༄༅། །ཏུན་ཧོང་ཡིག་རྙིང་ལས་བྱུང་བའི་སློབ་དཔོན་པདྨའི་སྐོར་གྱི་ཟིན་ཐོ།

        ཉེ་ཆར་བོད་ཀྱི་དུར་འཇུག་ལུགས་སྲོལ་འབྲེལ་ཡོད་ཡིག་ཆ་བསྔོག་པའི་དགོས་དབང་གིས་བཀའ་ཐང་སྐོར་ལ་དོ་སྣང་བྱས་པ་ཡིན་ལ། རྒྱུ་མཚན་ཡང་བོད་ཀྱི་དུར་འཇུག་ལུགས་སྲོལ་ལ་བཙན་པོ་ཁྲི་སྲོང་ལྡེ་བཙན་སྐབས་འགྱུར་བ་ཆེན་པོ་ཞིག་ཐེབས་མགོ་ཚུགས་པ«ཟས་གཏད་ཀྱི་ལོ་རྒྱུས»ལས་ཤེས་ཐུབ། ཕྱིས་ཀྱི་ཡིག་ཚང་ལྟར་ན་སྣང་ཚུལ་དེའི་རྒྱབ་ཏུ་སློབ་དཔོན་པད་མ་ཡོད་ཅིང་། སློབ་དཔོན་པདྨའི་སྐོར་ངེས་དགོས་ཚེ་བཀའ་ཐང་གཙོ་བྱས་པའི་འབྲེལ་ཡོད་ཡིག་ཆར་བལྟ་རྒྱུ་དེའོ། །
        རང་རེའི་ཡིག་ཆར་སློབ་དཔོན་ཁོང་ཅུང་རྩོད་གཞི་ཆེ་བ་ཀུན་ལ་གསལ་ཞིང་། ཐ་ན་དངོས་སུ་བྱོན་ཡོད་མེད་ནས་མགོ་བཟུང་སྟེ«སྦ་བཞེད»རིགས་མི་འདྲ་བ་ལས་བོད་དུ་བཞུགས་ཚུལ་གྱི་ལོ་གྲངས་མི་འདྲ་པ་བྱུང་བས་བོད་ཀྱི་ལོ་རྒྱུས་ཀྱི་གོང་འོག་འཁྲུག་པ་ཙམ་ཟད་གྲུབ་མཐའི་བར་གྱི་རྩོད་རྙོག་ཞིག་ཏུ་གྱུར་བར་ཡང་བཤད། གང་ལྟར་སློབ་དཔོན་གྱི་རྣམ་ཐར་སྔ་ཤོས་དང་གལ་ཆེ་ཤོས་ནི་དུས་རབས་བཅུ་གཉིས་པའི་ཉང་ཉི་མ་འོད་ཟེར་གྱི«རྣམ་ཐར་ཟངས་གླིང་མ»དང་། གཞན་དུས་རབས་བཅུ་བཞིའི་སངས་རྒྱས་གླིང་པའི«རྣམ་ཐར་གསེར་ཕྲེང»། དུས་རབས་བཅོ་ལྔའི་ཨོ་རྒྱན་གླིང་པའི«བཀའ་ཐང་སྡེ་ལྔ»དང«པད་མ་བཀའ་ཐང»། གོང་དང་དུས་མཉམ་པའི་པད་མ་གླིང་པའི«བཀའ་ཐང་མུན་སེལ་སྒྲོན་མེ»། དུས་རབས་བཅུ་དྲུག་པའི་སོག་བཟློག་པའི«བཀའ་ཐང་ཡིད་ཀྱི་མུན་སེལ»། དུས་རབས་བཅུ་བདུན་པའི«ཡིད་ཆེས་གསུམ་ལྡན»སོགས་གཅིག་ལས་གཅིག་གྱེས་པའམ་འཕེལ་བ་ཡིན་མོད། མཚམས་ལན་རེར་ལོ་རྒྱུས་ཀྱི་ངོས་ནས་ཁྱད་ཆོས་དམིགས་གསལ་བ་རེ་ཡོད་ཅིང་། དེ་བཞིན་བོད་ཀྱི་བཙན་པོ་ཁྲི་སྲོང་ལྡེ་བཙན་སྐབས་ཀྱི་སྲིད་དོན་ལོ་རྒྱུས་མང་པོ་ཞིག་བཀའ་ཐང་རྣམས་དང་བསྡུར་བ་བྱས་ཡོང་དུས་ད་བཟོད་ཚིག་འབྲུའི་དོན་ཇེ་གསལ་དུ་འགྲོ་བ་སྟེ། མུ་ཏིག་བཙན་པོ་དང་བློན་པོ་འུ་རངས་བཙན་གྱི་བར་གྱི་རྩོད་རྙོག་ལ་བརྟེན་མཐའ་མར་རྒྱལ་སྲས་ཁོང་ལ་སྲིད་ཁྲི་མ་རགས་པ། ཐང་མཚམས་སུ་ཕབ་