རྐང་ཚ་ནས་མཁས་མང་འཛོམས་ཏེ་བོད་ཀྱི་གསོ་རིག་བགྲོ་གླེང་ཞིག་སྤེལ།

ཞིང་ཆེན་ཡོངས་ཀྱི་སྨན་ལུམས་རིག་གཞུང་བགྲོ་གླེང་ཚོགས་འདུ་དང་མཚོ་བྱང་ཁུལ་གྱི་མདོ་ལ་རི་བོའི་ཀྲུང་བོད་གསོ་རིག་འཆད་ཁྲིད་སྐབས་བཞི་པ་འཚོགས།
 

       འཛམ་གླིང་གི་གཟུགས་འདས་ཤུལ་བཞག་རིག་གནས་བོད་ཀྱི་གསོ་རིག་པའི་ལུམས་བཅོས་བྱ་གཞག་སྔར་ལས་རྒྱུད་འཛིན་དང་འཕེལ་རྒྱས་སུ་གཏོང་བ། ཞིང་ཆེན་ཕྱི་ནང་གི་ལུམས་ཀྱི་རིག་གཞུང་བརྗེ་རེས་དང་མཉམ་འབྲེལ། སྨན་ལུམས་ཀྱི་ཆེད་ལས་མི་སྣ་གསོ་སྐྱོང་དང་ཚན་ཁག་གསར་འཛུགས། རྐང་ཚའི་བོད་ལུགས་གསོ་རིག་གི་བདུད་རྩི་ལུམས་ཀྱི་བསྟི་གནས་དང་སྨན་ལུམས་རྟེན་མཛོད་ཁང་འཛུགས་སྐྲུན་སོགས་ཁྱོན་ཡོངས་ནས་སྔོག་འདོན་དང་འཕེལ་རྒྱས་སུ་གཏོང་ཆེད། ཟླ7པའི་ཚེས28ཉིན་ནས30ཉིན་བར་མཚོ་སྔོན་བོད་ཀྱི་གསོ་རིག་སློབ་ཚོགས་དང་མཚོ་སྔོན་ཞིང་ཆེན་བོད་ཀྱི་གསོ་རིག་སློབ་ཚོགས་སྨན་ལུམས་ཆེད་ལས་ཚོགས་པས་གཙོ་སྒྲུབ་དང་། མཚོ་བྱང་ཁུལ་འཕྲོད་བསྟེན་བདེ་ཐང་ཨུ་ཡོན་ལྷན་ཁང་། རྐང་ཚ་རྫོང་མི་དམངས་སྲིད་གཞུང་། རྐང་ཚ་རྫོང་འཕྲོད་བསྟེན་བདེ་ཐང་ཅུས་དང་རྐང་ཚ་རྫོང་བོད་སྨན་ཁང་བཅས་ཀྱིས་འགན་སྒྲུབ་གནང་བའི་ཞིང་ཆེན་ཡོངས་ཀྱི་སྨན་ལུམས་རིག་གཞུང་བགྲོ་གླེང་ཚོགས་འདུ་དང་མཚོ་བྱང་ཁུལ་གྱི་མདོ་ལ་རི་བོའི་ཀྲུང་བོད་གསོ་རིག་འཆད་ཁྲིད་སྐབས་བཞི་བ་རྐང་ཚར་འཚོགས།  ཐེངས་འདིའི་བྱ་འགུལ་ལ་གསོ་རིག་གི་སྡེ་ནས་མིང་གྲགས་ཅན་ཀྱི་ཆེད་མཁས་པ་བཅུ་གསུམ་མཉམ་ཞུགས་བྱས་ཡོད་པར་མ་ཟད་དེ་དག་གིས་བརྗོད་བྱ་གསར་བ་དང་ཁྱད་ཆོས་འབུར་ཐོན། ནང་དོན་ཕུན་སུམ་ཚོགས་པའི་སྒོ་ནས་འཆད་ཁྲིད་གྱ་ནོམ་པ་བྱས་པས་རིག་གཞུང་མཉམ་སྤྱོད་དང་བསམ་བློ་བརྗེ་རེས་སོགས་ལ་སྔར་ལས་གསོན་ཤུགས་གསར་བ་ཞིག་བསྩལ་ཡོད། ཞིང་ཆེན་ཡོངས་ཀྱི་ཁུལ་དང་རྫོང་གི་བོད་ལུགས་སྨན་ཁང་གི་མགོ་གཙོ་དང་།  རྫོང་དང་ཡུལ་ཚོ། སྡེ་བ་སོགས་ཀྱི་ལག་རྩལ་མི་སྣ150ཙམ་ཟབ་ཞུགས་བྱས།

       ཚོགས་འདུར་ཞུགས་པའི་མཁས་དབང་དག་གིས་བོད་ཀྱི་སྨན་ལུམས་ཚུལ་ཅི་ལྟར་འཕེལ་རྒྱས་གཏོང་ཚུལ་དམིགས་སུ་བཟུང་ནས་སྨན་ལུམས་ཚན་ཁག་གི་འཛུགས་སྐྲུན། སྨན་ལུམས་ཀྱི་མི་སྣ་གསོ་སྐྱོང་། མི་ན་བར་གནས་པ་དང་ན་བ་གསོ་བའི་ཐབས། དཔེ་མཚོན་གྱི་བྱ་ཐབས་དང་ནད་དཔེ་བསྡུ་ཉར་བྱ་ཚུལ་སོགས་བོད་ཀྱི་གསོ་རིག་ཚད་མཐོན་པོའི་སྒོ་ནས་འཕེལ་རྒྱས་འགྲོ་ཚུལ་ཐད་ལ་རང་རང་གི་བསམ་ཚུལ་དང་ཉམས་མྱོང་མང་དུ་གསུངས། ཆེད་མཁས་པའི་བརྗོད་པ་མཐའ་དག་གནད་ལུགས་དང་བསྟུན་ཆེ་ལ། དོན་དངོས་དང་འབྱོར་ཆེ་བས་ཚོགས་ཞུགས་མི་སྣ་དག་གིས་ཡིད་སེམས་རང་བཞིན་གྱིས་བཀུག་ཡོད་པར་མ་ཟད། བོད་ལུགས་གསོ་རིག་ཚུལ་ཅི་ལྟར་ཚད་མཐོའི་ངང་འཕེལ་རྒྱས་འགྲོ་དགོས་པའི་ལམ་ཕྱོགས་གསལ་ལེར་སོང་ཡོད་ངེས། ཚོགས་འདུ་བདེ་བླག་ངང་མཇུག་སྒྲིལ་བ་དེས་རྒྱ་ཆེ་བའི་བོད་ཀྱི་གསོ་རིག་གི་ཆེད་ལས་མི་སྣ་དག་ལ་ལས་སྒོ་གསར་འབྱེད་དང་གསར་གཏོད་ཀྱི་གོ་སྐབས་བསྩལ་ཡོད་པར་མ་ཟད་མི་རིགས་གསོ་རིག་གི་སྨན་ཁང་སོ་སོའི་བར་རིག་གཞུང་བརྗེ་རེས་དང་མཉམ་འབྲེལ་གྱི་གསེར་ཟམ་ཡང་བསྐྲུན་ཡོད། ཐེངས་འདིའི་ཚོགས་འདུས་ང་ཚོར་སྔོན་ཐོན་གྱི་དོ་དམ་དང་འཕེལ་རྒྱས་ཀྱི་མ་དཔེ། ཉམས་མྱོང་བསྡུ་ལེན། དགེ་ལེན་སྐྱོན་སེལ་སོགས་སྨན་ཁང་འཕེལ་རྒྱས་ཀྱི་ཐད་ལ་ཉམས་མྱོང་བརྗེ་རེས་ཀྱི་ལྡིང་ཆ་གསར་བ་ཞིག་བསྐྲུན་སོང་བས། བོད་ལུགས་གསོ་རིག་གི་རྒྱུ་ཆ་སྔོག་འདོན་དང་རིག་གནས་ཁྱབ་བསྒྲགས། རྒྱལ་ཡོངས་གཞི་རིམ་གྱི་ཀྲུང་ལུགས་གསོ་རིག་བྱ་བའི་དཔེ་སྟོན་རྫོང་དང་བདུད་རྩི་ལུམས་ཀྱི་བསྟི་གནས་གསར་འཛུགས་ཀྱི་བྱ་བ་བདེ་བླག་ངང་འགྲུབ་པར་རྨང་གཞི་བརྟན་པོ་ཞིག་བཞག་ཡོད།