རྒྱལ་ཡོངས་བོད་ཡིག་དཔེ་རྙིང་ལེགས་སྒྲིག་དང་ཞིབ་འཇུག་སྐོར་གྱི་མཐོ་རིམ་བགྲོ་གླེང་ཚོགས་འདུ་ཐེངས་དྲུག་པ་ལྷ་སར་འཚོགས།

       སྤྱི་ཟླ9ཚེས5ཉིན། རྒྱལ་ཡོངས་བོད་ཡིག་དཔེ་རྙིང་ལེགས་སྒྲིག་དང་ཞིབ་འཇུག་སྐོར་གྱི་མཐོ་རིམ་བགྲོ་གླེང་ཚོགས་འདུ་ཐེངས་དྲུག་པ་བོད་ལྗོངས་སློབ་ཆེན་དུ་འཚོགས་པ་དང་། དེའི་དམིགས་ཡུལ་ནི་བོད་ཡིག་དཔེ་རྙིང་སྲུང་སྐྱོབ་དང་ལེགས་སྒྲིག ཞིབ་འཇུག བེད་སྤྱོད་བཅས་བྱ་རྒྱུར་ཤུགས་སྣོན་བརྒྱབ་ནས་ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་གསར་གཏོད་རང་བཞིན་གྱི་བརྗེ་སྒྱུར་དང་གསར་སྐྲུན་རང་བཞིན་གྱི་གོང་འཕེལ་འགྲོ་རྒྱུར་སྐུལ་འདེད་གཏོང་ཆེད་ཡིན་པ་རེད།

       ཚོགས་འདུ་དེ་ནི་ཀྲུང་གོ་བོད་རིག་པ་ཞིབ་འཇུག་ལྟེ་གནས་ཚན་ཞིབ་ལས་སྒོ་གཞུང་ལས་ཁང་གིས་གཙོ་གཉེར་བྱས་པ་དང་། ཀྲུང་གོ་བོད་རིག་པ་ཞིབ་འཇུག་ལྟེ་གནས་ཀྱི་དཔེ་མཛོད་ཁང་དང་བོད་ལྗོངས་སློབ་ཆེན་གྱི་ཀྲུང་ཧྭ་མི་རིགས་གཅིག་མཐུན་ཚོགས་པའི་ཞིབ་འཇུག་ཁང་ནས་མཉམ་དུ་བསྒྲུབ་གཉེར་བྱས་པ་ཞིག་རེད། བོད་ལྗོངས་དང་བོད་འབྲེལ་ལས་དོན་གྱི་གཙོ་གནད་ཞིང་ཆེན་དང་། པེ་ཅིང་དང་། ཧྲང་ཧའེ། ནང་སོག ལེའོ་ཉིང་སོགས་ས་ཁུལ་གྱི་ཞིབ་འཇུག་ཚན་པ་དང་། དཔེ་རྙིང་ལེགས་སྒྲིག་ཚན་པ། དཔེ་མཛོད་ཁང་། མཐོ་སློབ་སོགས་འབྲེལ་ཡོད་ཚན་པ40ཙམ་གྱི་རིགས་གཅིག་མཁས་དང་ཞིབ་འཇུག་པ50ལྷག་ཙམ་ལྷ་སར་འཛོམས་ནས་བོད་ཡིག་དཔེ་རྙིང་སྲུང་སྐྱོབ་དང་རྒྱུན་འཛིན་བྱེད་པ་དང་། བོད་ཡིག་དཔེ་རྙིང་དང་མི་རིགས་ཁག་གི་མི་དམངས་བར་འགྲོ་འོང་དང་། སྤེལ་རེས། མཉམ་འདྲེས་བཅས་བྱེད་པའི་ལོ་རྒྱུས་ལ་ཞིབ་འཇུག་བྱེད་པ། བོད་ཡིག་དཔེ་རྙིང་གྲངས་གཞི་ཅན་དུ་འཛུགས་སྐྱོང་བྱེད་པ་སོགས་ཀྱི་བརྗོད་གཞིར་གཞིགས་ནས་གྲོས་བསྡུར་གཏིང་ཟབ་བྱས་ཡོད།

