ཚེ་རིང་དོན་འགྲུབ་ཀྱིས་བཏབ་པའི་གློག་རྡུལ་ཚོང་ལས་སྐོར་གྱི་དྲིས་ལན།༣

དྲི་བ་འདོན་མཁན། བོད་ཡུལ་ཚོང་དོན་གྱི་ཚོགས་མི།
དྲིས་ལན་འདེབས་མཁན། དགེ་རྒན་ཆེན་མོ་ཚེ་རིང་དོན་འགྲུབ།
ས་གནས། བོད་ཡུལ་ཚོང་དོན་ཚོགས་པ།
ཡི་གེར་ཕབ་མཁན། བརྩེ་དུང་རྡོ་རྗེ།
     དྲི་བ་གསུམ་པ། ཉེ་རབས་བོད་ཀྱི་གློག་རྡུལ་ཚོང་ལས་ནི་ཇི་ལྟར་རྒྱ་བསྐྱེད་རྒྱུ་དང་། ཤེས་ཡོན་པ་ཚོས་དེའི་ཕྱོགས་ལ་ནུས་པ་ཇི་ལྟར་བཏོན་ནས་མི་རིགས་ཀྱི་དཔལ་འབྱོར་འཕེལ་རྒྱས་ཀྱི་གོམ་ཁ་ཆེས་མགྱོགས་པར་གཏོང་བར་ཐབས་ཤེས་ག་འདྲ་སྤྱོད་དགོས།
     ལན། ད་ངས་འདི་ནས་དྲྭ་གྲོགས་གསུམ་པའི་དྲི་བ་ལ་ལན་འདེབས་རྒྱུ་བྱེད། ཁོང་གི་དྲི་བ་དང་པོ་ནི་ཉེ་རབས་བོད་ཀྱི་གློག་རྡུལ་ཚོང་ལས་ཇི་ལྟར་རྒྱ་བསྐྱེད་དགོས་ཞེས་པ་དེ་རེད། དེའི་ལན་དུ་ཐོག་མར་ཅི་ཞིག་ལ་གློག་རྡུལ་ཚོང་ལས་ཟེར་བ་ལ་གོ་བ་ཕྱོགས་ཙམ་ཞིག་ལེན་པར་བྱེད། གློག་རྡུལ་ཚོང་ལས་ཞེས་པ་དེས་གཙོ་བོ་སྟོན་པ་ནི་གང་རེད་ཅེ་ན། དེ་ནི་ཉོ་མཁན་དང་བཙོང་མཁན་ཡོད་ཚད་ཀྱིས་དེང་རབས་ཚན་རིག་ལག་རྩལ་བེད་སྤྱད་དེ། དྲྭ་རྒྱ་དང་དྲྭ་ལམ་ལག་ཆ་བྱས་ནས་ཚོང་ལས་གཉེར་པའི་རིགས་ཤིག་ལ་གོ་དགོས། དེ་བས་གློག་རྡུལ་ཚོང་ལས་དང་སྲོལ་རྒྱུན་ཚོང་ལས་གཉིས་ཀའི་བར་ལ་མི་འདྲ་ས་མང་པོ་ཡོད། གློག་རྡུལ་ཚོང་ལས་ནི་སྲོལ་རྒྱུན་ཚོང་ལས་ཀྱི་ཁ་གསབ་ཞིག་རེད། ཡང་འགའ་ཞིག་གིས་གློག་རྡུལ་ཚོང་ལས་ཀྱིས་སྲོལ་རྒྱུན་ཚོང་ལས་ཀྱི་མགོ་རྟིང་སློགས་སོང་ཞེས་བཤད་ཀི་འདུག་ཀྱང་། ང་རང་ལྟ་བ་དེ་ལ་ཅུང་འཐད་ཀི་མེད། རྒྱུ་མཚན་དེ་གནས་སྐབས་འདི་ནས་མི་གླེང་བར་ཞུ།
     སྲོལ་རྒྱུན་ཚོང་ལས་ཞེས་པ་དེ་ནམ་རྒྱུན་ང་ཚོས་འཚོ་བའི་ནང་དུ་མཐོང་པ་བཞིན། ཉོ་མཁན་དང་བཙོང་མཁན་གཉིས་ཀ་གནས་གཅིག་ཏུ་འཛོམས་ནས་ཚོང་ཟོག་ཉོ་འཚོང་བྱེད་པ་དེ་རེད། གོ་རིམ་དེའི་ཁྲོད་ནས་ཉོ་མཁན་གྱིས་རང་གི་དབང་བོ་རྣམ་ལྔ་ལ་བརྟེན་ནས་ཚོང་ཟོག་དེས་རང་གི་འདོད་པ་སྐོང་ཐུབ་མིན་ལ་བརྡར་ཤ་གཅོད་དགོས། དེ་ནས་དངུལ་སྒོར་དང་ཚོང་ཟོག་གཉིས་ཀ་དུས་གཅིག་ཏུ་བརྗེ་རེས་བྱེད་པ་རང་ཡིན། རྗེས་སུ་ཉོ་བཙོང་མཁན་གཉིས་ཀ་གནས་གཅིག་ཏུ་འཛོམས་མེད་རུང་ཁོ་ཚོས་ཁ་པར་དང་འཕྲིན་ཡིག་སོགས་བརྒྱུད་ནས་ཉོ་འཚོང་བྱེད་བཞིན་པའང་ཡོད་མོད། སྐབས་དེར་ཉོ་མཁན་གྱིས་བཙོང་མཁན་གྱི་ཚོང་ཟོག་ལ་ཆ་རྒྱུས་ཡོད་པའི་རྨང་གཞིའི་སྟེང་ནས་ཕན་ཚུན་ཉོ་འཚོང་བྱེད་པ་ལས་གཞན། ཁོ་ཚོའི་བར་གྱི་བརྡ་སྤྲོད་ལག་ཆ་དེ་དེང་རབས་ལག་རྩལ་དྲྭ་རྒྱ་ལྟ་བུ་མིན་ཕྱིར། འདི་ལྟ་བུའི་ཚོང་ལས་ལ་སྔར་བཞིན་སྲོལ་རྒྱུན་ཚོང་ལས་ཞེས་འབོད་པ་ཡིན། འོན་ཀྱང་། གློག་རྡུལ་ཚོང་ལས་ཀྱི་སྐབས་སུ་ཉོ་མཁན་དང་བཙོང་མཁན་གཉིས་ཀས་དེང་རབས་དྲྭ་རྒྱའི་ལག་རྩལ་བཀོལ་སྤྱོད་བྱེད་དགོས་པ་དང་ཁོ་གཉིས་གནས་གཅིག་ཏུ་འཛོམས་མེད་པ་ཁོ་ཐག་ཡིན། དེ་མ་ཟད། གློག་རྡུལ་ཚོང་ལས་ཀྱི་སྐབས་སུ་ཉོ་མཁན་གྱིས་གཙོ་བོ་མིག་དང་རྣ་བ་ལ་བརྟེན་ནས་རང་གིས་ཉོ་བ་ཡིན་མིན་བརྡར་ཤ་གཅོད་པ་དེ་འདྲ་ཞིག་རེད།
     གློག་རྡུལ་ཚོང་ལས་ཀྱི་སྐབས་སུ་ཚོང་ཟོག་དང་དངུལ་སྒོར་དུས་གཅིག་དུ་ཐད་ཀར་བརྗེ་རེས་བྱེད་པའི་ངེས་པ་ཡོད་མ་རེད། དེ་ལའང་སྣ་ཁ་གཉིས་ཡོད། དང་པོ་ནི། གློག་རྡུལ་ཚོང་ལས་ཀྱི་སྐབས་སུ་ཐོག་མར་ཉོ་མཁན་གྱིས་བཙོང་མཁན་ལ་དངུལ་སྒོར་ཐད་ཀར་ཕར་སྤྲོད་དགོས།  དེ་ནས་བཙོང་མཁན་གྱིས་བར་བ་བརྒྱུད་ནས་དངོས་པོ་བསྐུར་ཡོང་། ཉོ་མཁན་གྱིས་དངོས་པོ་རང་གི་ལག་ཏུ་འབྱོར་རྗེས། དབང་པོ་རྣམ་ལྔ་ལ་བརྟེན་ནས་ཚོང་ཟོག་གང་དེའི་རང་གི་འདོད་པ་སྐོང་ཐུབ་མིན་ཐག་གཅོད་བྱེད་དགོས། གལ་ཏེ་སྐོང་མ་ཐུབ་པ་ཡིན་ན། ཕྱིར་འཁོར་ནས་ཚོང་ཟོག་གང་དེ་བཙོང་མཁན་ལ་བསྐུར་རྒྱུ་རེད། དེ་ནས་བཙོང་མཁན་གྱིས་ཀྱང་དངུལ་སྒོར་ཕྱིར་ཉོ་མཁན་ལ་སྤྲོད་དགོས་པ་རེད། སྐབས་དེར། ཚོང་ཟོག་བསྐུར་བ་དང་དངུལ་སྒོར་ཕྱིར་སྤྲོད་པ་སོགས་ལས་དུས་ཚོད་མང་པོ་ཞིག་འགོར་འགྲོ། སྤྱིར་བཏང་ཡིན་ན་ཉིན་བཅུ་ལྷག་ཞིག་འགོར་རྒྱུ་རེད། དེའི་བར་གྱི་དུས་ཚོད་ནི་གཙོ་བོ་ཉོ་མཁན་དང་བཙོང་མཁན་གཉིས་ཀའི་བར་ཐག་ལ་རག་ལས་ཀི དེ་ནས་ཤེས་ཐུབ་པ་གང་རེད་ཅེ་ན། ཚོང་ཟོག་དང་དངུལ་སྒོར་དུས་གཅིག་ཏུ་བརྗེ་རེས་བྱེད་ཐུབ་མེད་པ་དེ་མཚོན་ཀི