ཨ་མདོའི་ཡུལ་སྐད་ལས་རྒྱུན་སྤྱོད་མིང་བརྡ་ཁག་ཅིག་གི་དོན་ཐོབ་ཡི་གེ་གང་ཡིན་སྐོར་གླེང་བ། ཁག་གསུམ་པ།

       མགོ་གཡང་སྤར། མགོ་ལ་ཕོག་ཐུག་ཆེན་པོ་བྱུང་སྟེ་ཀླད་སྲུབས་ཅུང་བསྒུལ་བའམ་ཀླད་པའི་གནས་ཅུང་ཟད་སྤར་བས་རེ་ཞིག་དྲན་པ་ཉམས་པར་གྱུར་པའི་དོན། ཨ་མདོའི་ཡུལ་སྐད་དུ། མགོ་གཡང་བསར་ཞེས་པའི་གདངས་ཐོན། རྟས་ཐང་ལ་གཡུགས་ནས་མགོ་གཡང་སྤར(བསར)། མགོར་བེ་ཅོན་གྱིས་བརྒྱབ་ནས་མགོ་གཡང་སྤར(བསར)ཟེར་བ་ལྟ་བུ། མགོ་གཡང་སྤར་བའི་རྟགས་མཚན་ནི། ཁ་བླ་བའམ་སྐྱུག་པ་སོགས་བྱེད། མཚོ་སྔོན་ཐེམ་ཆེན་རྫོང་གི་སྐད་དུ། མགོ་གཡང་གཏོར་ཟེར། ཀན་ལྷོའི་ཅོ་ནེ་རྫོང་གི་སྐད་དུ། མགོ་རྒྱ་སྤར་ཟེར། རྒྱ་སྐད་དུ། ནའོ་ཀྲིན་ཏེང(脑震荡)ཟེར། མྱོང་བ་རྒན་པོའི་ངག་སྒྲོས་ལྟར་ན། མགོ་གཡང་སྤར(བསར)བ་བྱུང་ཚེ་མིའི་རྐང་པ་གཉིས་ཀར་རིང་ཐུང་ཤོར་ཡོད་ཟེར་བས། དེ་བཅོས་ཐབས་སམ་དྲན་པ་ཕྱིར་བསུ་བྱེད་ཀྱི་གདམ་པ་ནི། མི་དེ་ཐང་ལ་དྲང་མོར་བསྣར་དུ་བཅུག་རྗེས་རྐང་པ་གཉིས་ཀྱི་དྲང་ཐད་དུ་ཤིང་ལེབ་ཅིག་བཞག་སྟེ་ཐོ་བ་གང་རུང་གིས་ཤིང་ལེབ་ངོས་སུ་བརྡུང་ན་ཕན་ནུས་འབྱུང་ཟེར་ལ། ཡང་སྐེ་རགས་བཤགས་ཏེ་མགོ་ནས་མ་ནེའི་འོག་ཏུ་བསྡམས་པ་དང་། དེ་ནས་ཐོད་པ་ནས་ལྟག་པའི་བར་དུ་དཀྲི་བསྡམས་བྱས་ན་ཕན་ཐོགས་འབྱུང་ཟེར་ཚུལ་ཡོད་ཅིང་། ད་དུང་མི་དེ་ཤིང་སྒོ་ལྟ་བུ་ཞིག་གི་སྟེང་ལོག་ཏུ་འཇུག་པ་དང་། གྲོད་པུ་ཞིག་གི་ནང་ཆུ་གང་བླུགས་ནས་དེའི་མགོར་ཁེན་དུ་བཅུག་རྗེས་རིང་ཐུང་ཤོར་བའི་རྐང་པ་གཉིས་ཀྱི་དྲང་ཐད་དུ་ཤིང་ལེབ་ཅིག་བཞག་སྟེ་བེ་ཅོན་ཞིག་གིས་ཤིང་ལེབ་ངོས་སུ་བརྡུང་ཚེ་རིམ་གྱིས་རྐང་པའི་རིང་ཐུང་ཇེ་སྙོམ་དུ་འོངས་ཤིང་དྲན་པ་སོས་འོངས་པ་སོགས་ཀྱི་ཡུལ་ཐབས་ཡོད་ཟེར། སྤར་ནི་གནས་སྤར་བའམ་བརྗེས་པའི་དོན་གྱིས། རྐང་པའི་ཚིགས་ལོག་པ་ལ་རྐང་ཚིགས་སྤར(བསར)། འགད་རྫས་གས་སྒྲ་སོགས་ཀྱིས་གྱང་ལ་སེར་ཁ་ཤོར་དུ་བཅུག་པ་ལ་གྱང་སྤར(བསར)། མགོའི་གཡང་ངམ་རྟེན་སྤར་བས་མགོ་གཡང་སྤར(བསར)། ལོ་གསར་རྙིང་བརྗེ་སྤོར་བྱེད་པའམ་ལོ་གསར་བ་བསུ་རོལ་བྱེད་པ་ལ་ལོ་སྤར(བསར)། ལོ་གསར་སྤར(བསར)གིན་ཡོད། ལོ་སྐྱིད་པོ་ཞིག་སྤོར(བསར)ལ་ཤོག་ཟེར་བ་ལྟ་བུའོ། །སྤར་དང་སྤོར་ཡིག་ཁག་ཅིག་ལ་སྐབས་འགར་བསར་དང་བསོར་སྒྲ་ཐོན་ཚུལ་ནི། དཔེར་ན། མི་ཁ་དགོད་ཅན་ནམ་ཁ་མཚར་ཅན་ལ་སྤྲོ་མོ་ཟེར་ཡང་ངག་ཏུ་བསོར་མོ་ཞེས་པའི་གདངས་ཐོན་ཏེ། སྤྲོ་ཡི་མིང་གཞི་པ་དེ་སྔོན་འཇུག་བ་རུ་འཕོས་ཤིང་། མགོ་ཅན་ས་དེ་མིང་གཞིར་གྱུར་པ། ར་བཏགས་རྗེས་འཇུག་ཏུ་འཕོས་པ་བཅས་ལས་བསོར་དུ་གྱུར་པ་ཡིན། འགྲོས་དེ་དང་མཐུན་པར། ཁ་སྤུ་ལ་ཁ་བསུ། རྣ་སྐྱག་གི་མིང་ལ་རྣ་སྤ་ཞེས་པར་རྣ་བསའ། རྔ་སོགས་ལ་རླན་ཞད་འདྲེས་པའམ་ནེམ་ཞུགས་པའི་དོན་ལ་སྤབས་ཞེས་པར་བསབས། རྩམ་པ་རྙིངས་པའི་དོན་ལ་རྩམ་པ་སྤབས་ཞེས་པར་རྩམ་པ་བསབས། བླ་སྤང་ལ་བླ་བསང་། དྲི་ཆུ་འདོར་བའི་དོན་གྱི་ཆབ་སྤང་ལ་ཆབ་བསང་། རྐང་བའི་ཚིགས་སྤར་བ་ལ་ཚིགས་བསར། གནས་སྤོར་བ་ལ་གནས་བསོར། རས་སོགས་འཐགས་པའི་རྒྱུ་སྤུན་ལ་རྒྱུ་བསུན། སྤུན་ཟླ་ལ་བསུན་ཟླ། རྒྱུ་སྤུས་ལ་རྒྱུ་བསུས། མི་སྤུས་ལ་མྱི་བསུས། སྤེན་མ་ལ་བསེན་མ། གོམ་པ་སྤོས་ལ་གོམ་པ་བསོས། དཀར་ཡོལ་ནང་འབྲས་ཐུག་ཁ་སྤུངས་སུ་བཅུས་པ་ལ་ཁ་བསུངས་བཅུས་དང་། མགོ་སྤུངས་སུ་བཅུས་པ་ལ་མགོ་བསུངས་བཅུས་ཞེས་པའི་སྤུ་དང་སྤབས་སོགས་