       གསར་འགོད་པས་ཤེས་རྟོགས་བྱས་པར་གཞིགས་ན། རྒྱལ་ཡོངས་བོད་ཡིག་དཔེ་རྙིང་ལེགས་སྒྲིག་དང་ཞིབ་འཇུག་སྐོར་གྱི་མཐོ་རིམ་ཚོགས་འདུ་དེ་སྤྱི་ལོ2017ལོ་ནས་ཚོགས་ཚུན། སྔ་རྗེས་སུ་མཚོ་སྔོན་དང་ལེའོ་ཉིང་། སི་ཁྲོན། ཀན་སུའུ། ཡུན་ནན་སོགས་ས་ཁུལ་དུ་ཐེངས་ལྔ་འཚོགས་ཏེ་རིགས་གཅིག་མཁས་པ་དང་ཞིབ་འཇུག་པ་ཚོར་བསམ་བློ་སྤེལ་རེས་དང་ཐུན་མོང་ངོས་འཛིན་གཅིག་སྡུད། མཉམ་ལས་ལ་ཤུགས་སྣོན་བཅས་བྱེད་པའི་སྟེགས་བུ་གལ་ཆེན་ཞིག་མཁོ་འདོན་བྱས་ཡོད།

       ཐེངས་འདིའི་ཚོགས་འདུར་ཁྱད་ཆོས་གསུམ་ལྡན་ཡོད་པ་སྟེ། དང་པོ། བོད་ཡིག་དཔེ་རྙིང་དང་མི་རིགས་ཁག་གི་མི་དམངས་བར་འགྲོ་འོང་དང་། སྤེལ་རེས། མཉམ་འདྲེས་བཅས་བྱེད་པའི་ལོ་རྒྱུས་ལ་ཞིབ་འཇུག་བྱེད་པའི་བརྗོད་གཞི་དེར་ཚད་མཐོའི་དོ་ཁུར་བྱས་པ་དང་། གཉིས་པ། བོད་ཡིག་དཔེ་རྙིང་གྲངས་གཞི་ཅན་དུ་འཛུགས་སྐྱོང་བྱེད་པ་སྟེ་དཔེ་རྙིང་ལས་དོན་གྱི་གཙོ་གནད་ཁྱབ་ཁོངས་དེར་འཚོལ་ཞིབ་ཧུར་ཐག་བྱས་པ། གསུམ་པ། ནང་དོན་ཕུན་སུམ་ཚོགས་ཤིང་གྲུབ་འབྲས་གཡུར་དུ་ཟ་བའི་ཐོག་ནས་དུས་རབས་གསར་པའི་བོད་ཡིག་དཔེ་རྙིང་ལེགས་སྒྲིག་དང་ཞིབ་འཇུག་བྱེད་པའི་ཁྱད་ཆོས་མངོན་པར་བྱས་པ་བཅས་རེད།

       ཐེངས་འདིའི་ཚོགས་འདུར་བརྗོད་གཙོའི་གཏམ་བཤད་ཚོགས་ར་གཅིག་དང་ཡན་ལག་གྲོས་བསྡུར་ཚོ་ཆུང་བཞི་བཀོད་སྒྲིག་བྱས་ཡོད། ཀྲུང་གོ་བོད་རིག་པ་ཞིབ་འཇུག་ལྟེ་གནས་དཔེ་མཛོད་ཁང་གི་འགོ་འཛིན་གཞོན་པ། ཞིབ་འཇུག་པ་གཞོན་པ་ཆེའུ་ཡའོ་ཧྭ་ཡིས་བརྗོད་གཙོའི་གཏམ་བཤད་ཚོགས་ར་གཙོ་སྐྱོང་གནང་བ་དང་། བོད་ལྗོངས་སློབ་ཆེན་དཔེ་རྙིང་ཞིབ་འཇུག་ཁང་གི་འགོ་འཛིན། ཞིབ་འཇུག་པ་ཤེས་རབ་བཟང་པོ་དང་། བོད་རང་སྐྱོང་ལྗོངས་དཔེ་རྙིང་སྲུང་སྐྱོབ་ལྟེ་གནས་ཀྱི་ཞིབ་འཇུག་པ་པད་མ་བཀྲ་ཤིས་སོགས་ཀྱིས་བརྗོད་དོན་གཏམ་བཤད་གནང་ཡོད། དེ་མིན་ཡན་ལག་གྲོས་བསྡུར་ཚོགས་འདུའི་ཐོག རིགས་གཅིག་མཁས་དབང་དང་ཤེས་ལྡན་པ40ལྷག་གིས་ཚོགས་འདུའི་བརྗོད་དོན་གཙོ་བོར་དམིགས་ནས་སྤེལ་རེས་དང་གྲོས་བསྡུར་གཏིང་ཟབ་གནང་ཡོད་པ་རེད།