གློག་བརྙན«གསའ»ཡི་མཛེས་པ་གླེང་བ། རྣམ་རྒྱལ་བཀྲ་ཤིས།

རྣམ་རྒྱལ་བཀྲ་ཤིས།
 

       གློག་བརྙན«གསའ»ནི་ཁྱིམ་ཚང་ཞིག་གི་ལུག་ཁྱུར་གསའ་ཞིག་ལྡིང་ནས་ལུག་དགུ་བསད་པར་རྐྱེན་བྱས་ནས་གཏམ་རྒྱུད་ཀྱི་བྱུང་རིམ་བཀྲམ་པར(展开)བྱས་ཡོད་ལ། གློག་བརྙན་འདི་ནི་རྒན་པད་མ་ཚེ་བརྟན་གྱི་གློག་བརྙན་གཞན་དག་དང་བསྡུར་ན་ཟློས་གར་རང་བཞིན་གྱི་ཤན་སྟོབས་ཆེ་ཞིང་། མཛེས་རྟོག་གསར་བ་ཞིག་ལ་འཚོལ་ཞིབ་དང་ལྡེབ་འཐེན(抽帧)གྱི་སྒྲིག་སྦྱོར་ལག་ཐབས་སྤྱད་ཡོད་པ་ཞིག་རེད། ད་དུང་། ཁོང་ཉིད་བྱང་ཆ་ལྡན་པའི་བརྙན་མིག་རིང་བོ(长镜头)སྤྱད་ནས་དངོས་ཡོད་འཚོ་བའི་བདེན་སྣང་མངོན་པར་བྱས་འདུག

       གློག་བརྙན་ནི་དངོས་ཡོད་བསྐྱར་མཚོན(再现)གྱི་སྒོ་ནས་མཚོན་དགོས་པ་ཞིག་མིན་པས། གློག་བརྙན་འདི་ལ་དངོས་ཡོད་དང་དངོས་ཡོད་ལས་འགོང་བའི(超现实)མཚོན་ཐབས་སྤྱད་འདུག་ཅིང་། དེའང་གློག་བརྙན་ལ་ཚོན་མདོག་ཡོད་མེད་གཉིས་སུ་ཕྱེས་ནས་ཚོན་ལྡན་གྱི་དུམ་ཚན་ལས་དངོས་ཡོད་དང་ཚོན་མེད(黑白)ཀྱི་དུམ་ཚན་ལས་དངོས་ཡོད་ལས་འགོང་བ་མཚོན་པར་བྱས་འདུག སྤྱིར་ཉེ་རབས་གློག་བརྙན་དག་གི་ཁྲོད་དུ་ཚོན་མེད་ཀྱི་དུམ་ཚན་ལས་ཕྱིར་དྲན་མངོན་པ་ཞིག་ཡིན་མོད། དེང་སྐབས་དེ་ལྟར་སྤྱོད་མཁན་ཤིན་ཏུ་ཉུང་། འོན་ཀྱང་། 2023ལོའི་ཆེས་སྐད་གྲགས་ལྡན་པའི་ནོ་ལན(克里斯托弗·诺兰)གྱི་གློག་བརྙན«ཨོ་ཕན་ཧེ་མོར»གྱི་ཚོན་མེད་ཀྱི་དུམ་ཚན་ལས་ཕྱིར་དྲན་མངོན་ཡོད་པ་ཞིག་རེད། ཡིན་ནའང་། གློག་བརྙན«གསའི»ཁྲོད་ཀྱི་ཚོན་མེད་ཀྱི་དུམ་ཚན་ནི་ཕྱིར་དྲན་མིན་པར་དངོས་ཡོད་ལས་འགོང་བའམ་ཡང་ན་གསའ་དང་ཨ་ཁུའི(ཚེ་བརྟན་བཀྲ་ཤིས་ཀྱིས་འཁྲབ།)བར་ལ་རྣམ་ཤེས་ཀྱི་འབྲེལ་ཐག་ཅིག་ཡོད་པ་མཚོན་པར་བྱས་འདུག

