བཙན་པོ་ཆོས་ཞུ་བ་ཕེབས་པའི་ལྡེབས་རིས།

       བཙན་པོ་ཆོས་ཞུ་བ་ཕེབས་པའི་ལྡེབས་རིས་འདི་ནི་ཏུན་ཧོང་གི་ཕུག་པ༢༣༧དུ་བཞུགས། དུས་རབས་བརྒྱད་པའི་ནང་བོད་བཙན་པོས་ཏུན་ཧོང་ཕྱོགས་སུ་དབང་བསྒྱུར་བའི་སྐབས་སུ་བཞེངས་སྐད། ལྡེབས་རིས་འདིའི་ནང་ངོས་སུ་གསལ་བའི་བཙན་པོའི་ཆ་ལུགས་ནི་དམིགས་བསལ་བ་ཞིག་ཡིན་པས། དེ་ནི་བཙན་པོ་མཆོག་ཆོས་ཞུ་སར་ཕེབས་པའི་དགའ་སྟོན་གྱི་རྣམ་པ་སྟོན་པའི་རྒྱུ་མཚན་ནས་སོ། །གཤམ་དུ་དེའི་སྐོར་ཏོག་ཙམ་ཞུ་ན།

       ལ་ཐོད་དམར་པོ། རྒྱུན་པར་བཙན་པོས་ལ་ཐོད་དཀར་དམར་གཉིས་དབུ་ལ་བཞེས་གསོལ་ཡོད་པ་ལས་ཆོས་ཞུ་བ་དང་ཆོས་སྤྱོད་ཀྱི་མཛད་སྒོ་དང་། ཡང་ན་ལྷ་གསོལ་བའི་སྐབས་སུ་བཙན་པོའི་དབུ་རུ་ལ་ཐོད་དམར་པོ་སྒྲོན་ཡོད་པ་ལྡེབས་རིས་འདི་ནས་གསལ་པོར་སྟོན་ཏོ། ཁྱད་པར་དུ་བཙན་པོའི་ལ་ཐོད་འདི་ཁུག་མ་ཞིག་དང་འདྲ་སྟེ། ཐད་ཀར་དབུ་རུ་གྱོན་ཆོག་ཅིང་། གཞན་དུ་བཤད་པའི་ལ་ཐོད་དཀྲིས་མ་ཅན་དང་གཡུང་དྲུང་བརྩེགས་མའི་ཟེར་ལུགས་དང་འབྲེལ་བ་སྤུ་ཙམ་མ་མཐོང་།

       ཐོད་གདན་དཀར་པོ། ལྡེབས་རིས་དང་བསྟུན་གྱུར་ན་བཙན་པོའི་ལ་ཐོད་ཀྱི་འོག་ཏུ་ད་རུང་ཞྭ་གདན་དཀར་པོ་ལྕེ་ལེབ་མ་ཞིག་ཡོད་འདུག གཡས་གཡོན་ཁོལ་པོ་དག་གི་དབུ་ལ་བལྟས་ན་ཞྭ་གདན་འདི་དབུ་ཆ་ཚང་ཁེབས་པ་ཞིག་མ་ཡིན་པ། གཡས་གཡོན་གྱི་ལྕེ་ལེབ་ཆེ་ཙམ་གཉིས་ནས་རྣ་བ་དང་དེའི་སྟོད་ཀྱི་སྐྲ་ཚོགས་འགེབ་ཙམ་དེའོ། །

       བཙན་པོའི་དབུ་སྐྲ་ལན་བུར་བསླས་པ་ལ་བ་སོ་ཡང་ན་དུང་དཀར་གྱི་སྐྲ་རྒྱན་ཞིག་བརྒྱན་ཡོད་པ་དེ་རྣ་རྩ་རུ་འཕྱངས་ཡོད་ཅིང་། སྐྲ་རྒྱན་འདིའི་གཡས་གཡོན་དུ་ཆ་བསྒྲིགས་པ་ཞིག་ཡིན་མིན་མི་གསལ་ཡང་། འདི་བཙན་པོའི་སྐུ་ཐང་གཞན་དང་མི་འདྲ་བ་དབུ་སྐྲའི་ལན་བུ་གཉིས་དེ་ཕྲག་ངོས་སུ་ལྷུག་མེད་པར་ལྟག་རྒྱབ་ཏུ་བསྐུངས་ཡོད། སྲོལ་འདི་ནི་ལྷ་གསོལ་སོགས་ཆོས་སྤྱོད་ཀྱི་སྐབས་སུ་ཡིན་མིན་དཔྱད་དགོས།