པ། རྟ་བཅག་ནས་བཀྲོངས་བ་ལྟ་བུར་མཚོན་ན། ཆོས་འབྱུང་སྔ་ཤོས་ཕལ་ཆེ་བར་དོན་གྱི་བྱུང་རིམ་བསྡུས་དྲགས་ནས་གོ་བ་དག་པར་ལེན་དཀའ་བ་ལྟ་བུ། དེ་བཞིན་བན་བོན་བར་གྱི་འབྲེལ་བ་དང་ཤིད་འདུར་གྱི་རིག་གནས་སྐོར་ལ་མཚོན་ཡང་བཀའ་ཐང་དང«བསྒྲགས་གླིང»། «སྲིད་པ་རྒྱུད་ཀྱི་ཁ་བྱང»སོགས་བསྡུར་བ་བྱས་ཚེ་གང་ལ་གང་འཚམ་གྱི་བདེན་དོན་ཞིག་རྟོགས་པའི་སྣང་བ་སྐྱེ། ཏུན་ཧོང་ཤོག་དྲིལ་ནང་ནས་སློབ་དཔོན་པདྨའི་སྐོར་གྱི་ཡིག་ཆ་ཆེས་སྔ་ཤོས་དང་ཀུན་ལ་རྒྱུས་ཆེ་ཤོས་ནི་ཧྥ་རན་སིའི་ཤོག་དྲིལP.T.44རེད། དེར་ཕུར་བའི་ལོ་རྒྱུས་སྐོར་འཁོད་འདུག་ལ། ཇོ་ནང་ཏཱ་ར་ན་ཐས་ཕུར་བའི་ཆོས་སྐོར་འདི་རྙིང་མའི་ཆོས་སྐོར་ཁུངས་བཙན་ཤས་ཁག་གསུམ་བགྲངས་པའི་ཡ་གྱལ་ཡང་རེད། ཕྱིས་ཀྱི«ཕུར་བའི་ཆོས་འབྱུང་ངོ་མཚར་རྒྱ་མཚོ»ལྟ་བུར་མཚོན་ཡང་དོན་ཤོག་དྲིལ་ནང་དོན་བར་ཡང་ཐུན་མོང་གི་ཆ་མང་དུ་འདུག གང་ལྟར་ཕུར་བའི་སྐོར་ལ་དེང་སེང་དབྱིན་ཇིའི་ཨོ་ཁི་སི་ཧྥོར་རྡི་གཙུག་ལག་སློབ་གྲྭ་ཆེན་མོའི་ཁེ་སེ•ཁན་ཐི་ཝོ(Cathy Cantrell)དང་ར་བྷོར་ཐི•མེ་ཡེར(Robert Mayer)རྣམ་གཉིས་ནས་ཞིབ་འཇུག་ཀྱང་གང་འཚམ་གནང་འདུག་ཅིང་། ཆེད་དེབ་གཉིས་ཙམ་མཇལ་མྱོང་ཡོད།
        རིག་གཞུང་ཞིབ་འཇུག་གི་ངོས་ནས་གོང་དུ་དྲངས་པའི་ཤོག་དྲིལ་དེར་སྤྱི་ལོ1971ལོ་དང་སྤྱི་ལོ1978ལོའི་སྔ་ཕྱིར་བྷེ་སི་ཁོ་ཧྥེ་དང(Bischoff)ཧར་མན(Charles Hartman)གཉིས་ཀྱིས་ཞིབ་འཇུག་གནང་ཡོད་ཅིང་། དེ་སྔ་བཙན་པོའི་སྐབས་ཀྱི་ཡིག་ཆ་རྣལ་མ་ཡིན་ཤག་ཤག་ཏུ་བརྩི་བ་སྤྱི་ལོ2004ལོར་ཉི་ཧོང་བ་ཐ་ཁོ་ཆི(Takeuchi)ཡིས་སྤྱི་ལོ980ལོའི་རྗེས་སུ་བྲིས་པ་ཞིག་ཡིན་པར་སྒྲུབ་བྱེད་བཀོལ་འདུག་ལ། རྒྱུ་མཚན་ཡང་ཤོག་ལྷེ་འདི་བོད་པས་བསྐྱར་དུ་བེད་སྤྱད་པ་ཞིག་དང་། དེའི་སྔ་རོལ་དུ་ཐོག་མར་ལི་ཡུལ་རྒྱལ་པོས་རྒྱའི་ཤ་ཅུའི་དམག་དཔོན་ཞིག་ལ་བྲིས་པའི་འཕྲིན་ཡིག་ཡིན། འཕྲིན་ཡིག་གི་རྟགས་ཐམ་སྟེང་ལི་ཡུལ་གྱི་ཟླ་ཐོ་བྱུང་ཡོད་པ་སྤྱི་ལོ978ལོར་འཁེལ་བས་ན། བོད་ཀྱི་ཕུར་བའི་ཆོས་བརྒྱུད་དེ་ཕྱིས་སུ་ཡི་གེར་བྲིས་པ་དང་། སྦྱི་ལོ1006ལོར་ཏུན་ཧོང་གསུང་རབས་ཕུག་པ་སྒོ་བརྒྱབ་པ། དེ་བཞིན་བོད་ཡིག་ཏུ་“ལོ་གཉིས་སྟག་གི་ལོ་”བྱ་བས་ཞིབ་ཕྲའི་དུས་ཚོད་ཀྱང་གཏན་འཁེལ་བྱེད་ནུས་པ་རེད། དེ་བཞིན་ཡིག་ཆ་གཞན་ཁག་གཉིས་ཀྱང་བྱུང་ཡོད་པར་གཅིག་ནི་དབྱིན་ཇིར་ཉར་བའི་ཤོག་དྲིལIOL Tib J 644དང་གཞན་དེ་ཧྥ་རན་སིར་ཉར་བའི་ཤོག་དྲིལP.T.307རེད། ཡིག་ཆ་འདི་གཉིས་ལ་ཉེ་ཆར་ཨ་རིའི་ཡེ་ལོ་གཙུག་ལག་སློབ་ཆེན་གྱི་ཇོ་ཁོ་བྷི•རྡོ་ཐོན(Jacob Dalton)གྱིས་ཞིབ་འཇུག་གནང་འདུག སྔ་མ་དེར་སློབ་དཔོན་གྱི་མཚན་དངོས་སུ་བྱུང་མེད་མོད། བལ་ཡུལ་གྱི་ཡང་ལེ་ཤོད་ཀྱི་སྒྲུབ་ཕུག་ནས་དོན་གྱི་བྱུང་རིམ་རྣམས«རྣམ་ཐར་ཟངས་གླིང»དང་ཤོག་དྲིལP.T.44འདྲ་ཆེ་བའི་ཡིན་པ་དང་། ཕྱི་མའི་ནང་རྒྱ་གར་གྱི་མཁན་པོ་པད་མ་སམ་པ་པ་དང་རླངས་དཔལ་གྱི་སེང་ངེ་གཉིས་ཀྱི་བོད་ཁམས་གྱི་བདག་མོ་བདུན་ནང་བར་བཀུག་པའི་ལོ་རྒྱུས་བསྟན་འདུག་པ་ནི། ལྷ་མོ་བདུན་པོ་རེ་རེའི་སྐུ་མདོག་ཆ་བྱད་ཀྱི་ཁྱད་ཆོས་ཙམ་མ་ཟད། ཀོང་བཙུན་དེ་མོ་ནང་བར་བཀུག་རྗེས་མཚན་ལ་རྡོ་རྗེ་ཀུན་གྲགས་མར་བསྒྱུར་བ་ལྟ་བུ་སྟེ། གང་ལྟར་ཤོག་དྲིལ་འདིས་སློབ་དཔོན་པདྨས་བོད་ཀྱི་ཡུལ་ལྷ་གཞི་བདག་བཏུལ་བའི་ས་བོན་ཡིག་ཚང་རིག་པའི་ངོས་ནས་དུས་རབས་བཅུ་བར་དེད་ཡོད་ཅིང་། དེ་བཞིན«སྦ་བཞེད»ཀྱི་ཤོག་དྲིལ་ལྷེབ་མོ་ཐེ་བའི་ཏུན་ཧོང་དུ་བྱུང་ཞིང་སློབ་དཔོན་དང་འབྲེལ་བའི་ཡིག་ཆ་གང་ཡིན་དེང་གི་ཕྱི་རྒྱལ་གྱི་རིག་པ་སྨྲ་བ་དག་གིས་མགྲིན་གཅིག་ཏུ་དུས་རབས་བཅུ་པའི་ནང་འཇོག་ཅིང་། སྐབས་འདི་བོད་ཀྱི་རྙིང་མ་པའི་རིག་གཞུང་མ་ལག་གི་སྒྲོམ་གཞི་ཆགས་པའི་དུས་གནད་ཆེན་པོ་ཞིག་མ་ཟད། སློབ་དཔོན་པདྨ་གཙོ་བྱས་པའི་དད་པའི་རྣམ་བཞག་དར་བའི་དུས་རབས་གལ་ཆེན་པོ་ཞིག་ཏུ་བགྲངས། གཞན་རང་རེའི་རྒན་ཁ་སྒང་ལྟར་ན་ཤོག་དྲིལP.T.849ཡང་སློབ་དཔོན་གྱི་རྣམ་ཐར་དུ་འདོད་མོད། ཤོག་དྲིལ་དེར་སློབ་དཔོན་གྱི་མཚན་དངོས་སུ་བྱུང་མེད་པ་དང་ལོ་རྒྱུས་བྱུང་བ་ཡང་སྤྱི་བམ་ཙམ་བསྟན་པས་སམ་གང་ཡིན་འབྲེལ་ཡོད་ཆེད་རྩོམ་དུ་འཁོད་པ་མ་མཐོང་།