༄༅།།ཡུལ་ཤུལ་དུ་ལྷུང་བའི“སྐར་རྡོ”ཡི་གནས་ཚུལ་གསར་བ།

     2020ལོའི་ཟླ་12པའི་ཚེས་23ཉིན། མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཁུལ་གྱི་ནང་ཆེན་རྫོང་ཁོངས་སུ“སྐར་རྡོའི་མེ་ཕུང”ཞིག་ལྷུང་བ་ལ། སྤྱི་ཚོགས་ཐོག་ཏུ་དོ་སྣང་ཆེན་པོ་བྱུང་བ་རེད།        སྐར་རྡོ་མར་ལྷུང་དུས་ཀྱི་འོད་ཆེ་བ་དང་སྒྲ་ཆེན་པོ་གྲགས་པ། མཁའ་དབྱིངས་དང་ས་ངོས་ནས་ཡོམ་ཚོར་དྲག་པོ་བྱུང་བ་སོགས་ལ་གཞིགས་ན། སྐར་རྡོ་ཧ་ཅང་ཆེན་པོ་ཞིག་ཡིན་པ་མངོན་སུམ་རེད། ཡིན་ནའང་། ཆེ་བའི་ཚད་ཅི་འདྲ་ཞིག་ཡིན་ནམ་ཞེ་ན། ཀྲུང་གོའི་ཚན་རིག་གླིང་གི་ས་གཤིས་དང་སའི་གོ་ལའི་དངོས་ལུགས་ཞིབ་འཇུག་སུའོ་ཡི་ཞིབ་འཇུག་པ་ལི་མིང་ཐའོ་(李明涛)སོགས་ཀྱིས་ཚན་རིག་གི་དབྱེ་ཞིབ་བྱས་ནས་ལན་གསལ་པོ་ཞིག་བཏབ་ཡོད་པ་རེད།        ཡུལ་ཤུལ་དུ་སྐར་རྡོ་ལྷུང་བའི་གནས་ཚུལ་བྱུང་རྗེས་ཀྱི་ཉིན་གཉིས་པར། ཨ་རིའི་འཇིག་རྟེན་འཕུར་སྐྱོད་ཅུའུ་(NASA)ཡི་སའི་གོ་ལར་ཉེ་བའི་གནམ་རིག་ཞིབ་འཇུག་ལྟེ་གནས་ཀྱིས་སྐར་རྡོ་འདི་དང་འབྲེལ་བའི་རྟོག་ཞིབ་གཞི་གྲངས་ཡོངས་བསྒྲགས་བྱས་པ་རེད། སྐར་རྡོ་འདི་སའི་གོ་ལའི་རླུང་ཁམས་ཆེན་མོ་ལ་རྡེབ་དུས་ཀྱི་མྱུར་ཚད་ནི་སྐར་ཆ་རེ་ལ་སྤྱི་ལེ་13.5ཙམ་ཡིན་པ་དང་ཁ་ཕྱོགས་ནི་བྱང་ནས་ལྷོ་ལ་གཏད་ཡོད་ནའང་། སའི་གོ་ལ་དང་སྣོལ་ཟུར་ཏུའུ་5ལས་མེད་པ་རེད། སྐར་རྡོ་འདི་རླུང་ཁམས་ཆེན་མོའི་ནང་ལ་ཐོན་རྗེས། སའི་གོ་ལའི་འཐེན་ཤུགས་ཀྱི་དབང་གིས་མྱུར་ཚད་ཇེ་དལ་དུ་གྱུར་ནས་མར་ལྷུང་བའི་ཚུལ་དུ་གྱུར་པ་རེད།       སྐར་རྡོ་འདི་ཡི་ཚངས་ཐིག་ལ་སྨི་6.5ཡོད་པ་དང་། བོངས་ཚད་ཆེ་ཞིང་ལྗིད་ཚད་ལ་ཏུན་430འདུག་ཅིང་། མཐུག་ཚད་ནི་སྨི་དཔངས་གྲུ་བཞི་མ་གཅིག་ལ་ཏུན་3ཡས་མས་ཡོད་པ་རེད།
      མཚོ་སྔོན་ཡུལ་ཤུལ་གྱི་སྐར་རྡོ་ལྷུང་བའི་གནས་ཚུལ་འདི་ནི་སྨི་དཔངས་གྲུ་བཞི་མ་172ཡོད་པའི་ཤེལ་རིལ་ཞིག་གམ་ཡང་ན་སྨི་དཔངས་གྲུ་བཞི་མ་159ཙམ་གྱི་ཆེ་ཆུང་ཡོད་པའི་ཧ་ཡང་རིལ་པོ་ཞིག་སྐར་ཆ་རེ་ལ་སྤྱི་ལེ་13.5ཙམ་ལ་སྐྱོད་ཐུབ་པའི་མྱུར་ཚད་ལས་མཁའ་དབྱིངས་ནས་མར་ལྷུང་བ་ཞིག་དང་འདྲ་ལ། དེ་ལས་ཐོན་པའི་ནུས་ཚད་ནི་ཉི་ཧོང་རྒྱལ་ཁབ་ཀྱི་ཀོང་ཏའོ་གྲོང་ཁྱེར་དུ་རྡུལ་ཕྲན་འབར་མདེལ་འབར་གས་བྱུང་བ་ལས་ཐོན་པའི་ནུས་ཚད་ཀྱི་73%ཙམ་ཡོད་པ་རེད།         དགའ་འོས་པ་ཞིག་ལ། སྐར་རྡོའི་ནུས་ཚད་མང་ཤོས་མཁའ་དབྱིངས་ནས་ཕྱིར་བཏོན་པ་དང་། ས་ངོས་ལ་ལྷུང་དུས་སྔར་བཞིན་ནུས་ཚད་ཆེན་པོ་ལྡན་ནའང་། ལྷུང་ཡུལ་ནི་མདོ་དབུས་མཐོ་སྒང་གི་ཤར་བྱང་རྒྱུད་ཀྱི་ས་བབ་མཐོ་བའི་མི་མེད་ཁུལ་ཡིན་སྟབས། གནོད་འཚེ་སོགས་ཅི་ཡང་བྱུང་མེད་པ་རེད།