བྱུང་གཅིག་ཙམ་འགོར་ལ་ཉེ་བའི་སྔ་རོལ་དུ། བོད་རིག་པའི་སློབ་གླིང་གི་དངོས་གཞི་སློབ་མ་ཚོར་ལོ་ཙཱའི་ཆེད་ལས་གསར་བ་ཞིག་བསྣན་པ་རེད། དེ་ནི་སྤྱི་ཚོགས་ལ་མཁོ་བའི་ཤེས་ལྡན་པ་སྐྱེད་བསྲིང་བྱ་རྒྱུ་དམིགས་པ་དང་པོ་རུ་བཟུང་བའི་སློབ་ཆེན་གྱིས་སྤྱི་ཚོགས་ཀྱི་དགོས་མཁོ་དང་བསྟུན་ནས་བསྒྱུར་བཅོས་ཐེངས་ཤིག་བྱས་པ་ཡིན་ལ། གསར་གཏོད་ཀྱི་ཁ་གཡང་ཤེད་ཀྱིས་སྒྲོག་པའི་རིག་པའི་དཔའ་བོ་དོན་གྲུབ་རྒྱལ་སྐྱེད་པའི་ཞིང་ས་རུ་ཁ་གཡང་དེ་ལ་མི་འགྱུར་དན་རྟགས་ཤིག་བཞག་སོང་བ་ཡང་ཡིན།
འོན་ཏེ། ཐེངས་འདིའི་ཆེད་ལས་བཅོས་བསྒྱུར་གྱི་དོན་སྙིང་འདི་ཙམ་ག་ལ་ཡིན། དེས་བོད་ཀྱི་སློབ་ཆེན་དག་གི་ཆེད་ལས་བཀོད་སྒྲིག་དེ་དུས་རབས་ཀྱི་རྗེས་ལ་ཆོད་ཀྱིན་མེད་པའི་ཉེན་བརྡ་བཏང་སོང་ལ། སྤྱི་ཚོགས་ཀྱི་དགོས་མཁོར་དང་འཚམས་པོ་མཐུན་པོ་ཞིག་ཡོང་ཐུབ་ཀྱིན་མེད་པའི་དྲན་སྐུལ་བྱས་བྱུང་། དེ་བས། ང་ཚོས་རྟོག་གེའི་མིག་དང་སྙོམས་འཇུག་བློས་བོད་ཀྱི་སློབ་ཆེན་ཁག་གི་ཆེད་ལས་བཀོད་སྒྲིག་ཐད་ལ་བློ་ཞིབ་མོས་ཕྱིར་རྟོག་རེ་བྱ་དགོས་འདུག
ལྔ།
བོད་ཀྱི་སྔ་མའི་མཁས་པ་རྣམས་ཀྱིས་ཐོས་པ་དོན་དུ་གཉེར་བའི་ཚེ། རིག་གནས་བཅུ་བོ་ཀུན་ལ་སློབ་གཉེར་བྱ་དགོས་པ་ལྟར། བོད་ཀྱི་སློབ་ཆེན་དག་གིས་ཀྱང་གོམས་སྲོལ་དེ་རྒྱུན་འཛིན་བྱས་ཡོད་ལ། བོད་ཀྱི་སློབ་ཆེན་བྱིངས་ལ་འདི་ལྟ་བུའི་སྣང་ཚུལ་ཞིག་ཡོད་དེ། ཆེད་ལས་དང་སློབ་ཚན་བཀོད་སྒྲིག་གང་གི་ཐད་ནས་ཀྱང་སྤྱི་ཡི་ཕྱོགས་སུ་བསྡུས་པ་ཅུང་ཐལ་བ་རེད།
