༄༅༎ གསར་དུ་རྙེད་པའི་མཚོ་སྔོན་ཞིང་ཆེན་ཁྲི་ཀ་རྫོང་ཁོངས་ཀྱི“རྫོང་མགོའི་བྲག་བརྐོས་རི་མོའི”ཡུལ་དངོས་རྟོགས་དཔྱོད།

རྫོང་མགོ་ནི་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་ཁྲི་ཀ་རྫོང་ལ་སེ་བ་གྲོང་རྡལ་གྱི་ཁོངས་སུ་གཏོགས་པའི་གྲོང་ཚོ་ཞིག་ཡིན། འདིར་བཀོད་པའི་བྲག་བརྐོས་རི་མོ་དག་ནི་ཉེ་བའི་ཆར་གྲོང་ཚོ་དེའི་མངའ་ཁོངས་ནས་གསར་རྙེད་བྱུང་པ་ཡིན་པས“རྫོང་མགོའི་བྲག་བརྐོས་རི་མོ”ཞེས་མིང་དུ་བཏགས་པ་ཡིན། ཡུལ་འདི་ནི་ཁྲི་ཀའི་རྨ་ཆུའི་འབབ་ཡུལ་གྱི་ནུབ་བྱང་གི་སྣེ་མཐའ་རུ་ཡོད་ཅིང་། གྲོང་ཚོ་གནས་ཡུལ་གྱི་ལུང་པའི་མིང་ལ་རྡོ་ར་ལུང་པ་ཟེར་པས་གྲོང་ཚོ་འདིའི་མིང་གཞན་ལ་རྡོ་རའི་རྫོང་མགོ་ཡང་ཟེར། རྫོང་མགོའི་བྲག་བརྐོས་རི་མོ་ནི་མཚོ་བོད་མཐོ་སྒང་གི་གནའ་བོའི་བྲག་བརྐོས་རི་མོ་ལས་མཚོ་སྔོན་གྱི་བྲག་བརྐོས་རི་མོའི་གྲས་སུ་གཏོགས་པ་གདོན་མི་ཟ་ལ། ད་སྔ་སུས་ཀྱང་མཐོང་མྱོང་མེད་པའི་རྨ་ཆུའི་འགྲམ་རྒྱུད་ཀྱི་བྲག་བརྐོས་རི་མོ་ཁག་ཅིག་ཡིན་པས་ཞིབ་འཇུག་གི་རིན་ཐང་ཆེན་པོ་ལྡན། རྫོང་མགོའི་བྲག་བརྐོས་རི་མོ་ལ་སྤྱིའི་ཆ་ནས་མདོ་དབུས་མཐོ་སྒང་གི་བྲག་བརྐོས་རི་མོའི་ཁྱད་ཆོས་ལྡན་ལ། བྱེ་བྲག་གིས་གཟུགས་རིས་འདྲ་མིན་དང་། ཐོན་ཡུལ་ཁྱད་པར་བ་ཡིན་པ། ཁྱབ་སྟངས་ངོ་མཚར་བ་སོགས་ཐུན་མིན་གྱི་ཁྱད་ཆོས་ཀྱང་མང་དུ་མཆིས། བྲག་བརྐོས་རི་མོ་ཡོད་སའི་གནས་འདི་དག་ནི་ལུང་མཐིལ་གྱི་ཆུ་ངོས་ལས་རྨི༥༠༠ཡས་མས་ཀྱིས་མཐོ་བའི་རི་ཐང་མཚམས་སུ་ཡོད་ཅིང་། ཆ་སྙོམས་ཀྱི་མཐོ་ཚད་ལ་མཚོ་ངོས་ལས་རྨི༢༦༠༠ཡོད་པ་དང་། འཕྲེད་ཐིག༡༠༡ཚེག༡དང་། གཞུང་ཐིག༣༦ཚེག༡གི་མཚམས་སུ་ཡོད། སྔར་ལུང་རྒྱུད་ཐམས་ཅད་བྲག་བརྐོས་རི་མོས་ཁེངས་ནས་ཡོད་