དཀར་མཛེས་རྟའུ་རྫོང་དབའ་ཞབས་ཤང་གི་འགྱུར་མེད་རྡོ་རྗེའི་གནས་ཚུལ་རགས་བཀོད།

འགྱུར་མེད་རྡོ་རྗེ།

       སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་གྱི་རྟའུ་རྫོང་གི་ཤང་གྲོང་སྲིད་གཞུང་ཡོད་ཚད་ལ་ཟ་མ་མཉམ་ཟ་བྱེད་སའི་ཟ་ཁང་ཆུང་ཆུང་རེ་ཡོད། ཟ་ཁང་གི་སྤྱོད་ནུས་ཟ་མ་བཟོ་ས་མ་ཟད། ད་རུང་ཟ་ཁང་དུ་ཚ་ལྷང་ངེར་ཡིན་སྟབས་ཤང་གི་དངོས་གཞི་མིན་པའི་ཚོགས་འདུ་འཚོགས་ས་དང་འགྲུལ་པར་སྣེ་ལེན་བྱེད་ས་བྱས་ན་མ་གཏོགས་གཞན་པའི་ཁང་པ་ཚང་མ་འཁྱགས་དོང་ལྟར་གྲང་མོ་ཡིན་པ་རེད། ཡུལ་དེའི་གནམ་གཤིས་གོར་ཐིག་མན་གྱི་ཏུའུ་གྲངས27-28ལ་སླེབས་ནའང་དྲོད་གསོ་སྒྲིག་ཆས་མེད་པ་རེད།
        འགྱུར་མེད་རྡོ་རྗེ་ནི་རྫོང་དེའི་ལུང་བསྟན་ཤང་གི་ཤང་ཀྲང་བྱེད་མྱོང་། ཁོ་རང་ལོ་ན30ལྷག་ལས་མེད་ནའང་ལུས་པོ་དེ་ཙམ་ཡག་པོ་མ་ཡིན། ཁོ་རང་ལོ་མང་པོ་རིང་ཕལ་ཆེར་རི་འགོར་ལས་དོན་སྒྲུབ་སར་འགྲོ་བཞིན་ཡོད། ལས་རོགས་བྱེད་མྱོང་བའི་རོགས་པ་ཚོས་འགྱུར་མེད་རྡོ་རྗེས་ནམ་ཡང་བོད་པའི་ཟ་ཁང་ནང་གི་གྱང་ངོས་ཀྱི་འཛེར་མའི་ཐོག་སྨན་ཆུའི་ཁུག་མ་དེ་ཡར་འཕྱངས་ནས་མེར་སྲོ་ཞོར་དུ་ཚོགས་འདུ་ཚོགས་ཟེར་ནས་འབོད་པ་རེད། ཁོ་ལ་མཚོན་ན་ལས་རོགས་ཚོ་དང་མཉམ་དུ་མེ་ཐབས་ཀྱི་ཟུར་དུ་གནམ་ཁབ་རྒྱག་ཞོར་དུ་ཚོགས་འདུ་འཚོགས་ཆོག་པ་ནི་ཐོབ་དཀའ་བའི་བདེ་སྐྱིད་ཀྱི་ཉིན་མོ་ཞིག་ཏུ་སྙམ་གྱི་ཡོད། ས་བབ་མཐོ་ཞིང་གྲང་ངར་ཆེ་བའི་ཆ་སྙོམས་སུ་མཚོ་ངོས་མཐོ་ཚད་ལ་སྨི3600ལ་སླེབས་པའི་ས་ཆ་དེར་འགྱུར་མེད་རྡོ་རྗེས་འགན་བཞེས་མ་ཐག་དཀའ་གནད་ཆེ་བའི་ལས་ཀ་དང་འཕྲད་པ་རེད། བོད་ཁུལ་གྱི་འབྲོག་མི་ཚོའི་རྩྭར་ཆུ་བསྙེགས་ནས་རུ་སྤོ་ཕྱུགས་