ཨ་མདོའི་ཡུལ་སྐད་ལས་རྒྱུན་སྤྱོད་མིང་བརྡ་ཁག་ཅིག་གི་དོན་ཐོབ་ཡི་གེ་གང་ཡིན་སྐོར་གླེང་བ། ཁག་བདུན་པ།

       རྐོས་བཅོ་བྱིན། ཕ་རོལ་བ་ལ་འཆུན་ཕམ་བྱིན་པའམ་བརྙས་བཅོས་བྱས་པའི་དོན། དེ་རིང་ཁོས་ང་ལ་རྐོས་བཅོ་བྱིན་དེངས་ཟེར་བ་ལྟ་བུ། རྐོས་བཅོ་སྟེར་ཀྱང་ཟེར། རྐོས་ནི་སྙད་བརྐོའམ་སྙད་བརྐོས་ཞེས་པ་སྟེ། «སྒྲིག་ཁྲིམས་ཆེན་པོ་གསུམ་དང་དོ་སྣང་བྱེད་དགོས་པ་བརྒྱད»ལས། བརྒྱད་པ། བཟུང་དམག་ལ་བརྙས་བཅོས་བྱེད་མི་ཆོག ཅེས་པར། བཟུང་དམག་ལ་བསྙད་བརྐོ་མི་ཆོག ཅེས་བསྒྱུར་ཡོད་པ་ལྟ་བུ། བརྙས་བརྐོ་དང་བརྙས་མ་བརྐོ་ཞེས་ཀྱང་འབྱུང་སྟེ། «འབྲུག་པ་ཀུན་ལེགས་ཀྱི་རྣམ་ཐར»ལྡེབ༨༢པར། ཆུ་རབ་གང་འགྲོར་ཐོངས། རི་ཁྲོད་དུ་འདུག་པ་སྲིད་ན་བརྙས་མ་བརྐོ། ཁྱོད་སྙིང་རྗེ་ཆེ་བ་རྣམས་ཀྱིས་ལྟོ་བྱིན། ཞེས་འབྱུང་བ་ལྟ་བུ། «དག་ཡིག་གསར་བསྒྲིགས»ཀྱི་ལྡེབ༢༧༨པར། མི་ཉམ་ཐག་ལ་སྙད་མ་རྐོ། ཞེས་འབྱུང་བ་ལྟ་བུ། བཅོ་ནི་བཅའ་དང་བཅོས་ཀྱི་མ་འོངས་པ་སྟེ། བཅའ་རྒྱུའོ་བཅུ་གསུམ་བཅོས་ཟེར་བ་ལྟ་བུས་མཚོན།

       ལྐུག་ཤི ཕོ་གསར་ལ་ཆགས་སྤྱོད་ཀྱི་ནུས་པ་མེད་པའམ་ཕོ་མཚན་འཁར་རྒྱུ་མེད་པའི་དོན། ཀན་ལྷོའི་ཀླུ་ཆུ་རྫོང་གི་སྐད་དུ། ལྐུག་ཤི་ཞེས་གདངས་དག་པར་ཐོན་ཅིང་། ཨ་མདོའི་ཡུལ་སྐད་དུ། ཀུག་ཤི་ཞེས་པའི་གདངས་ཐོན། སི་ཁྲོན་མཛོད་དགེ་རྫོང་གི་ངག་རྒྱུན་དུ། ཀུག་ཤི(ལྐུག་ཤི)ལམ་སྟོང་ནས་འཁར་ཟེར་སྲོལ་མཆིས། ལྐུག་ལ་ཀུག་སྒྲ་ཐོན་ཚུལ་ནི་རྩེག་ཡིག་གི་མགོ་ཅན་བོར་ནས་མིང་གཞི་དང་དབྱངས་སོགས་ཀྱི་སྒྲ་ཙམ་ལས་མ་ཐོན་པས་ཡིན་ཏེ། སྟག་ལྷ་ལ་སྟག་ལ་དང་། གྱང་གླེགས་ལ་གྱང་ལེགས་ཟེར་བ་སོགས«ཨམ་སྐད་གསང་བཀྲོལ་ལྡེ་མིག»ཏུ་གསལ་བ་བཞིན་ནོ། །མགོ་ལོག་སོགས་ཀྱི་ཡུལ་སྡེ་མང་ཤོས་སུ། གཞོར་ལོ་མ་ཟེར་ཏེ། མ་མ་གཤམ་ལ་ནང་མེད། །ཀུ་ཤི་གཞོར་མགོར་རྒྱུད་མེད། །ཅེས་ཀྱང་ཟེར་སྲོལ་མཆིས། གུག་ཤི་ཡིན་ནམ་འདོད་མཁན་ཡང་མཆིས་པས་བརྟག་འཚལ།