༄༅། །གསར་དང་སར། རྡོ་དགོན་གསང་བདག་རྡོ་རྗེ་ལགས།

མ་དག་རྒྱུན་འབྱམས་སུ་འགྲོ་ཉེན་ཆེ་བའི་མིང་དང་ཚིག་གྲོགས་འགའ་ཞིག་གི་སྐོར་བཤད་པ།        གསར་པ་ཞེས་པ་ནི་རྙིང་པའི་ལྡོག་ཕྱོགས་ཏེ་གོས་གསར་པ། དུས་གསར་པ། ལས་ཀ་གསར་པ་སོགས་བྱ་དངོས་གསར་པ་ཐམས་ཅད་ལ་སྔོན་འཇུག་ག་ཡིག་འཇུག་པ་རྩོད་མེད་ལགས་ཀྱང་། དག་ཡིག་འགའ་ཞིག་ཏུ་གསར་ཞེས་པ་ལ་འབྲེལ་བཤད་མཛད་སྐབས་འདི་ལ་སར་ཞེས་བྲིས་པའང་སྣང་ལྟ་བུ་ཡོད་པ་ལ་བརྟེན་ནས། མདོ་སྨད་ཁུལ་དུ་ལོ་གསར་ལྟ་བུའི་སྐབས་སྔོན་འཇུག་ག་དོར་ནས་ལོ་སར་ཞེས་འབྲི་སྲོལ་བྱུང་བ་དང༌། སར་ཞེས་པ་མིང་མཐར་སླེབས་སྐབས་ལོ་སར་དང༌། སློབ་སར་ལྟ་བུ་གསར་པའི་དོན་སྟོན་ཚུལ་གསུང་མཁན་ཡང་ཡོད་པར་བརྟེན་དེང་སྐབས་དབུས་ཁུལ་དུ་ཡང་དེའི་ལད་མོ་བྱས་ཏེ་འབྲི་མཁན་རེ་ཟུང་འདུག་པས་དེ་ཡང་མ་དག་རྒྱུན་འབྱམས་སུ་འགྲོ་ཉེན་ཆེ་བས་དེའི་སྐོར་ཡང་མི་བརྗོད་ཐབས་མེད་དུ་མཐོང་།
       གསར་དང་སར་ཞེས་པ་མིང་གི་སྐབས་སུ་གདམ་ང་ཡིན་པའི་དབང་དུ་བཏང་ན་ཡང་ལོ་སར་ལ་བཀྲ་ཤིས་བདེ་ལེགས་ཞུ་ལྟ་བུ་བྲིས་པ་ཡིན་ན་བཀྲ་ཤིས་བདེ་ལེགས་ཞེས་པའི་ཚིག་གྲོགས་ཀྱི་ནུས་པས་ལོ་གསར་ཡིན་པར་གོ་བ་ལས་གཞན་དུ་འཁྲུལ་བའི་དོགས་པ་མེད་ཀྱང༌། གསར་པའི་དོན་དེ་མིང་གི་མཐར་སླེབས་སྐབས་སྔོན་འཇུག་ག་ཡིག་དོར་རུང་ན་དོན་གཞན་ལ་ཡང་དེ་ལྟར་འབྲི་རུང་བས་སློབ་མ་གསར་པ་ལའང་སློབ་སར་དང༌། འཐབ་འཛིང་པ་གསར་པ་ལ་འཐབ་སར། མེ་ཐབ་གསར་པ་ལ་ཐབ་སར། ཁང་པ་གསར་པ་ལ་ཁང་སར།ཞེས་སོགས་འབྲི་རུང་བ་ཡིན་པས་གོང་གསལ་དེ་དག་རིམ་པ་བཞིན་དུ་སློབ་མ་གསར་པ་ལ་སློབ་སར་ཞེས་བྲིས་པ་དེ་ཡི་གེ་སློབ་སར་ཞེས་སུ་འཁྲུལ་བ་དང༌། དེ་བཞིན་དུ་དཔེར་ན་འཐབ་འཛིང་པ་གསར་པ་འབྱོར་བ་དང་གཡུལ་དུ་ཞུགས་ལྟ་བུ་ལ་འཐབ་སར་འབྱོར་བ་དང་གཡུལ་དུ་ཞུགས་ཞེས་བྲིས་པ་ཡིན་ན་འཐབ་ས་སྟེ་དམག་འཐབ་བྱེད་ས་ལ་འབྱོར་མ་ཐག་གཡུལ་དུ་ཞུགས་ཞེས་པར་འཁྲུལ་རྒྱུ་དང༌། མེ་ཐབ་གསར་པ་ལ་ཐབ་སར་ཞེས་བྲིས་ན་མེ་ཐབ་ཀྱི་ས་ལའམ་འགྲམ་དུ་ལྟ་བུ་ར་ཡིག་དེ་ལ་དོན་གྱི་ཕྲད་དུ་འཁྲུལ་སྲིད་པ་མ་ཡིན་ནམ། གལ་ཏེ་འཐབ་གསར་འབྱོར་མ་ཐག་གཡུལ་དུ་ཞུགས་ཞེས་བྲིས་པ་ཡིན་ན་འཐབ་འཛིང་པ་གསར་པ་ཁོ་ན་ལས་གཞན་དུ་འཁྲུལ་གཞི་རྩ་བ་ནས་མེད་པས་གདམ་ག་བྱེད་རྒྱུ་ཡོད་ཕྱིན་ལེགས་པ་དེ་འདེམས་དགོས་པ་ཡིན་པས་ཚང་མས་འཁྲུལ་གཞི་མེད་པ་དེ་འདེམས་པར་མཛོད་ཅིག
       བརྡ་སྤྲོད་ཀྱི་ནུས་པ་ཙམ་ཡང་མ་རྟོགས་པ་དང་ལོག་པར་རྟོགས་པ། ཐེ་ཚོམ་གྱི་རྒྱུ་མེད་པ་བཅས་ཀྱི་རང་རེའི་སྐད་ཡིག་འདི་བཞིན་མ་ཉམས་གོང་འཕེལ་དང་ཉམས་པ་སོར་ཆུད་བཅས་ཀྱི་ཆེད་དུ་བརྡ་སྤྲོད་རིག་པའི་མཁས་པའི་ཚོས་ཐུགས་སྣང་ཆེན་པོས་ཞིབ་འཇུག་དང་དག་བཅོས་མཛད་རྒྱུ་དང༌། བློ་གསར་རྣམས་ནས་ཀྱང་བརྡ་སྤྲོད་ཀྱི་བརྗོད་པ་བཙན་ཅིང་ཚིག་གི་འཇུག་པ་བདེ་བའི་ཡིག་རྩོམ་འབྲི་ཤེས་ཤིང་གཞན་གྱི་རྩོམ་ཡིག་གི་གོ་དོན་ལེགས་པར་རྟོགས་པའི་ཆེད་དུ་བརྡ་སྤྲོད་རིག་པ་འདིར་སྣང་ཅུང་དུ་མ་སོང་བར་དོ་སྣང་ཆེན་པོས་སློབ་སྦྱོང་མཛད་རྒྱུ་ཡང་ཤིན་ཏུ་གལ་ཆེ་བ་ལགས་སོ། །