གཉིས་པ་ནི། གློག་རྡུལ་ཚོང་ལས་ཀྱི་སྐབས་སུ་ཉོ་མཁན་དང་བཙོང་མཁན་གཉིས་ཀའི་བར་ན་བར་བའམ་ཕྱོགས་གསུམ་པ་ཞེས་པ་ཞིག་ཡོད། ཉོ་འཚོང་གི་སྐབས་སུ་ཉོ་མཁན་གྱིས་ཐོག་མར་དངུལ་སྒོར་དེ་བར་བ་ལ་སྤྲོད་དགོས་པ་རེད། དེ་ནས་བར་བས་བཙོང་མཁན་ལ་ཚོང་ཟོག་ཉོས་ཟིན་པའི་བཀའ་གཏོང་རྒྱུ་རེད། དེ་ནས་བཙོང་མཁན་གྱིས་ཉོ་མཁན་ལ་ཚོང་ཟོག་བསྐུར་ཡོང་རྒྱུ་རེད། ཉོ་མཁན་གྱིས་ཚོང་ཟོག་དེ་རང་ལ་མཁོ་བའི་ཚོང་རྫས་ཡིན་མིན་ཐག་གཅོད་བྱེད་རྒྱུ་རེད། གལ་ཏེ་ཚོང་ཟོག་ལ་སྐྱོན་ཡོད་པ་ཡིན་ན་ཕྱིར་བཙོང་མཁན་ལ་སྐུར་རྒྱུ་རེད། དེ་ལས་ལྡོག་སྟེ་རང་གི་བློ་ལ་འབབས་པ་ཞིག་ཡིན་ན་ཚོང་ཟོག་ཉོས་པ་ཡིན་ཞེས་བར་བ་ལ་བརྡ་གཏོང་ཀི་རེད། བར་བས་དེ་མ་ཐག་ཉོ་མཁན་གྱི་ཚབ་བྱས་ཏེ་དངུལ་སྒོར་དེ་བཙོང་མཁན་ལ་སྤྲོད་རྒྱུ་རེད། གོ་རིམ་འདིའི་ཁྲོད་ནས་ཀྱང་ཚོང་ཟོག་དང་དངུལ་སྒོར་གཉིས་ཀ་དུས་གཅིག་ཏུ་བརྗེ་རེས་བྱེད་ཐུབ་ཀི་ཡོད་པ་མ་རེད།
     ཡང་ལ་ལ་ཞིག་གིས“གློག་རྡུལ་ཚོང་ལས་སྐབས་སུ་ཕ་རོལ་བས་མགོ་སྐོར་བཏང་སོང་ན་ག་རེ་བྱེད་དགོས་སམ”ཞེས་བསམ་ན་ཐང་། དོན་དངོས་སུ། གློག་རྡུལ་ཚོང་ལས་སྐབས་ཉོ་མཁན་དང་འཚོང་མཁན་ཚང་མས་དངུལ་ཁང་གི་མ་ལག་བརྒྱུད་ནས་དངུལ་སྒོར་གཏོང་ལེན་བྱེད་དགོས་པ་དང་། ད་དུང་མྱུར་སྐྱེལ་སྤྱི་གཉེར་ཁང་ཞེས་རྒྱ་སྐད་ནས快递公司ཞེས་པ་ཞིག་བརྒྱུད་ནས་ཚོང་ཟོག་དེ་སྐྱེལ་སྤྲོད་བྱེད་ཀི་ཡོད་པས། ཕན་ཚུན་ལ་མགོ་སྐོར་གཏོང་བའི་གོ་སྐབས་དེ་འདྲ་ཡོད་མ་རེད། ད་སྔོན་ཡན་ཆད་འདི་ལ་གློག་རྡུལ་ཚོང་ལས་གྱི་ཉོ་མཁན་ལ་མགོ་སྐོར་ཐེབས་སོང་ཞེས་པའི་གནས་ཚུལ་མང་པོ་གོ་མ་སོང་། ཚོང་ཟོག་སྐྱེལ་སྤྲོད་ཁྲོད། མྱུར་སྐྱེལ་སྤྱི་གཉེར་ཁང་གིས་ཚོང་ཟོག་ཐོག་ན་བྲིས་ཡོད་པའི་ཉོ་མཁན་གྱི་སྡོད་གནས་དང་ཉོ་མཁན་གྱི་ཁ་པར་ཨང་གྲངས་ལ་བརྟེན་ནས་ཉོ་མཁན་ལ་ཚོང་ཟོག་སྤྲོད་རྒྱུ་རེད། སྐབས་དེར་ཉོ་མཁན་གྱིས་ཚོང་ཟོག་འབྱོར་ཟིན་པའི་གན་རྒྱའི་ཐོག་ལ་མིང་བཀོད་ནས་ཚོང་ཟོག་འབྱོར་སོང་བ་ར་སྤྲོད་བྱེད་དགོས་པ་ཡིན། གོ་རིམ་དེ་ཧ་ཅང་ཚགས་དམ་པོ་ཡིན་པའི་རྐྱེན་གྱིས་ཕན་ཚུན་ལ་མགོ་སྐོར་གཏོང་བའི་གོ་སྐབས་ཡོད་པ་མ་རེད།