༄༅། །མདོ་འཛིན་པ་དང་སྙན་སྒྲོན་པའི་ཁྱད་པར།

        ལོ་འདི་འགའི་ནང་དུ་རྒྱང་སྒྲོག་བརྙན་འཕྲིན་གྱི་འཕེལ་རྒྱས་དང་བསྟུན་གསར་འགྱུར་ལས་རིགས་གཉེར་མཁན་གང་མང་ཞིག་བྱུང་དང་འབྱུང་བཞིན་འདུག་ལ། དེའི་ཁྲོད་ཀྱི་མདོ་འཛིན་པ་དང་སྙན་སྒྲོན་པའི་རིགས་ནི་རྒྱ་ཆེའི་ཉན་མཁན་དང་ལྟ་མཁན་རྣམས་ལ་ཅུང་ཆ་རྒྱུས་ཡོད་པ་དང་ཅུང་རྒྱུས་ལོན་བྱ་འདོད་པའི་རྒྱང་སྒྲོག་བརྙན་འཕྲིན་གྱི་ལས་རིགས་ཤིག་ཏུ་གྱུར་ཡོད། ཡིན་ཡང་ཉན་མཁན་དང་ལྟ་མཁན་མང་པོ་ཞིག་གིས་མདོ་འཛིན་པ་དང་སྙན་སྒྲོན་པའི་ཁྱད་པར་ནི་གསལ་པོ་ཞིག་དབྱེ་ཐུབ་ཀྱི་མི་འདུག མདོ་འཛིན་པ་དང་སྙན་སྒྲོན་པ་ཞེས་པ་དེེ་གཉིས་ལ་རྒྱང་སྒྲོག་བརྙན་འཕྲིན་ལས་རིགས་ལ་ཞབས་ཞུ་བྱེད་པའི་ཐུན་མོང་ཁྱད་ཆོས་ཆ་ཡོད་ལ་མི་འདྲ་ས་ཡང་ཡོད་པས་གཤམ་ནས་རང་ཉིད་ཀྱིས་མཚོ་སྔོན་རྒྱང་སྒྲོག་བརྙན་འཕྲིན་ཁང་དུ་ཡུན་རིང་པོར་མདོ་འཛིན་པ་དང་སྙན་སྒྲོན་པའི་བྱ་བ་གཉེར་བའི་སློབ་སྦྱོང་དང་ལག་ལེན་གྱི་ཉམས་མྱོང་བརྒྱུད་དེ་མདོ་འཛིན་པ་དང་སྙན་སྒྲོན་པའི་སྤྱི་དོན་དང་བྱ་བའི་ཁྱབ་ཁོངས་སམ་འགན་འཁྲི་སོགས་ཀྱི་ཐད་ནས་རགས་ཙམ་དཔྱད་ཁུལ་བྱ།
དང་པོ། མདོ་འཛིན་པ་དང་སྙན་སྒྲོན་པའི་སྤྱི་དོན་གྱི་ཁྱད་པར།
        གསར་འགྱུར་རིག་པའི་ཚིག་མཛོད་ཆེན་མོ་ལས་སྙན་སྒྲོན་པ་ནི་རྒྱང་སྒྲོག་ཁང་དང་རྒྱང་སྒྲོག་ས་ཚུགས། བརྙན་འཕྲིན་ཁང་དུ་སྐད་སྦུག་དང་བརྙན་ལེན་འཕྲུལ་ཆས་ཀྱི་མདུན་དུ་གཏན་ཁེལ་བྱས་ཟིན་པའི་ཡི་གེ་ལྟར་སྐད་ཆའི་ལམ་ནས་བྱ་བ་སྤེལ་བའི་ཆེད་ལས་མི་སྣར་གོ་ཞེས་བཀོད་ཡོད་ལ། སྤྱིར་བཏང་དུ་སྙན་སྒྲོན་པར་སྐད་ངག་སྙན་ཞིང་ཁ་ལྕེ་དག་ལ། སྙན་སྒྲོན་གྱི་རྨང་གཞིའི་རྩལ་ནུས་འཛོམས་དགོས་པར་བཤད།
