༄༅།།རྒྱལ་ཁབ་ཀྱི་མི་རིགས་ཡི་གེའི་དཔེ་སྐྲུན་མ་དངུལ་རོགས་སྐྱོར་རྣམ་གྲངས《ཀྲུང་གོ་གསར་པ་དབུ་བརྙེས་པ་ནས་བཟུང་དཔེ་སྐྲུན་བྱས་པའི་བོད་ཡིག་དཔེ་དེབ་ཀྱི་སྤྱིའི་དཀར་ཆག（༡༩༤༩-༢༠༡༩）》གི་ཆེད་རམས་པའི་བཞུགས་མོལ་ཚོགས་འདུ་པེ་ཅིང་དུ་འཚོགས།

      སྤྱི་ཟླ༥པའི་ཚེས༢༢ཉིན། རྒྱལ་ཁབ་ཀྱི་མི་རིགས་ཡི་གེའི་དཔེ་སྐྲུན་མ་དངུལ་རོགས་སྐྱོར་རྣམ་གྲངས་ལས་གཞི་སྟེ།《ཀྲུང་གོ་གསར་པ་དབུ་བརྙེས་པ་ནས་བཟུང་དཔེ་སྐྲུན་བྱས་པའི་བོད་ཡིག་དཔེ་དེབ་ཀྱི་སྤྱིའི་དཀར་ཆག（༡༩༤༩——༢༠༡༩）》ཅེས་པའི་ཆེད་རམས་པའི་བཞུགས་མོལ་ཚོགས་འདུ་པེ་ཅིང་དུ་འཚོགས། ཀྲུང་གོ་མི་དམངས་སློབ་ཆེན་དང་ཀྲུང་དབྱང་མི་རིགས་སློབ་ཆེན། ཀྲུང་གོ་རྒྱལ་ཁབ་དཔེ་མཛོད་ཁང་། ཀྲུང་གོ་བོད་རིག་པ་ཞིབ་འཇུག་ལྟེ་གནས། ཀྲུང་གོ་མི་རིགས་སྐད་ཡིག་ཡིག་བསྒྱུར་ཅུས། མི་རིགས་དཔེ་སྐྲུན་ཁང་། ཀྲུང་གོའི་བོད་རིག་པ་དཔེ་སྐྲུན་ཁང་། མི་རིགས་རིག་གནས་ཕོ་བྲང་སོགས་ཀྱི་ལས་ཁུངས་ཁག་གི་ཆེད་རམས་པ་༡༤ཐེངས་འདིའི་ཚོགས་འདུར་ཞུགས།       སི་ཁྲོན་མི་རིགས་དཔེ་སྐྲུན་ཁང་གི་འགོ་གཙོ། སྤྱི་ཁྱབ་རྩོམ་སྒྲིག་པ་ཨ་སྔགས་ཚེ་རིང་བཀྲ་ཤིས་ཀྱིས་ཐེངས་འདིའི་ཚོགས་འདུ་ལ་ཤིས་ཚིག་གནང་དོན། ལས་གཞི་འདི་ནི་སི་ཁྲོན་མི་རིགས་དཔེ་སྐྲུན་ཁང་གིས་ཇུས་འགོད་དང་རྩ་འཛུགས་ལག་བསྟར་བྱས་པའི་རྒྱལ་ཁབ་མི་རིགས་ཡི་གེའི་དཔེ་སྐྲུན་ཐེབས་རྩའི་རོགས་དངུལ་གྱི་ལས་གཞིའི་གྲས་ཡིན་ཞིང་། དེའི་དམིགས་ཡུལ་ནི་ཀྲུང་གོ་གསར་པ་དབུ་བརྙེས་པ་ནས་བཟུང་རང་རྒྱལ་དུ་དཔེ་སྐྲུན་བྱས་པའི་བོད་ཡིག་དཔེ་ཆེའི་བསྡུ་རུབ་དང་རིགས་དབྱེ། ཆ་འཕྲིན་སོགས་ཆེས་ཆ་ཚང་བའི་སྤྱིའི་དཀར་ཆག་ཆེན་མོ་ཞིག་རྩོམ་སྒྲིག་བྱ་རྒྱུ་དེ་ཡིན་ལ། འདི་ནི་ཏང་དང་རྒྱལ་ཁབ་ཀྱིས་བོད་ཀྱི་རིག་གནས་ཀྱི་འཕེལ་རྒྱས་ལ་མཐོང་ཆེན་དང་སྐུལ་འདེད་བྱས་པ་ཆེས་ཆེར་མངོན་ཐུབ་པའི་དོན་སྙིང་གལ་ཆེན་ལྡན།
     ཚོགས་ཐོག་ཏུ། སི་ཁྲོན་མི་རིགས་དཔེ་སྐྲུན་ཁང་གི་འགོ་གཙོ་གཞོན་པ་ཐང་དབྱི་ཡིས་རྣམ་གྲངས་འདིའི་སྤྱིའི་གནས་ཚུལ་དང་ལས་ཀའི་སྒྲིག་གཞི། དེ་མིན་མིག་སྔའི་ལས་ཆོད་སོགས་ཀྱི་ཐད་ནས་ཞིབ་ཕྲ་སྒོས་ངོ་སྤྲོད་བྱས་པས། ཚོགས་ཞུགས་ཆེད་རམས་པ་རྣམས་ཀྱིས་དེ་བསྟུན་གྱི་བགྲོ་གླེང་གང་ལེགས་བྱས་ཏེ། ཐེངས་འདིའི་རྣམ་གྲངས་ནི་རིག་གནས་ཀྱི་བཟོ་སྐྲུན་ཆེན་པོ་ཞིག་ཡིན་པས། སི་ཁྲོན་མི་རིགས་དཔེ་སྐྲུན་ཁང་གི་ཚགས་སུ་ཆུད་པའི་སྔོན་འགྲོའི་གྲ་སྒྲིག་གིས་རྣམ་གྲངས་འདི་ཉིད་ལ་རྨང་གཞི་ལེགས་པོ་བཏིང་སོང་ཞེས་བསྔགས་བརྗོད་ཀྱི་ཞོར་དུ་དཔེ་ཆའི་རིགས་དབྱེ་དང་རྩོམ་སྒྲིག་གི་གསལ་བཤད་ནང་དོན། དཀར་ཆག་གི་སྒྲིག་རིམ། བོད་རྒྱ་སྐད་གཉིས་ཀྱི་ཡིག་བསྒྱུར་གྱི་ཚད་གཞི་སོགས་ཀྱི་གནད་རྣམས་ཁོལ་དུ་ཕྱུངས་ཏེ་སྐྱོན་སེལ་དང་མཛུབ་སྟོན་གང་ལེགས་གནང་།      ཚོགས་འདུའི་མཇུག་ཏུ། ཨ་སྔགས་ཚེ་རིང་བཀྲ་ཤིས་ལགས་ཀྱིས་ཐེངས་འདིའི་ལས་གཞི་ལ་ཚོགས་ཞུགས་ཆེད་རམས་པ་དག་གི་རྒྱབ་སྐྱོར་དང་སྐུལ་འདེད། དེ་མིན་གསེར་ལས་ལྷག་པའི་དགོངས་འཆར་གྱིས་ལས་གཞིའི་སྒྲིག་གཞི་དང་ལག་བསྟར་ལ་དོན་སྙིང་གལ་ཆེན་ལྡན་པས། ཆེད་རམས་པ་དག་གིས་རྗེས་ཕྱོགས་ཀྱང་མུ་མཐུད་ནས་ཐེངས་འདིའི་ལས་ཀའི་མགོ་མཇུག་བར་གསུམ་ལ་ཐུགས་ཁུར་བླ་ལྷག་མཛད་རྒྱུར་བཀའ་དྲིན་མི་ཆུང་ཞེས་ཚོགས་འདུ་བདེ་བླག་ངང་མཇུག་སྒྲིལ་བའོ།།