པ་གདོན་མི་ཟ་མོད། ལུང་པའི་ཕུ་ཐག་རིང་ཞིང་དབྱར་དུས་སུ་ཤྭ་འོད་རྒོལ་བས་ལུང་གཞུང་ཐམས་ཅད་ཆུས་དྲུས་ནས་བདེ་ཐང་ཐམས་ཅད་ལེབ་མོར་བཅད་ཟིན་པའི་ཤུལ་ན་ལུས་པའི་ཐང་ཁུག་རེ་རེའི་ངོས་སུ་མིག་སྔར་གསར་རྙེད་བྱུང་པའི་ལྷག་ལུས་ཀྱི་བྲག་བརྐོས་རི་མོ་དག་མཐོང་ཐུབ། ཡིན་ནའང་གནས་འདི་ནི་ད་ལྟ་ད་དུང་ལྟ་ན་སྡུག་ཅིང་ཕུན་སུམ་ཚོགས་པའི་གནའ་བོའི་བྲག་བརྐོས་རི་མོ་བརྒྱ་ཕྲག་ལས་བརྒལ་བའི་བང་མཛོད་ཆེན་པོ་ཞིག་ཡིན།
རྨ་ཆུ་ཁ་ནས་རྫོང་མགོ་སྡེ་བའི་དབར་དུ་ལེའུ་བར་དྲུག་ཙམ་ཡོད་ཅིང་། རྫོང་མགོའི་བྲག་བརྐོས་རི་མོ་རྙེད་ཡུལ་ནི་སྡེ་བ་འདིའི་བེའུ་ཐང་ཁུག སྡོམ་འཚེར། ཤྭ་རོང་ཁུག གསེར་ཁང་ཁུག ཝོ་རིས་ཁུག ཨ་བསེ་ཁུག་བཅས་ཡིན་ལ། གནས་འདི་དག་ནི་རྫོང་མགོ་སྡེ་བའི་གྲོང་ཁྱིམ་ཆགས་ཡུལ་གྱི་ཉེ་འཁོར་སྟེ་སྤྱིའི་རིང་ཐུང་ལ་སྤྱི་ལེ་བཅུ་ཙམ་གྱིས་ཆོད་པའི་ནང་རོལ་ཡིན་ཞིང་། ཕན་ཚུན་བར་དུ་སྤྱི་ལེ་གཉིས་གསུམ་དང་ཡང་ན་དྲུག་བདུན་ཙམ་གྱི་བར་ཆོད་ལས་མེད།
རྫོང་མགོའི་བྲག་བརྐོས་རི་མོ་ནི་མདོ་དབུས་མཐོ་སྒང་གི་གནའ་བོའི་བྲག་བརྐོས་རི་མོའི་བྱེ་བྲག་ཅིག་ཡིན་པས། བརྐོས་རིས་གཟུགས་བརྙན་གྱི་ཆ་ནས་བོད་ཡུལ་གྱི་བྲག་བརྐོས་རི་མོ་གཞན་དག་དང་ཕལ་ཆེར་འདྲ་བར་སྣང་སྟེ། མིག་སྔར་གསར་རྙེད་བྱུང་བའི་བརྐོས་རིས་ཚང་མ་ཕྱོགས་བསྡོམས་རགས་རིམ་ཙམ་བྱས་ན་ཕལ་ཆེར་རིགས་གསུམ་ཙམ་ལ་འདུ་བར་འདོད་དེ། དང་པོ་ནི་སྲོག་ཆགས་ཀྱི་རིགས་ཡིན། གཉིས་པ་ནི་འགྲོ་བ་མིའི་རིགས་ཀྱི་གཟུགས་དབྱིབས་སྣ་ཚོགས། གསུམ་པ་རྩི་ཤིང་གི་རིགས། བཞི་བ་ནི་གནའ་བོའི་ཆོས་ལུགས་སོགས་ཀྱི་དོན་སྙིང་ལྡན་པའི་མཚོན་བྱེད་རི་མོ་སྣ་ཚོགས་པ། དང་པོ་སྲོག་ཆགས་ཀྱི་རིགས་ལ། འབྲོང་གཡག་དང་ཤྭ་བ། རྣ་བ་སོགས་རི་དྭགས་ཀྱི་གྲས་སུ་གཏོགས་པའི་རིགས་དང་། སྟག་དང་སྤྱང་ཁུ་སོགས་གཅན་གཟན་གྱི་རིགས། ས་འབྲུག་གི་གཟུགས་རིས་དང་། གཡུ་འབྲུག་སྔོན་མོའི་དབྱིབས་ལྟ་བུའི་ཆུ་དང་རྒྱ་མཚོ་ལ་འབྲེལ་ཆེ་བའི་སྲོག་ཆགས་ཀྱི་རིགས། གཞན་ཡང་སྦྲུལ་ལྟ་བུའི་སྐམ་སའི་ནུར་འགྲོའི་སྲོག་ཆགས་ཀྱི་རིགས། བྱ་ལྟ་བུའི་མཁའ་ལ་འཕུར་བའི་འདབ་ཆགས་ཀྱི་རིགས་བཅས་ཕྱོགས་ལྔ་ཙམ་དུ་འདུ། གཉིས་པ་ནི་འགྲོ་བ་མིའི་རིགས་ཀྱི་གཟུགས་དབྱིབས་སྣ་ཚོགས་པ་སྟེ། དེའི་ནང་གསེས་སུ་རི་དྭགས་བཤོར་བ་དང་། བྲོ་འཁྲབ་པ། འགྲོ་རྒྱུགས་བྱེད་པ། རྟར་ཞོན་པ་སོགས་སྤྱི་ཚོགས་འཚོ་བ་མཚོན་པའི་རིགས་དང་། ཆོས་ལུགས་ཀྱི་ཆོ་ག་སྒྲུབ་པའི་སྲོལ་མཚོན་པའི་རིགས་གཉིས་སུ་འདུ། གསུམ་པ་ནི་གནའ་བོའི་ཆོས་ལུགས་སོགས་ཀྱི་དོན་སྙིང་ལྡན་པའི་མཚོན་བྱེད་རི་མོ་སྣ་ཚོགས་སྟེ། དཔེར་ན། ཉི་མ། ཟླ་བ། གཡུང་དྲུང་། རླུང་འཁོར། ཤིང་སྡོང་གི་ཡལ་ག འཕང་ཤིང་ལྟ་བུ་རེད། གོང་གསལ་རིགས་གསུམ་པོ་འདི་དག་ནི་མདོ་དབུས་མཐོ་སྒང་གི་ཡུལ་གྲུ་ཁག་ནས་ཐོན་པའི་བྲག་བརྐོས་རི་མོ་རྣམས་དང་ཕལ་ཆེར་མཐུན་པར་སྣང་ཡང་། རྫོང་མགོའི་བྲག་བརྐོས་རི་མོ་ལ་མཚོན་ན་དེ་དག་གི་ཁྲོད་ནས་ནམ་རྒྱུན་མཐོང་དཀོན་པའི་རི་མོ་ཁ་ཤས་ཀྱང་ཡོད་པ་སྟེ། དཔེར་ན་ས་འབྲུག་གི་གཟུགས་རིས་དང་གཡུ་འབྲུག་སྔོན་མོའི་གཟུགས་རིས་ལྟ་བུ་ནི་དེ་སྔོན་མདོ་དབུས་མཐོ་སྒང་ནས་རྙེད་པའི་བྲག་བརྐོས་རི་མོ་དག་གི་ཁྲོད་ནས་མཐོང་དཀོན་པ་དང་། གཞན་ཡང་འཁོར་ལོའི་རིགས་ལྟ་བུར་མཚོན་ན་སྔ་རབས་མཁས་པ་དག་གིས་གནའ་བོའི་འདྲུད་འཁོར་གྱི་རིགས་ཡིན་པར་འདོད་མོད། ཁོ་བོའི་རྨོངས་ཚོད་ལ་འབྱུང་བ་རླུང་གི་མཚོན་དོན་ཡིན་པར་སེམས་པས། རྫོང་མགོའི་བྲག་བརྐོས་རི་མོའི་མཚོན་དོན་སོགས་ལ་རྟོགས་དཔྱོད་མཐའ་འཁྱོལ་བ་གནང་རྒྱུ་ནི་ང་ཚོའི་མདུན་དུ་ལྷག་པའི་འོས་བབ་ཀྱི་གནད་ཆེན་པོ་ཞིག་རེད།  