འཚོའི་འཚོ་བ་རོལ་སྟངས་དེ་ལོ་ངོ་སྟོང་ལ་བརྒལ་ཡོད་མོད། ཡིན་ནའང་གནས་སྤོ་ཕྱུགས་འཚོ་བྱེད་པའི་འཚོ་བས་མི་རྒན་ཚོས་ནད་སྟོན་དཀའ་བ་དང་ཕྲུ་གུ་སློབ་གྲྭར་འགྲོ་དཀའ་བ། འབྲོག་མི་ཚོས་སྲིད་གཞུང་གིས་མཁོ་འདོན་བྱས་པའི་སྤྱི་བའི་ཞབས་ཞུའང་ལོངས་སུ་སྤྱོད་དཀའ་བ་རེད། སྲིད་གཞུང་གིས་འབྲོག་པའི་གཞིས་ཆགས་བྱ་ཡུལ་བསྐྲུན་པའི་ལས་ཀ་དེ་ནི་དམངས་འཚོའི་ལས་གྲྭ་ཆེན་པོ་ཞིག་དང་དོན་ཆེན་ཞིག་ཡིན། རེད་དེ་གནས་སྤོ་ཕྱུགས་འཚོའི་འཚོ་བར་གོམས་གཤིས་ཆགས་ཟིན་སྟབས། དུད་ཚང་རེར་ཁ་གསབ་རོགས་དངུལ་སྒོར་ཁྲི་གཉིས་གསུམ་ཙམ་གྱི་གཟིགས་སྐྱོང་ཆ་རྐྱེན་ཡོད་ཀྱང་གཞིས་ཆགས་རྒྱུར་དེ་ཙམ་དང་ལེན་བྱེད་དཀའ་བ། འགྱུར་མེད་རྡོ་རྗེ་དེ་ནས་རི་འགོར་དུད་ཚང་རེ་རེ་བཞིན་ལ་བསམ་བློའི་སློབ་གསོ་རྒྱག་སར་ཕྱིན་འགོ་ཚུགས་པ་རེད།
 

        རྫོང་དེའི་ལུང་བསྟན་ཤང་གཅིག་པུར་གཞི་ཁྱོན་སྤྱི་ལེ་གྲུ་བཞི་མ380ཡོད། ཁོ་རང་རླངས་འཁོར་ལ་བསྡད་ནས་འགྲོ་ལམ་མེད་སྐབས་འཕྲུལ་རྟ་བཞོན་པ་དང་། འཕྲུལ་རྟ་གཏོང་ཐབས་མེད་སར་རྟ་བཞོན་ནས་འགྲོ་བ། རྟ་ཐོག་ནས་འགྲོ་མི་ཐུབ་པའི་སྐབས་རྟ་ཁྲིད་ནས་འགྲོ་བ། ཁོས་དུད་ཚང་རེ་རེ་བཞིན་སྲིད་ཇུས་ཡག་པོ་དེ་འདྲ་ཡོད་འདུག་ཁྱོད་ཚོས་དེ་འདྲའི་གོ་སྐབས་བཟང་པོ་ཤོར་ཉན་མ་རེད། གཞིས་ཆགས་བྱ་ཡུལ་དུ་ཕྱིན་ན་ལེགས་ཚུལ་གྱི་བསླབ་བྱ་ཡང་ཡང་བཏང་བ་རེད། ཁོང་གིས་ངང་རིང་ཞིབ་ཚགས་ཀྱིས་བསླབ་བྱ་བརྒྱབ་སྟབས་འབྲོག་མི་ཚོ་མཐར་སྡོད་ཁང་གསར་པའི་ནང་བསུ་ཐུབ་པ་རེད། དྭངས་ཞིང་གཙང་བའི་སྡོད་ཁང་གསར་པའི་ནང་ཁྱིམ་ཆས་སྤོས་ཟིན་པ་དང་ཁོར་ཡུག་སྲུང་སྐྱོང་གི་སྤྱོད་ཁང་ཡང་སྒྲིག་སྦྱོར་བྱས་ཡོད། འགྱུར་མེད་རྡོ་རྗེས་གདོང་ལ་རྔུལ་ཆུ་ཟགས་ཞོར་ཁྱིམ་ཆས་སྤོ་རོགས་བྱེད་པར་བྲེལ་བཞིན་ཡོད། སྡོད་ཁང་གསར་པའི་ནང་སྤོས་ཟིན་པའི་འབྲོག་མི་ཚོས་འཚོ་བ་གསར་པ་རོལ་ནས་དགའ་སྤྲོའི་རྣམ་པ་རབ་ཏུ་ཁེངས། འབྲོག་པའི་ཕྲུ་གུ་མི་ཉུང་བ་སློབ་གྲྭར་ཕྱིན་ནས་ཤང་གི་ལོ་ན་རེན་པའི་ཕྲུ་གུ་སློབ་ཆུང་སློབ་གྲྭར་ཞུགས་ཚད་མཐོ་རུ་ཕྱིན་ནས་སློབ་མ་བརྒྱ་ཙམ་འཕར་སྣོན་བྱུང་ཡོད་པ་རེད། མཐོ་སྒང་འབྲོག་ཁུལ་གྱི་བུ་ཕྲུག་ཚོའི་ཁྱིམ་གཞིས་ཐར་ཐོར་དུ་གནས་ཡོད་སྟབས། འབྲོག་ཁུལ་གྱི་སློབ་གྲྭས་ཁྱིམ་བདག་གི་ཚོགས་འདུ་ཞིག་ཚོགས་དགོས་བསམ་ནའང་ལས་སླ་མོ་མ་རེད། སློབ་གཙོས་འགྱུར་མེད་རྡོ་རྗེ་བཙལ་ནས་དཀའ་གནད་དེ་ཞུས་ཏེ་འགྱུར་མེད་རྡོ་རྗེས་སྐད་བསྐུར་རོགས་བྱས། གཟའ་འཁོར་གཅིག་འགོར་རྗེས་ཤང་གི་ལྟེ་བའི་སློབ་ཆུང་དུ་སྔོན་བྱུང་མ་མྱོང་བའི་གཞི་ཁྱོན་ལྡན་པའི་ཁྱིམ་བདག་གི་ཚོགས་འདུ་ཞིག་འཚོགས་ནས་ཁྱིམ་བདག་ཡོད་ཚད་སླེབས་པ་རེད།
        འབྲོག་མིས་རྩྭ་ས་སྤོ་དུས་ངེས་པར་དུ་ཆུ་བོ་ཞིག་བརྒལ་དགོས། ཆུ་བོའི་ཞེང་ཚད་ལ་སྨི་བཅོ་ལྔ་ནས་བཅུ་དྲུག་ཙམ་ཡོད་པས། འབྲོག་མིའི་ཐོན་སྐྱེད་དང་འཚོ་བར་ཧ་ཅང་སྟབས་མི་བདེ་ཞིང་། དེར་བརྟེན་འགྱུར་མེད་རྡོ་རྗེས་ཡང་ཁོ་ཚོ་ལ་ཟམ་པ་བསྐྲུན་རོགས་དང་ལམ་ལས་རོགས་བྱས་ནས་མི་སེར་གྱི་ཐོན་སྐྱེད་དང་འཚོ་བ་ལ་སྟབས་བདེ་སྤྲད་ནས་ལམ་ཀྱག་ཀྱོག་མང་པོ་འགྲོ་མི་དགོས་པར་བྱས། ད་ལྟ་ཁོས་བསྒྲུབས་པའི་ལས་ཀ་དེ་དག་ཕྱིར་དྲན་བྱེད་དུས་མི་མང་པོས་ཕར་བལྟས་ན་དོན་དག་ཆུང་ཆུང་ཡིན་པ་འདྲ། ཡིན་ཡང་མི་སེར་ཚོ་ལ་མཚོན་ན་དེ་ཚང་མ་གནམ་ས་འགོངས་པའི་ལས་ཆེན་པོ་རེད་ཅེས་བཤད། འབྲོག་མི་ལ་ཆ་བཞག་ན་རྩྭ་ར་ནི་ཁོ་ཚོའི་ཚེ་སྲོག་དང་ནོར་ཕྱུགས་ཀྱི་སྲོག་རྩ་ཡིན། སྐབས་འགར་མཚན་གུང་ལ་ཁ་པར་བརྒྱབ་ཡོང་ན། གཉིད་དུ་ཡུར་བའི་ཤང་གི་ལས་བྱེད་པ་ཚོ་དེ་མུར་མལ་ལས་ལངས་ཏེ་དོན་རྐྱེན་བྱུང་ཡུལ་དུ་འགྲོ་དགོས་ཀྱི་ཡོད། གལ་སྲིད་དུས་ཡུན་ཅུང་འགོར་སོང་ན། འབྲོག་མི་ཚོས་བདེ་འཇགས་ཀྱི་དོན་རྐྱེན་དང་ཐ་ན་ཉེས་དོན་གྱི་གྱོད་གཞི་སློང་སྲིད་ངེས་རེད། རྩྭ་སའི་དོན་དུ་སྐབས་འགར་མི་འགའ་རེས་རྩྭ་ར་སྐོར་དུས་ཐ་ན་གཞན་གྱི་རྩྭ་ར་ཡང་རང་གི་རྩྭ་རའི་ཁོངས་སུ་ལྕགས་སྐུད་ཀྱིས་བསྐོར་ར་བརྒྱབ་པའི་རྐྱེན་གྱིས་ཤང་ཀྲང་འགྱུར་མེད་རྡོ་རྗེས་འབྲོག་མི་དེ་ཚོ་ལ་བསླབ་བྱ་བཏང་བར་མ་ཟད། དཀའ་ངལ་ཁྱད་བསད་བྱས་ནས་གཟའ་འཁོར་གཅིག་རིང་ལས་བྱེད་པ་ཚོ་སྣེ་ཁྲིད་དེ་ཤང་ཡོངས་ཀྱི་རྩྭ་ཐང་དུ་ལྕགས་སྐུད་དེ་ཚོ་ཚང་མ་མེད་པར་བཟོས། འགྱུར་མེད་རྡོ་རྗེ་ནམ་ཡང་མགོ་ན་བཞིན་ཡོད་ལ། ཤང་སྨན་ཁང་གི་སྨན་པས་སྐབས་འགར་ཁོ་ལ་ཁྲག་ཤུགས་འཇལ་རོགས་བྱེད་སྐབས་ཁོའི་ཁྲག་ཤུགས་མཐོན་པོ220ལ་སླེབས་ནའང་ད་རུང་ས་ཁད་མཐོན་པོ་དེ་འདྲར་ལས་ཀ་སྒྲུབ་ནས་སྡོད་ཅིང་། དུས་རྒྱུན་ཁོ་རང་གི་བཟའ་ཟླ་དང་རྒྱང་ཐག་སྤྱི་ལེ་བཅུ་ལྷག་ཡོད་སའི་ཤང་གྲོང་མི་འདྲ་ས་གཉིས་ལ་ལས་དོན་བསྒྲུབས་ནས་ཡུན་རིང་ཐུགས་ཐབས་མེད། གཟའ་ཟླས་ཁོའི་རོགས་པ་བྱས་ནས་ཁྲེང་ཏུའུ་ལ་ནད་བསྟན་སར་ཕྱིན་པའི་དུས་ཡུན་དེ་ནི་ཁོང་གཉིས་མཉམ་དུ་ཡོད་པའི་དུས་ཚོད་ཆེས་རིང་ཤོས་ཤིག་ཡིན་ལ་ཁྱོན་བསྡོམས་ཉིན་བཅུ་ཁ་ཤས་སྡོད་མྱོང་ཟེར། འགྱུར་མེད་རྡོ་རྗེ་རྟའུ་རུ་ཡོད་པའི་རང་གི་ཕ་མའི་ཁྱིམ་དུ་ལོག་ཡོང་སྐབས། ཕ་མས་ང་ཚོ་ལོ་ན་ཤིན་ཏུ་རྒས་པར་ད་རུང་ལྟ་བར་མི་ཡོང་བ་ཅི་ཡིན་ཟེར་ནས་གཤེ་གཤེ་གཏོང་བཞིན་པ་རེད། ཁོང་གིས་དྲང་གཏམ་བཤད་ནས་ལས་ཀ་བྲེལ་ནས་ང་རང་ངོ་མ་དཀའ་འདུག་ཅེས་བཤད། གྲོང་རྡལ་ནི་རྒྱལ་ཁབ་ཀྱི་ཆེས་རྨང་གཞིའི་སྲིད་གཞུང་ཡིན། བོད་ཁུལ་གྱི་གཞི་རིམ་ལས་བྱེད་པས་སྲིད་ཇུས་ཀྱི་ནང་དོན་གཞི་རིམ་གྱི་སྲིད་གཞུང་ཚང་མར་སྐྱེལ་དགོས་རྒྱུ་དེ་ནི་རྒྱ་ཡུལ་གྱི་ལས་བྱེད་པ་ལས་དེ་བས་མང་བའི་ལས་མང་པོ་དོ་དམ་བྱེད་དགོས་པ། བོད་རིགས་མི་སེར་མང་པོས་ཐོབ་ཐང་ལག་ཁྱེར་གྱི་གལ་ཆེ་བའི་རང་བཞིན་མི་ཤེས་པའི་རྐྱེན་གྱིས་ལག་ཁྱེར་གང་མོས་སུ་བཞག་པ་དང་མི་ཁ་ཤས་ཀྱིས་ཐོབ་ཐང་ལག་ཁྱེར་ལེན་དུ་མི་འགྲོ་བ། དེ་འདྲའི་དོན་ཆུང་ནི་འགྱུར་མེད་རྡོ་རྗེས་སེམས་ནང་བཞག་པ། ཁོས་ལས་ཁུངས་སོ་སོ་ནས་བུ་སྐྱེ་ཆོག་འཐུས་ལག་ཁྱེར་དང་གཉེན་སྒྲིག་ལག་ཁྱེར། ཐོབ་ཐང་ལག་ཁྱེར། ཁྱིམ་ཐོ་སོགས་ཀྱི་ལག་ཁྱེར་བསྒྲུབས་རྗེས་སྦག་སྦག་འཁོར་ལོར་བཞོན་ནས་འབྲོག་པ་མང་ཚོགས་ཀྱི་ལག་ཏུ་སྤྲད་པ་དང་ཉར་ཚགས་ཡག་པོ་བྱེད་དགོས་ཚུལ་བཤད། ད་ལྟའང་མི་ཁ་ཤས་ཀྱིས་འགྱུར་མེད་རྡོ་རྗེ་སྦག་སྦག་འཁོར་ལོར་བཞོན་ནས་སྤྱི་ལེ་བཅུ་ལྷག་ཏུ་འབྲོག་པ་དུད་ཚང་ལ་ཁྱིམ་ཐོ་སྐྱེལ་བའི་གནས་ཚུལ་ཡོཔ་པར་བཤད། འགྱུར་མེད་རྡོ་རྗེས་ཤང་ནང་གི་ས་བོན་དང་རྫས་འགྱུར་ལུད་དོ་དམ་དང་། རྒྱལ་ཁབ་ཀྱིས་སྤྲད་པའི་ཁ་གསབ་མ་དངུལ་དུད་ཚང་རེ་རེ་དང་མི་སེར་གྱི་ལག་དུ་སྤྲོད་པ། ཕག་ཕྲུག་དུད་ཚང་ལ་སྐྱེལ་བ། ལམ་ལས་སའི་ཨར་འདམ་བརྩོན་ལེན་སོགས་ཀྱི་ལས་ཀ་ཚང་མའང་རང་གིས་ལས་པ་རེད། བརྩོན་ལེན་བྱས་པའི་ལམ་ལས་སའི་ཨར་འདམ་ཏུན12ལས་མེད་ནའང་ཁོ་ཐེངས་ལྔ་ལྷག་འབྲེལ་བ་བྱེད་སར་འགྲོ་བ་དང་། གནས་སྤོའི་འབྲོག་པ་མང་ཚོགས་ལ་སྔོ་ཚལ་དང་ལོ་ཏོག་འདེབས་འཛུགས་བྱེད་ཚུལ་སློབ་ཁྲིད་བྱེད་ཅིང་། སྔོན་མ་རྨོ་ལས་གཏན་ནས་སྒྲུབ་མ་མྱོང་བའི་འབྲོག་ཁུལ་གྱི་ཟོག་གཉའ་ཕབ་ནས་ཞིང་རྨོ་རོགས་བྱེད་པ། ཁོས་ད་དུང་རང་གི་འབྲོག་སྐད་དང་རྒྱ་སྐད་ཤེས་པའི་དགེ་མཚན་སྤྱད་ནས་འབྲོག་པ་མང་ཚོགས་ལ་སྐད་བསྒྱུར་བྱེད་རོགས་དང་། སྨི་གྲུ་བཞི་མ་བརྒྱ་ཕྲག་ཁ་ཤས་ཀྱི་ནགས་ཚལ་དང་རྩྭ་ཐང་ལ་མེ་སྐྱོན་མི་འབྱུང་བར་ཁག་ཐེག་བྱེད་ཆེད། མེ་འགོག་བདེ་འཇགས་ཀྱི་ལས་ཀར་མཐོང་ཆེན་ཆེན་པོ་བྱེད་ལ། འགྲིམ་འགྲུལ་བདེ་འཇགས་ཐད་ཁོས་རྒྱུན་དུ་མི་སེར་དང་ཁྱད་པར་དུ་སྦག་སྦག་འཁོར་ལོར་ཞོན་མཁན་ལ་འགྲིམ་འགྲུལ་བདེ་འཇགས་ལ་དོ་སྣང་བྱ་དགོས་རྒྱུའི་བསླབ་བྱ་གནང་། སློབ་གྲྭར་མི་འགྲོ་བའི་བུ་ཕྲུག་ཡོད་དུས་ཁོས་བུ་ཕྲུག་དེ་ཚོ་བཙལ་ནས་སློབ་གྲྭར་སྐྱེལ་བ་དང་། དེ་མིན་ཁོམ་གསེང་བཙལ་ནས་སྤྱི་བདེ་མངག་གཏོང་ཁང་གི་ཉེན་རྟོག་པ་དང་ཉེན་ཟོན་སྐོར་ཞིབ་བྱས་ནས་ཟོག་རྐུ་མཁན་འཛིན་པ་རེད། ཁོང་ཉིན་མཚན་མེད་པར་ལས་ཀ་ལས་པ་དང་། ཉལ་ཆས་རྒྱུན་དུ་རླངས་འཁོར་ཐོག་ཏུ་འཇོག་པ། འབྲས་ཐེངས་རེ་བཙོས་ན་ཉིན་གསུམ་རེ་ཟ་བ། རང་ཁྱིམ་བརྒྱུད་ནས་འགྲོ་དུས་ཁོས་སྐར་མ་ཁ་ཤས་ཀྱིས་རང་གི་བུ་དང་སྐད་ཆ་ཁ་ཤས་མ་གཏོགས་བཤད་ཁོམ་མེད་པ།
        གྲོང་བགྲོད་གཞུང་ལམ་བསྐྲུན་དུས་ཡུལ་མི་མང་པོའི་གྱང་བཤིག་དགོས་པ། གྲོང་སྡེའི་འཕེལ་རྒྱས་ཀྱི་ཆེད་དུ་ཁོས་ཡང་ནས་ཡང་དུ་ཡུལ་མིར་སྲིད་ཇུས་དྲིལ་སྒྲོག་དང་བསམ་བློའི་སློབ་གསོ་གཏོང་དུ་འགྲོ་བ། དུས་ཁ་ཤས་སུ་ཡུལ་མི་ཁ་ཤས་ལ་སྐྱབས་སྐྱབས་ཞུ་ཞུ་ཟེར་དགོས་པ་དང་ཆོས་དད་མང་ཚོགས་ལ་ཆོས་ལུགས་ཐོག་ནས་བསམ་བློའི་ལས་ཀ་བྱེད་པ་སོགས་ཀྱིས་གྲོང་བགྲོད་གཞུང་ལམ་ལས་རྒྱུའི་ཐད་ཀྱི་གནད་དོན་མང་པོ་ཐག་བཅད་པ་རེད། འགྱུར་མེད་རྡོ་རྗེ་ལ་ལས་དོན་ཉིན་ཐོ་ཞིག་ཡོད་ཅིང་། དེའི་ཐོག་ཏུ་མིས་བལྟས་ན་དོན་ཆུང་གང་མང་བཀོད་ཡོད་པ་སྟེ། ཟླ་བ3པའི་ཚེས་གཅིག་ཉིན། དེ་རིང་གི་དྲན་ཐོ། དབང་མོ་ཁྱིམ་གྱི་བུ་ཕྲུག་ལ་ཞིན་ཧྭ་ཚིག་མཛོད་ཅིག་དགོས་པ། ཟླ་བ4པའི་ཚེས11ཉིན། དེ་རིང་གི་དྲནཐོ། རིན་འཛིན་ཁྱིམ་གྱི་སྨན་བཅོས་ཉེན་འགོག་དེབ་ཀྱི་མིང་དེ་རྫོང་གི་ཐེམ་ཐོ་གཞུང་ལས་ཁང་ལ་ཞིབ་བཤེར་ཡང་བསྐྱར་བྱེད་དུ་འགྲོ་དགོས་པ་སོགས། འགྱུར་མེད་རྡོ་རྗེ་ལ་ཁྲག་ཤེད་མཐོ་བའི་ནད་ཡོད་པ། རྒྱུན་དུ་མགོ་ན་བ་དང་གཉིད་མི་ཁུག་པ། ཁོའི་ཤུག་ལྕོག་ནང་ཁྲག་ཤེད་མཐོ་བའི་ནད་བཅོས་སའི་སྨན་ཡིན་པ།
        ཐེག་ཚད་ལས་བརྒལ་གྱི་ལས་ཀ་བྱེད་རུང་ཁོང་གིས་དཀའ་མོ་རེད་ཅེས་སྐད་ཤོར་མ་མྱོང་ཞིང་། ཡིན་ཡང་ཉིན་ཞིག་ལ་ཁོས་དེ་རིང་མགོ་ན་ལུགས་འདྲ་གི་མི་འདུག་ཟེར་ནས་ཞོགས་པའི་ཆུ་ཚོད8པ་ནས་དགོང་མོའི་ཆུ་ཚོད12ལྷག་ལས་ཀ་བྱས་རྗེས་རང་གི་རླངས་འཁོར་ནང་ཉལ་བ་དང་། ཕྱི་ཉིན་ཞོགས་པར་མི་ཚོས་ཁོ་མཐོང་དུས་ཁོའི་ལག་པ་གྲང་མོ་གྲང་རྐྱང་དུ་གྱུར་ལ། 2012ལོའི་ཟླ5ཚེས19ཉིན་འགྱུར་མེད་རྡོ་རྗེ་གནམ་གྲིབ་ཕོག་ནས་འཆི་སོང་བ་རེད། ཤང་ཀྲང་ནད་ལས་འདས་པའི་གནས་ཚུལ་གོ་རྗེས་འགྱུར་མེད་རྡོ་རྗེས་ལས་ཀ་སྒྲུབ་མྱོང་བའི་ཤང་ནང་གི་མི་སེར་རྣམས་ཚོ་དང་ཚོ་བསྒྲིགས་ནས་ཁོའི་ཁྱིམ་དུ་ལྟ་བར་འགྲོ་བ་དང་ཁ་ཤས་ངུ་བཞིན་ཡོད་པ་རེད། ཉིན་དེའི་དགོང་མོར་དབའ་ཞབས་ཤང་གི་མི་སེར་ཚོས་ཁོ་ཚོར་དོན་དངོས་སྒྲུབ་མཁན་གྱི་ཤང་ཀྲང་ལ་མཆོད་མེ་སྤར་ཞིང་། མི་སེར་གྱིས་ཁོ་ལས་བྱེད་པ་ཡག་པོ་ཡིན་མིན་ང་ཚོས་མི་ཤེས་མོད། ཁོ་མི་ཡག་པོ་ཞིག་ཡིན་པས་ང་ཚོའི་སེམས་ནང་གི་ལྷ་ཡིན་ཟེར།