གླིང་སྒྲུང་ནང་གི་བུད་མེད་ཀྱི་སྣང་བརྙན་དང་ཐོབ་ཐང་རྒྱན་གོས་སྐོར་རགས་ཙམ་གླེང་བ།

　　གཉིས་པ། བུད་མེད་ཀྱི་ཐོབ་ཐང་སྐོར་གླེང་བ།
　　སྤྱིར་མི་རིགས་གང་ཡིན་རུང་སྔོན་ཆད་བུད་མེད་ཀྱི་གོ་སའི་ཐོབ་ཐང་ཧ་ཅང་དམའ་བ་གནའ་བོའི་ལོ་རྒྱུས་དང་ཡིག་ཚང་ལས་ཀུན་གྱིས་ཤེས་གསལ་ལྟར། ལྷག་པར་དུ་ཁ་བ་རི་བོའི་ཁྲོད་ཀྱི་བོད་མི་རིགས་རང་ལ་མཚོན་ནའང་བུད་མེད་ཀྱི་ཐོབ་ཐང་དང་དབང་ཆ་མི་རིགས་གཞན་ལས་དེ་བས་དམའ་བའི་སྣང་བ་ཞིག་སྟེར་བ་སྟེ། བོད་སྲིད་པའི་ཁ་དཔེར་ཡང་བུ་མོ་དང་བོང་བུས་སྐྱིད་མི་ཐེག  ཁྱི་བུ་མོ་གཉིས་ལ་བློ་གཏད་མེད། མ་སྐྱིད་ས་ནས་མི་ཆགས། སྐྲ་མདུད་ས་ནས་མི་འདུག  ཟེར་བ་ལྟ་བུ་སོགས་ལས་ཀྱང་སྐབས་དེའི་བུད་མེད་ཀྱི་ཐོབ་ཐང་དང་དབང་ཆ་གསལ་བོར་མཚོན་ཡོད་མོད། འོན་ཀྱང་བོད་ཀྱི་ལོ་རྒྱུས་གར་སྟེགས་ལ་ཕྱི་མིག་ཐེངས་གཅིག་བལྟས་ཚེ། ལོ་རྒྱུས་གར་སྟེགས་སུ་གོ་ས་ངེས་ཅན་བཟུང་མྱོང་བའི་གདགས་ཁྲི་བཙན་པོའི་བཙུན་མོ་མ་མ་གྲོ་ཞ་སྐྱིད་བརླིང་མ་ལྟ་བུར་མཚོན་ན། ཏུན་ཧོང་གཏེར་ཡིག་ལས། དྲི་གུམ་བཙན་པོ་སྐུ་ཆུང་བའི་ཚེ་མཚན་ཇིར་གདགས་ཤེས། མ་མ་གྲོ་ཞ་སྐྱིད་བརླིང་མ་ལ་དྲིས་ན། མ་མའི་མཆིད་ནས། སྐྱི་བྲག་མར་བ་ནི་རྙིལ་ཏམ་མ་རྙིལ། དང་མ་འབྲི་སྤང་ནི་མྱེས་ཚིག་གམ་མ་ཚིག  མཚོ་དམ་བེ་དབར་མཚོ་ནི་སྐམས་སམ་མ་སྐམས་ཤེས་མཆི། བྲག་མ་རྙིལ། མཚོ་ཡང་མ་སྐམས། སྤང་ཡང་མྱེས་མ་ཚིག་ཅེས་བགྱི་སྣ། མ་མ་གྲོ་ཞ་མ། རྒས་ནས་རྣ་ལོག་པར་ཐོས་ཏེ། བྲག་ཀྱང་རྙིལ། སྤང་ཡང་མྱེས་ཚིག་མཚོ་ཡང་སྐམས་ཤེས་ཐོས་ནས། འོན་ཏང་ཆུ་དགུའམ་སྲི་དགུམ་གྱིས། དྲི་གུམ་བཙན་པོར་མཚན་ཐོགས་ཤིག་ཅེས་འཁོད་པར་གཞིགས་ན། མ་མ་གྲོ་ཞ་སྐྱིད་བརླིང་མ་ནི་བོད་ཀྱི་གདོད་མའི་ཆོས་ལུགས་སུ་མཚན་མཁན་གྱི་མིང་བཟུང་བར་མ་ཟད། བོད་ཀྱི་ལོ་རྒྱུས་སྟེང་དུ་བུད་མེད་ཀྱི་ཐོབ་ཐང་ངེས་ཅན་འཛིན་པའི་བུད་མེད་འཇོན་ཐང་ཅན་ཞིག་གོ །དེ་བཞིན་དུ་གླུ་སྲིང་མེར་ལྕམ་དང་རྒྱ་བཟའ་ཁྲི་མ་ལོད་སོགས་ལྟ་བུའི་བུད་མེད་སྐོར་ཞིག་གིས་བོད་ཀྱི་རྒྱལ་སྲིད་དར་རྒྱས་ཡོང་བའི་ཆེད་དུ་རང་ནུས་ཡོད་རྒུ་བཏོན་ཏེ། ལོ་རྒྱུས་ཀྱི་གར་སྟེགས་སུ་རྒྱུ་སྐར་ཁྲོད་ཀྱི་ཟླ་བ་བཞིན་བུད་པ་དེས་ཀྱང་བོད་ཀྱི་བུད་མེད་ལ་ཐོབ་ཐང་གི་དབང་ཆ་ཡོད་པ་ར་སྤྲོད་བྱུང་ངོ་། །
　　དེའི་མཚུངས་སུ་དཔའ་བོའི་བྱུང་རབས་ཆེན་མོ་གླིང་སྒྲུང་ལས་ཀྱང་བུད་མེད་རྣམས་ལ་ཐོབ་ཐང་གི་དབང་ཆ་ཡོད་པ་མངོན་གསལ་གྱིས་མཐོང་ཐུབ་ཅིང་། དྲང་ཕྱོགས་དང་ལྡོག་ཕྱོགས་གཉིས་ཀ་གང་རུང་གི་སྒོ་ནས་བུད་མེད་ཀྱི་ཐོབ་ཐང་གང་མང་ཞིག་མིག་གི་དགའ་སྟོན་དུ་གསལ་བོར་བཤམས་འདུག  དཔེར་ན། 《དམྱལ་གླིང་མུན་པ་རང་གསལ》དུ། ནག་པོ་བདུད་ཀྱི་ས་ཆ་ལ། །དགྲ་ཡོད་ན་མདུང་མོ་མཉམ་འཛིན་གྱིས། །ཕྱི་དགྲ་བོའི་གདོང་ལ་མཉམ་རྒྱུག་བྱོས། །ནང་སྡེ་བའི་སྐྱིད་སྡུག་གཅིག་ནི་གྱིས། །མཐོ་མི་ཆེན་སྡེ་ལ་བྱམས་སྐྱོང་གྱིས། །སྡེ་གཉོམ་ཆུང་སྐྱོང་གི་ཕ་མ་མཛོད། །སྡེ་བཙན་པོ་རྣམས་ཀྱི་གཉའ་ནས་ནོན། །ནང་སྡེ་བ་ཁ་མགོ་ཡོད་པར་གྱིས། །གླིང་གེ་སར་རྒྱལ་པོས་ཅི་གསུང་སྒྲུབས། །ཞེས་དང་། བདུད་ནག་པོའི་དཔོན་མོ་བྱེད་དུས་ཀྱི། །ཏོག་དང་ཐོབ་དང་ཐམ་ག་དང་། །དཔོན་གནས་ཁྲི་འཕང་མཐོན་པོ་དང་། །ཡུལ་སྡེ་འབངས་འཁོར་བྲན་དང་བཅས། །གོང་དཔོན་མོའི་ཆས་རྣམས་ཁྱེད་ལ་འབུལ། །མ་དཔའ་མོའི་རྣམ་ཤེས་ཁྱེད་ཀྱིས་མཁྱེན། །ཞེས་པ་སོགས་ལས་སྐྲ་ལན་བུ་ཅན་གྱི་བུད་མེད་ཞིག་གི་གོ་གནས་དང་ཐོབ་ཐང་གསལ་བོར་བསྟན་ཡོད། གླིང་རྗེ་གེ་སར་རྒྱལ་པོས་ཨ་སྟག་ལྷ་མོར་དེ་འདྲའི་དབང་ཆ་ཆེས་མཐོན་པོ་བྱིན་ཡོད་པ་དེས་བོད་རིགས་བུད་མེད་རྣམས་ཀྱི་རང་དབང་དང་ཐོབ་ཐང་ཕྱོགས་ལ་མཐུན་རྐྱེན་མི་ཉུང་བ་ཞིག་བསྐྲུན་འདུག་པ་ཡང་གླིང་སྒྲུང་ནང་མངོན་གསལ་དུ་མཐོང་ཐུབ་པ་སྟེ་བུད་མེད་དང་སྐྱེས་པའི་ཆབ་སྲིད་ཀྱི་དབང་ཆ་གཅིག་མཚུངས་ཡིན་པ་ཡང་། དཔེར་ན། གླིང་གི་ལས་དམག་རྣམས་འདུ་རར་འདུས་ནས་སྲིད་དོན་བགྲོ་གླེང་བྱེད་པར་དཔའ་བོ་རྣམས་ཀྱི་རིམ་བཞིན་སྟག་གདན་གཟིག་གདན་བཅས་ཀྱི་གྲལ་ལ་འཁོད་པའི་དུས་ན། སེང་ལྕམ་འབྲུག་མོ་དང་མ་ཡུམ་འགོག་བཟའ། ཨ་སྟག་ལྷ་མོ། རྒྱ་བཟའ་ལྷ་སྐྱིད་སོགས་གླིང་གི་བུད་མེད་གྲགས་ཆེན་དག་ཀྱང་གྲལ་ལ་བཞུགས་ཡོད་པར་མ་ཟད། ད་དུང་གླིང་གི་སྤྱི་དོན་ཐད་ལ་བསམ་འཆར་དང་ལྟ་སྟངས་གསར་བ་འདོན་པའི་དབང་ཆའང་ཡོད་པ་ལྟ་བུའོ། །གཞན་ཡང《ཧོར་གླིང་གཡུལ་འགྱེད》ལས། ས་ཆ་མེད་ཧོར་གྱི་ས་ཆ་ནས། །དགྲ་ཐུལ་བའི་བར་དུ་འདུག་རྒྱུ་ཡིན། །སེམས་སྐྱིད་རོགས་མགར་བཟའ་ཁྱོད་རང་ཡིན། །དགྲ་འདུལ་ཚེ་བློ་ཡ་གྲོས་རོགས་དགོས། །བཏུལ་ཚར་དུས་ཁྲ་མོ་གླིང་ལ་འགྲོ། །སྨན་འབྲུག་མོ་དེ་དང་ཁྱད་པར་མེད། །མཁར་སེང་འབྲུག་སྟག་རྩེ་ནང་རྫོང་གྱིས། །སྡེ་ཧོར་གླིང་གཉིས་ཀྱི་དཔོན་མོ་གྱིས། །མཛོད་ཁྲ་མོའི་སྒོ་ཡི་ལྡེ་མིག་ཟུངས། །ངས་ཚེ་མཐའ་མགར་བཟའ་མི་སྐྱུར་ངེས། །ཞེས་པ་ལྟ་བུར་བལྟས་ནའང་བུད་མེད་ཀྱི་ཐོབ་ཐང་དང་དབང་ཆར་རྒྱུས་ལོན་རགས་ཙམ་བྱེད་ཐུབ། གླིང་སྒྲུང་ནང་དུ་དབང་ཆ་ཆེས་མཐོ་བ་ནི་གེ་སར་ལས་གཞན། ད་དུང་སྤྱི་དཔོན་དང་མ་བཞི་དཔོན་པོ་ཁྲོ་ཐུང་། སྟག་རོང་ཨ་ནུ་གཟིག་འཕེན། ཡང་རྟུལ་དམ་པའི་མི་བདུན། ཞེ་རྟུལ་ཁྲ་གླག་སྤྱང་གསུམ་ལྟ་བུའི་བློན་པོ་མིང་ཆེན་དང་གྲགས་ཆེན་མང་ན་ཡང་། དོན་གལ་ལ་ཐུག་དུས་དོ་དམ་ཚང་མ་སེང་ལྕམ་འབྲུག་མོར་བཅོལ་བཞིན་ཡོད་པ་གེ་སར་གྱི་གླུ་ལས་མཚོན་ཐུབ་པ་སྟེ། བདུད་ཡ་མེད་ཀླུ་བཙན་རྒོད་པོ་དེ། །ལྷོ་འཛམ་བུ་གླིང་གི་སྤྱི་དགྲ་རེད། །དབུས་གླིང་དཀར་སྟོད་ཀྱི་སྒེར་དགྲ་རེད། །འཆོར་མི་ཉན་འདུལ་བའི་དུས་བབས་གསུངས། །ང་དེ་ཕྱིར་བདུད་རྒན་འདུལ་དུ་འགྲོ། །བདུད་ནོར་གླིང་ལ་འདྲེན་པར་འགྲོ། །སྨན་མེ་བཟའ་ཨ་འབུམ་ལེན་དུ་འགྲོ། །རྩིས་ལེན་རྩིས་སྤྲོད་དེ་རིང་བྱེད། ། ཆུང་མ་འབྲུག་མོས་རྩིས་ལེན་མཛོད། །ཅེས་གླུ་དེ་ལྟར་བླངས་རྗེས་ཕོ་བྲང་ནང་གི་རིན་ཆེན་ཡོད་དོ་ཅོག་རྩིས་སྤྲོད་བརྒྱབ་པ་དང་དུས་མཚུངས་སུ་ཁོང་ཉིད་ཆུང་དུས་ཀྱི་འཁྲབ་རྨོག་འཁོར་གསུམ་ཡང་གནང་སྟེ་བདུད་ནག་པོར་ཐོད་མདའ་སྤྲོད་པར་ཕེབས་སོ། །ཞེས་པ་ལྟར་རོ། །
　　གེ་སར་བདུད་ལ་ཕེབས་ཤུལ་དུ་ཨ་ཆེན་ཧོར་གྱིས་གླིང་ལ་བཙན་འཛུལ་བྱས་ཏེ་ཇ་མཁར་རྨང་ནས་བཤིག་པ་དང་སེང་ལྕམ་འབྲུག་མོ་ཕྲོགས། ཧོར་གླིང་གཉིས་ཀྱི་བར་ལ་ཡ་ང་བའི་མི་ཤི་རྟ་འགྱེལ་གྱི་གཡུལ་འཁྲུག་ཆེན་པོ་བྱུང་སྐབས། སེང་ལྕམ་འབྲུག་མོས་རང་ཡུལ་བསྐྱར་འཛུགས་དང་ནང་ཕུ་ནུའི་ཤ་ཁོན་གྱི་ཆེད་དུ། གེ་སར་ལ་སྔ་ཕྱིར་ཐེངས་གསུམ་ལ་འཕྲིན་བཏང་བ་དེས་བོད་རིགས་བུད་མེད་ཞིག་གི་འགྱུར་མེད་ཀྱི་སྙིང་སྟོབས་བླ་ན་མེད་པ་མཚོན་འདུག  སྤྱིར་བོད་ཀྱི་འགྲོ་ལུགས་དང་བཤད་རྒྱུན་ལ་ཕ་ཤུལ་བུ་ཡིས་འཛིན་པ་མ་གཏོགས་བུ་མོས་མི་འཛིན་ཟེར་མོད། འོན་ཀྱང་གླིང་སྒྲུང་དུ་ཕའི་རུས་དང་མའི་རུས་འདོགས་པའི་འདྲ་མཉམ་དབང་ཆའང་ཧ་ཅང་རྒྱུན་འབྱམས་སུ་གྱུར་ཡོད། དཔེར་ན། སྐྱ་ལོ་སྟོན་པ་རྒྱལ་མཚན་དང་སྔོ་ལོ་གྲོ་ལོ་སོགས་ཀྱི་རུས་ཕའི་རུས་དང་། རོང་ཚ་ཁྲ་རྒན་དང་འགོག་བཟའ་ཇོ་རུ་གཉིས་ཀྱི་སྔོན་དུ་ཕའི་རུས་མིན་པར་མ་ཡི་རུས་སྦྱར་ཡོད། ད་དུང་གླིང་སྟོད་སྨད་བར་གསུམ་གྱི་ཚོ་ཆེན་གྱི་མིང་དེ་ཡང་གླིང་གི་ལྡོང་ཆོས་འཕན་ནག་པོས་ཇ་མ་གསུམ་བླངས་པ་དེ་ལས། རིམ་བཞིན་སྟོད་གླིང་གསེར་བ་མཆེད་བརྒྱད། བར་གླིང་འོམ་བུ་ཚོ་དྲུག  སྨད་གླིང་རྨུ་སྤྱང་སྡེ་བཞི་ཞེས་ཨ་མ་གསུམ་གྱི་རུས་ལས་མཆེད་པར་གྲགས་སོ། །
　　སྤྱིར་བཏང་དུ་བོད་རིགས་དམངས་ཁྲོད་དུ་བུད་མེད་རྣམས་སྐྱེས་པའི་གོང་དུ་བསྡད་མི་ཆོག་པ་དང་། ལྷ་ཁང་དང་བཙན་ཁང་སོགས་སུ་རང་གར་རྒྱུ་མི་ཆོག་པ།  ལྷ་རྩེད་དང་ལྷ་བསང་གཏོང་སྐབས་བུད་མེད་རྣམས་ཡོང་མི་ཆོག་པ་བཅས་ནི་ཆོས་ལུགས་ཀྱི་ཤུགས་རྐྱེན་འོག་ཕོ་མོ་གཉིས་འདྲ་མཉམ་མིན་པའོ། །
　　གླིང་སྒྲུང་ལས་ཕོ་མོའི་ཁྱད་པར་དང་དབྱེ་བ་དགར་རྒྱུ་མེད་པར་བརྟེན། དེ་ནི་གེ་སར་བདུད་ལས་ཕེབས་ཁ་ལྟ་བུར་མཚོན་ནའང་གཡོག་མ་ལེ་དགོ་དགོ་མ་སོང་ནས་བསང་དུད་ནམ་མཁའ་བཀང་འདྲ་ཞིག་ཕུལ་ཏེ་ལྷ་ལ་སྐྱབས་འཇུག་བྱས་ཚུལ་གྱི་རྣམ་པའི་སྟེང་ནས་ཀྱང་ཤེས་ཐུབ་བོ། །
　　གསུམ་པ། བུད་མེད་ཀྱི་རྒྱན་གོས་སྐོར་གླེང་བ།
　　དེ་ཡང་ང་ཚོ་བོད་མི་རིགས་ལ་གནའ་སྔ་མོའི་དུས་ནས་བཟུང་གོས་སུ་ཤིང་ལོ་གྱོན་པའི་དུས་སྐབས་བྱུང་བ་དང་། རྗེས་སུ་རིམ་གྱིས་གནམ་གཤིས་ཀྱི་དྲོ་གྲང་ལ་འགྱུར་ལྡོག་བྱུང་བའི་དབང་གིས་རི་དྭགས་ཀྱི་པགས་རིགས་གྱོན་པའི་སྲོལ་རིམ་གྱིས་དར། དེང་ཐོག་མི་རྣམས་ཀྱིས་དམར་གྱོན་དང་རིམ་གྱིས་ལག་མཉེད་བྱས་ནས་གྱོན་ཏེ་པགས་རིགས་འཚེམ་བཟོ་བྱེད་སྟངས་སོགས་ལའང་མདོ་དབུས་ཁམས་གསུམ་དུ་དབྱེ་བ་མང་དུ་བྱུང་། དེ་དང་མཚུངས་པར་གླིང་སྒྲུང་དུ་བསྟན་པའི་རྒྱན་གོས་ལའང་རིགས་དང་རྣམ་གྲངས་གང་གི་ཆ་ནས་ཀྱང་ཕུན་སུམ་ཚོགས་པོ་ཞིག་འདུག་སྟེ། སྐྱེས་པའི་རྒྱན་གོས། བུད་མེད་ཀྱི་རྒྱན་གོས། བྱིས་པའི་རྒྱན་གོས། བགྲེས་པོའི་རྒྱན་གོས། ཆོས་ལུགས་པའི་རྒྱན་གོས་སོགས་དང་། དུས་ཚིགས་ཀྱི་འགྱུར་ལྡོག་ལ་བརྟེན་ནས་དབྱར་ཁར་རས་ལྭ་དང་དགུན་ཁར་རི་དྭགས་པགས་རིགས་གྱོན་པའི་སྲོལ་ཡོད་ཅིང་། སྤྱོད་ལུགས་ཀྱི་དབང་དུ་བྱས་ནའང་རྒྱུན་སྤྱོད་གྱོན་གོས་དང་གཟབ་འཆོར་རྒྱན་གོས་གཉིས་ཡོད་དོ། །
　　གླིང་སྒྲུང་ནང་བུད་མེད་ཀྱི་སྣང་བརྙན་ཞིབ་འབྲི་བགྱིས་པ་ཆེས་མང་ལ་། སྣང་བརྙན་རེ་རེའི་ཁྲོད་དུ་རྒྱན་གོས་ཀྱི་སྐོར་དེ་བས་མངོན་གསལ་དོད་པོ་ཡིན། དེ་དག་ཚང་མ་མཛེས་དཔྱོད་རིག་པའི་ངོས་ཐད་ནས་བརྗོད་ན་སྒྱུ་རྩལ་གྱི་རིན་ཐང་ཚད་ངེས་ཅན་ཞིག་ལ་བསླེབས་འདུག་ཅེས་ཆེད་མཁས་དག་གིས་གསུངས། གླིང་སྒྲུང་དུ་བུད་མེད་རྣམས་ཀྱི་ལུས་ལ་ཚར་སློག་དང་། དར་གོས། སྣམ་ཕྲུག་སོགས་དང་། རྐང་ལ་ཀོ་ལྷམ། རས་ལྷམ་དང་། ཕྱིང་ལྷམ། རྒྱན་ཆ་ལ་གཡུ་བྱུར། གསེར་མེན་མུ་ཏིག་སོགས་ཀྱིས་གྲུབ་པའི་སྐེ་རྒྱན་དང་རྣ་རྒྱན། ཐོང་ཁའི་དངུལ་གྱི་གའུ། གསེར་དངུལ་ཟངས་གསུམ་གྱི་མཛུབ་དཀྲིས། གདུ་བུ། དངུལ་གྱི་གློ་ཟུར། དངུལ་གྱི་བཞོ་ཟུང་སོགས་ཀྱིས་མཛེས་པར་བྱེད་པ་ཡིན་ཏེ། དཔེར་ན། 《རྨ་ཤེལ་བྲག》ཏུ། གླིང་གི་དཔོན་མོ་དེ་མགོ་རྒྱན་རབ་ནོར་བུ་སྣ་ཚོགས། ལུས་གོས་རབ་ཟ་འོག་དགུ་བརྩེགས། སྐེད་ཆིངས་འཇའ་ཚོན་རང་ཤར། སེར་པོ་སྤོས་ཤེལ་དགུ་བསྒྲིགས། ཁྲ་བོ་གཟི་བྱུར་དགུ་བསྒྲིགས། དམར་པོ་བྱུར་མགུལ་དགུ་བསྒྲིགས། སྔོན་པོ་གཡུ་མགུལ་དགུ་བསྒྲིགས། གསེར་དངུལ་འགུག་ཡ་གྲ་བསྒྲིགས། གསེར་ཆབ་ནོར་བུའི་ཕྲ་ཚོམ། གསེར་རྣ་མུ་ཏིག་བཏགས་ལུང་། གསེར་གྭ་རིན་ཆེན་དགུ་བསྒྲིགས། གློ་ཟུར་ནོར་འཛིན་དགུ་བསྒྲིགས། མུ་ཏིག་ཟར་ལོ་རང་འགྲིགས། དར་ལྷམ་འཇའ་རིས་སུམ་བརྩེགས། ལྷམ་སྒྲོག་ཆུ་མིག་དགུ་བསྒྲིགས་སོགས་རྒྱན་རབ་ཕུན་སུམ་ཚོགས་པས་སྤྲས་ཏེ་མཛེས་དགུ་ལུས་ལ་ཚངས་ཞེས་པ་དང་། 《ཐོག་གླིང》དུ། སྒ་སྐྱ་ལོ་སེང་ལྕམ་འབྲུག་མོ་དེས། རྒྱན་རབ་བཅོ་བརྒྱད་སྐུ་ལ་གསོལ། རྒྱན་གོས་ལུག་ཆུང་ཚ་རུ་ལ། ཕོ་སྲམ་བརྒྱ་ཡིས་སྒང་བཟོ་བྱས། མོ་སྲམ་བརྒྱ་ཡིས་གཤོང་བཟོ་བྱས། སྲམ་ཕྲུག་བརྒྱ་ཡིས་སྲུབས་ཟིན་བྱས། གཟིག་མི་གཟན་པགས་ཁ་ཤན་བརྒྱན། དོམ་ཁྲག་འཐུང་པགས་པས་མཐའ་རྒྱན་བྱས། བཀབ་ན་ཤོག་དྲུག་ཁེབས་པ་བྱུང་། གྱོན་ན་བྱང་རླུང་ལྷགས་པ་ཁོགས། སྐེད་འཆིང་དུང་གི་ཆབ་ཁྲ་ལ། རྒྱ་བྱུར་དཀྲུག་མས་ཕྲ་རྒྱན་བརྒྱབ། དར་གོས་མདངས་ལྡན་མཛེས་རྒྱན་གྱིས་ཞེས་འཁོད་ཡོད་པ་ལྟ་བུ་ལས་མདོ་དབུས་ཁམས་གསུམ་གྱི་རྒྱན་གོས་ལ་ཁྱད་ཆོས་འབུར་དུ་ཐོན་པའི་སྒྱུ་རྩལ་རང་བཞིན་གྱི་བཟོ་ལུགས་སྣ་ཚོགས་ཤིག་བྱུང་ཡོད་པ་མཚོན་ལ། དེ་ནི་བོད་རང་གི་ཐུན་མོང་མ་ཡིན་པའི་སྒྱུ་རྩལ་རང་བཞིན་དང་མཛེས་དཔྱོད་ཀྱི་རིན་ཐང་ལྡན་པའི་དམངས་སྲོལ་རིག་གནས་ཀྱི་མ་ལག་ཅིག་ཡིན། རི་དྭགས་ཀྱི་པགས་རིགས་གཙོ་བྱེད་པའི་རྒྱན་གོས་ནི་སྟག་ལྤགས། གཟིག་ལྤགས། དོམ་ལྤགས། སྲམ། ཝ་སོགས་ཡིན་ལ། གླིང་སྒྲུང་ལས་བྱུང་བའི་རྒྱན་གོས་ཀྱི་རིགས་ཚང་མ་རྩ་ཆེན་ཡིན་དོན་ཡང་དེ་དག་གྲུབ་བྱེད་ཀྱི་རྒྱུ་ཚང་མ་གཞལ་དཀའ་བའི་རིན་ཆེན་ཁོ་ན་ཡིན་པའི་རྐྱེན་གྱིས་ཡིན་ལ། དེ་ལས་ང་ཚོ་བོད་པ་རྣམས་ལ་གནའ་སྔ་མོ་ནས་རང་བྱུང་གི་མཛེས་སྡུག་ལ་དགའ་བའི་སེམས་འདུན་དྲག་པོ་མཚོན་པའང་ཤེས་ཐུབ་བོ། །