༄༅། །མྱང་ཉི་མ་འོད་ཟེར་སྐོར་གྱི་བརྗེད་ཐོ།

        རྗེ་བཙུན་ལྔ་བ་ངག་དབང་བློ་བཟང་རྒྱ་མཚོ༼༡༦༡༧-༡༦༨༢༽མཆོག་གིས་མངའ་བདག་ཉང་ཞེས་ཆེན་པོའི་ཆོ་ལོ་བསྩལ་བའི་དམ་པ་འདི་ལ། མྱང་ཉི་མ་འོད་ཟེར་ཞེས་སུ་འབོད་ལ་ལན་རེར་མྱང་རལ་པ་ཅན་ཡང་ཟེར། ལྷོ་བྲག་གཏམ་ཤུལ་གྱི་འཇེད་ས་སེར་དགོན་དུ་ཡབ་ཉང་སྟོན་ཆོས་ཀྱི་འཁོར་ལོ་དང་། ཡུམ་པདྨ་བདེ་བ་རྩལ་གཉིས་ཀྱི་སྲས་སུ་ཕྱི་ལོ༡༡༣༦ལོར་འཁྲུངས་ཤིང་། ས་སྐྱའི་མཁས་པ་འཇམ་དབྱངས་མཁྱེན་བརྩེ༼༡༨༢༠-༡༨༩༢༽ཡི་གནས་ཡིག་ལྟར་ན། ལྷོ་བྲག་སྨྲའོ་ཅོག་ནི་མྱང་ཉི་མ་འོད་ཟེར་གྱི་གདན་ས་ཡིན་ཞེས་གསུངས་ཡོད། གྲྭ་པ་མངོན་ཤེས་དང་ར་ཤག་གཏེར་སྟོན་གཉིས་ཀྱི་ཁ་བྱང་ལྟར་ལྷོ་བྲག་མཁོ་མཐིང་སོགས་ནས་གཏེར་ཁ་མང་དུ་བཞེས། ཉང་སྟོན་ཆེན་པོ། རྒྱ་སྨྱོན་པ་དོན་ལྡན། ཞིག་པོ་ཉི་མ་སེང་གེ མལ་ཀ་བ་ཅན་སོགས་བླ་མར་བསྟེན་ནས་མདོ་སྔགས་ཀྱི་གསན་པ་རྒྱ་ཆེར་མཛད། ཞིག་པོ་བདུད་རྩི་སོགས་སློབ་མ་མང་པོ་ཡོད། མཐར་དགུང་གྲངས་རེ་བརྒྱད་དེ་ཕྱི་ལོ༡༢༠༤ལོར་སྐུ་གཤེགས། ཉང་གི་གདུང་རབས་ཕྱི་མ་ཟེར་མཁན་ཞིག་དིང་སང་ཀོང་ཡུལ་དུ་ཡོད། དམ་པ་འདིའི་གསུང་རྩོམ་བྲིས་མ་པོད་བརྒྱད་ཙམ་ཕོ་བྲང་པོ་ཏ་ལའི་ནང་དུ་བཞུགས་ཡོད་ལ། དེ་རྣམས་ནི་གསང་སྔགས་ཀྱི་སྒྲུབ་སྐོར་འབའ་ཞིག་སྟེ། ཤིན་ཏུ་གྲགས་ཆེ་བའི«བཀའ་ཐང་ཟངས་གླིང་མ»དང«ཉང་རལ་ཆོས་འབྱུང» «མེས་དབོན་རྣམ་གསུམ་གྱི་རྣམ་ཐར»སོགས་གསུང་འབུམ་དེར་ཐེར་མི་འདུག དེར་དཔྱད་ན། མྱང་ཉི་མ་འོད་ཟེར་ལ་ཐ་སྙད་རིག་གནས་སྐོར་གྱི་གསུང་རྩོམ་གཞན་ཡང་ཡོད་པར་ཆ་འཇོག་བྱེད་ནུས་སོ།། དམ་པ་འདིའི་རྣམ་ཐར་ཞིབ་པ་ནི། «ཉང་སྤྲུལ་ཉི་མ་འོད་ཟེར་གྱི་རྣམ་ཐར་གསལ་བའི་མེ་ལོང»དང«སྤྲུལ་སྐུ་མངའ་བདག་ཆེན་པོའི་སྐྱེས་རབས་དྲི་མ་མེད་པ་བཀའ་རྒྱ་ཅན»དུ་གཟིགས་པར་བྱའོ། །

        ཁྱད་པར་དུ། དུས་རབས་བཅུ་གཉིས་ནས་བཅུ་གསུམ་པའི་ནང་དེར། མྱང་ཉི་མ་འོད་ཟེར༼༡༡༣༦-༡༢༠༤༽གྱིས«བཀའ་ཐང་ཟངས་གླིང་མ»མཛད་ནས་སློབ་དཔོན་པདྨ་འབྱུང་གནས་ཀྱི་སྐུ་ཚེའི་ལོ་རྒྱུས་དང་མཛད་པ་འཕྲིན་ལས་སྐོར་ལ་ཤུགས་རྐྱེན་ཆེན་པོ་ཐེབས་པ་མ་ཟད། «དབའ་བཞེད»སྣ་ཚོགས་ཀྱི་བརྗོད་བྱར་ལོག་གནོན་བྱེད་པའི་ཕྱིར«ཆོས་འབྱུང་མེ་ཏོག་སྙིང་པོ་སྦྲང་རྩིའི་བཅུད»དང«ཆོས་རྒྱལ་མེས་དབོན་རྣམ་གསུམ་གྱི་རྣམ་ཐར་ནོར་བུའི་ཕྲེང་བ»གཉིས་བརྩམས་ནས«དབའ་བཞེད»ཀྱི་སྐོར་ལ་དགག་སྒྲུབ་བྱས་ཡོད་ལ། སྐབས་དེའི་བཀའ་གདམས་པའི་དགེ་བཤེས་བཅོམ་ལྡན་རིགས་རལ༼༡༢༢༧-༡༣༠༤༽གྱི«བསྟན་པ་རྒྱས་པ་རྒྱན་གྱི་ཉི་འོད»སོགས་དང་དེའི་སློབ་མ་དབུས་པ་བློ་གསལ༼འཁྲུངས་འདས་མ་གསལ༽གྱི«བསྟན་བཅོས་ཉི་མའི་སྙིང་པོ»སོགས་དེའི་ལྟ་བའི་རྒྱབ་འགལ་དུ་བཞེངས་ཡོད། དེའི་ཕྱིར། མྱང་ཉི་མ་འོད་ཟེར༼༡༡༣༦-༡༢༠༤༽ནི་སྤུ་རྒྱལ་བཙན་པོའི་དུས་ཀྱི་ཡིག་ཚང་ཁག་ན་དེ་ཙམ་གྱི་ཤུགས་རྐྱེན་ཆེན་པོ་མེད་པའི་སློབ་དཔོན་པདྨ་འབྱུང་གནས་ཀྱི་རྣམ་ཐར་ལ་རྒྱས་སྤྲས་དང་ཞབས་བཏགས། འཆད་སྤེལ་སོགས་གནང་མཁན་གྱི་ཕོ་ཉ་ལྟ་བུ་ཞིག་ཡིན།