ཨ་མདོའི་ཡུལ་སྐད་ལས་རྒྱུན་སྤྱོད་མིང་བརྡ་ཁག་ཅིག་གི་དོན་ཐོབ་ཡི་གེ་གང་ཡིན་སྐོར་གླེང་བ། ཁག་ལྔ་པ།

       འགྱལ།(བྱེད་མེད་ལས་ཚིག) ①ཉི་མ་ནུབ་རིའི་ཕག་ལ་ཡིབ་པའམ་ཡལ་བའི་དོན་ལ། ཨ་མདོའི་ཡུལ་སྐད་དུ། ཉི་མ་འགྱལ་ཟེར་ཞིང་། འགྱའ་ཞེས་པའི་གདངས་ཐོན། ཉི་མ་ནུབ་རིའི་ཕག་ལ་འགྱལ་ཐལ། ངེད་ཚང་ཉི་མ་ཚང་འགྱལ་ཡིན་ཟེར་བ་ལྟ་བུ། འགྱལ་ཅེས་པ་འགྱེལ་ཡིག་ལས་གྱེས་པ་ཡིན་ཚུལ་སྐོར། འགྱེལ་ནི་དྲང་མོར་བསླངས་པའི་དངོས་པོ་ཞིག་ཐང་ལ་ལོག་པའི་དོན་ཡིན་པས། ཉི་མ་འགྱལ་ཞེས་པ་དེ་ཡང་དོན་གྱིས་ཉི་མ་ནུབ་རིའི་ཕག་ལ་འགྱེལ་བའི་ཚུལ་དུ་ཕར་ལོག་པ་དང་ཆོས་མཚུངས་པའི་རྣམ་པས་ཐོགས་པ་ཞིག་ཡིན། དབྱངས་བོར་ཡང་དོན་མི་འབོར་བའི་གྱེས་བྱུང་གི་ཡི་གེ་མང་དུ་མཆིས་ཏེ། མེ་བསད་པའམ་བཏུལ་བའི་དོན་ལས་མེ་བཏལ་ཅེས་པ་བྱུང་ཞིང་། དུལ་ཡིག་ལས་དལ་ཡིག་བྱུང་བ། བུ་ག་བརྟོལ་ཞེས་པའི་བརྟོལ་ཡིག་ལས་བརྟལ་ཡིག་བྱུང་བ། བློ་གཏད་པའམ་ཡིད་འཁེལ་བའི་དོན་ལ་ཁོག་བརྟལ་དང་བརྟོལ་ཟེར་བ། སྒྲོབ་ཉམས་ཆེ་བའི་དོན་ལས་སྒྲབ་རྒྱགས་ཀྱི་སྒྲབ་ཡིག་བྱུང་བ། གྱོལ་བོ་ལས་གྱལ་ཙེ་གོམ་ཙེ་ཞེས་པའི་གྱལ་ཡིག་བྱུང་བ། བར་ཆོད་ཅེས་པ་ལས་བར་ཆད་དང་། འཆོལ་ཡིག་ལས་འཆལ་ཡིག་གྱེས་པ། རྒྱུ་མཚན་སྟོན་པའི་དོན་གྱི་སྟོབས་ཀྱིས་ཞེས་པ་ལས་སྟབས་ཀྱིས་བྱུང་བ་བཞིན་དུ་འགྱལ་དང་འགྱེལ་ཡང་གཅིག་ལས་གཅིག་གྱེས་སུ་བྱུང་བ་ཞིག་ཡིན། དེ་ལྟར་དུ་ཡལ་ཞེས་པ་དེ་ཡང་འགྱལ་ཡིག་གི་མིང་གཞི་ག་བོར་ཤུལ་གྱི་འདོགས་ཅན་ཡ་དང་རྗེས་འཇུག་ལ་གཉིས་ཀྱི་གདངས་ལས་མ་ཐོན་པས་ཡིན། མགོ་ལོག་གི་སྐད་དུ། ཉི་མ་འགྱལ་ཐལ་ཟེར། ཉི་མ་ལའི་ཕ་རོལ་ཏུ་འཛིར་སོང་ཞེས་པའི་དོན། ②དུས་གཟུར་བའམ་ཡོལ་བའི་དོན། ལོ་བསར་འགྱལ་རྗེས་མ་གཏོགས་ང་མི་ཁོམ། དོམ་དངུལ་སྟེར་བའི་ཉི་མ་འགྱལ་སོང་ཟེར་བ་ལྟ་བུ། ③རྙིང་བའམ་རྒས་པའི་དོན། མེ་ཏོག་འགྱལ་སོང་། ཡགས་འགྱལ་སོང་ཟེར་བ་ལྟ་བུ། ④མྱུར་བའམ་མགྱོགས་པའི་དོན། རྟ་གོམ་པ་ཅན་པོར་བཞོན་ཚེ་འགྱལ་འགྲོ་གིན། ཁོ་འདི་ནས་གན་ཞིག་ལ་འགྱལ་ཐལ་ཟེར་བ་ལྟ་བུ། ⑤ཚེ་ལས་འདས་པའམ་ཤི་སོང་བའི་དོན་གྱི་ཞེ་སའམ་གབ་མིང་སྟེ། མི་དེ་ན་ནིང་འགྱལ་སོང་ཟེར་བ་ལྟ་བུ།