དཔའ་རིས་སངས་རྒྱས་ཀྱི་གསུང་རྩོམ་དེབ་ཕྲེང་འགྲེམ་སྤེལ་བྱས་པ།

       ཟླ12པའི་ཚེས9ཉིན། གནའ་མཁར་ཟི་ལིང་ནས་དཔའ་རིས་སངས་རྒྱས་ཀྱི་གསུང་རྩོམ་དེབ་ཕྲེང་འགྲེམས་སྤེལ་དང་འབྲེལ་བའི་རིག་གཞུང་བགྲོ་གླེང་ཚོགས་འདུ་འཚོགས།

       དེབ་ཕྲེང་འགྲེམས་སྤེལ་དང་འབྲེལ་བའི་རིག་གཞུང་བགྲོ་གླེང་ཚོགས་འདུ་འདི་ཀྲུང་གོའི་བོད་རིག་པའི་དཔེ་སྐྲུན་ཁང་དང་མཚོ་སྔོན་བོད་ཀྱི་གནའ་དཔེ་ཞིབ་འཇུག་ཚོགས་པས་གཙོ་སྒྲུབ་གནང་ཞིང་། ནུབ་བྱང་མི་རིགས་སློབ་ཆེན་དང་མཚོ་སྔོན་སྤྱི་ཚོགས་ཚན་རིག་བོད་ཡིག་རྩོམ་སྒྲིག་ཁང་། ཀན་སུའུ་ཞིང་ཆེན་བོད་རིག་པའི་ཞིབ་འཇུག་སློབ་ཚོགས་བཅས་ཀྱིས་རོགས་སྒྲུབ་དང་། མཚོ་སྔོན་གཙུག་ལག་ཕྲེང་བ་རིག་གནས་གཏོང་སྦྱོར་སྤྱི་གཉེར་ཁང་གིས་སྒྲུབ་འགན་ཁུར་ཡོད།

       ཐོག་མར་ཀྲུང་གོའི་བོད་རིག་པའི་དཔེ་སྐྲུན་ཁང་གི་འགོ་འཛིན་ཧོང་ཐའོ་ཡིས་ཤིས་ཚིག་ཕུལ་བར་མ་ཟད་རྩོམ་པ་པོ་ཁོང་ལ་དཔེ་སྦྱིན་གནང་བ་དང་། རྒྱལ་ཡོངས་དམངས་ཆེན་གྱི་མི་རིགས་ཆོས་ལུགས་དོན་གཅོད་ཨུ་ལྷན་གྱི་ཀྲུའུ་རེན་གཞོན་པ་ཟུར་པ། ཀྲུང་དབྱང་མི་རིགས་སློབ་ཆེན་གྱི་སློབ་གཙོ་ཟུར་པ་དོན་གྲུབ་དབང་འབུམ་དང་ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱིས་སྤྱི་ཁྱབ་ལས་འཛིན་གཞོན་པ་ཟུར་པ་བློ་བཟང་ལྷུན་གྲུབ་རྡོ་རྗེ་གཉིས་ཀྱིས་བརྙན་ལམ་ནས་ཤིས་ཚིག་ཕུལ་བ་དང་། མཐར་རྩོམ་པ་པོ་ཁོང་གིས་གཏམ་བཤད་གནང་བ་དང་འབྲེལ་ཀློག་པ་པོའི་སྐུ་ཚབ་ལ་དཔེ་སྦྱིན་གནང་བ་རེད།

       ཐེངས་འདིའི་རིག་གཞུང་བགྲོ་གླེང་ཚོགས་འདུའི་ཐོག་དམ་པ་ཁོང་གི་རིག་གཞུང་བསམ་བློར་ཞིབ་འཇུག་དང་དེ་རྒྱུད་འཛིན་སྐོར་གླེང་བར་མ་ཟད། དུས་རབས་གསར་པའི་བོད་སྐད་ཡིག་ཞིབ་འཇུག་དང་བོད་རྒྱ་སྐད་གཉིས་ལོ་ཙྭའི་བྱ་གཞག་འཕེལ་རྒྱས་བཏང་ནས། རིག་གཞུང་མཉམ་ལས་དང་། རིག་ཚན་འཐུས་ཚང་དང་ཡར་རྒྱས་གཏོང་ཆེད་སྤེལ་བ་རེད།

       དཔའ་རིས་སངས་རྒྱས་ཀྱི་གསུང་རྩོམ་དེབ་ཕྲེང་ཞེས་པར་པོད་དགུ་ཡོད་ལ། 2023ལོའི་ཟླ11པར་ཀྲུང་གོའི་བོད་རིག་པ་དཔེ་སྐྲུན་ཁང་གིས་པར་སྐྲུན་འགྲེམ་སྤེལ་བྱས། དེབ་དགུ་སོ་སོ་ནི«བརྡ་སྤྲོད་གསལ་བྱེད་ངག་སྒྲོན»དང་། «དག་ཡིག་རིག་པ་གབ་པ་མངོན་ཕྱུང་།» «བརྡ་སྤྲོད་སྦྱོར་བ་རྣམ་བཞི་རབ་གསལ།» «སྡེབ་སྦྱོར་རིག་པའི་སྲོལ་འབྱེད་ངག་གི་རོལ་མཚོ།» «དཔེ་ཆོས་ཚིག་མཛོད།» «མངོན་བརྗོད་ཁུངས་བཙུན་རྒྱ་མཚོ།» «བོད་ཡིག་འབྲི་ཚུལ་མཐོང་བ་ཀུན་སྨོན།» «ལེགས་བཤད་དབྱིག་མཛོད།» «དཔའ་རིས་སངས་རྒྱས་ཀྱི་དཔྱད་རྩོམ་ཕྱོགས་བསྒྲིགས»བཅས་ཡིན།

       དཔའ་རིས་སངས་རྒྱས་ནི་བོད་རྒྱ་སྐད་གཉིས་སྨྲ་བའི་ལོ་ཙཱ་བ་དང་བོད་ཀྱི་བརྡ་སྤྲོད་རིག་པའི་མཁས་དབང་ཆེན་མོ་ཡིན་ལ། སྤྱི་ལོ1931ལོར་མདོ་སྨད་དཔའ་རིས་ཡུལ་དུ་སྐུ་འཁྲུངས། 1955ལོར་ནུབ་བྱང་མི་རིགས་སློབ་གླིང་ནས་སློབ་མཐར་ཕྱིན་རྗེས་སློབ་གྲྭ་དེ་གའི་དགེ་རྒན་གྱི་ཕྱག་ལས་གནང་། དགེ་རྒན་གྱི་ལས་གནས་སུ་མི་ལོ་ལྔ་བཅུ་ལྷག་ཙམ་ལ་སློབ་ཁྲིད་དང་ལོ་ཙཱ། བསླབ་དེབ་རྩོམ་སྒྲིག བསླབ་གཞི་འཆར་འགོད། སློབ་མ་བདག་གཉེར། སློབ་གླིང་དོ་དམ་སོགས་ལས་དོན་གྱི་ཁུར་གང་བབ་འཐུས་ཤོར་མེད་པ་གནང་ཞིང་། ཞོར་ནས་བོད་ཀྱི་རིག་གནས་སྤྱི་དང་སྒོས་སུ་བརྡ་སྤྲོད་དང་མངོན་བརྗོད། སྡེབ་སྦྱོར། ཚིག་མཛོད་བཅས་ཐ་སྙད་རིག་གནས་ཀྱི་གནས་རེ་རེ་ནས་བརྩམས་པའི་བསྟན་བཅོས་གྲགས་ཅན་པོད་དུ་མ་པར་སྐྲུན་གནང་ནས་བོད་ཀྱི་རིག་གཞུང་འཕེལ་རྒྱས་ལ་བྱས་རྗེས་བླ་མེད་བཞག་ཡོད།