       བུ་ཆེ་བ(སྦྱིན་པས་འཁྲབ་ཅིང་གློག་བརྙན་ཁྲོད་དུ་ཁོའི་མིང་མངོན་མེད་པས་འདིར་བུ་ཆེ་བར་སྦྱིན་པ་ཞེས་བྲིས་ཡོད།)དང་ཁོའི་ཨ་ཕ(བློ་བཟང་ཆོས་འཕེལ་གྱིས་འཁྲབ།)གཉིས་ཀྱི་གཤིས་ཀའམ་སེམས་ཀྱི་འགྱུར་བ་དེ་ཚོན་ལྡན་དང་ཚོན་མེད་ལས་མངོན་པ་ནི་མི་འདྲ་སྟེ། དྲང་ཐད་ནས་བལྟས་ན་སྦྱིན་པས་གསའ་གསོད་པར་འདོད་པ་དང་ཁོའི་ཨ་ཕས་གཏོང་བར་འདོད་པ་ཞིག་ཏུ་སྣང་ཞིང་། གསར་འགོད་པས་བརྙན་མིག་སྦྱིན་པའི་སྟེང་དུ་བསྐོར་ཏེ་ཁྱོད་ལ་བསམ་ཚུལ་ཅི་ཡོད་འདྲི་དུས་རང་གི་གྱོང་གུད་ཀྱི་ཆེད་དུ་རང་སེམས་འགལ་བར་བྱས་ཏེ་རྫུག་ཉམས་དྲག་པོས་ཁོ་ཚོར་འཇིགས་སྐུལ་བྱས་པ་ཙམ་མ་གཏོགས་གསོད་འདོད་མེད་པ་ཁོའི་བཤད་པའི་སྐད་ཆའི་ཞིབ་ཕྲ(细节)དང་ཚོན་མེད་ཀྱི་དུམ་ཚན་ཁྲོད་དུ་ཤེས་ཡོང་བ་ཞིག་རེད། སྲིད་གཞུང་གིས་གྱོང་གུད་ལ་སྐྱིན་ཚབ་སྤྲོད་དགོས་པར་གསའ་བཀག་ནས་བཞག་པ་ཙམ་ལས་གསོད་འདོད་ཡོད་ན་སྔ་མོ་ནས་བསད་ངེས་པས། ཁོས་རྡོ་རྗེ(多杰会长)ལ་ངས་གསའ་འཕུད་ན་གྱོང་གུད་ཀྱི་སྐྱིན་ཚབ་སྤྲོད་པར་ཁྱོད་ཚོས་གཞན་མགོར་འཕེན་པས་ངས་སུ་ལ་སྒོར་མོ་དགོས་ཟེར་དགོས་པ་རེད་ཅེས་པ་དང་། གསར་འགོད་པ་དང་སྡེ་དཔོན་སོགས་ལ་ཁ་རྩོད་བྱེད་དུས་སུའང་སྔོན་ཆད་ནས་གཅན་གཟན་གསའ་དང་ང་ཚོས་ཁྱོད་ཀྱིས་མི་འཐུང་ཚེ་ངས་མི་ཟ་ཟེར་སྲོལ་མེད་རུང་། གཅན་གཟན་ཤ་ཟ་ཁྲག་འཐུང་ཞིག་གིས་ལུག་གཅིག་རེ་གཉིས་རེ་གསོད་ངེས་རེད་ཟེར་བ་སོགས་ལས་ཁོས་གསའ་གསོད་འདོད་མེད་པའི་བསམ་ཚུལ་དེ་མངོན་ཡོང་བ་ཞིག་རེད། གལ་སྲིད་སྐྱིན་ཚབ་གཅིག་ཀྱང་མ་བྱིན་ཡང་ཁོས་གསའ་གསོད་མི་སྲིད་པ་རི་སྐེད་ཀྱི་གསའ་ཕྲུག་དེས་ཀྱང་ནུས་པ་ཐོན་ཡོད། འོན་ཀྱང་། གསར་འགོད་པས་བརྙན་མིག་ཨ་ཕ་ལ་གཏད་དུས་ཁོས་གསའ་འདི་གངས་རིའི་རྣམ་ཤེས་རེད་ཟེར་བས་དེ་ལ་གནོད་པ་བྱེད་མི་ཉན། དེར་གནོད་པ་བྱས་ཚེ་རྣམ་སྨིན་འཁོར་ཡོང་ངེས། གསའ་གཏོང་འདོད་ཀྱང་རྒད་པོ་ངའི་ཁར་ཉན་པ་མ་རེད་ཟེར་བ་དེས་ཀྱང་ཁོས་རང་གི་ནང་སེམས་ལ་རྒྱབ་འགལ་བྱས་འདུག་ཅིང་། བོད་དུ་རྒན་བཀུར་གྱི་འདུ་ཤེས་མཐུག་པོ་ཡོད་པས་སྦྱིན་པའི་རྒྱུད་ནའང་དེ་དོར་མེད་པ་གཏམ་རྒྱུད་ཀྱི་མཇུག་ནས་མཐོང་ཐུབ། སྦྱིན་པས་གསའ་གསོད་རྒྱུ་ཡིན་ཞེས་པ་དེར་སེམས་བསམ་པའི་སྟེང་ནས་གསོད་འདོད་སྐྱེས་མེད་ལ། ཨ་ཕས་སེམས་གཏིང་ངམ་བག་ཉལ་གྱི་འདུ་ཤེས་སུའང་གསའ་དེ་གཏོང་འདོད་ཀྱང་སྐྱེས་མེད་པ་རེད། དེ་ཡང་ཡིན་ཏེ། ཁོང་ཕ་བུ་གཉིས་ལྷ་སར་འགྲོ་བ་ལ་ཁོས་ལོ་མང་རིང་ལ་ལམ་དངུལ་གསོག་དགོས་བྱུང་བས། ཁྱིམ་དུ་གྱོང་གུད་ཆེན་པོ་བྱུང་དུས་སྐྱིན་ཚབ་ཀྱི་ཆེད་དུ་གསའ་གཏོང་འདོད་མི་སྐྱེ་བ་དེའང་དོན་དངོས་ཤིག་ཡིན་པས། འདི་ལས་ཁོང་གཉིས་ཀྱི་སེམས་སུ་འགལ་འདུ་དྲག་པོ་ཞིག་གིས་བཀང་འདུག

       གཏམ་རྒྱུད་མགོ་རྩོམ་དུས་གསར་འགོད་པའི་མགོ་བས(དཀའ་ཐུབ་བཀྲ་ཤིས་ཀྱིས་འཁྲབ།)ལོ་འདི་དག་ལ་འབྲོག་པ་ཚོའི་ལག་ཏུ་བོའུ་ཡོད་པ་མ་རེད་ཅེས་པ་དེར་གོ་རྒྱུ་ཡོད་དེ། དེ་ནི་སྦྱིན་པ་དང་ཁོའི་ཕ་གཉིས་ཀྱི་སྤྱི་ཚོགས་ཉམས་མྱོང་སྟེང་གི་འགྱུར་བ་ཞིག་ཀྱང་ཡིན། སྦྱིན་པའི་ཨ་ཕའི་མི་ཚེ་ཁྲོད་དུ་རི་དྭགས་བསད་པའི་བརྒྱུད་རིམ་དང་གོ་ཐོས་ངེས་པར་དུ་ཡོད་སྲིད་པས། ཐ་ན་ཚོན་མེད་ཀྱི་དུམ་ཚན་དུ་གསའ་ཡིས་ཨ་ཁུ་ཁུར་ཡོང་དུས་ཉེ་འཁོར་གྱི་མི་རྣམས་དང་མི་འདྲ་ས་ནི་ཨ་ཕའི་སློག་པའི་གོང་བར་གསའ་ལྤགས་བརྒྱབས་ཡོད་པ་དེར་གབ་སྦས་ཆེན་པོ་ཞིག་འདུག