རྫོང་མགོའི་བྲག་བརྐོས་རི་མོ་གསར་དུ་རྙེད་པ་དེས་མདོ་དབུས་མཐོ་སྒང་གི་གནའ་བོའི་བྲག་བརྐོས་རི་མོའི་ཁྱབ་ཁོངས་རྒྱ་བསྐྱེད་པ་དང་། གནའ་བོའི་བོད་པའི་རིག་གནས་ཀྱི་འཚོལ་ཞིབ་དང་ཤུལ་རྫས་གསོག་འཇོག་ཐད་ལ་རིན་ཐང་ཆེན་པོ་ལྡན་པར་མ་ཟད། གདོད་མའི་དད་མོས་དང་ཐོན་སྐྱེད་འཚོ་བའི་གནས་སྟངས་སོགས་ཀྱི་ཞིབ་འཇུག་ལ་རིན་ཐང་བྲལ་བའི་རྒྱུ་ཆ་མཁོ་སྤྲོད་བྱས་པ་རེད།  དེ་བས་རྫོང་མགོའི་བྲག་བརྐོས་རི་མོར་ཁྱད་ཆོས་འདི་དག་ལྡན་པར་འདོད་དེ།
གཅིག་ནས་རྙེད་སའི་ས་ཁུལ་ལ་ཁྱད་ཆོས་ལྡན་པ་སྟེ། རྫོང་མགོའི་བྲག་བརྐོས་རི་མོ་ཐོན་ཡུལ་ནི་དེ་སྔོན་གནའ་བོའི་བྲག་བརྐོས་རི་མོ་ཐོན་མ་མྱོང་པའི་ས་ཁུལ་གྱི་གྲས་སུ་གཏོགས་པ་སྟེ། དེ་སྔོན་མཚོ་སྔོན་གྱི་ཡུལ་གྲུ་བཅུ་གསུམ་ཙམ་ནས་གནའ་བོའི་བྲག་བརྐོས་རི་མོ་རྙེད་པ་ཐམས་ཅད་མཚོ་སྔོན་པའི་མཐའ་འཁོར་གྱི་འབྲོག་ཁུལ་དུ་གཏོགས་པ་རེད། དཔེར་ན་མཚོ་སྔོན་པོའི་བྱང་རྒྱུད་ཀྱི་རྐང་ཚ་རྫོང་དང་། ཐེམ་ཆེན་རྫོང་། ནུབ་རྒྱུད་ཀྱི་དབུས་ལམ་རྫོང་དང་། དུར་ལམ་རྫོང་། ན་གོར་མོ་གྲོང་ཁྱེར། དེ་མིན་ལྷོ་རྒྱུད་ཀྱི་གུང་ཧོ་རྫོང་བཅས་འབྲོག་ཁུལ་དུ་གཏོགས་པའི་ས་བབ་མཐོ་བའི་རྩྭ་ཐང་ཆེན་པོ་དག་ལས་ཐོན་པ་མ་གཏོགས། རྨ་ཆུ་དང་འབྲི་ཆུའི་འགྲམ་རྒྱུད་ཀྱི་ས་བབ་ཅུང་དམའ་བའི་གཞུང་ཁུག་དང་ལུང་རྒྱུད་དག་ནས་རྙེད་མ་མྱོང་པས། ཐོན་ཡུལ་གྱི་ཆ་ནས་གཞན་ལས་ཁྱད་དུ་འཕགས་པ་རེད།