       བཙན་པོ་མཆོག་གི་མགུལ་རྒྱན་ནི་རྒྱལ་པོའི་ཉེ་འགྲམ་དུ་ཁོད་པའི་གདུགས་འཛིན་མཁན་དེའི་མགུལ་རྒྱན་དང་གཅིག་མཚུངས་རེད། ཞིབ་ཏུ་མཇལ་ན་བཙན་པོའི་སྐེ་ཡི་རྒྱན་ཆ་འདི་ཤིན་ཏུ་ངོ་མཚར་བ་ཞིག་འདུག་སྟེ། མགུལ་རྒྱན་དེ་ཕལ་ཆེར་བྱུ་རུ་ཡང་ན་མཆོང་དམར་དང་མུ་ཏིག་གཉིས་འདྲེས་ཅན་ཞིག སྐེ་ཕྲེང་གི་འོག་ཏུ་དར་དཀར་ལྟ་བུའི་གདན་པ་ཞིག་ཡོད་པ་མཐོང་། འདི་ཚང་མས་དཔྱོད་ཅིག

       བཙན་པོའི་ན་བཟའ་ཕྱི་ནང་སུམ་བརྩེགས་ཅན་ཅན་ལས་ལྭ་རིང་གི་སྟོད་དུ་བརྒྱན་པའི་སྟག་ལྤགས(ལྡེབས་རིས་སུ་ཚོན་སྔོན་པོ་ཡིན་པས་ན་གོས་ཆེན་ཡིན་ཀྱང་སྲིད།) དེ་ཕྱུ་པའི་ཁ་ཐུམ་ཡིན་དང་སྟོད་གཡོགས་ཡིན་གསལ་པོ་ཤེས་མ་སོང་། འོན་ཏེ། བཙན་པོའི་ལྭ་བའི་རུམ་སྣེ་དེ་སྐ་རགས་ཀྱི་འོག་ཏུ་བཙུད་པ་ལ་བལྟས་ན་འདི་ནི་དམིགས་བསལ་ཅན་གྱི་སྟོད་གཡོགས་ཤིག་ཏེད་འདོད་སྙམ།

       བཙན་པོ་མཆོག་གི་ལྭ་རིང་ནང་མའི་ངོས་སུ་རི་མོ་སྟོད་སྨད་བར་གསུམ་ཡོད་པ་ལས་སྟོད་དེ་ཅི་ཡིན་གསལ་པོ་མི་མཇལ། ཡིན་ནའང་རིས་བར་མ་ནི་བོད་ཀྱི་བརྡ་རིས་ལས་བྱུང་བའི་ཆུ་བོའི་རྟགས་མཚན་ཁོ་ན་རེད། འདི་ཕལ་ཆེར་ཆུ་བོའི་རྒྱུན་ནམ་བཙན་པོའི་ཆབ་སྲིད་བར་མ་ཆད་པར་བརྟན་པའི་མཚོན་བྱེད་ཅིག་རེད་འདོད།

       ལྭ་རིང་ནང་མའི་རིས་འོག་མ་དེ་ནི་མཐའ་སྲུང་གི་ལྕགས་རི་བརྟན་པོ་མཚོན། དེ་ནི་ལྭ་བའི་ཕུ་ཐུང་ས་འདྲུད་མའི་ལྕགས་རི་དང་ནང་དོན་གཅིག་མཚུངས་ཡིན། ཁྱད་པར་དུ་རྐང་པའི་ས་ནས་ཀ་བ་བཙུགས་པ་ལྟར་དང་རྡོ་རིང་བསླངས་པ་བཞིན་དུ་ནམ་ཡང་འགྱུར་བ་མེད་པ་དེ་མཚོན་ཞིང་། ལྷག་པར་འདིས་བོད་ཡིག་གི་མཇུག་མཐའ་བཞི་ཤད་ནས་རྫོགས་དགོས་པའི་གསང་དོན་དོན་ཡང་མངོན་ཏོ། །

       བཙན་པོའི་ཞབས་གཉིས་རྐང་རྗེན་དུ་ཡིན་པ་ནི་ཆོས་ཞུ་བའི་སློབ་བུ་ཞིག་གི་ངོས་ནས་དམ་པའི་ལྷ་ཆོས་ལ་གུས་འདུད་ཞུ་བའི་བརྡ་སྟོན་པ་དང་། མཉམ་དུ་བྱེད་སྟངས་འདི་ནས་དུས་རབས་བརྒྱད་པའི་ནང་བོད་ཡུལ་དུ་ཆོས་ཞུ་སར་མཆིལ་ལྷམ་ཕུད་དགོས་པའི་གུས་སྲོལ་འདི་དར་ཡོད་པ་རྟོགས་ཐུབ།