༄༅། །ཐང་བོད་གནའ་བཞག་རྡོ་རིང་དང་དེའི་ལྷོ་ངོས་ཀྱི་རྡོ་རིང་།

ཇོ་བོ་དབུ་སྐྲའི་འགྲམ་དུ་བཙན་པོའི་རྒྱལ་རབས་ཞེ་གཅིག་པ་ཁྲི་གཙུག་ལྡེ་བཙན་རལ་པ་ཅན་གྱིས་ཁྲི་ལོ་བདུན་པ་ལྕགས་གླང་ལོ་སྤྱི་ལོ821ལོར་ཐང་རྒྱལ་རབས་ཀྱི་རྒྱལ་ས་ཁྲང་ཨན་དང་། ཆུ་སྟག་ལོ་སྤྱི་ལོ822ལོར་བོད་ཀྱི་ལྷ་སར་སྔ་རྗེས་སུ་གཅིག་མཐུན་ཆིངས་འགྲིག་གཏན་འཁེལ་བྱས་ཏེ་ཆིངས་ཀྱི་ཡི་གེའི་ནང་དོན་བོད་རྗེ་ཁྲི་རལ་པ་ཅན་གྱི་ཁྲི་ལོ་དགུ་པ་ཆུ་ཡོས་ལོ་སྤྱི་ལོ822ལོར་རྡོ་རིང་ལ་བཀོད་དེ་གཙུག་ལག་ཁང་གི་མདུན་དུ་བཙུགས་ཡོད། རྡོ་རིང་དེ་དང་གཅིག་མཚུངས་གཅིག་ཐང་རྒྱལ་རབས་ཀྱི་རྒྱལ་ས་ཁྲང་ཨན་དང་། རྒྱ་བོད་གཉིས་ཀྱི་ས་མཚམས་སུ་གུ་གུ་རྨེ་རུར་བཙུགས་ཡོད་ཀྱང་ད་ལྟ་བསྡད་མེད། རྡོ་རིང་གི་ཡི་གེའི་ནང་དོན་ནི་དེ་སྔར་ཆོས་རྒྱལ་སྲོང་བཙན་སྒམ་པོ་དང་། ཁྲི་གཙུག་ལྡེ་བཙན་གཉིས་ཀྱི་སྐབས་སོ་སོར་ཐང་རྒྱལ་རབས་ཀྱི་འུན་ཤིང་ཀོང་ཇོ་དང་། ཀིམ་ཤིང་ཀོང་ཇོ་བྱུང་ཚུལ་དང་། （ཀེམ་ཤིང་ཀོང་ཇོའི་སྲས་ཁྲི་སྲོང་ལྡེ་བཙན་ཡིན་པར་གྲགས）ཐང་བོད་གཉིས་ཆབ་སྲིད་གཅིག་ཏུ་མོལ་ཏེ།  གནམ་ལ་ཉི་ཟླ་ཟུང་གཅིག ས་ལ་བཙན་པོ་དབོན་ཞང་གཉིས་ལས་མེད་དོ་ཞེས་པའི་གནའ་ཚིག་དང་། ཕྱིན་ཆད་བོད་བོད་ཡུལ་ན་སྐྱིད། རྒྱ་རྒྱ་ཡུལ་ན་སྐྱིད། ས་མཚམས་ཡན་ཆད་ཕན་ཚུན་ལ་དམག་མི་དྲངས། གལ་ཏེ་དམག་དྲངས་ན་དམག་དྲངས་མཁན་དེ་ཕུང་བར་གྱུར་ཅིག་ཅེས་སོགས་མནའ་ཚིག་རྡོ་ལ་བྲིས། རྡོ་རིང་གི་ངོས་ཆུང་གཉིས་ལ་ཆིངས་ལ་བཞུགས་མཁན་རྒྱ་བོད་གཉིས་ཀྱི་བློན་པོ་རྣམས་ཀྱི་གོ་གནས་དང་རུས་མིང་སོགས་འཁོད་ཡོད། རྡོ་རིང་དེ་བཙུགས་པ་ནས་བཟུང་རྒྱ་བོད་མི་རིགས་བར་མཛའ་མཐུན་དམ་ཟབ་ཆགས་པ་དང་། ཕྱོགས་གཉིས་ཀས་འཁོན་རྩོད་ཞི་བར་བྱས་ནས་དམག་འཁྲུག་མི་ཡོང་བར་“རབས་ཁྲིར་སྐྱིད་པའི་མཇལ་འདུམ་ཆེན་པོ་”མཛད། རྡོ་རིང་འདི་བཙུགས་ནས་ད་བར་མི་ལོ་ཆིག་སྟོང་བརྒྱད་ཅུ་ལྷག་གི་ལོ་རྒྱུས་ཡོད་ལ་དེང་སང་ཡང་མཇལ་རྒྱུ་ཡོད།
ལྷ་ངོས་ཀྱི་རྡོ་རིང་དེ་ནི་བོད་ཆུ་སྦྲུལ་སྤྱི་ལོ1833ལོར་བོད་དུ་འབྲུམ་ནད་ཤུགས་ཆེ་སླེབས་ནས་མི་མང་པོ་འཆི་བ་དང་། ནད་འཕོག་པའི་མི་རྣམས་རི་ཁུག་ཏུ་ཕུད་ནས་བཀྲེས་སྐོམ་གྱིས་མནར་བ། ཆར་ཆུས་བརྡུང་བ་སོགས་འཆི་སྒུག་བྱ་དགོས་པའི་གནས་ཚུལ་ཐོན་སྐབས། བོད་སྡོད་ཨམ་བན་ཧྭ་ལིང（和琳）ཞེས་པ་དེས། བོད་མིར་ལྷ་འབྲུམ་བཙུགས་དགོས་ཚུལ་དང་། དེ་མིན་ཏཱ་ལའི་བླ་མར་ཞུ་འབུལ་གྱིས་བོད་མི་ཕྱུག་གྲས་ཡིན་ཚེ་བཟའ་འཐུང་གོས་སོགས་ཞལ་འདེབས་རྒྱག་རྒྱུའི་སྐུལ་སློང་དང་། རི་ཁུག་ཏུ་ནད་ཁང་འགའ་གསར་རྒྱག སྨན་བཅོས་མི་སྣ་མངགས་གཏོང་གིས་མི་ཁག་གཅིག་ནད་གཞི་དྲག་བསྐྱེད་བྱུང་བ་སོགས་ཀྱི་ཕན་འབྲས་ཐོན་པའི་ལོ་རྒྱུས་དང་། དེ་མིན་བོད་མི་འདས་གྲོངས་བྱུང་རྗེས་ཕུང་པོ་བྱ་གཏོར་སོགས་ཀྱི་ལམ་ལུགས་བཅོས་བསྒྱུར་བྱ་དགོས་ལུགས་འཁོད་ཡོད་པའི་རྡོ་རིང་དེ་ཡིན། རྒྱ་ཡིག་ལོ་རྒྱུས་སུ་ལྷ་འབྲུམ་རྡོ་རིང་ཡང་ཟེར། སྐབས་དེའི་གནས་ཚུལ་ལོ་རྒྱུས་དེབ་ཐེར་ནང་འཁོད་ཡོད་པ་གཤམ་གསལ་པར་རིས་དེ་ལས་རྟོགས་ཐུབ།