ཀྱང་རིམ་པ་བཞིན་བསུ་དང་བསའ་དང་བསབས་སོགས་ཀྱི་སྒྲ་རུ་གྱུར་པ་ཡིན། ཀན་ལྷོའི་བླ་བྲང་ཕྱོགས་ཀྱི་བསང་ཁོག་དང་བསང་ཆུ་ཞེས་པའི་ས་མིང་ཆུ་མིང་དེ་ཡང་། གནའ་སྔ་མོའི་དུས་སུ་སྤྱང་ཁོག་དང་སྤྱང་ཆུ་ཞེས་འབྲི་ཡང་རིམ་གྱིས་ཡ་བཏགས་བོར་ནས་སྤང་ཁོག་དང་སྤང་ཆུ་ཞེས་པར་གྱུར་ཅིང་། ཕྱིས་སུ་སྤང་གི་མིང་གཞི་པ་དེ་སྔོན་འཇུག་ཏུ་ཡར་འཕོས་ཤིང་། མགོ་ཅན་ས་དེ་མིང་གཞིར་བྱས་པ། རྗེས་འཇུག་སོར་འཇོག་བྱས་པ་བཅས་ལས་བསང་ཁོག་དང་བསང་ཆུ་ཞེས་པར་གྱུར་པ་ཡིན་པར་བཞེད། གཅན་གཟན་སྤྱང་ཁི་ཞེས་པའི་སྤྱང་ལ། ཨ་མདོའི་ཡུལ་ལ་ལའི་སྐད་དུ། སྤྱང་ཡིག་གི་ཡ་བཏགས་བོར་བའི་ཚུལ་དུ་སྤང་ཀིའམ་སྤང་ཁི་ཟེར་མོད། ཀན་སུའུ་དཔའ་རིས་རྫོང་གི་སྐད་དུ། སྤྱང་ཁི་ལ་བསང་ཁི་དང་། སྤྱང་ཁིའི་རྒྱུ་ལམ་ལ་བསང་ལམ་ཟེར་བས། སྤྱང་ཡིག་གི་ཡ་བཏགས་བོར་ནས་སྤང་དུ་གྱུར་རྗེས། ད་གཟོད་གོང་སྨོས་སྤྱི་འགྲོས་ལྟར་སྤང་དེ་བསང་དུ་གྱུར་པ་ཡིན། ཡུལ་དེ་གར་དང་པོར་ཀློག་སློབ་དུས་ནས་ས་པ་བཏགས་བསའ་ཞེས་ཁྲིད་ཟེར་བས་དཔྱད་གཞིའོ། །རྒྱུ་རྫས་བདག་པོ་ལ་སྤྲད་དང་སྤྲོད་ཅེས་པའི་སྤྲད་དང་སྤྲོད་ཀྱི་འདོགས་ཅན་བོར་ནས་སྤད་དང་སྤོད་ཀྱི་སྒྲ་ཐོན་ཅིང་། དེ་ནས་གོང་གསལ་ལྟར་སྤད་དང་སྤོད་ཀྱི་མིང་གཞི་པ་སྔོན་འཇུག་ཏུ་འཕོས་པས་བསད་དང་བསོད་བྱུང་བ་ཡིན། དཔེར་ན། ཁྲལ་བསྲད་དང་སྲོད་ཅེས་པ་ལ་ཁྲལ་ཧྲད་དང་ཧྲོད་ཅེས་པའི་གདངས་ཐོན་ལ། བསྲད་དང་སྲོད་ཀྱི་ར་བཏགས་བོར་ཏེ་བསད་དང་སོད་བྱུང་བས། དོམ་བསད་དང་སོད་ཅེས་པའི་གདངས་ཐོན་པ་ལྟ་བུ། མཚོ་སྔོན་གྱི་ཡུལ་འགའི་སྐད་དུ། མལ་ས་གཅིག་ལས་མི་འགའ་རེ་མགོ་ཡར་འཁོར་མར་འཁོར་གྱིས་འཚང་ཁ་བྱས་ཏེ་ཉལ་བའི་དོན་ལ། གཏད་སྤྲོད་བརྒྱབ་ཅེས་འབྲི་དགོས་ཀྱང་ངག་ཏུ་སྤྲོད་ཀྱི་ར་བཏགས་བོར་ནས་གཏད་སྤོད་བརྒྱབ་ཟེར། སི་ཁྲོན་གྱི་མཛོད་དགེ་དང་ཁྱུང་མཆུ་རྫོང་གི་སྐད་དུ། སྤྲད་དང་སྤྲོད་ཀྱི་མིང་གཞི་པ་བོར་ནས་མགོ་ཅན་ས་ལ་ར་བཏགས་སྦྱར་བའི་ཚུལ་གྱིས་སྲད་དང་སྲོད་ཀྱི་གདངས་ཐོན་ཕྱིར། གཏད་སྤྲོད་བརྒྱབ་ལ་གཏད་སྲོད་བརྒྱབ་ཟེར། དེ་ནི་ནམ་མཁའི་སྤྲིན་ལ་ནམ་མཁའི་བསྲིན་ཟེར་བ་དང་འགྲོས་མཚུངས། སི་ཁྲོན་རྔ་པ་རྫོང་དང་ཁྱུང་མཆུ་རྫོང་སོགས་ཀྱིས་སྤྲིན་གྱི་མིང་ལ་སྤིན་དང་། སྤྲེལ་གྱི་མིང་ལ་སྤེལ། སྤྲོ་ལ་སྤོ་ཟེར། ཡུལ་ལ་ལའི་སྐད་དུ། མེ་བཙའ་འཇོག་བྱེད་ཀྱི་རྒྱུ་སྤྲ་ཏོག་ལ་སྤ་ཏོག སྤྲང་པོ་ལ་སྤང་བོ། སྤྲུགས་ལ་སྤུགས། སྦྲུལ་ལ་སྦུལ་ཟེར་མཁན་ཚོས་དེའི་ར་བཏགས་བོར་བ་ཡིན་ལ། མཚོ་སྔོན་གྱི་མགོ་ལོག་དང་། ཀན་ལྷོའི་རྨ་ཆུ་རྫོང་སོགས་ཀྱིས། སྤྲ་ཏོག་ལ་དཔའ་ཏོག་གམ་དཔའ་ཐོག་དང་། སྤྲིན་ལ་དཔིན། སྤྲེལ་ལ་དཔེལ། ཁྲོ་བའི་དོན་གྱི་སྤོ་ལངས་ལ་དཔོ་ལངས་ཟེར་བས། དེ་དག་གིས་ས་པ་བཏགས་དཔའ་རུ་བཀླགས་པས་ཡིན། ཡ་མཚར་དགོས་པ་ཞིག་ལ། བེའུ་སྩེབས་མ་ཐག་བཞོས་པའི་འོ་མ་ཐོག་མའི་མིང་ལ་སྤྲི་ཞེས་པའི་སྐབས་སུ། ཨ་མདོའི་ཡུལ་བྱིངས་ལ་སྒྲ་གདངས་གཅིག་མཐུན་འབྱུང་བའི་སྐབས་ཀྱང་མཆིས། དཔེར་ན། འོ་སྤྲི་དང་། སྤྲི་མར། སྤྲི་ཞོ་ཟེར་བ་ལྟ་བུ། དུག་དང་བཟི་སྨན་སོགས་ཀྱིས་ལུས་ཀྱི་ཚོར་བ་ཉམས་སུ་བཅུག་པའི་དོན་གྱི་སྦྲིད་ཅེས་པ་ལ། མགོ་ལོག་སོགས་ཀྱི་སྐད་དུ། བིད་ཅེས་མགོ་འདོགས་གཉིས་བོར་ནས་མིང་གཞི་དང་དབྱངས། འཕུལ་བཅས་ཀྱི་སྒྲ་ལས་མི་ཐོན་པ་ལྟ་བུ། དེའི་སྐོར་སྦྲིད་ལེར་བཞོན་གྱི་སྐབས་སུ་གསལ།