དར་མ་འུ་དུམ་བཙན་གྱི་སྨོན་ལམ་བཀླགས་པའི་བརྗེད་ཐོ།

        འོ་ན། དོན་ངོ་མར་བཙན་པོ་འུ་དུམ་བཙན་གྱིས་ཅི་ཞིག་གནང་ངམ་འདོད་ན། སུམ་པ་ཡེ་ཤེས་དཔལ་འབྱོར་ཚང༼༡༧༠༤ནས༡༧༨༨༽གྱི་གསུང་འབུམ་ཤིང་སྤར་གླེགས་བམ་བཞི་བའི་ནང་གི༼གསུང་རབ་རྣམ་དག་ཆུའི་དྲི་མ་སེལ་བྱེད་ནོར་བུ་ཀེ་ཏ་ཀ༽ཞེས་བྱ་བར། རྒྱལ་པོ་གླང་དར་མ་ཞེས་པ་ཐུགས་རྗེ་ཆེན་པོས་ཞི་བའི་མི་ཐུལ་བའི་རིགས་གདུལ་ཆེད་དུ་སྤྲུལ་བ་ཡིན་ཡང་སྲིད། དེས་གཙོ་བོ་བསྟན་པ་ལ་མ་དག་པ་བྱུང་བ་རྣམས་སེལ་ཆེད་དུ་རྒྱལ་བསྟན་བསྣུབས་པའི་རྗེས་སུ་བྱུང་བ་ཤ་སྟག་དུ་གདའ་ཞེས་གསུངས་ཡོད། འདིར་དྲངས་པའི་བསྟན་པ་ལ་མ་དག་པ་བྱུང་ཞེས་པ་ནི། བཙན་པོའི་དུས་ཀྱི་བཀའ་གཙིགས་ནང་བཀག་ཟིན་པའི་སྔགས་ཀྱི་རྒྱུད་དང་། དེ་ལ་སྣོན་འཕྲི་བཅོས་བསྒྱུར་གནང་བའི་རྒྱུད་རྫུན་མའི་རིགས་དེ་བསྟན་པ་ཡིན། བཙན་པོ་འུ་དུམ་བཙན་གྱིས་དེ་དག་དར་སྤེལ་བྱེད་མཁན་གྱི་མི་རྣམས་ལ་རྡུང་རྡེག་དང་བཅོས་བསྒྱུར་བླ་ན་མེད་པ་བྱས་ཡོད། དཔེར་ན། དཔལ་ཆེན་ཆུ་བོ་རིའི་གསང་སྔགས་ཀྱི་སྒོམ་གྲྭ་སོགས་གཏོར་བ་དང་། སྔགས་ཀྱི་པོ་ཏི་ལ་ཀོ་ཐུམ་བརྒྱབ་ནས་རྒྱ་གར་ལ་བསྐུར་བ། ཉིན་མཚན་མེད་པར་སྟོང་སྒོམ་ལ་རོལ་པའི་བཙུན་གཟུགས་སོགས་ཀྱི་ལག་ལ་མདའ་གཞུ་བཞག་ནས་རི་དྭགས་བཤོར་བར་མངགས་པ། ལ་ལར་ཞིང་འདེབས་སུ་བཅུག་པ། བཙུན་པའི་ཆང་འཐུང་བའི་རི་མོ་བྲིས་ནས་ཟུར་ཟ་བྱེད་པ། ཆོས་དང་འཇིག་རྟེན་སོ་སོར་ཕྱེ་དགོས་པའི་བཅོས་བསྒྱུར་གྱི་དགོངས་གཞི་བླ་ན་མེད་པ་གནང་ཡོད། དེའི་ཕྱིར། མཐའ་མ་འུ་དུམ་བཙན་ནི་སྣུབས་ཀྱི་སྔགས་མཁན་ལྷ་ལུང་དཔལ་རྡོར་གྱིས་བཀྲོངས་པ་ཞིག་རེད། དེའི་ཚུལ་གུས་པའི་དཔྱད་འབྲས༼གསང་སྔགས་ཀྱིས་མཇུག་སྒྲིལ་བའི་བཙན་པོའི་རྒྱལ་རབས༽ཞེས་པར་གཟིགས་རོགས་ཞུ།