གཉིས་ནས་རི་མོའི་གཟུགས་བརྙན་ཕུན་སུམ་ཚོགས་པ་སྟེ། རི་དྭགས་དང་གཅན་གཟན་གྱི་རིགས་ཡོད་པར་མ་ཟད། ཆུ་ལ་གནས་པའི་ས་འབྲུག་སོགས་ཀྱི་གཟུགས་བརྙན་ཡང་མཐོང་ཐུབ་ལ། དེ་མིན་མིའི་གཟུགས་དབྱིབས་ལ་མཚོན་ན་ཡང་སྐྱ་མི་དང་རྔོན་པ། ཆོ་ག་པ་སོགས་ཀྱི་སྣང་བརྙན་སྣ་ཚོགས་ཡོད། གཞན་ཡང་ཉི་ཟླ་དང་གཡུང་དྲུང་། སྡོང་བོའི་ཡལ་ག འཁོར་ལོ། འཕང་ཤིང་སོགས་གནའ་བོའི་ཤེས་རིག་གི་མཚོན་བྱེད་དུ་གྱུར་པའི་རི་མོའང་སྣ་ཚོགས་ཡོད་པས། བྲག་བརྐོས་རི་མོའི་རྣམ་གྲངས་ཧ་ཅང་ཕུན་སུམ་ཚོགས་པ་རེད།
གསུམ་ནས་ཁྱབ་ཚུལ་ཁྱད་པར་བ་ཡིན་པ་སྟེ། ལུང་གཞུང་གཅིག་གི་ནང་ཁུལ་གྱི་ལེའུ་བཅུ་ཙམ་གྱི་ནང་རོལ་དུ་བྲག་བརྐོས་རི་མོ་རྣམས་གནས་དྲུག་ཙམ་གྱི་ཐང་ཁུག་ལ་བྱུར་བུར་སྤུངས་ནས་ཡོད་པ་རེད།
བཞི་ནས་བརྐོས་གཟུགས་རེ་རེ་བཞིན་རྡོ་ཕ་བོང་ཁེར་རྐྱང་གི་ངོས་སུ་བཀྲ་བ་དང་། དེ་ཡང་རྐོ་ཡུལ་གྱི་རྡོ་བ་ལ་ཆེ་ཆུང་གི་ཁྱད་པར་མེད་ཅིང་། ཆེ་བ་ཕ་བོང་གི་ངོས་དང་ཆུང་བ་སྲིད་ཞེང་ལ་ཁྲི་གང་ལས་ལྷག་པ་ཙམ་གྱི་རྡོ་ངོས་སུའང་རི་མོ་བརྐོས་ཡོད་པས། སྐབས་དེའི་མི་རྣས་ཀྱིས་རང་གིས་མཐོང་ཚད་ཀྱི་རྡོ་ངོས་སུ་རི་མོ་བརྐོ་བའི་སྲོལ་རྒྱུན་ཡོད་པ་ལྟ་བུའི་སྣང་བ་བཅོས་མིན་དུ་ཤར་འོངས། 
མདོར་ན། རྫོང་མགོའི་གནའ་བོའི་བྲག་བརྐོས་རི་མོ་ནི་མདོ་དབུས་མཐོང་སྒང་གི་ཤར་མཐའི་རྨ་ཆུ་འབབ་ཡུལ་གྱི་ལུང་ཁུལ་ནས་གསར་དུ་རྙེད་པའི་བྲག་བརྐོས་རི་མོའི་སྐོར་ཚོམ་ཆེན་པོ་ཞིག་ཡིན་ལ། གནས་འདིའི་མཐོ་ཚད་ལ་མཚོ་ངོས་ལས་རྨི༢༦༠༠ཙམ་ལས་མེད་པས་ད་སྔ་རྙེད་པའི་མདོ་དབུས་མཐོ་སྒང་གི་གནའ་བོའི་བྲག་བརྐོས་རི་མོའི་ཁྲོད་ནས་ཐོན་ཡུལ་ཆེས་དམའ་བའི་གྲས་སུ་གཏོགས་ཤིང་། རི་མོའི་ཁྱབ་ཡུལ་གྱི་ཆ་ནས་གཟུགས་དབྱིབས་སྣ་ཚོགས་རྡོ་ང་ཁེར་རྐྱང་གི་ངོས་སུ་སྤྱི་འདུས་ཀྱིས་སྤུངས་ནས་ཡོད་པ་སོགས་ཀྱི་ཁྱད་ཆོས་མངོན་པར་གསལ་བ་ཞིག་ཡིན་ནོ།།