        མདོ་འཛིན་པ་ཞེས་པར་གོ་དོན་གཉིས་ཡོད་དེ། གཅིག་ནི་བྱ་བ་ག་གེ་མོར་གཙོ་འཛིན་དང་བཀོད་སྒྲིག་ཐག་གཅོད་བྱེད་མཁན་ཏེ། དཔེར་ན། ཚོགས་འདུའི་མདོ་འཛིན་པ་དང་ལེ་ཚན་གྱི་མདོ་འཛིན་པ་སོགས་ལ་གོ་དགོས། གཉིས་ནི་གོ་གནས་ག་གེ་མོར་གོ་དགོས་པ་སྟེ། དཔེར་ན། ཚོང་ཚོགས་ཀྱི་མདོ་འཛིན་པ་ལྟ་བུ། གོང་གི་གོ་དོན་གཉིས་ཕྱོགས་སྡོམ་བྱས་པའི་དོན་ནི་འདི་ལྟ་སྟེ་མདོ་འཛིན་པ་ཞེས་པ་དོན་དག་ག་གེ་མོར་གཙོ་འཛིན་དང་བཀོད་སྒྲིག་ཐག་གཅོད་བྱེད་མཁན་ཡིན་ལ། ལེ་ཚན་མདོ་འཛིན་པ་ནི་རྒྱང་སྒྲོག་བརྙན་འཕྲིན་ལེ་ཚན་གཙོ་འཛིན་དང་གཏན་འཁེལ་བཀོད་སྒྲིག་བྱེད་མཁན་ཡིན། དེའི་བྱེད་ནུས་གཙོ་བོ་ནི་མདོ་འཛིན་གྱི་ཆ་ནས་ལེ་ཚན་དུ་ཞུགས་པ་དང་ལེ་ཚན་གྱི་འཕེལ་རིམ་ཚོད་འཛིན་བྱེད་པ། ཐད་ཀར་དང་འདྲ་མཉམ་གྱི་སྒོ་ནས་སྤེལ་བའི་སྤྱིའི་བརྒྱུད་སྒྲོག་བྱ་འགུལ་དང་ལས་ཞུགས་མི་སྣར་ཕྱོགས་བསྡུས་ཆུ་ཚད་ངེས་ཅན་ཞིག་ལྡན་དགོས་ལ། སྙན་སྒྲོན་པ་ལྟ་བུའི་སྐད་ངག་གི་ཆུ་ཚད་ཚད་བཀག་ནན་མོ་མེད་མོད། ཡིན་ཡང་མདོ་འཛིན་པ་ལ་སྣ་མང་ཤེས་བྱའི་ཆུ་ཚད་ངེས་ཅན་ལྡན་དགོས། དེ་བས་བརྙན་འཕྲིན་ཁང་སོ་སོའི་མདོ་འཛིན་པ་མང་ཆེ་བ་གསར་འགོད་པ་དང་རྩོམ་སྒྲིག་པའི་ཁྲོད་འཚར་ལོངས་བྱུང་བ་རེད། ཐོག་མར་སྙན་སྒྲོན་པའི་བྱ་བ་གཉེར་བ་དང་དེ་ནས་ལེ་ཚན་གྱི་མདོ་འཛིན་པ་བྱེད་མཁན་ཡོད་རུང་བསྡུར་ཚད་མང་པོ་ཟིན་མེད།
        དེས་ན་མདོ་འཛིན་པར་སྐད་ངག་གི་ཆ་རྐྱེན་མི་དགོས་སམ་ཞེས་དྲིས་ན་མ་ཡིན་ཏེ། མདོ་འཛིན་པ་དང་སྙན་སྒྲོན་པ་གཉིས་གང་ཡིན་ཡང་སྐད་ངག་གི་ཆ་རྐྱེན་ངེས་ཅན་ཞིག་ཡོད་དགོས་པ་ནི་བཤད་མ་དགོས་པ་ཞིག་རེད། སྙན་སྒྲོན་པར་སྐད་ངག་སྙན་