གཞན་ཚོན་མེད་ཀྱི་དུམ་ཚན་ལས་གསའ་དེར་ཨ་ཕས་ནན་གྱིས་གཅར་ཞིང་། ངས་འདིའི་པགས་པ་བྱི་རྒྱུ་ཡིན་ཞེས་བཤད་པ་དེས་ཁོའི་གསའ་གཏོང་མིན་ཤེས་ཐུབ་པ་ཞིག་རེད། འོན་ཀྱང་། གསའ་ལ་གཅར་དུས་སྦྱིན་པའི་ཉམས་སྣང་ལས་གསའ་ལ་སྙིང་རྗེ་ཤོར་ཚུལ་མངོན་ཡོང་བ་དེས་ཀྱང་སྦྱིན་པས་གསའ་ལ་བཟུང་བའི་རྣམ་འགྱུར་ཅིག་མཚོན་ཡོད་མོད། འཚོ་བའི་གྱོང་གུད་ཀྱིས་ཁོའི་ནང་སེམས་ལ་འགྱུར་བ་བཏང་འདུག

       གསར་འགོད་པ་ཚོས་ཅི་ཡིན་མི་ཤེས་པའི་རི་དྭགས་ཤིག་ལ་གདོང་ཐུག་བྱུང་བ་དེའང་ཚོན་མེད་ཀྱི་དུམ་ཚན་ནང་གསལ་ཁ་ཕྱེས་ཡོད་དེ། ཤྭ་བ་དེ་གསའ་ཡིས་བདའ་བས་གསར་འགོད་པ་ཚོར་གདོང་ཐུག་བརྒྱབ་པ་ཚོན་མེད་ཀྱི་བརྙན་མིག་ལས་ཤྭ་བ་བྱུང་ཡོད་པ་དེས་བསྟན་པ་རེད། དེ་མ་གཏོགས་ཤྭ་བའི་བརྙན་མིག་གིས་གློག་བརྙན་ཧྲིལ་བོར་ནུས་པ་མི་ཐོན་པས། དངོས་ཡོད་དང་དངོས་ཡོད་ལས་འགོང་བ་གཉིས་ཕན་ཚུན་ཟུང་འབྲེལ་བྱས་ཚེ་ད་གཟོད་གཏམ་རྒྱུད་ལ་གོ་བ་ཡོང་བར་འདོད་ཅིང་། དེ་ལྟ་བུའི་སྒྱུ་རྩལ་ནི་གློག་བརྙན་དང་རྩོམ་རིག རི་མོ་སོགས་ཀྱི་ཁྲོད་དུ་ད་གཟོད་མངོན་ཐུབ་པ་ཞིག་ཡིན། འདི་ལ་སྒྱུ་རྩལ་སོགས་ཀྱི་བློ་སྦྱོང་མཐོན་པོ་ཞིག་མེད་ཚེ་འགྲུབ་མི་ཐུབ་པ་ཞིག་ཀྱང་རེད།

       གཏམ་རྒྱུད་འདི་གསའ་གཏོང་མིན་ལ་ཕ་བུ་གཉིས་ཀྱི་གཙང་རྐྱང(单一)གི་འགལ་བ་ཙམ་ཞིག་བརྗོད་པ་མིན་པས། གཏམ་རྒྱུད་ཀྱི་མཐོ་རླབས་སུ་སྦྱིན་པས་ཉེན་རྟོག་པ་དང་རྡོ་རྗེ་སོགས་ཀྱི་བསམ་ཚུལ་ལ་དང་ལེན་སྤུ་ཙམ་ཡང་མི་བྱེད་ཅིང་། མཇུག་འབྲས་ཐོན་སྐབས་སུའང་ཁོས་རང་བློ་བརྟན་པོས་གསའ་མི་གཏོང་བར་ཁོ་ཚོར་ངོ་རྒོལ་བྱས་རུང་ཨ་ཕ་ལ་རྒོལ་ལན་སློག་མི་ཐུབ་ཅིང་། ཨ་ཕས་ནན་གྱིས་གསའ་གཏོང་བར་བཤད་རྗེས་ངོ་རྒོལ་མ་བྱས་པར་གསའ་བཏང་བ་རེད། འདི་ལས་སྔོན་མ་ནས་ཕ་རྒན་གྱིས་ཀྱང་གྱོང་གུད་ལ་སྐྱིན་ཚབ་ཡོང་བར་རེ་བ་བརྒྱབ་ཡོད་པ་ཤེས་ཐུབ་པས། རྒན་པད་མ་ཚེ་བརྟན་གྱིས་ཀྱང་གསའ་གཏོང་བར་ཕ་བུ་གཉིས་ཀྱི་དྲང་ཐད་ཀྱི་འགལ་བ་རྐྱང་བ་ཙམ་ཞིག་བརྗོད་མི་སྲིད་པ་ཁོང་གི་གློག་བརྙན«དབུགས་ལྒང»གི་ནང་དུ་ཨ་ཅེ་དང་ཇོ་མོ་གཉིས་ཀྱི་སེམས་ཀྱི་འགལ་འདུ་དང་གློག་བརྙན་གཞན་དག་ལས་ཀྱང་ཤེས་ཐུབ། གློག་བརྙན་འདིའང་གསའ་དང་ཨ་ཁུ་གཉིས་ཀྱི་བར་ལ་རྣམ་ཤེས་ཀྱི་འབྲེལ་ཐག་གམ་ཚེ་སྔོན་ལས་ཀྱི་འབྲས་བུ་ལྟ་བུ་ཞིག་ཡོད་པའང་མངོན་ཡོང་སྟེ། གསའ་ལུག་རའི་ནང་ཡོད་དུས་ཨ་ཁུ་ལུག་རའི་ནང་ལྡིང་བ་དེ་ཁོས་ཀྱང་ཅི་ཡིན་མ་ཤེས་པར་ལྡིང་སོང་ཞེས་བཤད་པ་སོགས་ལས་ཤེས་ཐུབ།

       འཁྲབ་སྟོན་པ་ལ་མཚོན་ན་འཁྲབ་བྱའི་མི་སྣའི་སྣང་བརྙན་ལ་རྒྱུས་ལོན་དང་འཁྲབ་སྟོན་ལ་ལྷོད་ཤ་ཡོད་རྒྱུ་ནི་ཤིན་ཏུ་གལ་ཆེན་པོ་ཡིན་པས། གློག་བརྙན་འདིའི་ནང་གི་སྦྱིན་པའི་མི་སྣའི་སྣང་བརྙན་བཞེངས་སྐྲུན་བྱས་པ་ལེགས་འགྲུབ་ཆེན་པོ་བྱུང་ཡོད་པར་འདོད། ཁོའི་འཁྲབ་བྱའི་མི་སྣའི་སྣང་བརྙན་གྱི་འགྱུར་བ་ལས་གློག་བརྙན་ལ་སྤྲོ་གར་གྱི་རང་མདངས་ཤིག་བསྣན་ཡོད་ཅིང་། གསར་འགོད་པ་དག་དང་རྡོ་རྗེ། ཉེན་རྟོག་པ་ཚང་མར་རང་རང་གི་ལས་རྐང་གི་དབང་གིས་འགལ་བ་མང་བོ་བྱུང་མོད། རང་གི་རྒྱུད་ན་གཤིས་ཀ་བཟང་པོ་ཡོད་པ་མཐོང་ཐུབ་པའང་ཁོ་ཚོས་འཁྲབ་བྱའི་མི་སྣ་ལ་རྒྱུས་ལོན་ཡག་པོ་བྱུང་བའི་འབྲས་བུ་ཡིན་ངེས། ལྷག་པར་དུ། སྦྱིན་པའི་ཆུང་མའི(བདེ་ཆེན་གཡང་འཛོམས་ཀྱིས་འཁྲབ།)སྒོར་ཞིང་དམར་ནག་གི་ངོ་གདོང་དང་མཐོང་རྒྱ་ཆུང་བའི་ཉམས་སྣང་གིས་འབྲོག་མོ་ཞིག་གི་སྣང་བརྙན་གསོན་ཉམས་ལྡན་པའི་སྒོ་ནས་བཞེངས་སྐྲུན་བྱས་ཡོད་ལ། འགལ་བ་ཅི་འདྲ་བྱུང་ཡང་འགྲུལ་བར་ཟ་མ་མི་ལྡུད་པའི་གནས་ལུགས་མེད་པའི་གཤིས་ཀ་དེ་བོད་མིའི་རྐང་ལ་ཟུག་པའི་འདུ་ཤེས་ཤིག་རེད། ཁོ་ཚོའི་བྱ་བྱེད་ཀྱི་ཕྲ་རབ་མང་བོ་ལས་བོད་ཀྱི་འཚོ་བའི་འདུ་ཤེས་གཞན་དང་མི་གཅིག་པ་དེའང་མངོན་པར་བྱས་འདུག

       སྦྱིན་པས་རྒན་པད་མ་ཚེ་བརྟན་དང་མཉམ་འབྲེལ་མང་བོ་བྱས་ཡོད་མོད། དེ་དག་ལས་མི་སྣའི་ཡིད་ཀྱི་འགྱུར་བ་ལས་མངོན་པའི་ཉམས་སྣང་སོགས་གང་ཅིའི་ཐད་ནས«དབུགས་ལྒང»གི་སྣང་བརྙན་བཞེངས་སྐྲུན་ནི་ཆེས་ལེགས་འགྲུབ་བྱུང་ཡོད་པ་ཞིག་ཏུ་བསམ་མོད། ཐེངས་འདིའི་མི་སྣའི་སྣང་བརྙན་བཞེངས་སྐྲུན་ནི་དེ་ལས་ཀྱང་ཐོད་བརྒལ་ཞིག་ཏུ་བསམ་ཞིང་། སྦྱིན་པས་འཁྲབ་སྟོན་བྱེད་པར་ལྷོད་པའི་རང་བཞིན་སྐྱོང་ཐུབ་ཅིང་། གློག་བརྙན་རེ་རེར་ཐ་དད་ཀྱི་མི་སྣའི་སྣང་བརྙན་རེ་བསྐྲུན་ཐུབ་པས་སྣང་བརྙན་རེ་རེ་ལའང་ལྷོད་ཆ་ཇེ་ལྡན་དང་ཚད་ཇེ་ཟིན། འཕེལ་རྒྱས་ཀྱི་རིས་ཇེ་གསལ་ཡིན་པར་འདོད། སྤྱིར་རྒན་པད་མ་ཚེ་བརྟན་དང་སྦྱིན་པ་གཉིས་ནི་ཧྥུའུ་ཐི(约翰·福特)དང་བད་འན(约翰·韦恩)། ཧེ་ཙི་མིན(黑泽明)དང་སན་ཁྲོན་མིན་ལང(三船敏朗)། སི་ཁོ་སད་སི(马丁·斯科塞斯)དང་ཏི་ཉིས་ལོ(罗布特·德尼罗)། ཀྲང་ཡེ་མོའུ(张艺谋)དང་ཀོང་ལིས(巩俐)། ཝང་ཇ་ཝའེ(王家卫)དང་ལང་ཁྲོ་ཝེ(梁朝伟)ཇི་བཞིན་ཕན་ཚུན་ལ་སུས་ཀྱང་བསྐྲུན་དཀའ་བའི་འབྲས་བུ་ཞིག་བསྩལ་ཡོད།