ཏུན་ཧོང་ཡིག་རྙིང་ཁྲོད་ཡོད་པའི་རྫོགས་པ་ཆེན་པོའི་བསྟོད་པ་ངོ་སྤྲོད།

        དེའི་ཕྱིར་ཏུན་ཧོང་གི་ཡིག་རྙིང་འདི་ཡིས་རྫོགས་པ་ཆེན་པོ་ནི་བསྟན་པ་སྔ་དར་གྱི་སྐབས་སུ་བསྒྱུར་བའི་སྔགས་ཀྱི་ལྟ་གྲུབ་ཡིན་པར་གྲགས་པ་དེ་ཉིད་དོན་ལ་གྲུབ་པའམ་གནས་པའི་དཔང་པོ་ཡང་དག་པར་བྱས་འདུག་པས། བོད་རིག་པའི་ཞིབ་འཇུག་པ་མཁས་པ་ཚད་མ་རྣམས་ལ་ངོ་སྤྲོད་ཞུ་ག་ལ་དགོས་ཏེ་མི་དགོས་མོད། རང་མཉམ་གནའ་དེང་དཔེ་ཀློག་ལ་དགའ་ཞིང་། ལྷ་སྒྲུང་ཙམ་ལ་ཞེན་པ་མ་ཡིན་པར་མི་ཡུལ་གྱི་ལོ་རྒྱུས་དངོས་ལ་འཇུག་པར་སྤྲོ་བ་དག་དགྱེས་པ་བསྐྱེད་ཕྱིར་ངོ་སྤྲོད་ཞུས་པ་ཙམ་སྟེ། དེང་དུས་དྲ་ལམ་སོགས་སུ་རྫོགས་ཆེན་གྱི་རྩ་བའི་ཁུངས་དང་། དེའི་རྣམ་གཞག་གི་འཕེལ་འགྱུར་གྱི་རིམ་པ་ཚན་རིག་དང་མཐུན་པ་སྨྲ་མཁན་ཧ་ཅང་དཀོན་ལ། ཁ་ཅིག་ནི་དད་པ་གཙོ་བའི་སྒོ་ནས་མ་བརྟག་མ་དཔྱད་པར་བར་སྐབས་ཀྱི་བཤད་སྒྲོས་རྙིང་པ་འགའ་འུར་བཞིན་པ་དང་། ཁ་ཅིག་ནི་ལོ་རྒྱུས་རིག་པ་ཇི་་བཞིན་མ་ངེས་པར། མཁས་པའི་འཁུར་བཟུང་སྟེ་འཁྱོག་བཤད། སྤོམ་བཤད། ཚོད་བཤད། ལོག་བཤད། ལོང་བཤད་སོགས་ལ་འབྱམས་ཞིང་མུ་ཅོར་སྨྲ་བ་མང་དུ་མཐོང་བས། དང་པོའི་ལས་ཅན་དག་རི་བོང་ཅལ་འདྲོགས་མི་བྱེད་པའི་རྐྱེན་བཟང་དུ་འགྱུར་བར་ཕན་ཐོགས་པར་འགྱུར་བའི་ཡིད་ཆེས་ཡོད་དོ། །
        འདིར་ཏུན་ཧོང་ཡིག་རྙིང་ཤོག་དྲིལ་རིགས་དེང་གི་གློག་རྡུལ་ཡིག་གཟུགས་སུ་ཕབ་ཅིང་ཞུས་དག་པ། དེབ་གཟུགས་སུ་བསྐྲུན་པ་པར་དུ་བླངས་ཏེ་འདྲེན་བྱེད་ལམ་དུ་མཆོད་པར་བཤམས་ཏེ། ཀུན་གྱིས་བདེ་བླག་ཏུ་མཇལ་ཞིང་སྤེལ་ནུས་པ་འདི་ནི། ཚན་རིག་མཁན་པོའི་འཕྲུལ་ལས་ཀྱི་ནུས་དྲིན་ཉག་གཅིག་ཡིན་པའི་ངེས་ཤེས་དང་། བར་ལམ་གྱི་གྲུབ་མཐའི་འཐེན་འཁྱེར་གྱི་བཤད་བསྒྲོས་འཁྱོག་པོ་ཙམ་ལ་ཡིད་མ་རྟོན་པར། དོན་གྱི་གནས་ལུགས་དངོས་ལ་འཇུག་པ་ནི་རང་གི་རྣམ་དཔྱོད་རང་ཚུགས་ཅན་དུ་བསྒྲུབ་པའི་ཐབས་ཡང་དག་ཡིན་པས། ཁོ་བོའི་དཔེ་ཀློག་གི་འབྲས་བུ་ཉུང་ངུ་འདི་ཡང་བོད་རིག་པའི་ཉམས་ཞིབ་ཀྱི་ཞབས་ཏོག་ཏུ་གྲུབ་པར་ངེས་སོ། །