༄༅།།མཚོ་སྔོན་པོའི་འགྲམ་གྱི་ན་ཆུང་བུ་མོའི་རྐང་གྲུག་རུ་ཁག

      མཚོ་སྔོན་པོ་མི་རིགས་བཅའ་སྡོད་སློབ་གྲྭ་ནི་མཚོ་སྔོན་པོའི་ལྷོ་རྒྱུད་ཀྱི་གཅིག་ལྔ་གཅིག་ན་ཡོད་པའི་གུང་ཧོ་རྫོང་གི་ལོ་དགུ་མུ་གཅིག་ཅན་གྱི་མི་རིགས་བཅའ་སྡོད་སློབ་གྲྭ་ཞིག་ཡིན། སློབ་གྲྭ་འདིས་རྒྱུན་ལྡན་གྱི་སློབ་གསོའི་འགན་འཁྲི་ཡོངས་སུ་རྫོགས་པ་ལེགས་འགྲུབ་བྱེད་པའི་རྨང་གཞིའི་ཐོག གཞི་རིམ་གྱི་ལུས་རྩལ་སློབ་གསོའི་འཕེལ་རྒྱས་ལ་གསོན་ཤུགས་ཆེན་པོ་མེད་པ་དང་། ལྷག་པར་བུ་མོའི་ལུས་རྩལ་སློབ་གསོ་ལ་གྲུབ་འབྲས་མི་ལེགས་པའི་དངོས་ཡོད་གནས་ཚུལ་ལ་དམིགས་ནས།གཟེབ་གྲུག་དང་རྐང་གྲུག་གཙོ་བྱས་པའི་འབྲེལ་ཡོད་ལུས་རྩལ་གྱི་དགའ་མོས་ཚོ་ཆུང་དང་རུ་ཁག་མང་པོ་བཙུགས་ནས། བུ་མོའི་ལུས་རྩལ་སློབ་གསོའི་འཕེལ་རྒྱས་ལ་སྐུལ་འདེད་བཏང་བས་གྲུབ་འབྲས་ཀྱང་མི་དམན་པ་བླངས་ཡོད།       ཉིས་སྟོང་བཅོ་ལྔ་ལོར། སློབ་རའི་བུ་མོའི་ལུས་རྩལ་སློབ་གསོའི་འཕེལ་རྒྱས་ལ་སྐུལ་འདེད་གཏོང་བའི་དགོས་མཁོ་དང་། དགེ་སློབ་མང་པོའི་རེ་འདུན་ལྟར་དུ།  མཚོ་སྔོན་པོ་མི་རིགས་བཅའ་སྡོད་སློབ་གྲྭའི་བུ་མོའི་རྐང་གྲུག་རུ་ཁག་ཐོག་མར་བཙུགས། ད་ལྟ་བུ་མོའི་རྐང་གྲུག་རུ་ཁག་འདི་ལ་ཁྱོན་བསྡོམས་རུ་མི་དྲུག་ཅུ་རེ་གཅིག་ཡོད་ལ། དེའི་ཁྲོད་དམའ་འབྲིང་གི་བུ་མོའི་རྐང་གྲུག་རུ་ཁག་ལ་རུ་མི་ཉེར་དགུ་དང་། སློབ་ཆུང་གི་བུ་མོའི་རྐང་གྲུག་རུ་ཁག་ལ་རུ་མི་ཉེར་གཉིས། བྱིས་སྐྱོང་ཁང་གི་བུ་མོའི་རྐང་གྲུག་རུ་ཁག་ལ་རུ་མི་བཅུ་བཅས་ཡོད།       སྤྲོ་སྣང་ལྡན་པའི་ལུས་རྩལ་སློབ་གསོ་སྤེལ་ནས། དགེ་སློབ་ཡོངས་ཀྱི་ལུས་རྩལ་འགུལ་སྐྱོད་ནུས་པ་མཐོར་འདེགས་དང་། དམངས་ཡོངས་ཀྱི་ལུས་རྩལ་འགུལ་སྐྱོད་བྱང་ཚད་ཇེ་དྲག་ཏུ་གཏོང་བའི་སློབ་སྒྲུབ་འདུ་ཤེས་ཀྱི་མཛུབ་སྟོན་འོག