ཞིང་ཁ་ལྕེ་དག་ལ། སྙན་སྒྲོན་གྱི་རྨང་གཞིའི་ཤེས་བྱ་ལྡན་པའི་སྟེང་དུ་མདོ་འཛིན་པར་མཐོང་རྒྱ་དང་ཐོས་རྒྱ། རིག་གནས་ཀྱི་ཆུ་ཚད། སྤྱི་ཚོགས་ཀྱི་འབྲེལ་འདྲིས་དང་ཉམས་མྱོང་སོགས་ཀྱིས་རམ་འདེགས་བྱ་ཐུབ་ཚེ། བཟང་ཐོག་ལ་རྒྱན་ལྟར་སྙན་སྒྲོན་པའི་བྱ་བར་དགེ་ཕྱོགས་ཀྱི་རམ་འདེགས་ཐོབ་སྲིད།
གཉིས་པ། མདོ་འཛིན་པ་དང་སྙན་སྒྲོན་པའི་བྱ་བའི་ཁྱབ་ཁོངས་མི་འདྲ་བ།
        སྙན་སྒྲོན་པའི་བྱ་བ་ནི་གསར་འགྱུར་མ་ཡིག་ལག་ཏུ་འབྱོར་བ་ནས་མགོ་རྩོམ་དགོས་པ་རེད། སྙན་སྒྲོན་པས་མ་ཡིག་ལ་དཔྱད་ཞོར་རང་ཚོད་ཀྱིས་མནོ་བསམ་བཏང་སྟེ་ཡང་དག་དང་གསོན་ཉམས་ལྡན་པའི་ངང་གསར་འགྱུར་མ་ཡིག་གི་ནང་དོན་སྒྲོག་རྒྱུ་དེ་སྙན་སྒྲོན་པའི་ལས་འགན་གཙོ་བོ་རེད། «སྙན་སྒྲོན་པའི་སྤྱི་དོན»ཞེས་པ་ལས་ང་ཚོས་སྙན་སྒྲོན་པའི་ཁྱད་ཆོས་གཙོ་བོ་སྐད་སྦུག་དང་བརྙན་ལེན་འཕྲུལ་ཆས་ཀྱི་མདུན་དུ་གཏན་འཁེལ་བྱས་ཟིན་པའི་ཡི་གེ་ཡི་ནང་དོན་ཇི་མ་ཇི་བཞིན་དུ་སྒྲོག་འདོན་བྱ་རྒྱུ་དེ་ཡིན་པ་གསལ་པོར་ཤེས་ཐུབ།
        མདོ་འཛིན་པའི་བྱ་བའི་ཁྱབ་ཁོངས་སྙན་སྒྲོན་པ་ལས་ཧ་ཅང་ཆེ་ལ། ལེ་ཚན་ཞིག་གི་མགོ་མཇུག་བར་གསུམ་གྱི་གོ་རིམ་ཧྲིལ་པོར་ཟབ་ཞུགས་བྱ་ཆོག མདོ་འཛིན་པ་དང་སྙན་སྒྲོན་པའི་འགན་འཁྲི་མི་འདྲ་སྟེ། སྙན་སྒྲོན་པས་རང་ལ་སྤྲད་པའི་ཡི་གེར་གཏན་ཁེལ་བྱས་ཟིན་པའི་ནང་དོན་མ་ནོར་བར་གཅིག་གཅིག་གཉིས་གཉིས་སྒོས་བསྒྲགས་པ་ན་ལས་འགན་ཕལ་ཆེར་གྲུབ་པ་རེད། སྙན་སྒྲོན་པས་སྙན་སྒྲོན་གྱི་མ་ཡིག་ཇི་བཞིན་སྒྲོག་འདོན་བྱེད་པ་ལས་གང་འདོད་ལྟར་རྒྱས་བཤད་བྱེད་མི་འོས་པ་དེ་ནི་སྙན་སྒྲོན་པ་དང་མདོ་འཛིན་པའི་ཁྱད་པར་ཞིག་རེད། མདོ་འཛིན་པར་ལེ་ཚན་ཡོངས་ཀྱི་སྣང་བརྙན་ཐེག་པའི་འགན་འཁྲི་ལྕི་མོ་ཡོད་ལ། ལེ་ཚན་གྱི་སྤྱིའི་བཀོད་སྒྲིག་ཅི་འདྲ་དང་ཐ་ན་འགྲོས་རིམ་གཅིག་གི་འགྲོས་ལའང་མཉམ་འཇོག་དགོས་པའི་གཞན་གྱིས་ཚོར་དཀའི་ཞིབ་ཆའི་ཆེད་ལས་རང་བཞིན་གྱི་འགན་འཁྲི་ཡང་ཡོད། མདོ་འཛིན་པས་ཐད་གཏོང་ལེ་ཚན་ཞིག་མདོ་འཛིན་བྱེད་སྐབས་ལེ་ཚན་ཕབ་སྐྲུན་མ་བྱས་སྔོན་གྱི་གྲ་སྒྲིག་རབ་དང་རིམ་པ་ཡོད་རུང་ཡུལ་དངོས་ནས་ལེ་ཚན་ཕབ་སྐྲུན་བྱེད་སྐབས་དོན་དག་གློ་བུར་བ་མི་འབྱུང་བའི་ངེས་པ་མེད་པས། གལ་ཏེ་ལེ་ཚན་ཕབ་སྐྲུན་བྱེད་བཞིན་པའི་སྒང་ལ་རང་གི་ཇུས་འགོད་ཀྱིས་མ་ཟིན་པའི་དོན་དག་གང་འདྲར་འཕྲད་རུང་དུས་རྒྱུན་གྱི་རིག་གནས་ཤེས་བྱ་དང་འཚོ་བར་བཟུང་བའི་སློབ་སྦྱོང་གི་ཉམས་མྱོང་སོགས་འཕྲལ་འདྲེན་བྱས་ཏེ་བྱང་ཆ་ལྡན་པའི་སྒོ་ནས་སྐབས་བསྟུན་གྱི་མདོ་འཛིན་ནུས་པར་བརྟེན་ནས་གླེང་བར་བྱ་བ་གང་ཉིད་ཡུལ་དངོས་སུ་ཐག་གཅོད་བྱེད་ཐུབ་མིན་དེ་ཡང་མདོ་འཛིན་པའི་ཁྱད་ཆོས་ཤིག་ཡིན། གོང་དུ་བརྗོད་ཟིན་པ་ལྟར་སྙན་སྒྲོན་པའི་བྱ་བའི་གཙོ་གནད་ནི་སྙན་སྒྲོན་གྱི་མ་ཡིག་ལ་ཞིབ་བརྟག་ཡང་ཡང་བྱས་ཏེ་ནང་དོན་ཡང་དག་གིས་སྙན་སྒྲོན་བྱ་རྒྱུ་དེ་ཡིན་པ་དང་། མདོ་འཛིན་པར་བཏོན་པའི་བླང་བྱ་ནི་ལེ་ཚན་ཡོངས་ལ་དམིགས་ཏེ་སྤྱི་ཁོག་ཚོད་འཛིན་བྱ་རྒྱུ་དེ་རེད།
གསུམ་པ། སྙན་སྒྲོན་པ་དང་མདོ་འཛིན་པས་ཉན་མཁན་དང་ལྟ་མཁན་རྣམས་ལ་སྤེལ་བའི་འབྲེལ་འདྲིས་ཀྱི་བྱེད་ཐབས་མི་འདྲ་བ།
        སྙན་སྒྲོན་པ་དང་ཉན་མཁན་དང་ལྟ་མཁན་བར་གྱི་འབྲེལ་འདྲིས་ལ་ཁེར་རྐྱང་རང་བཞིན་གྱི་ཆ་ལྡན། རྒྱང་སྒྲོག་ཁང་གི་སྙན་སྒྲོན་པས་སྐད་ཆའི་ལམ་ནས་ཉན་མཁན་དང་འབྲེལ་འདྲིས་བྱེད་པ་དང་བརྙན་འཕྲིན་ཁང་གི་སྙན་སྒྲོན་པས་སྐད་ཆ་ལས་གཞན་ད་དུང་ལུས་དང་གདོང་གི་ཉམས་འགྱུར་ལས་འབྲེལ་འདྲིས་བྱ་ཆོག