ཨ་མདོའི་ཡུལ་སྐད་ལས་རྒྱུན་སྤྱོད་མིང་བརྡ་ཁག་ཅིག་གི་དོན་ཐོབ་ཡི་གེ་གང་ཡིན་སྐོར་གླེང་བ། ཁག་བཅུ་པ།

       བསྲུབས།(བྱེད་འབྲེལ་ལས་ཚིག་འདས་པ) ①དོན་དག་ཅིག་བསྒྲུབས་ཟིན་པའི་དོན། ཨ་མདོའི་ཡུལ་སྐད་དུ། ཧྲུབས་ཞེས་པའི་གདངས་ཐོན། ན་ནིང་གི་དོན་དག་དེ་ད་ལོར་བསྲུབས་ཁུལ་བྱས། བཅའ་བ་རིམ་གྲོ་བསྲུབས། འགན་ཁུར་བསྲུབས་ཚར་ཟེར་བ་ལྟ་བུའོ། །བསྲུབས་ནི་བསྒྲུབས་ཡིག་ལས་གྱེས་པ་ཡིན་ཏེ། བསྒྲུབས་ཀྱི་མིང་གཞི་ག་བོར་ནས་མགོ་ཅན་ས་ལ་འདོགས་ཅན་ར་དང་དབྱངས་ཞབས་ཀྱུ་གཉིས་ཞུགས་པའི་སྒྲ་ལས་མ་ཐོན་པས་ཡིན། མ་འོངས་པ་ལ་བསྲུབ་སྟེ། བསྲུབ་རྒྱུའི་བཅའ་བ། ད་ལྟ་བ་ལ་སྲུབ། བཅའ་བ་སྲུབ་ཀྱིན་ཡོད། སྐུལ་ཚིག་ལ་སྲུབས། བཅའ་བ་སྲུབས་ཤིག་ཟེར་བ་ལྟ་བུ། ②ཡིད་ཚིམས་པར་བྱས་པའམ་འདོད་པ་བསྐངས་པའི་དོན། ཁོས་ངའི་འདོད་པ་བསྲུབས། དཀའ་ཁག་བསྲུབས་ཟེར་བ་ལྟ་བུ། «དག་ཡིག་གསར་བསྒྲིགས»སུ། བསྲིབ།(བྱེད་འབྲེལ་ལས་ཚིག་མ་འོངས་པ) ལས་ཀ་ལྷག་འཕྲོ་མེད་པར་འགྲུབ་པ་སྟེ། ཉིན་གཅིག་གི་ལས་ཀ་ཉིན་ཕྱེད་ལ་བསྲིབ་དགོས། ཁང་བ་འདི་ནམ་ཞིག་ལ་བསྲིབ་ཐུབ་རྒྱུ་རེད་ལྟ་བུ། [བསྲིབས]ནི་འདས་པ་སྟེ། རང་འགན་བསྲིབས་ནས་གཞན་ལ་རོགས་བྱས་ལྟ་བུ། [སྲིབས]ནི་སྐུལ་ཚིག་སྟེ། ལས་ཀ་འདི་དེ་རིང་སྲིབས་ཤིག་ལྟ་བུ། ཞེས་བཀྲལ་ཡོད་པས། དཔྱད་གཞིར་དྲངས་པའོ། །
       ཨ་མདོའི་ཡུལ་སྐད་ཁྲོད་དུ། བོད་རང་གི་རྩམ་དྲི་མར་དྲིས་ཕྱུག་པའི་མིང་བརྡ་རྩ་ཆེན་མང་པོ་ཞིག་ཡོད་པ་རྣམས་ཕན་ཚུན་བར་བཀོལ་སྤྱོད་བྱས་ཚེ། བརྡ་མི་འཕྲོད་པའི་དཀའ་ངལ་ཅི་ཡང་མེད་མོད། འོན་ཀྱང་བརྡ་ཆད་དེ་རིགས་ལ་སྒྲ་དོན་དང་མཐུན་པར་ཡི་གེ་དག་མོ་ཇི་ལྟར་འབྲི་བར་དཀའ་ཁག་བྱུང་ཡོད་པས། ཁོ་བོས་ཨ་མདོའི་ཡུལ་སྐད་དང་ཡིག་སྐད་གཉིས་བར་གྱི་སྒྲ་གདངས་འགྱུར་ཁྱད་ཆེ་བའི་ཐད་ལ་ཞིབ་འཇུག་བྱ་དོན་ནི། དེ་གཉིས་བར་དུ་འབྲེལ་བ་ཇི་ལྟར་ཡོད་ལུགས་སྐོར་གྱི་གསང་གནད་དམ་ཆོས་ཉིད་དེ་ཤེས་ཆེད་ཡིན་པ་ལས། དོན་ཐོབ་ཀྱི་ཡི་གེ་རྣམས་བསྐྱུར་ནས་སྒྲ་ཐོབ་ཀྱི་ཡི་གེ་ལྟར་འབྲི་རུང་ཟེར་བ་མིན་པ་ནི་ཁོ་བོའི་ཐོག་མཐའ་བར་གསུམ་གྱི་ཨམ་སྐད་ཞིབ་འཇུག་གི་དམིགས་ཡུལ་དང་དགོས་པ་ཉག་ཅིག་ཡིན་ནོ། །