སློབ་ཆུང་དང་སློབ་འབྲིང་སྐབས་ཀྱི་ན་ཆུང་བུ་མོའི་ལུས་རྩལ་སློབ་གསོ་ལ་རྨང་གཞི་བརྟན་པོ་ཞིག་དང་འཕེལ་རྒྱས་གསར་བ་ཞིག་འཚོལ་སྙེག་བཅས་ཀྱི་ཆེད་དུ། མཚོ་སྔོན་པོ་མི་རིགས་བཅའ་སྡོད་སློབ་གྲྭས་བུ་མོའི་རྐང་གྲུག་ལུས་རྩལ་གཙིགས་ཆེན་དུ་བཟུང་ནས། རེ་བ་མཐོན་པོ་དང་། ཚད་གཞི་མཐོན་པོ། དམིགས་འབེན་མཐོན་པོ་འཛིན་པའི་གསོ་སྐྱོང་རྩ་དོན་ལྟར། ལོ་ངོ་ལྔ་ཙམ་གྱི་རིང་ལ། རྐང་དྲུག་ལུས་རྩལ་གྱི་རྨང་གཞིའི་རྩལ་ནུས་ནས་མགོ་བརྩམས་ཏེ། གོ་རིམ་ཅན་དང་མ་ལག་ཅན་གྱི་སྦྱོང་བརྡར་རྒྱུན་འཁྱོངས་གནང་བ་ལ་བརྟེན་ནས། ད་ཆ་ན་ཆུང་བུ་མོའི་རྐང་གྲུག་རུ་ཁག་འདི་རྐང་གྲུག་གི་རྨང་གཞིའི་རྩལ་ནུས་དང་མཉམ་འབྲེལ་འགྲན་རྒོལ་གྱི་ནུས་པ་ངེས་ཅན་ལྡན་པའི་ན་ཆུང་བུ་མོའི་རུ་ཁག་ཅིག་ཏུ་གྱུར་ཡོད་པར་མ་ཟད། ཕྱོགས་སོ་སོའི་རྐང་གྲུག་འགྲན་སྡུར་གྱི་ཁྲོད་ནས་གྲུབ་འབྲས་ཀྱང་མི་དམན་པ་ཞིག་བླངས་ཡོད་པ་སྟེ། ཉིས་སྟོང་བཅོ་བརྒྱད་ལོའི་ཉི་འོད་ལུས་རྩལ་གྱི་མི་རིགས་མཐུན་སྒྲིལ་རྟགས་མའི་ཆུང་འབྲིང་སློབ་མའི་རྐང་གྲུག་འགྲན་སྡུར་ཁྲོད། སློབ་འབྲིང་བུ་མོའི་ཚན་སྐོར་གྱི་ཨང་གཉིས་པའི་བྱ་དགའ་བླངས། ཉིས་སྟོང་བཅུ་དགུ་ལོའིི་ཧྥོ་ཧྲན་གྲོང་ཁྱེར་གྱི་སྐབས་བཞི་བའི་རྨི་ལམ་རྟགས་མའི་ཆུང་འབྲིང་སློབ་མའི་རྐང་དྲུག་གདན་ཞུ་འགྲན་སྡུར་ཁྲོད་ཨང་དང་པོའི་བྱ་དགའ་བླངས། ཉིས་སྟོང་ཉི་ཤུ་ལོའི་མཚོ་སྔོན་ཞིང་ཆེན་གྱི་ག་རིམ་པའི་མཉམ་འགྲན་འགྲན་སྡུར་ཁྲོད། མཚོ་ལྷོ་འགྲན་ཁུལ་གྱི་བུ་མོའི་ཚན་སྐོར་ནས་ཨང་དང་པོའི་བྱ་དགའ་བླངས།