བརྙན་འཕྲིན་ལེ་ཚན་གྱི་མདོ་འཛིན་པ་དག་གིས་ཐད་ཀར་དུ་ཉན་མཁན་དང་ལྟ་མཁན་བར་སྐད་ཆས་འབྲེལ་འདྲིས་བྱེད་པ་ལས་གཞན་སྒྲ་དབྱངས་དང་བརྙན་རིས། རོལ་མོ་སོགས་ཀྱི་རམ་འདེགས་བརྒྱུད་ཉན་མཁན་དང་ལྟ་མཁན་བར་འབྲེལ་འདྲིས་བྱ་ཆོག
        རྒྱང་སྒྲོག་བརྙན་འཕྲིན་ནི་ཏང་དང་རྒྱལ་ཁབ་མི་དམངས་གྱི་ཁ་ལྕེ་ལྟ་བུ་ཡིན། སྙན་སྒྲོན་པ་དང་མདོ་འཛིན་པ་ནི་ཏང་དང་རྒྱལ་ཁབ་ཀྱི་སྲིད་ཇུས་དང་བྱེད་ཐབས་བརྒྱུད་སྒྲོག་བྱེད་མཁན་དང་སྤྱིའི་ཁེ་ཕན་གྱི་ཚབ་མི་ཡང་ཡིན། དུས་ཀྱི་འཕེལ་རྒྱས་ཀྱི་དབང་གིས་སྙན་སྒྲོན་པ་དང་མདོ་འཛིན་པར་བཏོན་པའི་སྤྱི་ཚོགས་འགན་འཁྲི་ཡང་སྔོན་དང་བསྡུར་ན་ལྡབ་འགྱུར་གྱིས་ཇེ་ལྕི་རུ་སོང་ཡོད།
        མདོ་འཛིན་པའི་བྱེད་ནུས་ནི་ཇི་མ་ཇི་བཞིན་དུ་ཡེ་གེར་གཏན་འཁེལ་བྱས་ཟིན་པ་དག་བརྒྱུད་སྒྲོག་བྱེད་པ་རྐྱང་རྐྱང་མ་ཡིན་པར་རང་ཉིད་ཀྱི་སྤྱི་ཚོགས་འགན་འཁྲི་ལ་དོ་སྣང་བྱེད་དགོས་ཤིང་། བཟང་ངན་དབྱེ་འབྱེད་དང་སྤྱི་ཚོགས་འགན་འཁྲིས་མི་སྒེར་དང་སྤྱི་ཚོགས་ལ་ཧུར་བརྩོན་གྱིས་སྣེ་ཁྲིད་བྱས་ཏེ་སྤྱི་ཚོགས་ཡོངས་ཀྱི་ཆ་མཐུན་འཕེལ་རྒྱས་ལ་ཡར་སྐུལ་བྱ་དགོས། སྨྱན་བྱད་གསར་པ་མུ་མཐུད་དུ་འཕེལ་རྒྱས་སུ་སོང་བ་དང་བསྟུན་སྙན་སྒྲོན་པ་དང་མདོ་འཛིན་པའི་བྱ་བའི་ངོ་བོ་དང་སྤྱི་ཚོགས་རིན་ཐང་ལ་ནང་དོན་གསར་པ་བྱུང་དང་འབྱུང་བཞིན་ཡོད་པས། སྙན་སྒྲོན་པ་དང་མདོ་འཛིན་པས་ངེས་པར་དུ་སྤྱི་ཚོགས་འགན་འཁྲི་དང་ལེན་བྱེད་པའི་གདོང་ལེན་པ་བྱས་ཏེ་སྤྱི་ཚོགས་འཆམ་མཐུན་ངང་འཕེལ་རྒྱས་འགྲོ་བའི་སྨྱན་བྱད་ཀྱི་གཙོ་ཤུགས་ནུས་པ་འདོན་དགོས། །