དཔེར་ན། ཆེད་ལས་བཀོད་སྒྲིག་གི་ཐད་ཀུན་གྱིས་ཤེས་གསལ་ལྟར། བོད་ཀྱི་སློབ་ཆེན་ཕལ་མོ་ཆེ་ལ་ཀྲུང་གོའི་གྲངས་ཉུང་མི་རིགས་ཀྱི་སྐད་ཡིག་དང་རྩོམ་རིག་ཅེས་པ་ཞིག་ལས་ཆེད་ལས་གཞན་ཉུང་ཉུང་ཡིན་པ་དང་། གཞན་ཡོད་པ་དེ་དག་ཀྱང་ནང་དོན་གྱི་ཆ་ནས་བསྡུར་ན་གོང་དང་ཕར་ཆེར་ཆ་མཚུངས་སུ་གནས་བ་རེད། སློབ་ཚན་བཀོད་སྒྲིག་གི་ཐད་ནས་ཀྱང་དེ་ལྟར་ཡིན་ཏེ། རྩོམ་ཡིག་གི་ཆེད་ལས་ལ་ཆ་བཞག་ན། ཆེད་ལས་ཀྱི་མིང་ལ་རྩོམ་རིག་ཅེས་བཏགས་ཡོད་ནའང་ངེས་པ་དོན་གྱིས་རྩོམ་རིག་འཇོག་དཀའ་སྟེ། སློབ་ཚན་བཀོད་སྒྲིག་ཐད་བོད་རིག་པའི་ཞིབ་འཇུག་ཁྱབ་ཁོངས་ཀྱི་ཆོས་ལུགས་དང་དམངས་སྲོལ། སྐད་བརྡ་ལ་སོགས་མ་འདུས་པ་ཞིག་མེད་པའོ། །
འདི་ལྟ་བུའི་ཆེད་ལས་དང་སློབ་ཚན་བཀོད་སྒྲིག་བྱེད་སྲོལ་གྱིས་ཤེས་བྱའི་སྒྲིག་གཞི་སྣ་མང་ཅན་གྱི་ཤེས་ལྡན་པ་གསོ་སྐྱོང་བྱེད་པར་མཐུན་རྐྱེན་བསྐྲུན་ཡོད་ནའང་། ཞིབ་ཏུ་བསམ་ན་ལོ་བཞི་ཡི་ཡུན་ཐུང་ཐུང་གི་ཐོས་གཉེར་ཙམ་གྱིས་རེ་བའི་འབྲས་བུ་སྨིན་པ་ཅུང་དཀའ་བར་སྙམ་ལ། དེར་འབྱུང་སྲིད་པའི་མཇུག་འབྲས་ནི་གང་ཡང་སྦྱངས་ལ། གང་ལ་ཡང་རྣ་ཐོས་ཙམ་ཡོད་པ། གང་ཡང་ཕུ་ཐག་ཆོད་པ་ཞིག་མི་ཤེས་པ་དེ་ཡིན་ནོ། །
དེང་གི་དུས་རབས་འདིར་མཁོ་བ་སྣ་གཅིག་ལ་མཁས་པའི་ཤེས་ཡོན་པ་ཡིན་པ་ལ། ས་སྐྱ་པཎྚི་ཏས “མཁས་གང་ཤེས་བྱའི་དེ་ཁོ་ན། ། ཇི་བཞིན་རྟོགས་པ་ཡིན་པར་འདོད། ། བྱེ་བྲག་སྦྱངས་པའི་དོན་ཤེས་པ། ། དེ་ཡང་དེ་ལ་ཤེས་པ་ཡིན། །” ཞེས་རྒྱབ་རྩ་མནན་ཡོད་པས། ང་ཚོས་ཀྱང་དེ་དེ་བཞིན་ཡིན་པ་ཤེས་དགོས་པར་སྙམ་མོ། །
དྲུག
སློབ་ཆེན་པ་དག་ལ་མཚོན་ན་སློབ་ཆེན་ནི་མཐར་ཐུག་གི་དམིགས་ཡུལ་མིན་པར། སྤྱི་ཚོགས་ཀྱི་ལས་རིགས་སྣ་ཚོགས་ལ་ཞུགས་ཏེ་འཇོན་ཐང་དང་བློ་གྲོས་ཀྱིས་མི་ཚེའི་རིན་ཐང་མངོན་འགྱུར་བྱ་རྒྱུ་དེ་མཐར་ཐུག་གི་དམིགས་ཡུལ་རེད།
འོན་ཏེ་སློབ་ཆེན་པ་མང་པོ་ཞིག་གི་ཤེས་བྱའི་སྒྲིག་གཞི་དང་ཤེས་ཡོན་གྱི་ཆུ་ཚད་དེས་སྤྱི་ཚོགས་ཀྱི་དགོས་མཁོ་བསྐང་རྒྱུ་ཕར་ཞོག མི་སྒེར་གྱི་འཚོ་བའི་དགོས་མཁོ་ཡང་སྐོང་མི་ཐུབ་བའི་གནས་སུ་ལྷུང་འདུག་པས། སྐབས་འདིར་ང་ཚོས་རང་ཉིད་བརྒྱུད་མྱོང་བ་དང་བརྒྱུད་གྱིན་པའི་ལམ་སྟེ། ཆེད་ལས་ཀྱི་ནང་དོན་དང་གོ་རིམ་ལྟར་སྦྱངས་ཡོང་བ་དེ་སྤྱི་ཚོགས་ཀྱི་དགོས་མཁོ་འཕྲལ་ག་བཞིན་འཕྲོད་མེད་པ་ཤེས་ཐུབ་ལ། བོད་ཀྱི་སློབ་ཆེན་ཁག་གི་ཆེད་ལས་ཀྱི་ནང་དོན་དེ་ལའང་བཅོས་བསྒྱུར་བྱ་རྒྱུ་མང་དག་ཅིག་ཡོད་པ་ཡང་ཤེས་ཐུབ།
གཞན་སློབ་ཚན་བཀོད་སྒྲིག་གི་སྐབས་སུ་བསྐྱར་བཟློས་མང་བ་དང་། སློབ་ཆེན་ཁ་ཤས་སུ་གཞུང་བཀའ་པོད་ལྔ་དེའང་སློབ་སྐབས་གཅིག་གི་ནང་དུ་རྫོགས་པར་བྱས་པ་སོགས་སྣང་ཚུལ་འདྲ་མིན་མཐོང་རྒྱུ་མང་བས། དུས་དང་བསྟུན་པའི་བཅོས་བསྒྱུར་དང་དག་ཐེར་ཡང་ཡང་བྱ་རྒྱུ་དེ་ཁ་ཚ་དགོས་གཏུགས་དང་གལ་འགངས་ཆེ་བར་སེམས་སོ། །
བདུན།
སློབ་ཆེན་པ་དག་ལ་རང་སྐལ་དུ་ཐོབ་པའི་ཆེད་ལས་ནི་ཁ་ཕྱོགས་སྟོན་མཁན་ཞིག་ཡིན་དགོས་པ་ལས། གང་ཞིག་ནས་གང་ཞིག་ཏུ་བསྐྱལ་དགོས་པའི་དོས་ཁལ་དང་རྡོག་ཁྲེས་ལྗིད་མོ་མ་ཡིན་ལ། སློབ་ཆེན་པ་ཚོ་ཡང་མ་འོངས་པའི་བདག་པོ་ཡིན་པ་ལས་དོས་ཁལ་སྐྱེལ་མཁན་མིན་པ་ཤེས་དགོས།
དེས་ན། ཉི་མ་ནི་རིང་ལ། ད་དུང་སྐྱས་ཐག་ཀྱང་མི་ཐུང་སྟེ། ཁྱོད་ཀྱིས་བལྟས་ན། ང་ཚོར་བསྐོས་པའི་བཀོད་ཐང་འདི་ལྕི་དྲགས་མེད་དམ།
